Juan 17:1-26
17 Tsëpitanam Jesusqa ciëluman rikëkur kënö mañakurqan: “Teyta, chäramushqanam höra. Tsurikita mas puëdeq këman churëkullë, tsënöpa nunakuna alabayäshunëkipaq,+
2 tsëta rurëkullë, entreganqëki nunakunata imëyaqpis kawëman chätsinanrëkur+ llapan nunakunata pëpa cargunman churanqëkinölla.+
3 Qamllam rasumpa kaq Dios kanki, imëyaqpis kawëta tarita munaqkunaqa+ qamtam reqiyäshunëki,*+ y mandamunqëki Jesucristutam reqiyänan.+
4 Noqaqa patsachö këkarmi qamta alabarqoq,+ y llapan ruranäpaq nimanqëkitam rurarqö.+
5 Tsëqa Teyta, nunakuna manaraq kayaptin läduykichö puëdeq kanqänölla, kanampis läduykichö puëdeq kanäta permitïkullë.+
6 Kë munduchö nunakunapita entregamanqëki kaqkunatam jutikita musyatsirqö.+ Qampam kayarqan, y noqatam entregamarqëki, y llapan ninqëkitam cäsukuyashqa.
7 Kananqa musyayannam llapan ninqä y ruranqä qampita shamunqanta.
8 Nimanqëkita willaptïmi pëkunaqa chaskikuyashqa,+ qampa jutikichö shamunqätam musyayashqa,+ y qam mandamanqëkitam creiyashqa.+
9 Pëkunarëkurmi qamman rogakamü; manam kë munduchö nunakunapaqtsu rogakamü, sinöqa qampa kayaptinmi entregamanqëki kaqkunapaq rogakamü.
10 Llapan noqapam qampa y qampanam noqapa,+ y noqaqa pëkunachömi alabashqa karqö.
11 Noqaqa kë mundupita ëwakuykänam, peru pëkunaqa kë munduchö nunakunawanran këkäyan,+ y noqaqa qam kaqtam ëwakamü. Alläpa respetashqa Teyta,* pëkunata musyatsinqä jutikirëkur, noqantsik juknölla kanqantsiknö+ pëkunapis juknölla kayänampaq pëkunata cuidëkullë.+
12 Pëkunawan këkarqa, musyatsikunqä jutikirëkurmi pëkunata shumaq rikarqö, y imëkapitam cuidarqö,+ manam mëqampis ushakashqatsu,+ sinöqa qellqarëkanqan cumplikänampaqmi+ ushakänampaq kaqlla ushakashqa.+
13 Peru kananqa qam kaqtam ëwakamü, y noqa kushikunqänölla pëkunapis alläpa kushikuyänampaqmi kë mundullachöraq këkar këkunata nï.+
14 Noqaqa ninqëkitam pëkunata willarqö, peru noqa kë munduchö nunakunanö mana kanqänömi pëkunapis kë munduchö nunakunanötsu kayan, tsëmi kë munduchö nunakunaqa pëkunata chikiyashqa.+
15 Manam kë munduchö nunakunapita jipinëkipaqtsu qamta rogakü, sinöqa Diablupita* cuidëkunëkipaqmi.+
16 Noqa kë munduchö nunakunanö mana kanqänömi,+ pëkunapis kë munduchö nunakunanötsu kayan.+
17 Palabrëkim rasumpa kaqqa,+ tsë rasumpa kaq palabrëkiwan sirwiyäshunëkipaq pëkunata akrëkullë.+
18 Kë munduchö nunakunaman mandamanqëkinömi, noqapis kë munduchö nunakunaman pëkunata mandarqö.+
19 Qamta sirwiyäshunëkipaq akrashqa kayänampaqmi, noqapis pëkunarëkur qamta sirwinaqpaq akrashqa karqö.
20 Manam pëkunarëkurllatsu qamman rogakamü, sinöqa pëkuna niyanqanta wiyar noqaman markäkoq o yärakoq kaqkunapaqwanmi,
21 llapankuna juknölla kayänampaq.+ Teyta, qam noqawan juknölla kanqëkinö y noqa qamwan juknölla kanqänö+ pëkunapis noqantsikwan juknölla kayätsun, tsënömi kë munduchö nunakuna qam mandamanqëkita creiyanqa.
22 Noqantsik juknölla kanqantsiknö, pëkunapis juknölla kayänampaqmi, qam alabamanqëkinölla noqapis pëkunata alabarqö.+
23 Awmi, pëkuna rasumpëpa juknölla kayänampaqmi, noqaqa pëkunawan juknölla këkä y qampis noqawan juknölla këkanki. Tsënöpam nunakuna musyayanqa qam mandamanqëkita y noqata kuyamanqëkinölla pëkunata kuyanqëkita.
24 Teyta, mas puëdeq kanäpaq churamanqëkita rikäyänampaqmi, entregamanqëki kaqkuna noqa kanqächö kayänanta munä.+ Qamqa patsachö nunakuna yurikur manaraq qallayanqampitam kuyamarqëki.+
25 Allita ruraq Teyta, kë munduchö nunakunaqa manam qamta reqiyäshurqunkitsu,+ peru noqaqa qamta reqeqmi,+ y entregamanqëki kaqkunaqa qam mandamanqëkitam musyayashqa.
26 Noqata kuyamanqëkinölla pëkunapis kuyanakuyänampaq y noqa pëkunawan juknölla kanäpaqmi,+ jutikita pëkunata musyatsirqö y musyatsishaqran”.+
Nötakuna
^ O “qam japallan rasumpa Diospitam yachakur këkäyänan”. Griëgu idiömachöqa “imëpis reqir këkäyänampaqmi” nikan.
^ O “limpiu Teyta”.
^ Griëgu idiömachöqa “Mana Allita Ruraqpita” ninmi.
