Job 23:1-17
23 Tsënam Jobqa kënö contestarqan:
2 “Imëkapaq llakikuptïmi kallpäpis kannatsu,tsëmi mana cäsukoqnö imëpis quejakushaq.+
3 ¡Imanöllaraq musyëküman Teyta Dios mëchö këkanqanta!+
Tsëqa këkanqan sitiumanchi asheq ëwëküman.+
4 Pëpa rikëninchöchi mana culpayoq kanqäta nïman,y defendikurchi parläman.
5 Pë imata pensanqantachi musyarïman,y nimanqantachi chaskiküman.
6 ¿Alläpa puëdeq kartsuraq conträ churakanman?
Manachi tsëtaqa rurëkunmantsu, pëqa shumaqchi wiyamanman.+
7 Alli kaqllata ruraq nunapis, tsëchöchi justiciata tarinman,y Jueznïqa mana culpayoq kanqätachi ninman.
8 Inti o rupay yarqamunan lädupa ëwarpismanam pëta tarïtsu, y kutimurpis manam tarïtsu.
9 Izquierda läduchö trabajëkaptimpis manam rikëta puëdïtsu,tsënöllam derëcha läduman tumaptimpis rikëta puëdïtsu.
10 Pëqa musyanmi allillachö imëpis kanqäta.+
Pë pruëbaman churamaptinqa, alli kaq örunömi kashaq.+
11 Pë ruranqannömi noqaqa imëpis rurarqö,y pë nimanqantam imëpis cäsukurqö.+
12 Pë mandakunqankunatam imëpis cumplirqö,+y nimanqampita mastam imëpis rurarqö.
13 Imatapis ruranampaq decidiptinqa, ¿piraq michëta puëdinman?+
Rurëta munanqantaqa, pensanqannöllam ruran.+
14 Noqapaq munanqantaqa, pensanqannöllam ruranqay imëkataran shuyarëkätsiman.
15 Pëpa culpanmi alläpa llakishqa këkä,y pëman pensarqa masraqmi mantsakä.
16 Teyta Diosmi kallpannaqta dejamashqa,y Llapanta Puëdeq Diosmi mantsakätsimashqa.
17 Peru manam ampipis o tsakëpis,*ni cäräta tsapaq yana pukutëpis upällatsimashqaraqtsu.
Nötakuna
^ Kënöpis niyanmi: tutapëpis.
