ISRAELÏTAKUNAWANSHI Moisés Canaanman yëkïta munanaq. Tsëshi, ‘alli markata rikärinäpaq Jordán mayuta tsimparatsimë Jehová,’ ninaq. Pero ‘¡tsëllana! ¡Ama yapë tsëta nimënatsu!,’ nishpash ninaq Jehová. ¿Imanir-raq tsënö nerqan?

Qaqata takanqanchö pasanqampitash. Yarpaptikeqa manash Jehoväta honrayänaqtsu Moiseswan Aarón. Manash tsë qaqapita yakutaqa, ‘Jehovämi horqamushqa,’ niyänaqtsu. Tsëshi, ‘Canaanman yëkuyänëkita manam haqiyashqëkitsu,’ ninaq Jehová.

Aarón wanurishqanllachönash Moisesta: ‘Llapan nunakunapa y Eleazar sacerdötepa nöpanman Josuëta churë. Y kananqa mushoq pushayäshoqnikikuna o lïderqa kanqa Josuëmi,’ nishpa ninki ninaqshi Jehová. Dibüjochö rikëkanqëkinöshi Jehová nenqannölla ruranaq Moisés.

Tsënash: ‘Ama mantsakëtsu, alleq tsarakï. Canaán änikonqä markamanmi pushanki llapan israelïtakunata, qamwanmi këkäshaq,’ nishpash ninaq Jehová Josuëta.

Tsëpitanash, Moab markachö Nebo nishqan hirkaman alli rarayaq lloqanampaq ninaq Jehová Moisesta. Tsë hirkapita patsëshi, Jordán mayu washaninchö selläma shumaq Canaán markayaq rikärinaq Moisés. ‘Abrahán, Isaac y Jacobpa tsurinkunata änenqä markam kë. Permiterqömi rikänëkita, pero manam yëkunkitsu,’ nishpash ninaq Jehová.

Tsë Nebo hirkachöshi wanurinaq Moisés 120 watayoq këkar. Alliraqshi rikëkänaq y alli kallpayoqllaraqshi kanaqpis. Tsëshi llapan israelïtakuna llakirnin alläpa waqëkuyänaq Moisespaq. Tsënö këkarpis mushoq pushaqninkuna Josué kaptinshi alläpa kushïkuyänaq.