Ezequiel 8:1-18
8 Joqta watachömi, joqta killapa pitsqa junaqninchö, wayïchö jamarëkarqä. Y Judäpita dirigentikunapis puntächömi jamarëkäyarqan. Tsëchö këkaptïmi Llapanta Gobernaq Teyta Jehoväqa poderninwan apakamarqan.
2 Y rikarëkarmi, rikärirqä nina niraqta. Tsë nina niraqqa, nunanömi karqan. Tseqllampita uramanqa ninanöran karqan,+ y tseqllampita janamanqa pläta metalwan öru takushqanöran chipaparqan.+
3 Tsëpitanam imëka makinwannö aqtsäpita pallarkamarqan.* Tsënam Teyta Diospa podernin suëñuychönölla Jerusalen markaman altullapa* apamarqan. Jerusalenman chäratsimarnam, norti kaq läduchö këkaq ruri punkuman churamarqan.+ Tsëchömi këkarqan melanëpaq santu. Tsë santuta rikarmi, Teyta Diosqa alläpa cöleran.+
4 Tsëchömi rikarqä Israelpa Diosnimpa puëdeq këninta.+ Pampachö këkar suëñuchönö rikanqänöllam karqan.+
5 Tsëpitanam kënö nimarqan: “Nunapa tsurin, norti kaq läduman rikäri”. Tsënam norti kaq läduman rikärirqä, norti kaq lädupa altarman yëkuna punkuman. Tsëchömi këkänaq, rikarnin Teyta Dios cöleranqan melanëpaq santu.
6 Tsëpitanam kënö nimarqan: “Nunapa tsurin, ¿rikëkankiku? Israel nunakunaqa alläpa mana allita y melanëpaqkunata rurakurmi kakuyan.+ Tsëkunata rurayaptinmi sagrädu sitiüpitapis witikü.+ Peru tsëpitapis mastaraq rurayanqantam rikanki”.
7 Tsëpitanam patiuman yëkuna punkunman apamarqan. Tsëchömi rikarqä perqachö ichiklla uchkuta.
8 Tsënam kënö nimarqan: “Nunapa tsurin, mas jatun kanampaq tsë uchkuta maslla uchkuri”. Uchkuskirnam juk punkuta rikëkurqä.
9 Tsënam nimarqan: “Yëkur rikë imëka mana allikunata y melanëpaqkunata rurëkäyanqanta”.
10 Yëkuskirnam rikarqä perqachö dibujarëkaq lätëpa pureq animalkunata,+ tukuyläya melanëpaq animalkunata+ y Israel nunakuna adorayanqan tukuyläya melanëpaq santukunata.
11 Tsë dibüjupa puntanchönam Israelpita setenta dirigentikuna shëkäyarqan.*+ Tsëchömi Safanpa tsurin Jaazanïaspis këkarqan. Cada ünum inciensu rupatsinata aptashqa këkäyarqan. Mushkoq o pukutaq inciensuqa qoyëkarqanmi o qoshnïkarqanmi.+
12 Tsënam nimarqan: “Nunapa tsurin, ¿rikëkankiku Israelchö dirigentikuna ampichö o tsakëchö* rurëkäyanqanta? Cada ünum ruri cuartukunachö santukunata katsiyan. Pëkunaqa, ‘Jehoväqa manam rikämantsiktsu. Jehoväqa markantsiktapis dejashqanam’ nirmi tsëkunata rurayan”.+
13 Tsëpitanam nimarqan: “Tsë rikanqëkipitapis mas melanëpaqta rurëkäyanqantam rikanki”.
14 Tsëpitanam Jehoväpa templumpa norti kaq punkunman apamarqan. Tsëchönam rikarqä, Tamuz santupaq warmikuna waqar jamarëkäyaqta.
15 Tsëpitanam nimarqan: “Nunapa tsurin, rurëkäyanqanta rikë. Peru tsëpitapis mas melanëpaqta rurayanqantam rikanki”.+
16 Tsëpitanam Teyta Jehoväpa templumpa ichik kaq patiunman apamarqan.+ Jehoväpa templunman yëkuna kaqchömi, pasadïzuwan altar tinkoqchö, veinticincu nunakuna inti o rupay yarqamunan läduman rikarar qonqurirëkäyarqan. Jehoväpa templunqa qepankunachömi këkarqan. Tsëchöqa qonqurirëkäyarqan intita o rupayta adorarmi.+
17 Y kënömi nimarqan: “Nunapa tsurin, rurëkäyanqanta rikë. Judä nunakunaqa manam conformakuyashqatsu imëka melanëpaqkunata rurarpis,+ maqanakurlla kawakurpis ni cöleratsimarpis. Pëkunaqa rämakunatapis* senqäparaqmi pasëkätsiyan.
18 Tsëmi kananqa cölerar castigashaq, manam llakipäshaqtsu*+ ni manam pëkunapaq yarpachakushaqtsu. Rogamar rinrïchöraq qayaräyaptimpis manam wiyashaqtsu”.+
Nötakuna
^ Kënöpis niyanmi: joqarkamarqan.
^ Hebreu idiömachöqa “patsapita ciëluman pallarkamar” ninmi.
^ Kënöpis niyanmi: ichirëkäyarqan.
^ Kënöpis niyanmi: tutapëchö.
^ Capazchi tsë rämakunataqa utilizayaq santunkunata adorar.
^ Kënöpis niyanmi: ankupäshaqtsu; kuyapäshaqtsu.
