Ezequiel 23:1-49
23 Teyta Jehovämi yapë parlapämarqan y kënömi nimarqan:
2 “Nunapa tsurin, tsë mamallapita yureq ishkë warmikunam kayarqan.+
3 Pëkunaqa shipash kayanqampitam, Egiptuchö ollqukunawan jukwan jukwanraq kakur* qallëkuyarqan.+ Tsëchömi nunakunaqa, pï nunapis manaraq yatanqan pëchunkunata y chichinkunata* yatar ushayarqan.
4 Mayor kaqpam jutin karqan Oholä* y menor kaqpanam Oholibä.* Pëkunaqa noqapam kayarqan. Pëkunachömi warmipis ollqupis tsurïkuna yuriyarqan. Oholäqa Samariam+ y Oholibänam Jerusalen.
5 Oholäqa warmï këkarmi, jukwan jukwan kakur* qallëkurqan.+ Wënankunataqa alläpam kuyëkoq,+ tsë wënankunaqa vecïnun asiriu nunakunam kayarqan.+
6 Tsë nunakunaqa kayarqan azul röpashqa gobernadorkuna y jukpa mandädunchö këkaq gobernadorkunam. Llapankunapis cawallunkuna montashqa kuyanëllapaq jövinkunam kayarqan.
7 Asiriachö mas reqishqa llapan nunakunawanmi kakurqan.*+ Y wënankuna adorayanqan melanëpaq santukunatam adorarqan.
8 Egiptuchö kanqannöllam jukwan jukwan kakurqan.* Pëtaqa Egiptuchömi, shipashllaraq këkaptin ollqukuna juknin jukninraq katsikuyarqan. Tsëchömi pï nunapis manaraq yatashqan chichinkunatapis* yatar ushayarqan.+ Y mana conformakushpam, pëwan punukur munayanqannö katsikuyarqan.
9 Tsëmi wënankunapa makinchö dejëkurqä,+ kuyanqan asiriu nunakunapa makinchö.
10 Pëkunam pïmë nunakuna rikäyänampaq qalapachäyarqan+ y espädawan wanutsiyarqan. Warmi y ollqu wamrankunatapis prësum apakuyarqan.+ Tsënö ushakäyanqantaqa mëtsëchö warmikunam musyariyarqan. Tsënö mana alli kanqampitam asiriu nunakuna juzgayarqan.
11 Nananta o ñañanta pasanqanta rikëkarpis, Oholibäqa mas peormi ollqupaq löcayäkurqan. Tsëmi nanampitapis mas peor pï ollquwampis lluta kakurqan.*+
12 Vecïnun asiriu ollqukunallapaqmi pasëpa* yarparäkoq,+ gobernadorkunapaq, alli vistishqa y cawallunkuna montashqa pureq jukpa mandädunchö gobernadorkunapaq. Llapampis kuyanëllapaq jövinkunam kayarqan.
13 Tsënö melanëpaqkunata ruraptinmi cuentata qokurqä, pëpis mayor kaq nanannölla o ñañannölla kanqanta.+
14 Peru Oholibäqa nanampitapis o ñañampitapis mas peormi jukwan jukwan kakurqan.* Oholibäqa rikarqan, puka pintürawan perqachö dibujashqa caldeu ollqukunatam.
15 Tsë dibujarëkaq soldädukunaqa kayarqan, tseqllankunachö wachäkashqa y peqankunapis o umankunapis alli tëlawan wankushqam. Tsë dibujarëkaq ollqukunaqa, Caldëa markachö yureq nunakunam kayarqan.
16 Tsë dibüjuchö ollqukunata rikëkurqa pëkunapaqmi löcayäkurqan. Tsëmi Caldëa markaman willakoqkunata mandarqan.+
17 Tsëmi babiloniu ollqukunaqa tsë warmiwan kakuyänampaq* seguïdu shayämoq, y mana conformakuypam tsë warmita cämanchö munayanqannö katsikuyaq. Tsë ollqukunawan munanqannö kakurirmi,* tsë nunakunata melanar dejarirqan.
18 Tsënö mana penqakuypa wënankunawan qalapächu kakuptinmi,+ nananta o ñañanta melananqänö, pëtapis melanar dejarirqä.+
19 Pëqa, shipash kanqan witsan Egiptuchö pïmë nunakunawampis kakunqanta* yarparmi,+ mas peor-raq jukwan jukwan kakurqan.+
20 Imanömi sirwipakoq warmi* qowampa o runampa* partin ashnupanöraq kaptin y cawallupanöraq kaptin tsë ollqullapaq löcayäkun, tsënöllam pëpis wënankunapaq alläpa löcayäkun.
21 Qamqa Oholibä, shipashllaraq këkarmi Egiptuchö pïmë ollqukunawan kakurqëki* y pï nunapis manaraq yatanqantam pëchuykikunatapis y chichikikunatapis* yatar ushayämurqan,+ y yapë tsënö rurayäshunëkitam pasëpa* munarqëki.+
22 Tsëmi kananqa Oholibä, Llapanta Gobernaq Teyta Jehovä kënö nishunki: ‘Kananmi melanar dejanqëki llapan wënëkikunata abusapäshaq.+ Tsëmi pëkunaqa mëtsëpita atacayäshunëkipaq shayämunqa.+
23 Babiloniu nunakuna+ y llapan caldeu nunakunam shayämunqa:+ Pecod markapita,+ Söa markapita y Cöa markapitam shayämunqa, y pëkunawan juntum llapan asiriu nunakunapis shayämunqa. Tsë llapan nunakunaqa cawallunkuna montashqa pureq kuyanëllapaq jövinkuna, gobernadorkuna, jukpa mandädunchö këkaq gobernadorkuna, soldädukuna y reqishqa nunakunam kayan.
24 Tsë llapankunam atacayäshunëkipaq shayämunqa y mëtsika carrëtankunawan shamuykaqtam wiyanki. Mëtsika soldädukunam cascunkunawan, jatun y taksha escüdunkunawan* shayämunqa. Chëkamurmi entëru läduykipa churanakuyanqa, pëkunataqa noqam mandarqö juzgayäshunëkipaq, y kikinkuna munayanqannömi juzgayäshunki.+
25 Alläpa cölerashqam castigashqëki, tsëmi pëkunaqa llakipäyäshunkitsu.* Senqëkita y rinrikitam roquyämunqa y wakin nunakunatam espädawan wanutsiyanqa. Ollqu wamrëkikunata y warmi wamrëkikunatam prësu apakuyanqa y quedaq kaq nunakunatam ninawan rupatsiyanqa.+
26 Qalapachëkuyäshurnikim+ shumaq adornuykikunata apakuyanqa.+
27 Tsëmi, mana alli portakunkinatsu ni jukwan jukwanqa kakunkinatsu,*+ tsënö këtaqa Egiptuchömi yachakurqëki.+ Y mananam egipciu nunakunata rikapankinatsu y manam Egiptu markapaq yarpankinatsu’.
28 Llapanta Gobernaq Teyta Jehovämi kënö nishunki: ‘Kananqa chikinqëki y melanar dejanqëki nunakunapa makinchömi dejarishqëki.+
29 Alläpa chikiyäshurnikim mana alli tratayäshunki y alli trabajar tarinqëkikunatam llapanta apakuyanqa.+ Qalapachäyäshunkim y röpannaqtam dejayäshunki. Pïmëwampis kakunqëkita,* melanëpaq portakunqëkita y jukwan jukwan kakunqëkitaqa llapankunam musyayanqa.+
30 Tsënöqa pasashunki jukwan jukwan kakoq* warminö, juk nacion nunakunapa qepan qepanchö purinqëkipita+ y melanëpaq santukunata adoranqëkipitam.+
31 Qamqa nanëki o ñañëki ruranqanllatam rurarqunki,+ tsëmi nanëkita castiganqänölla qamtapis castigashqëki’.+
32 Llapanta Gobernaq Teyta Jehovämi kënö nin:
‘Jatun cöpachö cöleräta nanëkita o ñañëkita uputsinqänöllam, qamtapis uputsishqëki.+
Tsëmi pïmëpis qampita asikuyanqa y burlakuyanqa, tsë cöpachöqa tsëkunam junta këkan.+
33 Y nanëki o ñañëki Samariapa cöpanwan upukurkurmi machashqa purinki.
Waqarmi, llakirmi mantsakashqa japallëki purinkiy imannaqmi quedanki.
34 Allpapita rurashqa cöpachö këkaqtam llapanta upukurkunki,+ hasta cöpapa kuchuntapis kachkakurkunkim.
Tsëpitanam alläpa llakikurnin pëchuykitapis rachir ushanki.
“Tsëtam noqa parlarqö” ninmi Llapanta Gobernaq Teyta Jehovä’.
35 Tsëmi Llapanta Gobernaq Teyta Jehovä kënö nishunki: ‘Pasëpa* qonqëkamar y despreciamar melanëpaq portakunqëkipita+ y jukwan jukwan kakunqëkipitam* sufrinki’”.
36 Tsëpitanam Teyta Jehoväqa kënö nimarqan: “Nunapa tsurin, ¿clärutsuraq willakunki Oholäwan Oholibä melanëpaq jutsakunata* rurashqa kayanqanta+ y castïguta chaskiyänampaq kaqta?
37 Pëkunaqa adulteriu*+ jutsatam* rurayashqa y nunakunatam wanutsiyashqa. Manam melanëpaq santukunallatatsu adorayashqa, sinöqa maman këkarmi tsë santukunapaq wamräkunata ninachö rupatsiyashqa.+
38 Y tsëkunata rurëkarpis mas peortaran rurayashqa. Manam respetayashqatsu sagrädu templüta ni säbadu junaqtapis.
39 Melanëpaq santukunapaq rupatsiyänampaq wamrankunata wanutsiyanqan+ junaqllam hasta templümampis yëkuyarqan, y manam respetayarqantsu.+ Tsëkunatam templü rurinchö rurayarqan.
40 Hasta willakoqkunatam mandayarqan, karu markakunapita nunakuna shayämunampaq.+ Tsë nunakuna shamuykäyaptinmi pëqa bañapäkurqan, nawintapis pintapäkurqan y shumaq adornukunatapis churakurqan.+
41 Mësatapis shumaq adornarmi+ shumaq sïllaman jamakurqan,+ y inciensütapis+ y aceitïtapis+ tsë mësamanmi churarqan.
42 Tsë warmikunaman chaq ollqukunaqa, imapaqpis mana yarpachakushpam büllata rurar kayarqan. Tsëchömi tsunyaq sitiupita ëwashqa borrächu nunakunapis kayarqan. Pëkunam tsë warmikunapa makinkunaman pulsërakunata churayarqan y shumaq corönakunatam coronatsiyarqan.
43 Tsëta rikarmi adulteriu jutsata* rurëkaqpaq nirqä: ‘Kananqa manachi jukwan jukwan kakuyta* dejanqanatsu’.
44 Qellëpaqrëkur jukwan jukwan kakoq* warmiman ëwaqnöraq, ollqukuna pëman seguïdu ëwayarqan. Tsënömi ollqukunaqa melanëpaq portakoq Oholäman y Oholibäman ëwayarqan.
45 Tsë warmitaqa adulteriu jutsata* ruranqampita+ y nunakunata wanutsinqampitam, alli ruraq nunakuna juzgar condenayanqa.+ Tsë warmikunataqa adulteriu jutsa rurëkunam pasëpa* gustashqa y mëtsikaqtam wanutsiyashqa.+
46 Llapanta Gobernaq Teyta Jehovämi kënö nin: ‘Mëtsika soldädukunatam pushayämunqa. Pëkunam tsë warmikunata mantsëpaqta tikratsiyanqa. Y imëkankunatam apakuyanqa.+
47 Tsë soldädukunaqa rumiwanmi tsampiyanqa o saqmayanqa,+ tsëpitanam espädawan wanutsiyanqa. Ollqu wamrankunata y warmi wamrankunatam wanutsiyanqa+ y wayinkunamampis ninatam prendïkuyanqa.+
48 Tsë nacionchöqa mananam mana alliqa portakuyanqanatsu. Tsë warmikunata pasanqanta rikarmi, wakin warmikunapis tsë warmikunanöqa melanëpaq portakuyanqanatsu.+
49 Y melanëpaq santukunata adorar jutsakunata* rurayanqampitam, tsë soldädukunaqa ushakätsiyanqa. Tsë warmikunaqa musyariyanqam, Llapanta Gobernaq Jehovä noqa kanqäta’”.+
Nötakuna
^ O “oqllanakur”.
^ Kënöpis niyanmi: chuchunkunata.
^ Tsë jutiqa, “pëpa carpa wayin” ninanmi.
^ Tsë jutiqa, “pëchömi carpa wayï këkan” ninanmi.
^ O “oqllanakur”.
^ O “oqllanakurqan”.
^ O “oqllanakurqan”.
^ Kënöpis niyanmi: chuchunkunatapis.
^ O “oqllanakurqan”.
^ Kënöpis niyanmi: jankat.
^ O “oqllanakurqan”.
^ O “oqllanakuyänampaq”.
^ O “oqllanakurirmi”.
^ O “oqllanakunqanta”.
^ Hebreu idiömachöqa “concubïna” ninmi. Rikäri “Bibliachö palabrakunata entiendinapaq” neqta.
^ Kënöpis niyanmi: ollqumpa.
^ Kënöpis niyanmi: jankat.
^ Kënöpis niyanmi: chuchuykikunatapis.
^ O “oqllanakurqëki”.
^ O “broquelninkunawan”. Tsëtaqa arcuwan flëchaqkunam utilizäyaq.
^ Kënöpis niyanmi: ankupäyäshunkitsu; kuyapäyäshunkitsu.
^ O “oqllanakunkinatsu”.
^ O “oqllanakunqëkita”.
^ O “oqllanakoq”.
^ Kënöpis niyanmi: Jankat.
^ O “oqllanakunqëkipitam”.
^ Kënöpis niyanmi: pecädukunata.
^ Kënöpis niyanmi: pecädutam.
^ Tsënö nirqa, santukunata adorayanqampaqmi parlëkan.
^ Kënöpis niyanmi: pecäduta.
^ O “oqllanakuyta”.
^ O “oqllanakoq”.
^ Kënöpis niyanmi: pecäduta.
^ Kënöpis niyanmi: jankat.
^ Kënöpis niyanmi: pecädukunata.
