37 YACHATSIKUY

¿Bautizakunäpaq listunaku këkä?

Marquë awmi neqta o manam neqta:

Teyta Diosta adoraqkunaqa bautizakuyänanmi.

□ Awmi

□ Manam

Bautizakurirqa manam jutsata rurashunnatsu.

□ Awmi

□ Manam

Bautizakurir-ran salvakuytaqa puëdinki.

□ Awmi

□ Manam

Mana bautizakuptïqa Teyta Dios manam juzgamanqatsu.

□ Awmi

□ Manam

Amïgükunaqa bautizakuyashqanam, tsëmi noqapis bautizakunä.

□ Awmi

□ Manam

¿Bibliachö yachakunqëkimannöku kawakunki? ¿Dioswan amïgu kanëkipaq kallpachakunkiku? ¿Bibliachö yachakunqëkitaqa jukkunata parlapankiku? Capaz kë kiman o kimsan tapukuykunata awmi nir contestarqunki, y manaraq bautizakushqa karqa bautizakuytana pensëkanki. Peru tsëpaqqa yanapashunki qallananchö këkaq tapukuykunata contestanqëkim.

● Teyta Diosta adoraqkunaqa bautizakuyänanmi.

Awmi. Jesusqa llapan qateqninkuna bautizakuyänampaqmi mandarqan (Mateu 28:19, 20). Kikin Jesuspis bautizakurqanmi, tsëmi Jesus ruranqannö qampis bautizakunëki. Peru tsëpaqqa alliran yachakunëki y segürum këkänëki bautizakuyta munanqëkita.

● Bautizakurirqa manam jutsata rurashunnatsu.

Manam. Bautizakurqa rikätsikunki Jehovä Diosllatana sirwinëkipaq kaqtam. Manam munanqëkita rurakunëkipaqtsu bautizakunki, sinöqa Jehoväta cäsukunëkipaq y pë munanqannö kawakunëkipaqmi.

● Bautizakurir-ran salvakuytaqa puëdinki.

Awmi. Bibliachö ninqannömi salvakunantsikpaqqa bautizakunantsikraq (1 Pëdru 3:21). Manam bautizakunëkillatsu, sinöqa Teyta Jehoväta kuyar y imëyaqpis sirwinëkipaqmi bautizakunëki (Marcus 12:29, 30).

● Mana bautizakuptïqa Teyta Dios manam juzgamanqatsu.

Manam. Bautizakushqana o manaraq bautizakushqa karpis, Santiägu 4:17 ninqantam yarpäyänan kënömi nin: “Tsëmi pï nunapis ima alli kanqanta musyëkar mana tsëta rurarqa, jutsatana rurëkan”. Tsëmi kë tapukuykunaman pensanëki: ¿Bautizakurir Diosta imanö sirwinëkipaq kaqta musyankiku? Kawënikichöqa, ¿imata ruranëkipaq kaqta alliku musyanki? Tsëqa papänikikunawan o juk alli yachaq wawqiwan parlë. Pëkunam yanapayäshunki y niyäshunki bautizakunëkipaqqa imakunata ruranëkipaq kaqta.

● Amïgükunaqa bautizakuyashqanam, tsëmi noqapis bautizakunä.

Manam. Bautizakunëkipaqqa kikikim decidinëki (Salmus 110:3). Entiendinëkim Jehoväpa testïgun karnin imakunata ruranëkipaq kaqta. Segürum kanëki bautizakunëkipaq decidinqëkipitaqa (Eclesiastes 5:4, 5).

Bautizakunëkipaq kallpachakuy

Bautizakurirqa Jehovä Diosta sirwinëkipaqmi kallpachakunëki y pëqa bendicishunkim. Jehoväta llapan äninqëkitam bautizakurninqa cumplinëki. Y tsëpaqqa alliran kallpachakunëki.

¿Bautizakunëkipaqqa ichikllanaku pishin? Tsënö kaptinqa kushishqam këkänëki. Jehovä Diosllata llapan shonquntsikwan cada junaq sirwinqantsikqa, ¿manaku alläpa kushikuypaq? (Mateu 22:36, 37.)

QATEQNIN KAQ CAPÏTULUCHÖ Kawënikichö imata ruranëkipaq kaqta musyari.

BIBLIACHÖ YACHAKUNQANTSIK

“Teyta Dios llakipäkoq kanqanrëkur, qamkunata rogayaq, kawëkaq, limpiu y Diosta kushitseq qarëtanö cuerpuykikunata entregayänëkipaq. Tsënömi llapan pensënikikunawan Teyta Diosta sirwiyanki” (Romänus 12:1)

KËTAPIS RURARINKIMANMI

Papänikikunata tapuri, congregacionchö mëqan wawqi o pani yanapashunëkipaq kaqta. Tsëmi mëqan karpis Diospa amïgun kanëkipaq yanaparishunki (Hëchus 16:1-3).

¿MUSYARQËKIKU?

Bautizakuyqa juk señalnömi salvakunëkipaq (Ezequiel 9:4-6).

¡KËKUNATA RURË!

Manaraq bautizakurqa, ¿Bibliachö ima yachatsikuykunatataq mas entiendinä? ․․․․․

Këchö yachakunqäpitaqa, ¿imatataq papänïta o mamänïta tapurïman? ․․․․․

¿QAMQA IMATATAQ PENSANKI KË TAPUKUYKUNAPAQ?

● ¿Imanirtan bautizakunëkipaqqa alliraq pensanëki?

● ¿Imanirtan wakin jövinkunaqa raslla bautizakuyan?

● ¿Imanirtan wakin jövinkunaqa alläpa demorayan Diosta sirwiyänampaq änikuyta y bautizakuyta?

[Willakï]

“Bautizakushqa kanqäta yarpanqämi yanapaman, mana allikunaman mana mëtikunäpaq” (Noemï)

[Recuadru]

Bautismupaq tapukuyanqankuna

Yakuchö bautizakunqëkiqa, ¿imatataq rikätsikun? Yakuman tullpushqa kanqëkim rikätsikun tsë höra wanureq cuenta llapan mana alli rurënikita dejarinqëkita. Y yakupita yarqarkamunqëkiqa rikätsikun yapë yurireq cuenta Jehovä Diosllapaqna kawar qallanqëkitam.

Jehovä Diosta äninqëkinölla imëpis kawakunqëkiqa, ¿ima ninantan? Tsë ninanqa manam munënikimannö kawakunëkipaqtsu nin, sinöqa Jehovä Dios munanqannöna kawakunëkipaqmi (Mateu 16:24). Manaraq bautizakurmi Jehovä Diosman mañakunëki pëpa voluntäninta imëpis ruranëkipaq.

Manaraq bautizakurqa, ¿imataraq rurëkäman? Bibliachö yachakunqëkimannömi kawakunëki y jukkunatam yachakunqëkipita parlapänëki. Dioswan amïgu kanëkipaqmi kallpachakunëki, Bibliatam alli estudianëki y Diosmanmi imëpis mañakunëki. Kikikim Jehovä Diosta sirwinëkipaqqa decidinëki y manam jukkuna niyäshuptikiraqtsu.

¿Ëka watayoq këkar-raq bautizaküman? Bautizakunëkipaqqa manam edänikitatsu cuentachö katsinëki. Sinöqa edänikimannömi Bibliachö ninqanta entiendinëki y Diosta äni ima ninan kanqantam alli entiendinëki.

Papänïkuna manaraq bautizakunäpaq niyämaptinqa ¿imataraq ruräman? Papänikikuna, “bautizakunëkipaqqa masran yachakunëki y cäsukunqëkitam rikätsikunëki” niyäshuptikiqa cäsukuy. Y tsëyaqqa Jehovä Dioswan mas amïgu kanëkipaq kallpachakuy (1 Samuel 2:26).

[Recuadru]

Yachakunëkipaq pägina

¿Bautizakuytaku pensëkanki?

Këchö këkaq tapukuykunam alli pensanëkipaq yanapashunki. Puntataqa textukunataraq leyi, tsëpitana tapukuykunata contestë.

¿Jehovä Diosmanqa confiakunkiku? ¿Imanötan confiakunqëkitaqa rikätsikunki? (Salmus 71:5.) ․․․․․

¿Cuentata qokunkiku ima alli y mana alli kanqanta? ¿Imakunata rurartan cuentata qokurqunki? (Hebrëus 5:14.) ․․․․․

¿Ëka kutitan Jehovä Diosman mañakunki? ․․․․․

¿Imakunapaqtan mañakunki? ¿Mañakunqëkichöqa Jehovä Diosta kuyanqëkitaku rikätsikunki? (Salmus 17:6.) ․․․․․

Diosman mas alli mañakunëkipaqqa, ¿imatataq rurankiman? ․․․․․

¿Bibliataqa seguïduku estudianki? (Josuë 1:8.) ․․․․․

Japallëki Bibliata estudiarqa, ¿imapitataq yachakunki? ․․․․․

Japallëki Bibliata estudiarqa, ¿ima mastataq yachakuyta munanki? ․․․․․

¿Diospita yachatsikunqëkitaqa entiendiyanku? (Këkunachö: Bibliachö yachatsikuykunataqa, ¿alliku entienditsikunki? ¿Bibliapita yachakuyta munaqkunaman watukaq kutinkiku? ¿Pillatapis Bibliapita estudiatsinëkipaq kallpachakunkiku?)

□ Awmi □ Manam

Papänikikuna Diospita yachatsikoq mana yarquyaptimpis, ¿qamqa yachatsikoq yarqunkiku? (Hëchus 5:42.)

□ Awmi □ Manam

Diospita yachatsikunqëkichöqa, ¿ima mastaraq rurankiman? (2 Timoteu 2:15.) ․․․․․

¿Mana faltëpaku reunionkunaman ëwanki? O ¿puëdirninllaku ëwanki? (Hebrëus 10:25.) ․․․․․

¿Imanötan reunionkunachöqa Diosta alabanki? ․․․․․

Reunionman japallëki ëwanëkipaq papänikikuna permitiyäshuptikiqa, ¿pëkuna mana ëwayaptimpis qamqa reunionman ëwankiku?

□ Awmi □ Manam

¿Diospa voluntäninta kushishqaku ruranki? (Salmus 40:8.)

□ Awmi □ Manam

¿Yarpankiku escuëlëkichö estudiaq mayikikuna mana allita ruranëkipaq nikäyäshuptiki mana cäsunqëkita? (Romänus 12:2.) ․․․․․

¿Imataraq rurankiman Jehovä Diosta imëpis kuyanëkipaq? (Jüdas 20, 21.) ․․․․․

Papänikikuna o amïguykikuna Jehovä Diosta manana sirwiyaptinqa, ¿qamqa sïguinkitsuraq Jehoväta sirwirnin? (Mateu 10:36, 37.)

□ Awmi □ Manam

[Fotu]

Bautizakuyqa casakuynömi, tsëmi llutallaqa decidinantsiktsu