Bandera saludë. Jehoväpa testïgonkunapaqqa cantallapa bandera saludëqa manam allitsu, nacionninkunata y nacionninkunapa dirigeqninkunata imëka salvakoq Diostanö adorayaptin (Isaías 43:11; 1 Corintios 10:14; 1 Juan 5:21). Tsënömi Babiloniapa reynin Nabucodonosor nishqan nunatapis adorayarqan. Hatun këninta, poderoso këninta, y mandakoq këninta rikätsikurmi huk hatun imägenta ruratserqan, y müsicata tocar qallëkuyaptin llapan nuna qonqurikïkur adorayänampaqmi mandarqan. Pero kimaq hebreukunaqa —Sadrac, Mesac y Abednego— mana adorayanqampita wanutsiyänanta musyëkarnimpis, manam tsë imagen nöpanman qonqurikuyarqantsu (Daniel, capítulo 3).

¿Tiempontsikchöpis tsënö adorëllatsuraq? El nacionalismo: una religión nishqan libro qellqaq nunam kënö nerqan: “Banderaqa nacionpa huk preciso señalninmi, y adorayänampaqmi [...] nunakunaqa tsukunkunata horqayan tsëta saludarnin y wakinkunanam qellqayan poesïakunata y wambrakunanam cantayan himno nacional nishqanta”. Hina kë libroqa willakun cada nación fiestankuna rurayanqantam. “Cada watam Perüchöqa 28 de julio killachö celebrayan kë fiestata y nacionnimpaq peleëkar wanushqakunapaqpis yarpäyan kë killachömi”. Tsënöllam hina willakun Mexicopa Diario Oficial de la Federación, nishqampis “Escudo, Bandera y Himno Nacional” nacionkunapa señalnin kanqanta, tsëmi willapan nunakuna tsë señalkunata adorayänampaq.  Y The Encyclopedia Americana nishqannam willakun, “Banderaqa cruznölla sagrado kanqanta”.

Tsëpitanam hina kë librolla willakun, himno nacional cantëqa “markankunata y dirigeqninkunata Dios yanapanampaq” rezaki cuenta kanqanta. Tsëmi, manam Jehoväpa testïgonkunallatsu bandera saludëpaq y himno nacionalpaq huk adoracionmi nintsik. Jehová Diosta adoraq alumnokuna Estados Unïdoschö bandërata mana saludayanqampita y himno nacionalta mana cantayanqampita, hatusaq juiciokunaman chäyanqantam, Genio y figura del norteamericano nishqan librochö huk profesor willakun: “Corte Suprema nishqanmi bandera saludë y himno nacional cantëqa rasumpa huk adoración kanqanta nin”.

Jehoväpa testïgonkunapis alleqmi musyantsik tsë rurëkunaqa Teyta Diospaq mana alli kanqanta, tsënö kaptimpis wakinkuna rurakuyänantaqa manam michantsiktsu. Y nacionnintsikpa señalninkunataqa respetantsikmi y “mandamaqnintsic autoridacunata[pis]” wiyakuntsikmi “Dios churashqa captin[...]” (Romanos 13:1-4). Hina “mañacushun jinantin nasioncho gobiernucunapaq y autoridacunapaq” nishqan mandätotapis wiyakuntsikmi. Tsëtaqa rurantsik “alli pasaquicho imapaqpis mana yarpakachashpa, Diosnintsicta respetarnin pe munashqanno” kawakunarëkurmi (1 Timoteu 2:2).

Autoridadpaq votacionkuna. Rasumpëpa cristiänokunaqa nuna mayinkuna hukta yanapar votakuyänantaqa manam michäyantsu. Ni manam propagandata rurar imatapis qarakur pëpaq votayanki nishpa puriyantsu, tsënö karpis yëkoq kaq autoridadtaqa respetayanmi. Y manam ni pipa lädonman ni contran churakäyantsu (Mateo 22:21; 1 Pedru 3:16). Pero nacionninkunachö autoridadkuna votayänampaq obligayaptinqa ëwayanmi. Tsënömi rurayarqan Sadrac, Mesac y Abednego nishqan jövenkunapis, Dura nishqan pampamanmi ëwayarqan imägenta adorayänampaq rey mandakuptin, pero ëwarnimpis manam adorayarqantsu. Tsëmi votaq ëwëkarnimpis, cristiänokunaqa yarpäyänan Teyta Diospa willakïninkunaman. Rikärishun kë hoqta willakïkunata:

1.   “Qamcunaqa manam tsenotsu cayanqui, noqa acrashqa cayapteq” (Juan 15:19).

2. Noqantsikqa “Jesucristupa cachancuna” o mandakushqankunam kantsik (Juan 18:36; 2 Corintios 5:20).

3. Diospa markanchöqa llapantsikpis “juc shonqullam” kantsik y huknöllam kuyanakuntsik (1 Corintios 1:10; Colosenses 3:14).

4. Autoridad kanampaq pipaqpis votarnenqa, mana alli rurëninkunatapis yanapëkantsikmi, y culpayoqmi kantsik (masta musyarinëkipaqqa rikë kë textokunata 1 Samuel 8:5, 10-18 y 1 Timoteu 5:22).

5. Huk nunata gobernayämänampaq churamï nishpa israelïtakuna mañakuyaptinmi, Jehová Dios alläpa piñakorqan pëpa gobiernonta manana munayaptin (1 Samuel 8:7).

6. Diosnintsikpa Reinompitaqa llapan nunakunatam willapëta munantsik, ima polïticapita kayaptimpis (Mateo 24:14; 28:19, 20; Hebreus 10:35).

Tröpaman ëwanampa rantin hukkunata ruratsiyanqan. Wakin nacionkunachöqa jövenkuna tröpaman mana ëwëta munayaptinmi, huk trabäjokunata rurayänampaq autoridadkuna mandakuyan. ¿Imatataq rurashwan markantsikchö tsënö kaptenqa? Jehovämanmi mañakunantsik y poqu cristiänokunatam tapunantsik yanaparamänapaq. Tsënöpam Bibliawan alli yachatsishqa concienciantsikwan alli kaqta rurashun (Proverbios 2:1-5; Filipenses 4:5).

Diospa Palabranqa kënömi cristiänokunata willapan, “nasioncho mandacoqta y marcancunacho autoridacunata cäsucur cawacuyänanpaq, y mana qelanashpa imatapis ganas ganaslla alli rurayänanpaq, [...] piwan mewanpis qollmi shonquncunawan shumaq cawa[cuyanampaq]” (Titu 3:1, 2). Kë textoman yarparmi tsë trabäjoman manaraq ëwar tapukunan: “¿Jehoväta sirvenqä rakchatakärenqatsuraq polïticakunawan y mana alli religionkunawan?” (Miqueas 4:3, 5; 2 Corintios 6:16, 17). “¿Jehoväpaq rurana kaqta cumplishaqtsuraq tsë trabäjoman ëwarnenqa?” (Mateo 28:19, 20; Efesios 6:4; Hebreus 10:24, 25.) “¿O mastsuraq tiempö kanqa Jehoväpita willapäkunapaq, reunionkunaman  ëwanapaq, Bibliata leinapaq y precursorpis karishaqraqtsuraq?” (Hebreus 6:11, 12.)

Huk cristiano carcelman ëwanampa rantin, huk trabäjokunaman ëwëta munaptenqa manam cristiano mayinkuna michäyanmantsu (Romanos 14:10). Tsënöllam hina conciencian mana permitiptin tsë trabäjokunaman ëwëta mana munaptimpis respetayanman rurëkanqanta (1 Corintios 10:29; 2 Corintios 1:24).