Ezequiel 14:1-23
14 Israelchö wakin dirigentikunam, puntäman shamuykur jamakayämurqan.+
2 Tsënam Teyta Jehoväqa parlapämarqan. Kënömi nimarqan:
3 “Nunapa tsurin, kë nunakunaqa manam dejayantsu melanëpaq santunkunata adorëta, y pëkunapa culpanrëkurmi wakin nunakunapis jutsata* rurëkäyan. Tsënö këkäyaptintsuraq, ¿imatapis tapuyämänanta permitishaq?+
4 Tsëmi pëkunata kënö ninëki: ‘Llapanta Gobernaq Teyta Jehovämi kënö nin: “Juk israelïta, melanëpaq santunkunata adorëkar y wakinkunata jutsata* rurëkätsir willakoqnïman tapukoq ëwaptinqa, kikï Jehovämi contestashaq melanëpaq santukunata adoranqanta cuentaman churëkur.
5 Israel nunakunaqa, noqata dejaramarmi melanëpaq santunkunata adorayan. Tsëmi noqa munaptï, llapankunapis shonqunkunachö mantsakashqalla kawakuyanqa”’.+
6 Llapan Israel nunakunatam kënö ninëki: ‘Llapanta Gobernaq Teyta Jehovämi kënö nin: “Melanëpaq santukunata adorëta dejarir y mana allikunata rurëta dejarir noqaman kutiyämuy.+
7 Juk israelïta o Israelchö kawaq juk forastëru, melanëpaq santukunata adorëkar y wakin nunakunata jutsata* rurëkätsir willakoqnïman tapukoq ëwaptinqa,+ kikï Jehovämi tsë nunata contestashaq.
8 Tsë nunapa contranmi tikrashaq, ushakätsishaqmi+ y manam sirwimaqnïkunawan juntunatsu kanqa. Tsë nunata castiganqäta rikarmi, wakin nunakunapis mantsapakuyanqa y pëpaqmi imëpis parlayanqa. Y musyariyankim noqa Jehovä kanqäta”’.
9 ‘Peru juk willakoq mana rasumpa kaqta willakuptinqa, tsë willakoqtaqa noqa Jehovämi engañarqö.+ Tsë willakoqpa contranmi kashaq, ushakätsishaqmi y mananam Israelchö kanqanatsu.
10 Jutsata* ruranqampitaqa pëkunam culpayoq kayanqa. Tapukoq kaq y willakoq kaqpis culpayoqllam kayanqa.
11 Tsënöpam Israel nunakunaqa noqapita rakikar oqrakashqanö puriyanqatsu, y mananam mana allikunata rurar kayanqatsu. Pëkunam sirwimaqnïkuna kayanqa y noqam Diosninkuna kashaq’+ ninmi Llapanta Gobernaq Teyta Jehovä”.
12 Teyta Jehoväqa yapëmi parlapämarqan y kënömi nimarqan:
13 “Nunapa tsurin, juk nacionchö nunakuna noqata dejaramar jutsata* rurakuyaptinqa, noqam contrankuna churakar castigashaq, y manam nacionninkunachö mikuy* kanqatsu.+ Entëru nacionchömi mallaqäyanqa.+ Nunatapis y animaltapis wanutsishaqmi.+
14 Tsë nacionchö Noë,+ Daniel+ y Jacob+ kawarnimpis, allikunata rurayanqampitaqa kikinkunallam salvakuyanman y manam juktaqa salvëta puëdiyanmantsu”+ ninmi Llapanta Gobernaq Teyta Jehovä.
15 “‘Sinöqa këman pensariyë, tsë nacionman mikukoq chukaru animalkunata mandäman, y tsë animalkunana llapan nunakunata mikurnin tsë nacionta tsunyëkaqta dejariyanman. Y chukaru animalkunata mantsar, tsë sitiupa nunakuna pasëta mantsayanman.+
16 Tsënö kaptimpis, noqa kawëkaq Diosmi nï: tsë nacionchö kë kiman nunakuna kawarpis, manam warmi wamrankunallatapis ni ollqu wamrankunallatapis salvëta puëdiyanmantsu. Kikinkunallam salvakuyanman y entëru nacionmi tsunyëkar quedarinman’ ninmi Llapanta Gobernaq Teyta Jehovä”.
17 “‘Sinöqa këman pensariyë. Tsë nacionchö kawaq nunakunata espädawan ushakätsiyänampaq mandaküman.+ Y “llapanta espädawan ushakätsiyë” niptï, nunatapis animaltapis espädawan ushakäratsiyanman.+
18 Tsënö kaptimpis, noqa kawëkaq Diosmi nï: tsë nacionchö kë kiman nunakuna kawarpis, manam warmi wamrankunallatapis ni ollqu wamrankunallatapis salvëta puëdiyanmantsu. Kikinkunallam salvakuyanman’ ninmi Llapanta Gobernaq Teyta Jehovä”.
19 “‘Sinöqa këman pensariyë. Entëru nacionchö kawaq nunakunata raslla o saslla wanutsikoq qeshyawan ushakätsïman.+ O alläpa cölerar nunatapis y animaltapis wanutsir ushakäratsïman.
20 Tsënö kaptimpis, noqa kawëkaq Diosmi nï: tsë nacionchö Noë,+ Daniel+ y Job+ kawarnimpis, manam warmi wamrankunallatapis ni ollqu wamrankunallatapis salvëta puëdiyanmantsu. Allikunata rurayanqampitaqa kikinkunallam salvakuyanman’ ninmi Llapanta Gobernaq Teyta Jehovä”.+
21 “Llapanta Gobernaq Teyta Jehoväqa kënömi nin: ‘Tsënömi kanqa, nunatapis y animaltapis+ ushakätsinäpaq Jerusalenchö nunakunata kë chuskun castïgukunawan castigaptï.+ Pëkunataqa espädawan, mallaqëwan, mikukoq chukaru animalkunawan y raslla o saslla wanutsikoq qeshyawanmi castigashaq.+
22 Peru wakinkunaqa, warmi wamrankunawan y ollqu wamrankunawanmi salvakuyanqa. Pëkunaqa tsë markapitam waqtaman yarqayämunqa.+ Tsë salvakoqkuna, qamkunaman shayämuptin y alli portakuyanqanta y allikunata rurashqa kayanqanta rikarmi, Jerusalen markata castiganqäpita kushikuyanki’”.
23 “‘Tsë nunakuna alli portakuyanqanta y allikunata rurayanqanta rikarmi kushikuyanki. Y cuentatam qokuyanki tsë markataqa rasumpa conviëniptin castiganqäta’+ ninmi Llapanta Gobernaq Teyta Jehovä”.
Nötakuna
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: pecäduta.
^ Kënöpis niyanmi: Pecäduta.
^ Hebreu idiömachöqa “tantata churarnin warkuyanqan qeru” ninmi.
^ Kënöpis niyanmi: pecäduta.
