Montreal markapa juk waktsa sitiunchömi winarqä. Papänïkunapaqa puwaqmi wamrankuna kayarqan y ultimu kaqmi noqa karqä. Joqta killayoq këkaptïmi papänï wanukurqan, tsëmi mamänïqa japallanlla llapäkunata wätayämarqan.

Wamra kanqäpitam qellëpaq pukllaqkunata, dröga shoqoqkunata y maqakoqkunata rikarqä. Täranqä sitiuchöqa mana alli ruraq nunakunallam kayaq. Chunka watayoqllaraq këkarmi jukwan jukwan kakoq warmikuna y qellëta prestakoqkuna imatapis mandayämanqanta ruraq kä. Nunakunata engañë y suwakuymi alläpa gustamaq. Tsëta rurëqa dröga shoquy viciunömi noqapaq karqan.

Catorci watayoqllaraq këkarmi alläpa engañakoqna karqä. Öruwan llushishqa relojkunata, pulsërakunata y sortijakunata rantïkurmi “catorci quilätis” nirnin marcarkur cällikunachö y jatusaq tiendakunapa cärrukuna cuadraränanchö rantikoq kä. ¡Qellë ganëqa fäcil-llam kaq! Juk kutinäqa diez mil dölaristam juk junaqllachö ganarqä.

Quinci watayoq këkaptïmi mana allita ruraq jövinkunata yanapayanqan sitiupita qarqarayämarqan, tsëmi mëchö quedakuyta puëdirqänatsu. Cällikunachö, parquikunachö o amïgükunapa wayinkunachömi punoq kä.

Engañakur imëkata rantikuptïmi policïakunaqa juk ishkë kutipa tsariyämarqan y imëkatam tapupäyämarqan. Peru rantikunqäkunata mana suwakushqa kaptïmi carcelman imëpis apayämarqantsu. Peru rantikunäpaq mana permïsü kaptin y nunakunata engañaptïmi atska kuti multayämarqan. Ni pitapis ni imatapis mana mantsarmi qellëta prestakoqkunapaq cobrakurpis trabajarqä. Tsëchö trabajëqa alläpa peligrösum karqan, tsëmi armayoq ëwaq kä. Höranäqa drögata rantikoqkunapaq y alläpa peligrösu nunakunapaqmi trabajaq kä.

Diecisiëti watayoq këkarmi Bibliapaq parlayaqta wiyarqä. Wätanakuyanqä shipashmi Jehoväpa testïgunkunawan Bibliapita estudiar qallëkurqan. Peru Bibliachö consëjukuna mana gustamaptinmi täräyanqä shipashta dejarir juk chïnawan ëwakurqä.

Tsë shipashpis Jehoväpa testïgunkunawanmi Bibliata estudiar qallëkurqan. Y Bibliapita yachakunqanmannömi mas kuyakoq y pacienciakoq karqan, tsëmi alläpa gustamarqan. Juk kutim reunionninkunaman invitayämaptin ëwarqä. Tsëchöqa alli ruraq nunakunawanmi tinkurqä, pëkunaqa kushishqam chaskiyämarqan. Tsënöqa manam imëpis tratayämashqatsu karqan. Wamra kanqäpitam tsënö kuyëpaqa tratayämashqatsu karqan y familiäpis mana kaqpaqmi churamarqan. Jehoväpa testïgunkuna tratayämanqannömi imëpis tratayämänanta munarqä. Tsëmi “Bibliapita yachakushun” niyämaptinqa ras o sas änirqä.

Bibliapita yachakunqämi imëkapita salvamashqa. Juk kutim ishkë ladronkunawan suwakuyänäpaq patsätsipakushqa kayarqä. Noqaqa pukllanqäpitam cincuenta mil dölarista debikurqä, tsëmi qellëta necesitarqä. ¡Peru manam pëkunawan suwakoq ëwarqätsu! Tsëmi ishkankunalla suwakoq ëwayarqan, tsëchömi jukninta wanutsiyarqan y juk kaqtanam carcelman apayarqan.

Bibliapita yachakunqämannömi imëkachö masraq cambianäpaq kaqta cuentata qokurqä. 1 Corintius 6:10 textuchömi kënö nin: “Suwakoqkuna, imatapis ërayëpa munaqkuna, machakoqkuna, insultakoqkuna y pitapis engañar suwapaqkunaqa manam Diospa Gobiernunta chaskiyanqatsu”. Tsëta leyirmi alläpa waqarqä. Imëkachömi cambianä karqan (Romänus 12:2). Noqaqa alläpa lïsu, ulikoq o llullakoq y imëka mana allikunata ruraqmi karqä.

Teyta Jehoväqa alläpa kuyakoq y perdonakoq kanqantam yachakurqä (Isaïas 1:18). Tsëmi llapan shonqüwan rogarqä, llapan mana alli ruranqäkunata dejanäpaq y vïdäta cambianäpaq yanapamänampaq. Jehovä yanapamaptinmi ichikllapa ichikllapa cambiar qallëkurqä. Y masqa yanapamarqan wätanakunqä shipashwan casakunqämi.

Tsë tiempupaqqa veinticuatru watayoqnam karqä y wamräkunapis kimanam o kimsanam karqan. Pëkunata manteninäpaqmi juk trabäjuta necesitarqä. Manam escuëlata ëwashqatsu karqä y imachöpis trabajashqatsu karqä. Tsëmi Jehoväman yapë mañakurir trabäju asheq ëwarqä. Trabäjuta ashinqächö tapuyämaptinmi, engañakur trabajëta manana munanqäta willakoq kä, höranäqa “Bibliapitam yachakuykä mas alli nuna kanäpaq” nirmi willakoq kä. Peru manam pipis trabajanäpaq chaskimarqantsu. Peru juk kutichöqa imanö kawakunqäta willaptïmi, juk nuna kënö nimarqan: “Manam musyätsu imanir contratanaqpaq kaqta peru contratashqëkim”. Tsëchömi cläru rikarqä mañakunqäta Jehovä wiyamashqa kanqanta. Tiempuwannam Jehoväpa testïgun kayänäpaq warmïwan bautizakuyarqä.

Kanan kawëkänäpaqqa Bibliachö consëjukunata cäsukunqä y Jesus ruranqanta ruranqämi yanapamashqa. Kananqa alli familiayoq y alli concienciayoqmi kawakü, y Jehovä perdonamashqa kanqantam següru këkä.

Catorci watakunapanam cäsi llapan tiempüwan nunakunata Bibliapita yachatsir yanapakü. Y warmïpis tsënö yanapakurmi qallashqa. Kë qepa treinta watakunachömi veintidos trabajaq mayïkunata Jehoväta sirwiyänampaq yanaparqö. Jatun tiendakunamampis ëwäran, peru manam nunakuna engañaqnatsu, sinöqa Bibliapita yachatsikoqmi. Mëchö këkarpis Diospitam nunakunata parlapä y shamoq tiempuchö ladronkuna manana kanampaq kaqtam yachatsikü (Salmus 37:10, 11).