Job 28:1-28
28 Kanmi plätata jipiyämunampaq sitiuy kanmi ninawan limpiuyätsiyanqan öruta jipiyämunampaq sitiu.+
2 Patsapitam fiërru mineralta jipiyämun,y tsullutsiyanqan cobritanam qaqapita jipiyämun.+
3 Nunakunaqa ampirëkaq o tsakëkaq* sitiukunamanmi ëwayan,y mineralta ashirmi,ampiman o tsakëman ruri ruriyaq yëkuyan.
4 Nunakuna kawayanqampita karuchöy mana puriyanqan sitiukunachömi mïnakunata uchkuyan.
Wakinkunaqa waskawan yëkuykurmi warkukëkur* trabajayan.
5 Patsa jananchöqa mëtsika mikuymi wayun,peru patsa rurinqa ninawan ushakätsishqanömi këkan.*
6 Rumikunachöqa zafïrum kan,y allpachönam öru kan.
7 Ëtsa mikoq jatusaq pishqukunaqa, manam tsëman ëwaq nänita reqiyantsu,y yana rukuspis manam tsë sitiuta rikashqatsu.
8 Ëtsa mikoq mantsëpaq animalkunapis manam tsë sitiupaqa puriyashqatsu,y malta leonpis manam tsëpa ëwashqatsu.
9 Nunakunaqa pedernal rumitam pakiyan,y jirkakunatapis sikimpita oqtirmi ushakätsiyan.
10 Yaku ëwanampaqmi qaqa rurimpa uchkuyan,+y imapis alli väleqtaqa allim reqiyan.
11 Pashtamoq yakutam qochakätsiyan,y patsachö imëka pakarëkaqkunatam jipiyämun.
12 Tsënö kaptimpis, ¿mëchöraq yachaq këta tariyanman?+
¿Y mëchöraq entiendikoq këta tariyanman?+
13 Nunakunaqa manam musyayantsu yachaq kë alläpa välinqanta,+tsëtaqa manam patsachö tarita puëdintsiktsu.
14 Mëtsika yakuqa, ‘manam këchötsu këkan’ ninmi,y lamarpis ‘manam noqawantsu këkan’ ninmi.+
15 Yachaq këtaqa manam alli kaq öruwan rantitani plätawan trokëta puëdintsiktsu.+
16 Manam Ofir+ markapita öruwan,önici rumiwan ni zafïru rumiwan rantita puëdintsiktsu.
17 Örupis ni vidriupis manam yachëwanqa igualantsu,y manam alli kaq örupita tazonwampis cambiëta puëdintsiktsu.+
18 Coral rumipis ni cristal rumipis manam tsëwanqa igualantsu.+
Yachaq këqa juk bolsa perlaspitapis masmi välin.
19 Cus markapita topaciu+ rumipis, yachaq këwanqa manam igualantsu,y alli kaq öruwampis manam rantita puëdintsiktsu.
20 Tsëqa, ¿pipitataq yachaq kë shamun?
¿Y pichötan entiendeq këta tarishwan?+
21 Nunakuna mana rikäyanqanchömi pakarëkan,+y ciëluchö volaq* pishqukunapis manam rikäyantsu.
22 Ushakëwan wanuypis o wañuypis,‘yachaq këpitaqa ichikllatam wiyayarqö’ niyanmi.
23 Teyta Diosllam,mëchö y imanö tarinapaq kaqta musyan.+
24 Pëqa entëru patsatam kuchu kuchuyaq rikan,y ciëlu jawanchö* këkaqkunataqa llapantam rikëkan.+
25 Pëqa vientu ëka kallpayoq kanampaq kaqta,*+y ëka yaku kanampaq kaqtam dispunishqa.+
26 Tsënöllam imë tamyamunampaq kaqta,+ räyukunay pukutë tamya mëpa ëwanampaq kaqtapis+ dispunishqa.
27 Tsëkunata rurarmi, yachaq këta rikätsikushqa y entienditsikushqa.
Pëmi yachaq këta alli patsätsirqan, y alläpa väleq kanqanta rikätsikurqan.
28 Tsëpitanam nunata nirqan:
‘Yachaq nunaqa Teyta Jehovätam respetan+y entiendikoq nunaqa mana allikunapitam witikun’”.+
Nötakuna
^ Kënöpis niyanmi: tutapëkaq.
^ Kënöpis niyanmi: warkakëkur.
^ Tsënö nirqa, capazchi mïnakunachö rurayanqampaq parlëkan.
^ Kënöpis niyanmi: päreq; vuëlaq.
^ Kënöpis niyanmi: qopinchö.
^ Hebreu idiömachöqa “ëka lasänampaq kaqta” ninmi.
