Ezequiel 22:1-31
22 Teyta Jehoväqa yapëmi parlapämarqan y kënömi nimarqan:
2 “Nunapa tsurin, ¿listunaku këkanki nunakunapa yawarninta jichaq marka ushakänampaq kaqta musyatsinëkipaq?+ ¿Listunaku këkanki imëka mana allikunata rurëkanqanta musyatsinëkipaq?*+
3 Kënömi ninëki: ‘Llapanta Gobernaq Teyta Jehovämi kënö nin: “Nunakunapa yawarninta jichaq marka,+ ushakänëkipaq höraqa chäramushqanam.+ Melanëpaq santukunatam adorarqunki+
4 y nunakunapa yawarnintam jicharqunki, tsëkunapitam culpayoq kanki.+ Y melanëpaq santukunata adorarmi limpiunatsu kanki.+ Ushakëtaqa kikikim ashirqunki, tsëmi kananllana ushakanki. Juk nacion nunakunam insultayäshurniki burlakuyanqa.+
5 Amänuchö y karuchömi qampita burlakuyanqa.+ Jutikiqa penqakuypaqmi quedanqa y qamchö täkoq* nunakunaqa imëka mana allikunatam rurayan.
6 Rikë Jerusalen marka, Israelchö mandakoqkunaqa autoridä karmi munayanqankunata rurar nunakunata wanutsiyan o wañutsiyan.+
7 Qamchö täkoq* nunakunaqa papäninta mamänintam despreciayan,+ forastëru nunakunatam engañayan, y papäninnaq wamrakunata y viudakunatam sufritsiyan”’”.+
8 “‘Qamqa sagrädu sitiükunatam desprecianki y säbadu junaqtapis manam respetankitsu.+
9 Qamchö täkoq* nunakunaqa mana kaqpita tumpakoqmi* kayan y nunakunapa yawarnintam jichayan.+ Y jirkachö santukunapaqmi qarëkunata rupatsiyan, tsëtam mikuyan y alläpa melanëpaqmi portakuyan.+
10 Qamchö kawaq nunakunaqa, madrastankunawanmi kakuyan*+ y killanwan këkaq warmitapis violarmi ushayan.+
11 Nuna mayimpa warminwanmi kakuyan,*+ tsënöllam lumtsuyninkunawan kakuyan+ y tsë teytalla këkarmi paninkunata violayan.+
12 Jerusalen marka, qamchö kawaqkunaqa päguta chaskipakuyan nunakunapa yawarninta jichayänampaqmi,+ qellëta prestakurpis ganëta munarlla y wachëninta cobrakuyta munarllam prestakuyan.+ Qamqa pasëpam* qonqëkamarqunki’+ ninmi Llapanta Gobernaq Teyta Jehovä.
13 ‘Qamchö täkoq* nunakuna mana allikunata rurar ganayanqampita y nunakunapa yawarninta jichayanqampitam, cölerashqa paqchir o taqllar despreciä.
14 ¿Castiganqaq junaqqa kushishqallatsuraq o kallpayoqllatsuraq këkanki?+ Noqa Jehovämi nikä, castigashqëkim.
15 Mëtsë nacionkunaman y markakunamanmi qarqushqëki,+ mananam mana allikunata rurarnin kankinatsu.+
16 Y mëtsë nacionkunapa puntanchömi penqakatsishqëki. Y musyarinkim noqa Jehovä kanqäta’”.+
17 Teyta Jehovämi yapë parlapämarqan y kënömi nimarqan:
18 “Nunapa tsurin, Israel nunakunaqa noqapaq tikrayashqa tsullutsishqa metalpa mana väleqninnömi. Pëkunaqa hornuchö këkaq cobrinö, estäñunö, fiërrunö y plömunömi kayan. Tsullutsishqa pläta metalpa mana väleqninnömi kayan.+
19 Tsëmi Llapanta Gobernaq Teyta Jehovä kënö nin: ‘Tsullutsishqa metalpa mana väleqninnö kayanqëkipitam, llapëkita Jerusalenman juntayashqëki.+
20 Pläta metalta, cobrita, fiërruta, plömuta y estäñuta hornuman juntu jitëkur tsullunampaq ninata pükapaqnömi, qamkunatapis tsulluyänëkipaq ninata pükapaqnö+ castigayashqëki.
21 Llapëkita juntëkurmi ninata pükaqnö castigayashqëki.+ Hornuchö ushakaqnömi ushakäyanki.+
22 Pläta metalta hornuchö tsullutseqnömi marka rurinchö qamkunatapis ushakätsiyashqëki. Y musyariyankim noqa Jehovä castiganqäta’”.*
23 Yapë parlapämarmi Teyta Jehovä kënö nimarqan:
24 “Nunapa tsurin, kënö ninki: ‘Castiganqaq junaqqa jitaräkoq chakranö y tamya mana chänan chakranömi kayanki.
25 Willakoqninkunam contran churakäyashqa,+ animalta juk leon rachikacharkoqnömi nuna mayinkunatapis mana allita rurayan.+ Väleq cösasninkunata y imëkankunatam apakuyan. Qowankunata o runankunata* wanuratsirmi warmikunatapis viudata dejayashqa.
26 Sacerdötinkunaqa manam leynïkunata cäsukuyashqatsu+ y sagrädu sitiükunatapis mana kaqpaqmi churayashqa.+ Manam musyatsikuyantsu ima sagrädu ni ima mana sagrädu kanqanta,+ y ima limpiu kanqanta ni ima mana limpiu kanqanta.+ Säbadu junaqtapis manam respetayantsu y noqatapis manam respetayämantsu.
27 Tsë markachö dirigeqkunaqa animalta racheq atoqnömi* kayan. Imatapis ganayänampaqmi nunakunata wanutsiyan y nuna mayinkunapa yawarnintapis jichayan.+
28 Peru willakoqninkunaqa, tsë nunakuna mana alli rurayanqantam yësuwan tsapaparkuyan. Ardëllam* revelaciontapis rikaq tukuyan y ulikurkurmi o llullakurmi suertita qatiyan.+ Teyta Jehovä imatapis mana nikaptinmi, “Llapanta Gobernaq Teyta Jehovämi kënö nimashqa” nir willakuyan.
29 Tsë markachö nunakunaqa mana allitam rurayashqa y suwakuyashqam.+ Wanëkaqkunata* y waktsakunatam mana alli tratayashqa. Forastëru nunakunapitam provechakuyashqa y tsë nunakunapaqqa manam justiciata rurayashqatsu’.
30 ‘Juk nunatam ashirqä, tsë markapa rumipita perqanta altsanampaq o tsë perqakunapa uchkunman shäkunampaq.* Tsënöpa tsë markaman yëkur mana ushakätsinäpaq,+ peru manam jukllëllatapis tarirqätsu.
31 Alläpa cölerarmi pëkunata castigar ushakätsishaq. Imëka mana allikunata rurayanqampitam kikinkunalla sufriyanqa’ ninmi Llapanta Gobernaq Teyta Jehovä”.
Nötakuna
^ Hebreu idiömachöqa “juzganëkipaq” ninmi.
^ Kënöpis niyanmi: täraq; päraq.
^ Kënöpis niyanmi: täraq; päraq.
^ Kënöpis niyanmi: täraq; päraq.
^ Kënöpis niyanmi: acusakoqmi.
^ O “oqllanakuyan”.
^ O “oqllanakuyan”.
^ Kënöpis niyanmi: jankatmi.
^ Kënöpis niyanmi: täraq; päraq.
^ Kënöpis niyanmi: castigayanqaqta.
^ Kënöpis niyanmi: Ollqunkunata.
^ Hebreu idiömachöqa “löbunömi” ninmi. Löbuqa atoq niraqmi, peru mas jatunmi.
^ Kënöpis niyanmi: Yaptallam.
^ Kënöpis niyanmi: Necesitëkaqkunata.
^ Kënöpis niyanmi: ichïnampaq.
