1, 2. ¿Imanirtaq kuyantsik Jehová Diosta?

¿DIOSTA kuyankiku? Shonqïkipita patsëchi awmi ninkiman Jehová Diosta qamllapaqnam kashaq nishqa karqa. Noqantsikpaqqa imëpis allim Dios kuyëqa. Rasumpëpaqa Pë kuyamanqantsikpitam kuyantsik. Biblia nenqannö: “Puntata Dios cuyamashqantsic captinmi, noqantsicpis peta cuyantsic” (1 Juan 4:19).

² Jehová Diosqa imëkanöpis kuyakïninta rikätsimënintsiktam tïran. Kawakunapaq huk shumaq patsantsikmi qomarqontsik, y imëkantsikmi qomantsik cada hunaq kawanapaq (Mateo 5:43-48). Hina espiritual kaqtapis qomantsikmi. Palabran Bibliatam qaramashqantsik, y Pëman confiakurnin santo espïrituntapis mañakunapaqmi invitamantsik (Salmo 65:2; Lucas 11:13). Pero más hatun kuyakïnenqa karqan kuyë Tsurinta hutsantsikpita salvamänapaq kachamonqanmi. ¡Imanö hatunmi Jehová Diospa kuyakïnenqa! (Leyi Juan 3:16; Romanos 5:8.)

3. a) ¿Diospa kuyakïninchö imëpis kawanapaq imataraq rurashwan? b) ¿Ima tapukïtataq rurakushwan, y mëchötaq respuestanta tarintsik?

³ Jehová Diosqa munan kuyakïninchö kushishqa imëyaqpis kawanatam. ¿Këkäshuntsuraq kuyakïninchö? Tsëqa kikintsikpitam kanqa. Pero Bibliaqa willamantsik:  “Dios cuyecamashqaqa imepis pe munanqanno cawacuyë [...] Pëmi ancupamarnintsic wiñe kawënintsik qoycamäshun” nishpam (Judas 21). Awmi, Jehová Diospa kuyakïninta mana oqranapaqqa, “imepis” rikätsikunantsik alli rurënintsikkunawanmi. Tsëmi tapukunantsik: “¿Imataraq ruräman shonqüpita patsë kuyanqäta Dios rikänampaq?” Kë tapukïpa respuestanqa këkan apóstol Juan qellqanqanchömi: “Këmi Dios kuyëqa: leyninta wiyanantsik, tsë leyninkunaqa manam utitsikuntsu” (1 Juan 5:3, NM). Diosta alläpa kuyanqantsiktam rikätsita munantsik, tsëmi kë texto nenqanta yachakurishun.

4, 5. a) Diospa kuyënimpaq parlarqa, ¿ima nïtataq munarqan Juan? b) ¿Imanötaq shonqïkichö Diosta kuyanqëki winashqa? Willakaramï.

⁴ Kë versïculochö Diospa kuyënimpaq parlarqa, ¿ima nitataq munarqan Juan? Manam Dios kuyamanqantsikpaqtsu, sinöqa noqantsik Pëta kuyanqantsikpaqmi. Rasumpëpaqa yarparëkankichi shonqïkichö Diosta kuyar qallanqëkita.

⁵ Diospita yachakur qallanqëki tiempokunaman yarpäri. Jehová Diospita y ruramunampaq kaqpita yachakurninmi Pëman más confiakur qallëkorqëki. Hina musyarerqëkim llapan nunanö hutsasapa yurenqëkita, tsënöpa Diospita karuchö këkanqëkitapis; tsënö kaptimpis Tsurin Jesucristuwan salvashunëkitam änishorqëki, Adán hutsata manaraq rurar kawanqannö kushishqa kawakunëkipaq (Mateo 20:28; Romanos 5:12, 18). Hina yachakorqëkim, Jehová, kuyë Tsurinta qamrëkur wanunampaq kachamonqanta. Tsë musyanqëkim yanapashorqëki shonqïkipita patsë Jehová Diosta kuyanëkipaq (leyi 1 Juan 4:9, 10).

6. ¿Imanötan rikätsikuntsik rasumpëpa kuyakïta, y imatataq rurarqonki Diosta kuyarnin?

⁶ Tsënö kaptimpis manam rasumpëpa kuyakïraqtsu kashqa. ¿Imanir? Rasumpëpa kuyakïqa manam “Diostam kuyä” ninanllatsu. Imanömi fënintsikta rurënintsikwan rikätsikuntsik, tsënöllam hina rikätsikuntsik rasumpëpa kuyakïtapis (Santiagu 2:26). Awmi, pitapis kuyarqa kushitsinqantam rurëta munantsik. Tsënömi shonqïkipita patsë Diosta kuyar qallëkorqa, Dios munanqannö kawar qallarqëki. Itsachi Testïgon kanëkipaq bautizakurerqëki. Tsënö rurashqa karqa rikätsikorqëki rasumpëpa kuyanqëkitam, y Pë munanqanllatana llapan kawënikichö ruranëkipaq  änenqëkitam (leyi Romanos 14:7, 8). Pero apóstol Juan nenqannömi änenqantsikta cumplinapaqqa mastaraq ruranantsik, tsëtam rikäshun qateqnin pärrafokunachö.

7. ¿Mëqankunataq kayan Diospa wakin leyninkuna, y wiyakurnenqa imataraq rurashwan?

⁷ Diosta kuyarqa ‘leynintam wiyanantsik’ nimantsikmi Juan. ¿Mëqankunataq kayan leyninkunaqa? Bibliachöqa atskatam tarintsik. Wakin wakin prohibenqankunaqa kayan: Machakï, hukwan hukwan punukï, imägenkuna adorë, suwakï, ulikï o llullakï (1 Corintios 5:11; 6:18; 10:14; Efesios 4:28; Colosenses 3:9). Diospa mandamientonkunata wiyakorqa kawanantsik Biblia nenqannömi.

8, 9. ¿Imanötaq musyashun ruranqantsikkuna Jehová Diospaq alli o mana alli kanqantapis Bibliachö leynö mana qellqarëkaptenqa?

⁸ Diosta kushitsinapaqqa manam Bibliachö qellqarëkaq leykunallatatsu wiyakushwan. Cada hunaq kawënintsikchömi imëkatapis rurantsik, y manam llapan ruranqantsikpaqtsu Bibliachö leykuna qellqarëkan. Tsëpenqa, ¿imanötaq musyashwan ruranapaq akranqantsikkunapita Jehová kushikonqanta o mana kushikonqantapis? ¿Y mëchötaq yanapakïta tarintsik Dios munanqannö ruranapaq? Bibliallachömi. Shumaq estudiarqa, tarintsik Jehová Dios kuyanqan y chikenqan rurëkunatam (leyi Salmo 97:10; Proverbios 6:16-19). Tsënöpam musyashun ima rurëkuna y portakïkuna kushitsinqanta. Jehová imanö kanqanta más reqenqantsikmanmi, tanteashun imakunatapis ruranqantsik Jehová Diosta kushitsinqanta y mana kushitsinqantapis. Tsënöpam alleq musyashun ‘Diospa boluntaninpaqno’ kanqanta, ruranqantsikkunapaq  leykuna Bibliachö mana kaptimpis (Efesios 5:17).

⁹ Rikärishun, Bibliachöqa manam tarintsiktsu leykunata mana alli pelïculakunata mana rikänapaq. ¿Pero leykunataraqku wanantsik tsëkunata mana rikänapaq? Musyantsiknam Jehová ima nenqantapis. Palabranchömi claro nikan: Pëqa “chikinmi maqakoqkunata, maqakita munar qayapäkoqkunatapis” y “mana majäcushpa jucwan jucwan cacoqtaqa [...] Diosmi cuentata mañanqa” (Salmo 11:5; Hebreus 13:4). Bibliachö qellqarëkanqankunaman alleq pensarqa tanteashunmi Jehová munanqanta. Tsëmi, Jehová chikenqan mana alli pelïculakunataqa rikëta munantsiktsu. Kë mundoqa mana allikunawanmi engañamënintsikta tïran, pero Jehoväqa kushikun tsëkunata mana rikashqam. *

10, 11. ¿Imanirtaq imëpis Jehová Diosta wiyakïta munantsik y qelanëkarku rurashwan?

¹⁰ ¿Imanirtaq Jehová Diospa mandamientonkunata wiyakuntsik? O huk parlakïchöqa, ¿imanirtaq Jehová munanqannö cada hunaq kawëta munantsik? Manam castigamänantsikta mantsar o hipakïkunata mana munarllatsu (Gálatas 6:7). Sinöqa, alläpa kuyanqantsikta rikätsirmi wiyakuntsik. Imanömi wambrakuna imatapis rurarqa teytankuna allim niyänanta munayan tsënöllam noqantsikpis Teytantsik Jehová ruranqantsikkunapita allim nimänantsikta munantsik (Salmo 5:12). Pëqa Teytantsikmi y alläpam kuyantsik. Y alläpam kushikuntsik ruranqantsikkunapita y portakïnintsikkunapita ‘favorninta chaskinantsikta’ musyar (Proverbios 12:2).

 ¹¹ Tsëmi Jehová Diostaqa mana munëkarqa o imatapis munarllaqa ni gustamanqantsiknöllaqa servinantsiktsu. * Wiyakorqa llapanchömi wiyakushwan y manam akranantsik fäcilninllatatsu. Tsëpa rantenqa llapan shonquntsikwanmi willakïninkunata chaskinantsik (Romanos 6:17). Salmista nenqannömi “mandamientïkikunata kuyämi” ninantsik (Salmo 119:47). Awmi, Jehová Diostaqa shonquntsikpita patsëmi kushishqa wiyakuntsik. Y alleqmi musyantsik mana qelanashpa pëllata wiyakunantsikta (Deuteronomio 12:32). Noënömi këta munantsik, pëqa llapan kawëninchömi Diosta wiyakorqan, tsënöpam rikätserqan shonqumpita patsë kuyanqanta. Tsënö rurashqam noqantsikpitapis niyanqa Noëpaqnö: “Dios llapan mandanqantam rurarqan. Nenqannömi rurarqan” (Génesis 6:22).

12. ¿Imata rurartaq Jehová Diosta kushitsintsik?

¹² ¿Jehová kushikuntsuraq shonquntsikpita patsë wiyakushqa? Awmi, shonquntam kushitsintsik nimantsikmi Bibliaqa (Proverbios 27:11). Pero ¿rasumpëpaqa kushitsita puëdentsiktsuraq Ciëlota y Patsata Gobernaq Diosta? Awmi, Rikärishun. Jehová Diosqa ruramashqantsik, imata ruranapaqpis kikintsik akrakunapaqmi. Tsënöpam noqantsikqa Dios Yayata wiyakïta o mana wiyakïtapis akrakïta puëdentsik (Deuteronomio 30:15, 16, 19, 20). Tsëmi, kawënintsikchö shonquntsikpita patsë kuyarnin allikunata imatapis rurarqa, Jehová Diosta alläpa kushitsishun (Proverbios 11:20). Hinamampis tsënö rurarqa Diosnintsik munanqannömi kawëkantsik.

13, 14. ¿Imanirtaq Jehová Diospa “leyninkunaqa manam utitsikuntsu” nintsik, y imataq yanapamantsik alleq tanteanapaq?

¹³ Tsëpitanam apóstol Juan kushiratsimantsik, “tsë leyninkunaqa manam utitsikuntsu” nishpa. 1 Juan 5:3 NM, nishqanchö “utitsikuntsu” ninanqa grieguchöqa manam “lasantsu” ninanmi. * Tsëmi huk Bibliaqa, mandakïninkunaqa manam “ajatsu” o sasatsu nishpa nin (Señor Jesucristopa Alli Willacuynincuna Conchucos Quechua — Norte). Jehová Diosqa manam mañamantsiktsu mana rurëta puëdenqantsiktaqa. Hutsasapa këkarnimpis leyninkuna cumplitaqa puëdentsikmi.

¹⁴ Yarpakurkï, kuyashqa amïguïki huk wayiman ëwakunman täraq y nirishunkiman cösasninkuna ashtapakïta yanaparinëkipaq. Y cösasninkunaqa lasaqpis y ankashpis kanmi, y amïguïkiqa mëqankunata apanëkipaqpis nishunkim. Pero kallpëki tinkulla apanëkitam munan, mana puëdenqëkitaqa manam, alläpa lasaq kaqwan malograkurinëkita musyar. Tsënöllam kuyakoq Diosnintsikpis, mana puëdenqantsik rurëkunataqa manam mandamantsiktsu (Deuteronomio 30:11-14). Tsëmi mana cumplipaqtanöqa leyninkunata imëpis churamuntsu. Jehová Diosqa musyanmi mëyaq puëdenqantsikta y mëyaq chänantsiktapis, hinamampis “musyanmi imanö rurashqa kanqantsikta, y yarpanmi allpa kanqantsikta” (Salmo 103:14).

15. ¿Imanirtaq Diosnintsikpa mandamientonkunaqa kikintsikpa biennintsikpaqmi nintsik?

 ¹⁵ Jehová Diospa mandamientonkunaqa manam imanöpapis utitsikuntsu, tsëpa rantenqa kushikïnintsikpaqmi (leyi Isaías 48:17). Moisesmi nerqan israelïtakunata: “Jehovämi mandamarqantsik llapan leyninkunata wiyakunapaq [...] Jehová Diosta llakitsita mantsar”. Tsëpitanam yaparerqan: “Kikintsikpaqmi y imëpis kawëkänapaqmi” nishpa (Deuteronomio 6:24). Noqantsikpis musyantsikmi Jehová Diospa leyninkuna wiyakïqa imëyaqpis kushishqa kawakunapaq kanqanta. ¿Imanirtaq tsënöqa nintsik? Jehová Diospitam shamun y alläpa yachaq karmi musyan biennintsikpaq kanqanta (Romanos 11:33). Hinamampis kuyakoq Diosmi (1 Juan 4:8). Kuyakoq kaptinmi kuyakïnenqa llapan ruranqanchö y mandamientonkunachöpis rikakun.

16. Imëka mana allikuna lädonchö tärëkarpis, y hutsasapa këkarnimpis, ¿imanirtaq Diosta wiyakushwan?

¹⁶ Pero Diospa mandamientonkuna wiyakïqa manam fäciltsu. Alleqmi tsarakunantsik kë mundopa mana alli rurëninkunaman mana ishkinapaq, Biblia nenqannöpis llapampis “diablupa muneninchomi caquicayan” (1 Juan 5:19). Y hutsasapa kënintsik mana allikunaman ishkitsimänatapis manam haqinantsiktsu (Romanos 7:21-25). Mana alli rurëkunaman mana ishkinapaqqa, yanapamäshun Diosta kuyanqantsikmi. Jehová Diosqa bendecinmi kuyarnin wiyakoqkunata. Awmi, ‘cäsucoqnincunamanmi Dios cachamushqa Santo Espiritunta’ nimantsikmi Bibliaqa (Hechos 5:32). Y tsë espïrituqa, yachanëpaq, alli kanapaq y Diosta wiyakunapaqmi yanapamantsik (Gálatas 5:22, 23).

17, 18. a) ¿Imatataq yachakushun kë librochö, y imatataq yarpashwan këpita yachakurnin? b) ¿Imapitaraq yachakushun qateqnin capïtulochöqa?

 ¹⁷ Kë librochömi yachakushun Jehová imatapis ruranantsikpaq willapämanqantsikta y maskunatapis. Tsëpaqmi yarpänantsik: Jehová Diosqa leyninkunata y willapämanqantsikkunata mana munëkar wiyakunataqa mana munanqanta, pero shonquntsikpita patsë wiyakunantsiktaqa munanqanta. Hina yarpänantsikmi, wiyakushqaqa atska bendicionkunata kanan tiempopaq y shamoq tiempopaqpis änimanqantsikta. Y mana wanushpa kawakïtapis. Y shonquntsikpita patsë Jehová Diosta wiyakur alläpa kuyanqantsikta rikätsenqantsiktapis yarpänantsikmi.

¹⁸ Alli kaqta o mana alli kaqta alleq tanteanapaqqa Jehová qaramarqontsik huk shumaq qarëtam: concienciata. Tsënö kaptimpis concienciantsik alleq yanapamänapaqqa alleqmi yachatsinantsik, tsëtaqa qateqnin capïtulochömi yachakushun.