Proverbius 26:1-28
26 Usya witsan rashtamunqan* y cosëcha witsan tamyamunqan mana alli kanqannömi,pensëta mana yachaq upa nunata alabëpis allitsu.+
2 Imanömi wayanïta pishqupis y wakin pishqukunapis volayan,*tsënöllam maldicionpis, mana allikunata rurashqa nunakunaman chanqa.
3 Chikutiwanqa cawallutam astayan, frënutanam ashnupa shiminman churayan,+y garrutiwannam pensëta mana yachaq nunata waqtan waqtan garrutiyan.+
4 Upa nunataqa, ama kikin nishunqëkinöllaqa contestëtsu,parlakunqannö contestarqa qampis upam kanki.
5 Upa nunataqa penqakatsipa contestë,tsënö mana contestaptikiqa imëkatapis musyaq kanqantam pensanqa.+
6 Kikinlla malograkurnin cöju tikrareq nunanömi,pensëta mana yachaq nunapa makinchö problëmanta arreglapunampaq dejaq nunaqa.
7 Juk nunata, cöju chakin mana yanapanqannömi,pensëta mana yachaq nuna parlakunqampis yanapakuntsu.+
8 Warakaman rumita watarkoqnömi,pensëta mana yachaq nunata alabëqa.+
9 Borrächu nuna kashata aptarëkaqnömi,pensëta mana yachaq nuna parlanqanqa.
10 Llutalla flëchar pitapis chëkatseq soldädunömi,imatapis mana yachaq nunata o puntata pasaq nunata contrataq nunaqa.
11 Shonqun jitanqanta allqu yapë mikureqnömi,pensëta mana yachaq nunapis kutin kutin mana allita ruran.+
12 ¿Rikarqunkiku yachaq tukoq nunata?+
Allikunata ruranampaq tsë nunata yanapanapa rantinqa, upa nunata yanapanqantsikmi mas fäcilqa kanqa.
13 Qela nunaqa trabajaq ëwëta mana munarmi, “nänichömi mallwa leon këkan,pläzachömi juk leon këkan” nin.+
14 Imanömi punkupis bisagran kaptin* kichar wichqar, kichar wichqar kakun,tsënöllam qela nunapis cämanchö tumar tikrar, tumar tikrar jitaräkun.+
15 Qela nunaqa tazonchö alli mikuymanmi makinta yakarkun,peru alläpa qela karmi amurkuytaqa qelanan.+
16 Qela nunaqa pensan, tapuyaptin alli pensëkur contestaq yachaq qanchis nunakunapitapismas yachaq kanqantam.
17 Allquta rinrimpita aptarkoqnömi,juk pleytukunqanta wiyaskir cölerakoq nunaqa.+
18 Juk löcu nuna pitapis wanutsita munar flëchawan o ima armawampis chëkatseqnömi,
19 nuna mayinta alli pensëkur ulipärir o llullapaskir,* “brömallam karqan” neq nunaqa.+
20 Yanta manana kaptinqa nina upirinmi,tsënöllam tumpakoq* nunakuna mana kayaptinqa pelyapis kannatsu.+
21 Imanömi carbonta maslla yaparkuyaptin y yantata maslla churarkuyaptin nina rawrar o lunyar qallëkun,tsënöllam discutita gustaq nunapis pelyata qallatsin.+
22 Alli mikuyta mishkipäkur mikureqnöran,mana kaqpita acusakoq nuna parlanqantaqa kushishqa wiyëkuyan.+
23 Imanömi allpa mankata chipapänampaq pläta metalwan janampa pintarkuyan,tsënömi mana alli nunaqa janan shonqulla pitapis shumaq parlapan.+
24 Chiki nunaqa janan shonqullam alli tukurnin pitapis parlapan,peru shonqunchöqa engañanampaqmi pensëkan.
25 Tsë nunataqa shumaq parlapäshuptikipis ama creitsu,tsë nunaqa imëka mana allikunata* ruranampaqmi shonqunchö pensëkan.
26 Chiki kanqanta musyayänanta mana munar alli tukur parlaptimpis,mana allikunata ruranqantaqa markanchö llapan nunakunam musyariyanqa.
27 Patsata uchkoq nunaqa kikinllam tsë uchkuman ishkinqa,rumita kuchpaq nunataqa kikinllatam tsë rumi nitinqa.*+
28 Pitapis ulipaq o llullapaq nunaqa, mana allikunaman chäratsirpis chikinran.
Pitapis janan shonqulla alabapaq nunaqa, imëka mana allikunamanmi chätsin.+
Nötakuna
^ Kënöpis niyanmi: rapimunqan; jankamunqan.
^ Kënöpis niyanmi: päriyan; vuëlayan.
^ O “quiciunchö”.
^ O “alläpa fuertipa brömapärir”.
^ Kënöpis niyanmi: mana kaqpita acusakoq.
^ O “qanchis mana allikunata”.
^ Kënöpis niyanmi: llapinqa.
