Ezequiel 26:1-21
26 Onci watachömi, killapa punta junaqninchö, Teyta Jehovä parlapämarqan, kënömi nimarqan:
2 “Nunapa tsurin, Jerusalen+ markapaqmi Tïruqa kënö nir kushikurqan: ‘¡Allichömi tsë pasëkushqa! ¡Mëtsë nacionpita nunakuna chäyänan markam ushakärishqa!+ Kananqa ushakärishqam y llapan nunakunapis noqallamannam shayämunqa y rïcuyäshaqmi’.
3 Tsënö ninqëkipitam Llapanta Gobernaq Teyta Jehovämi kënö nishunki: ‘Tïru marka, kananqa noqam contrëki churakä, mëtsika nacionpita nunakunatam ushakätsiyäshunëkipaq pushamushaq. Pëkunam lamar yaku laqcheqsar pallarikaqnöraq* ushakätsiyäshunëkipaq shayämunqa.
4 Pëkunam Tïru markapa murällankunata y törrinkunatapis ishkitsir ushayanqa.+ Noqam patsatapis jichkar usharishaq y allpannaqtam chipapëkaqta qaqatanö dejarishaq.
5 Y lamar chowpinchömi* quedanqa y pescäduta tsariyänan* mällata majayänanllapaqnam sirwinqa’.+
‘Noqam tsënö kanampaq parlarqö. Tïru markapitaqa mëtsë nacion nunakunam imëkankunata apakuyanqa’ ninmi Llapanta Gobernaq Teyta Jehovä.
6 ‘Y lamar kuchunchö kawaqkunatam, llapanta espädawan wanutsiyanqa y nunakunaqa musyariyanqam noqa Jehovä kanqäta’.
7 Llapanta Gobernaq Teyta Jehovämi kënö nishunki: ‘Tïru marka, ushakätsiyäshunëkipaqmi norti lädupita Babiloniachö gobernaq Nabucodonosorta*+ pushamushaq. Pëqa puëdeq gobernantim+ y mëtsika cawallunkunawan,+ guërrapaq carrëtankunawan,+ mëtsika soldädunkunawan y cawallunkuna montashqa soldädukunawanmi ushakätsishunëkipaq shamunqa.
8 Tsaki patsachö këkaq markëkikunatam espädawan ushakätsiyanqa, y murälla waqtankunapa perqakunata shäriratsir y allpata qoturirmi jatusaq escüdukunawan atacayäshunki.
9 Murällëkikunatapis mäquinakunawanmi juchutsir* ushayanqa y törrikikunatapis hächawanmi* mutur ushakätsiyanqa.
10 Mëtsika cawallunkunawan shamuptinmi polvupis shärir pukutënöraq tsaparishunki, y cawallunkunawan patatar-raq, carrëtankunawan y ruëdankunawan büllata rurar punkupa yëkaramuptinmi murällëkikunaqa karkaryanqaraq. Babiloniachö gobernaqqa, murällankuna ishkishqa markaman soldädukuna yëkoqnömi, fäcil-lla yëkaramunqa.
11 Cawallunkunawanmi entëru cällikikunata jarutsimunqa.+ Gobernantiqa llapan nunakunatam espädawan wanutsinqa y firmi columnakunatapis ishkitsirmi ushanqa.
12 Imëkëkikunata y negociuykikunatapis llapantam apakunqa,+ murällëkikunata y shumaq wayikikunatapis ishkitsirmi ushanqa, tsëpitanam rumikikunata, qeruykikunata y allpëkikunatapis yakuman jitarpunqa’.
13 ‘Tsënömi upällatsishqëki, mananam fuertipa cantanqëki y arpata tocanqëki imëpis wiyakanqanatsu.+
14 Y qaqatanömi allpannaqta dejarishqëki, tsëmi pescäduta tsareqkuna* mällankunata majayänanllapaqnam sirwinki.+ Qamchöqa manam ni imëpis markata shäritsiyanqanatsu, noqa Jehovämi tsëta parlarqö’ ninmi Llapanta Gobernaq Teyta Jehovä.
15 Llapanta Gobernaq Teyta Jehovämi Tïruta kënö nin: ‘Ushakaptikiqa, wanunëkaq nunakunam waqayanqa y qamchö täkoq* nunakunatam wanutsiyanqa. ¿Tsëta rikar manatsuraq wakin islakunapis karkaryäyanqaraq?+
16 Lamarchö mandakoqkunapis, mandakur jamakuyänampita bajarirmi mangannaq röpankunata y bordashqa röpankunata jipikuyanqa y pasëpa* mantsakarmi karkaryar patsachö jamaräyanqa, y mantsakashqam rikaräyäshunki.+
17 Llakishqam kënö nir cantapäyäshunki:+
“¡Barcunkunawan viajaq nunakuna täkuyanqan* marka! Pïmë nunapis alabanqan marka, ¡imanirtan tsënöqa ushakärinki!+
¡Qampis y qamchö täkoq nunakunapis lamarchöqa mantsëpaqmi kayarqëki!+
¡Mëtsë markachö nunakunam mantsayäshoq kayäshunki!
18 Ushakanqëki junaqqa, mëtsë islakunam karkaryäyanqa,ushakanqëki junaqqa, mëtsë islakunam imanö këtapis musyanqatsu”’.+
19 Këtam Llapanta Gobernaq Teyta Jehovä nin: ‘Ushakätsirmi tsunyëkaq markatanö dejashqëki. Mëtsika yakutam jitamushaq, tsëmi mëtsika yaku tsaparkushunki.+
20 Y wanushqakunatawan juntum, unë nunakuna pamparäyanqan sepultüraman tsaparkushqëki. Nunakuna qamchö imëpis mana kawayänampaqmi unë markakunata tsaparkunqänö wanushqakunatawan juntu, ruri uchkuman tsaparkushqëki.+ Tsëpitanam kawëkaqkuna këkäyanqan patsata shumaqyätsishaq.*
21 Mana pensanqëki höram imëka desgraciapa pasanki y ushakankim. Tsënam ashiyäshunki, peru manam imëpis tariyäshunkitsu’+ ninmi Llapanta Gobernaq Teyta Jehovä”.
Nötakuna
^ Kënöpis niyanmi: joqarikaqnöraq.
^ Kënöpis niyanmi: pullanninchömi.
^ Kënöpis niyanmi: achkuyänan.
^ Hebreu idiömachoqa “Nabucodorosorta” ninmi. Wakinkunaqa parlarnin tsenömi pashtatsiyaq.
^ Kënöpis niyanmi: laqmatsir.
^ O “espädawanmi”.
^ Kënöpis niyanmi: achkoqkuna.
^ Kënöpis niyanmi: täraq; päraq.
^ Kënöpis niyanmi: jankat.
^ Kënöpis niyanmi: täräyanqan; pärayanqan.
^ O “adornashaq”.
