Ezequiel 18:1-32
18 Teyta Jehovämi yapë parlapämarqan, y kënömi nimarqan:
2 “Israel markachöqa kënömi niyan: ‘Papäninkunam pochqoq üvasta mikuyan, peru wamrankunapa kirunkunam nanärin’,* ¿imanirtan tsënöqa niyan?+
3 Llapanta Gobernaq y kawëkaq Jehovä Diosmi kënö nï: ‘Israelchöqa mananam tsënö parlayanqanatsu.
4 Llapan kawëkaqkunam* noqallapa kayan. Papä kaqkunapa kawënin y tsurinkunapa kawënimpis noqallapam. Jutsata* ruraq kaqqa* kikinmi wanunqa o wañunqa.
5 Pensarishun juk alli nuna, allita ruranqanman.
6 Pëqa manam mikuntsu jirkakunachö santukunapaq mikuyta cocinayaptin,+ manam mañakuntsu Israelchö melanëpaq santukunaman, manam nuna mayimpa warminwan kakuntsu*+ ni manam killanwan këkaq warmiwan kakuntsu,+
7 manam pitapis sufritsintsu,+ jaqan* kaqkuna prendatanö entregayanqantapis kutïkatsinmi,+ manam pitapis suwapantsu,+ kikimpa mikuynintam mallaqëkaqkunata qarëkun,+ kikimpa röpantam röpannaqkunata vistitsin,+
8 qellëta prestakurpis manam wachëninta cobrakuntsu,+ imëpis allillatam ruran,+ ishkaq nunakuna problëmachö kayaptinqa justiciatam ruran,+
9 imëpis allikunata ruranampaqmi mandakunqäkunata y ninqäkunata cäsukun y cumplin. Tsënö cäsukoq nunaqa imëyaqpis kawanqam’+ ninmi Llapanta Gobernaq Teyta Jehovä.
10 ‘Peru pensarishun tsë nunapa tsurin ladron+ o asesïnu+ kanqanman, o kë mana allikunata ruranqanman.
11 Kë mana allikunata papänin mana rurashqa kaptimpis, tsurinqa këkunatam ruran: jirkakunachö santukunapaq cocinayanqan mikuytam mikun, nuna mayimpa warminwanmi kakun,*
12 waktsakunatam sufritsin,+ suwakunmi, jaqankuna* prendatanö entregayanqantapis manam kutitsintsu, melanëpaq santukunamanmi mañakun,+ imëka melanëpaq cösaskunatam ruran+
13 y prestakunqan qellëtapis wachënintawan kutitsiyänantam munan.+ Tsë nunapa tsurinqa wanunqam. Imëka melanëpaq cösaskunata ruranqampitam wanunqa. Kikinllam culpayoq kanqa wanunqampita.
14 Kananqa pensarishun juk papäman. Pëqa imëka mana allikunata ruranman. Peru tsurinqa, papänin mana allikunata rurëkanqanta rikarpis, mana allikunataqa manam rurantsu.
15 Jirkakunachö santukunapaq cocinayanqan mikuyta manam mikuntsu, Israelchö melanëpaq santukunaman manam mañakuntsu, nuna mayimpa warminwan manam kakuntsu,*
16 manam pitapis sufritsintsu, jaqan* kaqkuna prendatanö entregayanqantapis kutïkatsinmi, manam pitapis suwapantsu, kikimpa mikuynintam mallaqëkaqkunata qarëkun y röpannaqkunatam vistitsin,
17 manam waktsakunata sufritsintsu, qellëta prestakurpis manam wachëninta cobrakuntsu, llapan mandamientükunata y ninqäkunatam cumplin. Papänin jutsata* rurashqa kaptimpis, tsë wamraqa manam wanunqatsu, imëpis kawanqam.
18 Peru papäninqa pïmëtam ulipashqa o llullapashqa, wawqintam suwapashqa y markanchöpis imëka mana allikunatam rurashqa. Jutsata* tsënö ruranqampitam wanunqa o wañunqa.
19 Peru qamkunaqa niyanki: “¿Imanirtan papänin jutsata* rurëkaptinqa, tsurinqa culpayoqtsu?”. Tsurinqa alli kaqllatam ruran, y mandakunqäkunata cäsukurmi cumplishqa, tsëmi wanunqatsu.+
20 Jutsata* ruraq kaqqa* kikinmi wanunqa.+ Papänin jutsata rurashqa kaptimpis, tsurinqa culpannaqmi. Tsurin jutsata rurashqa kaptimpis, papäninqa culpannaqmi.+
21 Peru mana allita ruraq nuna, mana alli rurëninta dejar mandakunqäkunata cäsukurqa y allikunatana rurarqa kawanqam, manam wanunqatsu.+
22 Mana allikunata ruranqantaqa manam yarpäshaqnatsu,+ allikunatana ruranqampitam kawanqa’.+
23 Llapanta Gobernaq Teyta Jehovämi kënö nin: ‘Noqaqa manam kushikütsu mana alli kanqampita juk nuna wanuptin,+ tsëpa rantinqa, mana alli rurëkunata dejananta y kawakunantam munä’.+
24 ‘Peru juk nuna alli ruraq këkar, mana alli nunakunanö mana allikunata ruraptinqa, ¿imaraq pasanqa? Tsë nunaqa wanunqam. Mananam allikunata ruranqantapis yarpäshaqnatsu.+ Mana cäsukoq kanqampita y jutsata* ruranqampitam wanunqa.+
25 Peru qamkunaqa kënömi niyanki: “Jehoväpis mana conviëneqllatam ruran”.+ Israel nunakuna, shumaq wiyayämë. Noqa ruranqäqa llapampis allillam,+ qamkunam imëka mana allikunataqa rurayanki.+
26 Juk alli nuna, alli rurëkunata dejarir mana allita rurarqa wanunqam. Awmi, mana allikunata ruranqampitam kikin wanunqa.
27 Y juk mana alli nuna, mana alli rurëkunata dejar alli kaqllatana rurarqa kawakunqam.+
28 Ruranqankuna mana alli kanqanta cuentata qokur, tsë mana allikunata manana rurarqa kawakunqam, manam wanunqatsu.
29 Peru Israel nunakunaqa kënömi niyanqa: “Jehoväpis mana conviëneqllatam ruran”. Israel nunakuna, shumaq wiyayämë. Noqa ruranqäqa llapampis allillam,+ qamkunam imëka mana allikunataqa rurayanki’.
30 Tsëmi noqa Llapanta Gobernaq Teyta Jehovä kënö nï: ‘Israel nunakuna, cada ünutam mana allikunata rurayanqëkipita juzgayashqëki.+ Tsëmi mana alli rurëkunataqa dejayänëki. Mana alli rurëkunata mana dejarqa, kikikikunam culpayoq kayanki.
31 Mana alli rurëkunataqa dejayëna,+ cäsukuyëna y allikunatana pensayë.+ Israel nunakuna, ¿imanirtan wanuyta munayanki?’.+
32 Llapanta Gobernaq Teyta Jehovämi kënö nin: ‘Pï nunapis wanuptinqa manam kushikütsu.+ Mana alli rurëkunata dejaskir, alli kaqtana rurayë y kawakuyë’”.+
Nötakuna
^ Kënöpis niyanmi: shimpaskin; pajärin; jimpärin.
^ O “llapan almakunam”. Rikäri “Bibliachö palabrakunata entiendinapaq” neqta.
^ Kënöpis niyanmi: Pecäduta.
^ O “almaqa”. Rikäri “Bibliachö palabrakunata entiendinapaq” neqta.
^ O “oqllanakuntsu”.
^ Kënöpis niyanmi: debeq.
^ Kënöpis niyanmi: oqllanakun.
^ Kënöpis niyanmi: debeqkuna.
^ O “oqllanakuntsu”.
^ Kënöpis niyanmi: debeq.
^ Kënöpis niyanmi: pecäduta.
^ Kënöpis niyanmi: Pecäduta.
^ Kënöpis niyanmi: pecäduta.
^ Kënöpis niyanmi: Pecäduta.
^ O “almaqa”. Rikäri “Bibliachö palabrakunata entiendinapaq” neqta.
^ Kënöpis niyanmi: pecäduta.
