Ezequiel 43:1-27
43 Tsëpitanam inti o rupay yarqamunan lädumampa këkaq punkuman apamarqan.+
2 Tsëchö këkarmi Israelpa Diosnimpa poderninta, inti o rupay yarqamunan lädupita shamuykaqta rikarqä.+ Vozninqa mëtsika yakunöran büllarqan+ y poderninwanmi entëru patsa atsikyarqan.+
3 Tsë rikanqä revelacionqa markata ushakätseq ëwanqächö* rikanqänöllam karqan, Kebar mayu* kuchunchö rikanqänö.+ Tsëta rikëkurmi patsamampis urkü chanqanyaq ishkirirqä.
4 Tsëpitanam Teyta Jehoväpa poderninqa, inti o rupay yarqamunan lädumampa këkaq punkupa, templuman* yëkurqan.+
5 Tsëpitanam juk kallpa pallarkamar* ruri kaq patiuman apamarqan. Tsëchö këkarnam rikarqä, Teyta Jehoväpa podernin templuman juntarishqa kanqanta.+
6 Tsëpitanam templu rurimpita parlapämaqta wiyarqä, y tsë nunaqa lädümanmi shamurqan.+
7 Pëmi kënö nimarqan:*
“Nunapa tsurin, kë sitiuqa mandakur jamakunämi+ y chakï jarukunanmi.+ Këchömi Israel nunakunawan imëyaqpis kashaq.+ Mananam Israel nunakuna ni gobernantinkunapis jutïta mana allichö quedatsiyanqanatsu.+ Mananam jukwan jukwan kakoq* cuenta santukunata adorarnin ni gobernantinkunapa ayankunawan rakchatäyanqanatsu o qanratäyanqanatsu.*
8 Templunkunapa umbralnintam, templüpa umbralnin lädunman churayämurqan. Y punkunkunapa paradornintam, punküpa paradornin lädunman churayämurqan, tsëtaqa juk perqallanam rakirqan.+ Imëka mana allikunata rurarmi sagrädu jutïta mana allichö quedatsiyarqan. Tsëmi cölerar llapanta ushakätsirqä.+
9 Jukwan jukwan kakoq* cuenta adorayanqan santunkunatapis y gobernantinkunapa ayankunatapis karu karuman apayätsun. Tsëta rurayaptinqa, pëkunawanmi imëyaqpis kashaq.+
10 Qamqa nunapa tsurin, imëka jutsata* rurayanqampita penqakuyänampaq+ Israel nunakunata templu imanö kanqanta entienditsi+ y plänunta alli estudiayätsun.*
11 Imëka mana allikunata rurayanqampita penqakuyaptinqa, templupa plänun imanö dividishqa këkanqanta, yarqunanta y yëkunanta rikätsi.+ Llapan plänukunata y tsëchö mandakunqanta y leyninta rikätsi. Entëru plänuta rikäyänampaq y tsëchö mandakunqanta cumpliyänampaq pëkuna rikëkäyaptin llapanta qellqë.+
12 Templupaq leyqa këmi: jirka jananchö këkaq entëru pampam alläpa sagrädu.+ Awmi, tsëmi templupaq ley.
13 Altarpa medïdanqa kënömi karqan (tsë cödu medïdaqa, juk cöduman chusku dëdu* yapashqam karqan).+ Altarpa jarukunampa altunqa, mediu metrum* karqan y pasaraqnimpis mediu metrum* karqan. Tsë pasaraqnimpa entëru kuchumpam, masraq pasaraqnin karqan y anchunqa juk cuartam* karqan. Tsënömi altarpa jarukunan karqan.
14 Tsë altarta patsapita punta kaq patakninyaq mediyaptinqa, juk metrum* karqan y pasaraqnimpa anchunnam mediu metru* karqan. Punta kaq pataknimpita ushanan kaq patakyaq mediyaptinnam ishkë metru* karqan. Pasaraqnimpa anchumpis mediu metrum karqan.
15 Nina rupanan kaqnam, altunqa ishkë metru* karqan. Y altarpa chuskun waqrankunaqa, tsë nina rupanan kaqpitam witsëpa pasaraq.+
16 Tsë altarpa nina rupanan kaqqa cuadrädum, largumpis y anchumpis joqta metrum.*+
17 Tsë altarpa patakninkunaqa entëru lädupapis igual-llam karqan. Largunmi qanchis metru* karqan y anchumpis qanchis metrum karqan. Entëru lädumpa pasaraqnimpis veintiseis centïmetrusmi* karqan. Y jarukunannam entëru lädumpa mediu metru* karqan.
Altarpa escalonninqa inti o rupay yarqamunan lädumampam këkarqan”.
18 Tsëpitanam pëqa nimarqan: “Nunapa tsurin, këtam Llapanta Gobernaq Teyta Jehovä nin: ‘Këkunatam cumpliyänan qarëkunata rupatsiyänampaq y yawarta pillchitsiyänampaq* altarta rurarqa’.+
19 ‘Jutsapita* limpiu kanampaqmi juk mallwa töruta apanëki.+ Tsë törutaqa entreganëki puntächö sirwiyämaq Sadocpa tsurin levïta sacerdötikunatam’+ ninmi Llapanta Gobernaq Teyta Jehovä.
20 ‘Tsë altar jutsapita* limpiu quedanampaqqa, tsë wakin yawartam altarpa chusku waqrankuna kaqman y pataknimpa chuskun esquïnankunaman y pasaraqninkunamampis churanëki.+
21 Tsëpitana jutsapita* altar limpiu quedanampaq, mallwa töruta apanki, templupita waqtachö, akrashqa sitiuchö rupatsiyänampaq.+
22 Y waränin junaqnam rupatsiyänampaq juk sänu chïvuta* apanëki jutsapita* altar limpiu quedanampaq. Tsëwanmi sacerdötikunaqa, mallwa töruwan rurayanqannölla, altarta jutsapita limpiuyätsiyanqa’.
23 ‘Jutsapita* limpiuyätsita usharirnam, juk sänu mallwa töruta y juk sänu carnëruta apanëki.
24 Tsëtaqa Jehoväpaqmi apanëki y sacerdötikunam kachita winarkur+ Jehoväpaq rupatsiyanqa.
25 Jutsapita* rupatsiyänampaqmi qanchis junaqpa apanëki juk chïvuta,*+ juk mallwa töruta y juk carnëruta. Tsë animalkunaqa sänum kayänan.
26 Sacerdötikunaqa qanchis junaqpam jutsapita* altarta limpiuyätsiyänan y inaguräyänan.
27 Qanchis junaq cumpliskiptinnam, puwaq junaqpita qallëkur sacerdötikunaqa nunakuna apayanqan qarëkunata+ y noqawan amïgu kayanqanta rikätsikoq qarëkunata altarchö rupatsiyanqa. Y noqaqa qamkunawanmi kushishqa kashaq’+ ninmi Llapanta Gobernaq Teyta Jehovä”.
Nötakuna
^ O capazchi “shamuptin”.
^ Kënöpis niyanmi: riu.
^ Hebreu idiömachöqa “wayiman” ninmi.
^ Kënöpis niyanmi: joqarkamar.
^ Dios ninqantachi kënö parlapämarqan.
^ O “qowanta o runanta jukwan engañaq warminö traicionayanqanatsu”.
^ O “oqllanakoq”.
^ O “oqllanakoq”.
^ Kënöpis niyanmi: pecäduta.
^ Hebreu idiömachöqa “imanö kanqanta midiyätsun” ninmi.
^ Hebreu idiömachöqa “1 cödu” ninmi.
^ Hebreu idiömachöqa “1 palmu” ninmi. Tseqa 22 centïmetrusnömi karqan. Rikäri “Masllata musyanapaq” neqchö B14 kaqta.
^ Tsë medïdaqa jatun kaq cödum karqan, 1 cöduman 2 palmu menor yapashqam karqan. Rikäri “Masllata musyanapaq” neqchö B14 kaqta.
^ Hebreu idiömachöqa “1 cödu” ninmi.
^ Hebreu idiömachöqa “2 cödus” ninmi.
^ Hebreu idiömachöqa “1 cödu” ninmi.
^ Hebreu idiömachöqa “4 cödus” ninmi.
^ Hebreu idiömachöqa “4 cödus” ninmi.
^ Hebreu idiömachöqa “12 cödus” ninmi.
^ Hebreu idiömachöqa “14 cödus” ninmi.
^ Hebreu idiömachöqa “mediu cödu” ninmi.
^ Hebreu idiömachöqa “1 cödu” ninmi.
^ Kënöpis niyanmi: chispiatsiyänampaq.
^ Kënöpis niyanmi: Pecädupita.
^ Kënöpis niyanmi: pecädupita.
^ Kënöpis niyanmi: pecädupita.
^ Kënöpis niyanmi: orqu cabrata.
^ Kënöpis niyanmi: pecädupita.
^ Kënöpis niyanmi: Pecädupita.
^ Kënöpis niyanmi: Pecädupita.
^ Kënöpis niyanmi: orqu cabrata.
^ Kënöpis niyanmi: pecädupita.
