Mateu 4:1-25
4 Tsëpitanam santu espïrituqa tsunyaq sitiuman Jesusta pusharqan,+ tsëchömi Diablu tentëta munarqan.+
2 Cuarenta junaq y cuarenta paqas ayunashqa karmi, Jesusqa mallaq këkarqan.
3 Tsënam Diabluqa+ pëman witïkur tentëta munar kënö nirqan: “Diospa tsurin karqa, kë rumikunata nï tantaman tikrayänampaq”.
4 Jesusnam nirqan: “Qellqarëkanmi: ‘Nunaqa manam pachata mikurllatsu kawan, sinöqa Teyta Jehovä* ninqanta wiyakur-ran’”.+
5 Tsëpitanam Diabluqa Jerusalenchö* templupa+ mas altu kaq perqanman aparqan,+
6 y kënömi nirqan: “Diospa tsurin karqa, mä këpita jeqarkuy, qellqarëkanmi: ‘Angelninkunatam mandamunqa’, y: ‘Pëkunam makipita janchayäshunki, ima rumichöpis chakikita mana takanëkipaq’”.+
7 Jesusnam nirqan: “Kënöpis qellqarëkanmi: ‘Ama Jehovä* Diosnikita pruëbaman churëtsu’”.+
8 Tsëpitanam Diabluqa alläpa jatun jirkaman apëkur patsachö llapan gobiernukunata y riquëzankunata rikätsirqan,+
9 y kënömi nirqan: “Qonqurïkur juk kutilla adorëkamaptikiqa, kë llapanmi qampaq kanqa”.
10 Tsënam Jesusqa nirqan: “¡Këpita yarquy Satanas! Qellqarëkanmi: ‘Teyta Jehovätam* adoranëki,+ y pëllatam sirwinëki’”.+
11 Tsënam Diablu ëwakuptin,+ angelkuna shamur Jesusta atiendiyarqan.+
12 Tsëpitanam Jesusqa, Juan prësu këkanqanta musyarir+ Galilëa provinciata ëwarqan.+
13 Y Nazaretpita ëwakurmi Zabulon y Neftalï distrïtukunachö këkaq Capernaumchö täkurqan.*+ Tsë markaqa qocha kuchunchömi këkan.
14 Tsëqa pasarqan, Diospa willakoqnin Isaïas kënö willakunqan cumplikänampaqmi:
15 “¡Lamarman ëwaq näni kuchunchö, Jordan mayupa* wak tsimpanchö y Zabulonpawan Neftalïpa kastankuna kawayanqan kinrëchö juk nacion nunakuna täkuyanqan* Galilëa!
16 Ampichönö o tsakëchönö* këkaq nunakunam cläru atsikyaqta rikäyashqa,+ y wanuy o wañuy ampiranqan o tsakanqan* markakunachö nunakunam alli atsikyaqta rikäyashqa”.+
17 Tsë witsampitam Jesusqa kënö willakurqan: “Arrepentikuyë, ciëluchö Gobiernuqa këllachönam këkan”.+
18 Galilëa qocha* kuchumpa ëwëkarmi, ishkaq wawqikunata rikarqan mällankunata qochaman jitëkaqta: Pëdru+ nir reqiyanqan Simonta y wawqin Andresta,+ pëkunaqa pescadormi kayarqan.
19 Pëkunatam kënö nirqan: “Qepäta shayämuy, nunakunata pesquëtam yachatsiyashqëki”.+
20 Tsë höram mällankunata dejëkur qepanta ëwayarqan.+
21 Tsëpita pasarkurnam ishkaq mas wawqikunata rikarqan: Zebedeupa tsurin Santiäguta y wawqin Juanta.+ Pëkunaqa papänin Zebedeuwanmi mällankunata jirar barcuchö këkäyarqan, y pëkunatapis qayarqanmi.+
22 Tsë höram barcuta y papäninkunata dejëkur pëkunapis Jesuspa qepanta ëwayarqan.
23 Entëru Galilëa+ provinciachömi Jesusqa Diosta adorayänan wayikunachö+ yachatsikurqan, Diospa Gobiernumpita alli noticiakunata willakurqan, y imëkawan sufreqkunata y qeshyëkaqkunata alliyätsirqan.+
24 Entëru Siriachö pëpita musyëkurmi, imëkawan qeshyëkaqkunata, alläpa nanatsikur sufreqkunata,+ demoniuyoq kaqkunata,+ atäkiwan qeshyëkaqkunata+ y kuyukuyta mana puëdeqkunata pëman apayarqan, y llapantam alliyätsirqan.
25 Tsëmi Galilëa provinciapita, Decäpolispita, Jerusalenpita, Judëa provinciapita y Jordan mayupa wak tsimpampita mëtsika nunakuna qepanta ëwayarqan.
Nötakuna
^ Griëgu idiömachöqa “sagrädu markachö” ninmi.
^ Kënöpis niyanmi: tärarqan; pärarqan.
^ Kënöpis niyanmi: riupa.
^ Kënöpis niyanmi: täräyanqan; pärayanqan.
^ Kënöpis niyanmi: Tutapëchönö.
^ Kënöpis niyanmi: tutapanqan.
^ Wakin Bibliakunachöqa Galilëa lamar ninmi, peru mishki yakuyoq kaptin y lamarnö jatun mana kaptinmi kë Bibliachöqa Galilëa qocha nin.
