Diospa amigon kanapaqqa reqinantsikmi. Amigontsikkunaqa musyayanmi shutintsikta, inshiyanmi, ¿razonpaku? Tseno kaqmi, Diospis munan shutinta reqinata, inshinatawan. Diospa shutinqa Jehová ninmi (Salmo 83:18; Mateo 6:9). Musyashwanmi ima kushitsinqanta, ima llakitsenqanta, pi amigon kanqanta, pi chikenqantapis. Ünetaran pitapis alleq reqintsik, Bibliaqa ninmi, allim tiempota rakishwan Jehovata reqinapaq (Efesios 5:15, 16).

Diospa amigonkunaqa rurayan pë kushinqantam. Yarpäriki amiguikikunaman. Mana allipa rikaptiki, mana munanqanta ruraptikiqa, ¿hina amiguikiraqtsuraq kayanman? Manam. Tsemi Diospa amigon keta munarqa, kushitsinqantam ruranantsik (Juan 4:24).

Manam llapan religionkunatsu yanapamantsik Diospa amigon kanapaq. Diospa mas alli amigon Jesusmi, parlarqan ishke nänipaq. Hukmi hätun näni, tsepam ewayan atska nunakuna. Tse nänim apan ushakeman. Hukninnam llanulla näni, tsepaqa ewayan wallkaqllam. Kë nänim apan wiñeypaq kaweman. Tsemi Diospa amigon keta munarqa musyanantsik, imano alli adorana kanqanta (Mateo 7:13, 14).