1. ¿Imapaqtaq Jesus parlarqan wanunampaq ichikllana pishikaptin?

WANUNAMPAQ ichikllana pishikaptinmi, Jesus, qateqninkunapaq alläpa yarparanqanta rikätsikorqan. Tsëmi, Yayan Jehová Diosman mañakorqan: “Manam nunacunapita raquicacuriyänanpaqtsu mañacoq, sinoqa llutan rurecunapita wardecunequipaq. Noqaqa manam que patsa nunacunanotsu cä. Y pecunapis manam que patsa nunacunanotsu cayan” nishpa (Juan 17:15, 16). Tsënö shonqumpita patsë mañakurmi rikätsikorqan qateqninkunata alläpa kuyanqanta, hina tsë paqaslla “noqam akrayarqoq mundupita” nenqanqa alläpa precïsom karqan (Juan 15:19, QKW). Rikanqantsiknöpis, Jesuspaqqa alläpa precïsom karqan qateqninkuna mana alli rurëkunapita rakikashqa kayänan.

2. “Mundo” nerqa, ¿imapaqtaq Jesus parlëkarqan?

² “Mundo” nerqa, ¿imapaqtaq parlëkarqan? Jehová Diospita rakikashqa y Satanaspa munëninta ruraq chiki y nunatukoq nunakunapaqmi (Juan 14:30; Efesios 2:2; 1 Juan 5:19). Tsëmi Bibliaqa alleq tanteatsimantsik ‘pipis que munducho quecaqcunallata cuyarnenqa, Dios Yayapa chiqueqnin’ tikrarenqanta (Santiagu 4:4). Pero noqantsikqa imëpis Diospa kuyakïninchö këtam munantsik, tsëmi alleq tanteanantsik kë mundochö këkarnimpis mana alli rurëninkunaman mana takukänapaq. Tsëpaqqa rikärishun pitsqa yanapakïkunatam: 1) Jehová Diospa Gobiernonman confiakïta y mundopa gobiernonkunapa rurëninkunaman mana takukëta, 2) kë mundopa mana alli rurëninkuna chikita, 3) sencillulla vestikïta, 4) alli nawiyoq këta, 5) Dios qomanqantsik armadura apëta.

3. a) ¿Imatataq Jesus rurarqan gobiernokunapa rurëninkunaman mana takukashpa? b) ¿Imanirtaq “cachancuna” nishpa Biblia qayan Jesucristupa akrashqa qateqninkunata? (Rikäri hawanchö uchusaq letrakunawan qellqarëkaqtawan.)

³ Jesusqa manam takukarqantsu tiemponchö gobiernokunapa rurëninkunaman, tsëpa rantenqa Diospa Gobiernompita y shamoq tiempochö rey kanampaqwanmi yachatsikorqan (Daniel 7:13, 14; Lucas 4:43; 17:20, 21). Tsëmi Römapa gobernadornin Poncio Pilato nishqan nunata nerqan: “Noqapa mandaquinïqa manam que patsacho nunacunapa mandaquininnotsu” nishpa (Juan 18:36). Noqantsikpis pënöllam rurëkarqontsik. Diospa Gobiernonman y Jesucristu rey kanqanman confiakurnin, y hinantin Patsachö tsë gobiernopita willapäkurnin (Mateo 24:14). Tsëpaqmi apóstol Pablu qellqarqan: “Noqacunam Teyta Jesucristupa cachancuna cayä, y quiquin Teyta Diosmi permitin willapäyänaqpaq. Tsëmi Teyta Jesucristupa jutincho roguecuyaq, Dioswan amishtayänequipaq” nishpa (2 Corintios 5:20). *

4. ¿Imanötaq Diospa Gobiernonta yanapayanqanta rikätsikuyashqa rasumpëpa cristiänokuna? (Rikë “ Punta cristiänokunaqa manam takukäyarqantsu gobiernokunapa rurëninkunaman” nishqan recuadrota.)

⁴ Cada nacionchömi, huk nación gobiernopa rantin kachamushqan nunakuna kayan. Tsënö huk nacionpa karmi, këkäyanqan nacionchöqa imamampis takukäyantsu. Tsënö karpis kachamushqan gobiernompa leyninkunataqa respetatsiyanmi. Tsënöllam, ‘cielocho’ gobernamoqpaq kaq Jesuspa qateqninkunapis kayan (Filipenses 3:20). Y Jesuspa kachankunaqa willapäkïkäyan Diospa Gobiernompitam. Y kë willapäkïwanmi yanapayashqa ‘ushanö’ o alli shonquyoq nunakunata Jehová Diosta serviyänampaq (Juan 10:16; Mateo 25:31-40). Kë  ‘ushanö’ nunakuna o Patsachö taraqpaq kaqkunam, Jesus akrashqan qateqninkunata yanapayan. Ciëlopaq kaq y Patsapaq kaqpis Diospa Gobiernonllapitam willapäkuyan, y manam ichikllapis takukäyantsu kë Patsachö gobiernokunapa rurëninkunamanqa (leyi Isaías 2:2-4).

5. ¿Imachötaq hukläya kanan tiempo congregación unë Israel markapita, y imataq pasanman markantsikchö gobiernokunata yanapashqaqa?

⁵ Jesusman fiel karllatsu manam gobiernokunapa rurëninkunapita rakikäyan, sinöqa maskunam kan. Noqantsikqa manam unë israelïtakunanötsu huk markallachö tärantsik. Sinöqa llapan Patsachömi këkan wawqintsikkuna y panintsikkuna (Mateo 28:19; 1 Pedru 2:9). Y ¿imaraq pasanman markantsikchö gobiernokunapa rurëninkunaman takukashqaqa? Hinantin Patsachö huk markanölla kanqantsikmi ushakärinman, y tsëqa tukï rikoq nunatapis Diospa Gobiernompita willapëta penqakushwannam (1 Corintios 1:10). Hinamampis huk guerra kaptenqa kuyashqa cristiano mayintsikwanchi wanutsinakïkashwan, Jehová Palabranchö kuyanakunapaq mandëkämashqa (Juan 13:34, 35; 1 Juan 3:10-12). ¡Tsëchi Jesus mandakorqan qateqninkuna guërrata mana rurayänampaq, y chikeqninkunata kuyayänampaq! (Mateo 5:44; 26:52; rikë “ ¿Mana alli rurëkunaman takukäku?” nishqan recuadrota.)

6. Cristiänokuna ‘mandacoq cesarta’ wiyakurpis, ¿pipa kaqtataq puntaman churayan?

⁶ Hinamampis cristiänokunaqa kawëninkunata manam entreguëta puëdeyantsu huk nunata huk warmita ni huk nacionta, Jehová Diosllata kawëninkunata entregashqa karnin. Tsëmi 1 Corintios 6:19, 20 nimantsik: “Mananam qamcunanatsu cuerpiquicunapa dueñon cayanqui, sinoqa Teyta Diosnintsicmi. Tsëpaqmi pë rantimarqontsic” nishpa. Y ‘mandacoq cesar’ mañanqantaqa qoyanmi —Respetayan, impuestota pagayan, y wiyakuyan— pero ‘Diospa caqtaqa Diostam’ qoyan, tsëkaqmi pëkunapaqqa llapampa hanampapis más preciso (Marcos 12:17; Romanos 13:1-7). ‘Diospa caqchoqa’ këkan adorë, llapan shonquwan kuyë, y llapan kawënintsikwan pëllapaq këmi (Lucas 4:8; 10:27; leyi Hechos 5:29 y Romanos 14:8).

7, 8. ¿Pitaq nunakunata inkitëkaq espïrituqa, y imanötaq ruran?

⁷ Hinamampis mundopita rakikëqa mana alli rurëkunata chikir chipyëpa witikïmi. Tsëmi Pablu qellqarqan: “Noqantsekqa manam chaskerqontsik mundupa espirituntatsu, sinowqa Dyospita shamoq Espiritutam” nishpa (1 Corintios 2:12, QKW). Y Ëfesochö cristiänokunatanam nerqan: “Diosta mana cäsucurmi, supëpa mandacoqnin diablupa munashqanta ruracur cawacuyarqequi. Cananpis tse diabluqa Teyta Diosman mana cäsucoq nunacunata mana allicunata rurayänanpaq inquitarmi quecan” nishpa (Efesios 2:2, 3).

⁸ Awmi, kë mana alli espïrituqa Diosta mana wiyakuyänampaqmi nunakunata mana alliman ishkitsita tïran, mana alli munëkunawan, y nawintsik rikanqanta munapëkunawan (1 Juan 2:16; 1 Timoteu 6:9, 10). ¿Imanirtaq kë espïrituqa dominan nunakunata? Hutsasapa këninkunawanmi imëpis ishkitsita tïran, y viento cuentam më tsëchöpis këkan, manam hamantsu. ¿Imanötaq këtaqa ruran? Chiki këta, yachaqtukoq këta, codicioso këta, kikimpa munëninlla rurëta, mana wiyakoq këta, shonqunchö miratsirmi. * Awmi, Diablum munëninta nunapa shonqunman churarirnin winaratsin (Juan 8:44; Hechos 13:10; 1 Juan 3:8, 10).

9. ¿Imanötaq kë mana alli espïritupa munënin pensënintsikman y shonquntsikman yëkunman?

⁹ ¿Kë mana alli espïritupa munënin shonquntsikchö winanmantsuraq? Awmi, alkäbulla mana këkashqaqa winarinmanmi (leyi Proverbios 4:23). Qallananchöqa itsa tanteashwantsu. Höraqa shonquntsikman yëkurinman Jehová Diosta mana kuyaq allitukoq amïgokunawanmi (Proverbios 13:20; 1 Corintios 15:33). Y llutanta parlaq librokunawan, Internet nishqanchö qalapacho y mana allikunata rurëkar yarqamoq imägenkunawan, Diospita rakikärir contran parlaqkunawan, gananakïta munar mana alli pukllakunawan, y imëka rurëwampis Satanaspa munënin kaqkunawanqa yëkaramunmanmi shonquntsikman.

10. ¿Imatataq rurashwan mundopa espïritumpita chipyëpa witikunapaq?

 ¹⁰ ¿Imatataq rurashwan mundopa mana alli espïritumpita witikunapaq y Jehová Diospa kuyakïninchö imëpis kawanapaq? Jehová qomanqantsiktam alleq yachakïkashwan y rurëkashwan, hinamampis santo espïritunwan yanapamänapaqmi imëpis mañakïkänantsik. Kë mundo y pushaqnin Diablu poderoso kaptimpis, yarpänantsikmi Jehová Diosqa más poderoso kanqanta (1 Juan 4:4). Tsëmi Jehová Diosman mañakïtaqa imëpis haqinantsiktsu.

11. ¿Imanötaq vestikuyanqanchö rikätsikuyan mana alli espïritupa munëninta rurayanqanta?

¹¹ Kë mana alli espïrituqa rikakun nunakunapa altsapäkïninkunachö, vestikïninkunachö y qacha, qanra kayanqankunachömi. Wakin markakunachöqa alläpa melanëpaqmi vestikuyan. Tsëmi televisionchö parlaq nunapis nerqan, kanan tiempo warmikuna vestikuyanqanqa manam cuerponkunatapis tsapannatsu, tsënö vestikuyaptenqa, qellërëkur hukwan hukwan kakoq warmikunaqa manachi imanö vestikïtapis puëdeyanqanatsu. Tsënöllam hina huk willakoqkunapis “ichikllanlla ropa y penqakï kantsu” niyan, y këtaqa rikantsikmi wambrakunachöpis. Y wakinkunanam altsapäkuyantsu lluta munayanqannö melanëpaq purikïkäyan, tsëchönam rikätsikuyan kikinkunata mana kuyakuyanqanta ni respetakuyanqanta.

12, 13. ¿Ima consëjokunatataq wiyakunantsik vestikïnintsikchö?

¹² Noqantsikqa Jehová Diostam servintsik, tsëmi reunionman ëwanapaq, willapäkoq ëwanapaq, mëchö këkarpis shumaq y limpiota vestikunantsik y allim altsapäkunantsikpis. Më tsëchö këkarpis “sensillullata y normalllata[m]” vestikuntsik y ‘allicuna rurëllatam tirantsic’. Tsënöpam warmita y ollqutapis rikamaqnintsikkuna vestikïnintsikpita reqimäshun Jehová Diosta servinqantsikta. Vestikïnintsikpita y altsapäkïnintsikpita nunakuna alabamänantsiktatsu manam munantsik, sinöqa Jehová Diospa kuyakïninchö kawakïtam munantsik (1 Timoteu 2:9, 10; Judas 21). Tsëmi apóstol Pedru nerqan: “Shonqiquicunacho yarpacachäyë shumaq alli kawakïpaq. Tseno cawacurnenqa, Diospa riqueninchopis allapa valeqmi quecayanqui” nishpa (1 Pedru 3:3, 4).

¹³ Hina shumaq vestikïnintsikmi nunakunata rikätsenqa rasumpëpa religión imanö kanqantapis. “Sensillullata” nerqa, altsakïchö y vestikïchö wakinkunata respëtowan rikë ninanmi. Tsëmi kikintsikpa munënintsikllataqa ashishwantsu sinöqa rikashwan hukkunapa concienciantam. Y más alliqa Jehová Diospa shutinta y markanta respetanqantsikta vestikïnintsikwan rikätsikïmi, tsëmi imëkatapis “Dios  cushicunanpa caqta yarpakachar” ruranantsik (1 Corintios 4:9; 10:31; 2 Corintios 6:3, 4; 7:1).

14. ¿Ima tapukïkunatataq rurakunantsik vestikïnintsikpita y limpio kënintsikpita?

¹⁴ Ëllukäna Wayiman yachakunapaq ëwarnin y willapäkoq ëwarnenqa limpio y alleq altsapäkushqam ëwanantsik. Tsëmi tapukunantsik: “¿Qacha qanra kanqäpitaku y vestikïnïpitaku rikapäyäman? ¿Rikëkamarnï penqakuyanku? ¿Munanqänöllaku vestikïta y altskïta tïrä? O ¿Biblia nenqan cosëjokunataku wiyakü congregacionchö yanapakoq imëllapis churayämänampaq?” nishpa (Salmo 68:6; Filipenses 4:5; 1 Pedru 5:6).

15. ¿Imanirtaq kuchumpita kuchunyaqtsu Jehová willamantsik imanö vestikunapaq, altsapäkunapaq y limpio kanapaqpis?

¹⁵ Imanö vestikunapaq y altsapäkunapaqpis Jehová Diosqa manam kuchumpita kuchunyaqtsu willamantsik Palabran Bibliachö. ¿Imanir? Pëqa manam obligamënintsiktatsu munan, sinöqa alleq pensëkur kikintsik akrakunatam, y Palabran Bibliata leirnin poqu cristiano kanatam munan, tsënöpam imë hörapis musyashun, allita o mana allita rurëkanqantsiktapis (Hebreus 5:14). Y këtaqa ruranantsik Jehová Diosta y nuna mayintsikta kuyarninmi (leyi Marcos 12:30, 31). Pero tsënö kaptimpis tukï rikoq röpakunatam yakakuyan, tsëtaqa rikanki më tsëchöpis asamblëakunaman ëwarninmi y llapantapis kushishqallatam rikanki.

16. ¿Imakunachötaq kë mundopa espïritunqa Jesus yachatsikonqampa contran y ima tapukïkunatataq rurakushwan?

¹⁶ Kë mundopa espïritunqa mana allimanmi ishkitsikun. Qellëchö y cösaskunachö kushikïta ashiyänampaqmi animan llapan nunata. Tsënö kaptinmi Jesus nerqan: “¡Paqtaraq yö! Mallaqäcoq cayanquiman, tsëpita cuidakuyë. Nunacuna alli cawayänanpaqqa manam presisantsu capoqyoqraq cayänan” nishpa (Lucas 12:15). Jesus tsënö nerqa manam pasëpa waktsa kakuyänampaqtsu nerqan. Pero yachatserqanmi imanö kushikïta y salvacionta tariyänampaqpis, kënömi nerqan: “Cushishgam cawacuyanga tayta Diosllaman imaypis mañacur cawag runacunaga” tsëpitapis nerqanmi, “Nawiquicunam imeca chiuchino qamcunapaq. Tsëmi nawiquicuna alli captenqa, actsichono cayanqui” (Mateo 5:3, Mushog Testamento Conchucos Sur; 6:22). Tsëmi tapukushwan: “¿Rasumpëpaku creï Jesus yachatsikonqanman o Satanaspa munënintaku  rurëkä?” (Juan 8:44). “¿Imanö kanqätataq rikätsikun, parlanqä, munanqä, ashinqä y kawanqä?” nishpa (Lucas 6:45; 21:34-36; 2 Juan 6).

17. ¿Ima bendicionkunatataq tarishwan Jehoväpa kaqta puntaman churarnenqa?

¹⁷ Jesusmi nerqan: “Diospa acrashqancunaqa ricatsicuyan alli rurenincunawanmi Diospa yacheninta” (Mateo 11:19). Jehoväpa kaqta puntaman churarnenqa, ¿kushishqatsuraq kawayanqa? Awmi, alläpa kushikïtam tariyan Jehová Diosta servirnenqa (Mateo 11:29, 30). Manam alläpa yarparëninkuna, problëmankuna, ni nanatsikïninkuna kanqanatsu (leyi 1 Timoteu 6:9, 10). Ni alläpa ashiyannatsu cösaskunatapis, tsënöpam más tiemponkuna kanqa castankunata y cristiano mayinkunata yanapayänampaq, hinamampis kushishqam punukuyanqa imapaqpis mana yarparar (Eclesiastés 5:12). Tiemponkunawan y cösasninkunawampis nuna mayinkunatam yanapayanqa y kushishqam kawayanqa (Hechos 20:35). Hinamampis masmi ‘marcäcuyanqa’ o yärakuyanqa Jehová Diosman y shonqunkunachöpis yamë y kushishqam kayanqa (Romanos 15:13; Mateo 6:31, 32). Rasumpëpaqa, kënö shumaq kawakïqa huk bendicionmi y manam ni mëchöpis tarishwantsu.

18. ¿Imatataq Biblia willamantsik chikimaqnintsik espïritupita, y imanötaq tsë peleaqa?

¹⁸ Satanasqa kanan tiempo kushishqa kawakonqantsikta y shamoq tiempochö mana wanushpa kawakunapaq shuyaranqantsikta haqinatam munan, pero Jehová Diospa kuyakïninchö kawëkanqantsikmi tsapämäshun, Satanás ishkitsimënintsikta munanqampita (1 Pedru 5:8). Apóstol Pablum willakorqan: “Noqantsicqa manam nuna puratsu pelyecantsic, sinoqa mana ricanqantsik puedeq supecunawanmi, diabluwanmi y tse diablupa mandaduncuna ruraq demoniucunawanmi. Pecunam jinantin munducho nunacunata llutanta ruratsiquican” nishpa (Efesios 6:12). “Pelyecantsic” nerqa rikätsikun ishkaq tsarinakurkur peleëkaqpaqmi, y manam  karullapita peleaqpaqtsu. Hinamampis chikimaqnintsik espïritukunapaq parlarmi Pablu nerqan “diablupa mandaduncuna ruraq” “jinantin munducho” nishpa. ¿Imanö kanqantataq këqa rikätsimantsik? Satanaswan demonionkunaqa mana alliman ishkitsimänapaq imë horapis listo këkanqantam.

19. Mëqankunataq kayan Teyta Dios qomashqantsik armakuna.

¹⁹ Kë espïritupanö podernintsik mana kaptimpis vencita puëdentsikmi. ¿Imanö? “Teyta Dios qomashqantsic llapan armacunawan prebinicur listo quecayë” nishqan consëjota wiyakurnin (Efesios 6:13). Kë armakunatam Efesios 6:14-18 nishqan rikätsimantsik: “Tserecur rasunpa caqcho tsaracuyë imeca tseqllequicuna alli watashqa cuenta. Alli rureniquicunana catsun imeca fierupita chaleco cuenta. Imeca juc soldadu botasnin yacacurcur, imepis listu quecaq cuenta, qamcunapis listu quecayë nunacunaman alli willaquita willapäcoq jeqariyänequipaq, tsenopa shumaq cawaquichona nunacuna cayänanpaq. Y marcäquiniquicunana escudu cuenta quecatsun diablupa flechan mana imanayäshunequipaq. Cascu cuenta catsun salbasionniquicuna. Y soldadupa espadan cuentana catsun Santu Espiritu cäyitsiyäshuptiqui yachatsicuyanqequi Diospa palabran. Santu Espiritupa yanapeninwan mana qonqeta imepis Teyta Diosman mañacur rogacuyë. Mäcoq mäcoqlla llapan creyicoqcunapaq mana qonqepa mañacuyë”.

20. ¿Imachötaq hukläya kantsik guërrachö peleaq soldädokunapita?

²⁰ Diosnintsikpitam shamun kë armakunaqa y imëpis tsapämäshunmi. Tsëpaqqa mana haqishpam imëpis këkätsinantsik. ¿Imanir? Manam guërrachö peleaq soldädokunanötsu huk guërrata usharir hamarintsik, sinöqa llapan kawënintsikchömi peleëkänantsik hamarishqaqa wanuratsimashwanmi. Kë peleaqa ushakanqa kë mana alli mundota Diosnintsik ushakäratsiptinmi y Satanastawan demonionkunatapis uchkuman wichqariptinmi (Apocalipsis 12:17; 20:1-3). Tsëmi, hutsasapa kënikiwan mana alli munëniki ishkitsishïnikita munëkaptenqa alleqmi tsarakunëki. Jehová Diosman fiel kanapaqqa dominanantsik y alleqmi diriginantsik cuerpontsikta  (1 Corintios 9:27). Alläpa llakikïpaqqa kanman mana peleëkashqachi.

21. ¿Ima consëjokunata wiyakurtaq kë peleata ganashun?

²¹ Pero kikintsikpa kallpantsikllawanqa manam kë peleachö vencishuntsu. Tsëmi apóstol Pablu willakorqan: “Santu Espiritupa yanapeninwan mana qonqeta imepis Teyta Diosman mañacur rogacuyë” nishpa. Hinamampis Dios nimanqantsiktam wiyakunantsik. Palabran Bibliata estudiarnin, cristiano mayintsikkunawan reunionkunachö juntakarnin. Rikanqantsiknöpis manam hapallantsiktsu këkantsik (Filemón 2; Hebreus 10:24, 25). Kë llapan consëjokunata wiyakurnenqa manam peleallatatsu ganashun sinöqa yachakonqantsikwami cada hunaq defendishun creenciantsikta.

22, 23. a) ¿Imanirtaq listo këkashwan creenciantsikta defendinapaq y ima tapukïkunatataq rurakushwan? b) ¿Imapitataq yachakushun qateqnin capïtulochö?

²² Kikin Jesusmi nerqan: “Qamcunaqa manam tsenötsu cayanqui, noqa acrashqa cayapteq. Tsemi pecuna chiquiyäshunqui” (Juan 15:19). Tsëmi imëpis listo këkänantsik respëtowan y yachëllapa creinqantsikkunata defendinapaq (leyi 1 Pedru 3:15). Tsëpaqqa, imanir imatapis mana ruranqantsikta, y Jehová Diosta mana adoraq nunakuna rurayanqan mana alli kanqantapis alleqmi musyanantsik. Tsëmi tapukunantsik, “¿imatapis mana ruranäpaqqa Biblia y ‘llapanchö wiyakoq y yachëwan sirweq’ nenqan allipaqku?” (Mateo 24:45, NM; Juan 17:17). “Y Jehová Diospa kaqta defenderqa, ¿listo këkanqällataku rikätsikü o rurëkanqäpita kushiköku?” nishpa (Salmos 34:2; Mateo 10:32, 33).

²³ Hinamampis Diabluqa más fäcil-lla ishkitsikoq toqllakunatam churan Jehová Diospita rakikäriyänampaq. Rikanqantsiknömi mana alli rurëkunata allitanö ruratsimarnintsik iskitsimënintikta tïran. ¿Imataq yanapamäshun, pukllakunata y imëka rurëkunatapis alleq akranapaq y concienciantsik alli kanampaq? Këtaqa yachakushun qateqnin capïtulochömi.