35 YACHATSIKUY

¿Imataraq ruräman Teyta Diosta mas reqinäpaq y kuyanäpaq?

Gabrielmi cuentakun: “12 watayoq këkaptïmi papänï dejarayämar ëwakurqan, tsë paqasmi Teyta Jehoväta mañakurqä kutitsimunampaq”. Tsëchömi Gabrielqa rikarqan, Teyta Diosta reqinqantsik y kuyanqantsikqa yanapakunqanta.

Pasëpa llakishqa këkarmi, Gabrielqa Bibliata leyirqan. Tsëchömi rikarqan Jehovä Diosqa kuyakoq kanqanta. Salmus 10:14-mi nin: “Mana pïyuqkunaqa qammanmi markäkëkäyämun. Mamannaq tëtannaqkunapa yanapaqninqa qammi këkanki”. Gabriel kënö nirqan: “Bibliata leyinqächömi rikarqä, Teyta Jehoväqa yanapëkämanqanta y teytäpitapis mas kuyamanqanta”.

¿GABRIELTANÖ imëllapis pasashurqunkiku? Tsëkunapa pasashqa o mana pasashqa kaptikipis, Teyta Jehoväqa reqinëkita y kuyanëkitam munan. Tsëmi Palabranchö nimantsik: “Diosman witiyë, y pëqa qamkunamanmi witimunqa” (Santiägu 4:8). Rikëta mana puëdikashqa y lädunchö mana kaqlla këkashqapis, ¡Jehovä Diosqa amïgun kanatam munan!

Teyta Dioswanqa manam illaqpitatsu amïgu kanki. ¿Wëtëki kapushunkiku? Wëtëki shumaq winananta munarqa, ¿imataraq rurankiman? Alli allpamanchi churankiman y yakunchi winapunkiman. Tsënöllam Teyta Jehoväwan amïgu kanëkipaqpis imëkataraq ruranëki. ¿Imakunatatan rurankiman mas reqinëkipaq y kuyanëkipaq?

Bibliapitam yachakunantsik

Ishkaq nunakuna amïgu kayänampaqqa parlayänanmi y wiyanakuyänanmi. Tsënöllam Teyta Jehoväwampis ruranantsik. ¿Imatatan ruranantsik Jehoväta reqinapaq y kuyanapaq? Palabran Bibliapitam yachakunantsik (Salmus 1:2, 3).

Jövin kashqaqa, Bibliapita yachakuy manam gustamantsiktsu. Televisionta rikarë, pukllakuna y amïgukunawan kakuymi masqa gustamantsik. Tsënö kaptimpis, Jehovä Diosta reqinëkipaq y kuyanëkipaqqa, Palabran Bibliachö nishunqëkitam wiyakunëki.

Jövinkunaqa, Bibliata leyita wanuypam mantsayan. Peru librukuna leyi mana gustashuptikipis, Bibliapita shumaq yachakuytaqa puëdinkim. Tsëpaqqa, ¿imatatan puntata ruranëki? Gustashunqëki rurëkunapitam tiemputa rakinëki. Lizmi nin: “Noqaqa, shärikurllam Bibliäta leyï”. Y 15 watayoq Marïanam nin : “Noqaqa, punoq manaraq ëwarmi Bibliäta leyï”.

Y qamqa, ¿imë höratan Bibliapita yachakunki? Puntataqa rikäri,  292 päginachö yachakuyta. Allim kanqa 30 minütus Diospa Palabrampita yachakunqëki. Ima junaq y imë höra ruranëkipaq kaqta këman qellqë.

․․․․․

Bibliapita yachakur qallanqëki witsanqa, manam Bibliata leyinëki fäciltsu kanqa. 11 watayoq Jezreel jövinmi nin: “Bibliachö wakin willakuykuna ima ninan kanqanta mana musyar y sasa o aja leyinan kaptinmi leyï gustamantsu”. Peru Jehovä Diosta alli reqita y kuyëta munarqa, Palabran Bibliapitam yachakunëki. Ichikllapa ichikllapam Bibliëkita leyi gustashunki. Y gänas gänaslla leyirqa, kushishqam imëkata yachakunki.

Teyta Diosman mañakuy

Teytantsik Jehoväwan parlakunapaq mañakuyqa, ¡manam imawampis igualantsu! Jehovä Diosqa paqasta junaqta mañakuptikipis, wiyashunëkipaq listum këkan. Y parlapänëkitam pëqa munan. Tsëmi Palabranchö nishunki, “mañakurnin y rogakurnin” llapan munayanqëkita mañakuyë; y ‘agradecikuyta’ ama qonqayëtsu (Filipensis 4:6).

Teyta Jehoväwanqa ima pasamanqantsikpita y yarpachakuynintsikkunapitam parlakuyta puëdintsik. Peru manam mañakunantsikllatsu, sinöqa llapan ruranqankunapitam Jehovä Diosta agradecikunantsik (Salmus 106:1).

Imakunapita agradecikunqëkita këman qellqë.

․․․․․

Imëka llakikuykunapa y yarpachakuykunapa pasarqa, ¿imataraq rurankiman? Salmus 55:22-mi kënö nin: “Ima llakikïnikikunatapis TEYTA DIOSPA makinchö jaqiriyë. Pëmi imachöpis yanapayäshunki. Cäsuqninkunataqa manam imëpis jaqirinqatsu”.

¿Imakunapitatan Jehoväta willëta munanki? Këman qellqë.

․․․․․

Dios imanö kanqanta kikiki rikë

¿Ima mastan Jehovä Dioswan amïgu kanëkipaq yanapashunki? Tsëpaqqa, rey David qellqanqan cancionpita yachakurishun, tsëchömi nirqan: “Kuyakuq kashqanta musyayänëkipaq TEYTA DIOSMAN markäkuyë” (Salmus 34:8). ¿Imëtan tsë cancionta qellqarqan? Rey Saul wanutsita munanqan witsanmi. Juk kutinäqa, chikeqninkunapa markanmanmi escapar ëwakurqan. David kanqanta musyarqa, ¡jinan hörachi wanuratsiyanman karqan! Peru manam wanutsiyarqantsu. ¿Imanir? Löcu tukuptinmi reqiyarqantsu (1 Samuel 21:10-15).

Davidqa manam kikimpita salvakushqa kanqantatsu nirqan, qellqanqan cancionchömi, Jehovä yanapaptinlla salvakushqa kanqanta nirqan. “Rowakuptïmi TEYTA DIOS wiyamashqa. Mantsakuptïpis pëmi kallpatsamashqa” (Salmus 34:4). Jehovä yanapashqa kanqanta kikin rikashqa karmi, Davidqa kënö nimarqantsik: “Kuyakuq kashqanta musyayänëkipaq TEYTA DIOSMAN markäkuyë”. a

Imakunachö Jehovä yanapashushqa kashunqëkita këman qellqë. Manam mantsakëpaq rurëkunaraqtsu kanan, sinöqa ichik imallachöpis yanapashunqëkitawan qellë.

․․․․․

Teytëkikuna pishi kanqëkipita Diospita yachatsiyäshushqa kaptimpis, kikikim Jehoväta reqinëkipaq y mas kuyanëkipaqqa kallpachakunëki. Qamqa, ¿Jehovä Diospa amïgunnaku kanki? Manaraq kaptikiqa, kë yachatsikuymi yanapashunki. Pëpita yachakur kallpachakuptikiqa, Jehovä Diosqa yanapashunkim. Tsëmi Bibliachö kënö nimantsik: “Sïguiyë mañakurnin, y qoyäshunkim; sïguiyë ashirnin, y tariyankim” (Mateu 7:7).

MASLLA YACHAKUYTA MUNARQA, JÖVINKUNAPAQ PARLAQ PUNTA KAQ LIBRUPA 38 Y 39 YACHATSIKUYNINTA ASHI

JUKNINCHÖQA KËPITAM YACHAKUNKI

¿Mantsankiku Teyta Diospita yachatsikuyta? ¿Imatatan rurankiman Jehoväpita mas alli yachatsikunëkipaq?

[Willakuy]

BIBLIACHÖ YACHAKUNQANTSIK

“Kushishqam kayan Dios pushananta wanayanqanta musyaq kaqkuna” (Mateu 5:3)

KËTA RURË

Chusku päginakunata cada junaq Bibliata leyirqa, juk watachömi llapanta leyir ushanki.

¿MUSYARQËKIKU?

Jehovä Dios amïgun kanëkita munaptinmi, kë libruta leyikanki y Bibliachö yachakunqëkita cäsukuykanki (Juan 6:44).

¡RURAR QALLË!

Bibliapita mas alli yachakunäpaqqa këtam rurashaq: ․․․․․

Teyta Jehoväman seguïdu mañakunäpaqqa këtam rurashaq: ․․․․․

¿Imatatan tapüman papänïta y mamänïta yachakuykanqäpita? ․․․․․

Y QAMQA, ¿IMA NINKITAN?

● ¿Imatatan rurankiman Bibliapita yachakuy mas gustashunëkipaq?

● Jutsasapa këkashqapis, ¿imanirtan Jehovä Diosqa mañakunata munan?

● ¿Imatan yanapashunki Jehoväman mas alli mañakunëkipaq?

[Willakuy]

Ëvam nin: “Pishi karqa, imëpis igual-llam Teyta Diosman mañakoq kä. Peru kananqa, cada junaq alli o mana alli pasamanqantam Jehovä Diosta willä”.

[Recuadru]

 Bibliëkipita imanö yachakunëkipaq

1. Bibliachö mas gustashunqëki willakuyta ashi. Jehovä Diosman mañakuy leyikanqëkichö yanapashunëkipaq.

2. Leyinqëkiman yarpë. Ama janan jananllaqa leyitsu. Leyinqëkiman yarpë y ama juk rurëkunaman yarpëkëtsu. ¿Imanötan tsëta rurankiman? Pasakunqanta rikëkaq cuenta, parlayanqanta wiyëkaq cuenta, asyanqanta pukutanqanta o shumaq mushkunqanta sienteq cuenta y mikunankunata mikuykaq cuenta leyi... Tsënö leyiptikiqa, qam tsëchö këkaqnömi kanki y gustashunkim.

3. Tapukuy. Leyir usharir kënö tapukuy:

● Kë willakuytaqa, ¿imapaqraq Jehovä Dios Palabranman qellqatsirqan?

● ¿Pikunanötan këta munä, y pikunanötan këta munätsu?

● ¿Imata ruranäpaqtan yachakunqä yanapaman?

● ¿Imatatan Teyta Jehoväpita yachatsiman?

4. Jehovä Diosman mañakuy. Mañakunqëki höra, yachakunqëkita imanö ruranëkipaq kaqta Jehoväta willë. Y Palabran Bibliapita agradecikuyta ¡ama qonqëtsu!

[Fotu]

“Palabrëkiqa aktsinömi këkan. Mëpa ëwaptïpis aktsimaqnömi këkan” (Salmus 119:105).

[Recuadru]

¿Imatatan puntata rurankiman?

Teyta Diosman mañakunëkipaq y Bibliata leyinëkipaq tiemputa mana tarirqa, imata puntaman churanëkipaq kaqtam alli rikänëki.

Këta rurashun: Juk baldita ashï, y tsëman jatusaq rumikunata puntata winë. Tsëpitana arënillan winë. ¿Llapanku yëkushqa? Awmi ¿aw?

Kananna tallirir yapë winashun, peru kë kutichöqa puntata winë arenïllata, y tsëpitana rumikunata. ¿Llapanku yëkun? Manam llapantsu yëkushqa, ¿imanir? Arenïllata puntata winashqa kaptikim.

¿Imatatan yachakuntsik? Jehovä Diosta sirwitam puntaman churanantsik, y tsëpitaran wakin rurënintsikkunataqa ruranantsik. Tsëmi Bibliachöqa nimantsik, “mas precisaq cösaskunapita segurakuyänëkipaq” (Filipensis 1:10). Tsënö ruraptikiqa, Jehovä Diosta sirwinëkipaq y gustashunqëkita ruranëkipaqmi tiempuyki kanqa. Yarpë: Teyta Jehoväta sirwim puntachöqa kanan.