3 KAQ YACHAKUNËKIPAQ

¿Bibliachö ninqanta creishwantsuraq?

KICHË

Bibliachöqa imëka alli noticiakuna y consëjukunam kan. Bibliapita masllata yachakuyta munarpis, quizaschi kënö nikanki: “Unë libruna këkarqa, ¿rasumpatsuraq alli kawakunapaq yanapakun? ¿Rasumpatsuraq Bibliachö ninqannö llapan mana allikuna ushakanqa?”. Bibliachö ninqantaqa mëtsikaqmi creiyan. Imanir creiyanqanta yachakuy.

1 KAQ: Bibliachö ninqanqa, ¿rasumpatsuraq pasarqan?

Bibliachö ninqanqa llapampis “rasumpa kaqllam” (Eclesiastes 12:10). Rasumpa pasanqankunatam willakun, y unë tiempuchö rasumpa kawashqa nunakunapaqmi parlan (leyi Lücas 1:3 y 3:1, 2). Unë pasanqankunapaq, imë pasanqankunapaq, nunakunapaq y sitiukunapaq Bibliachö willakunqanqa rasumpa kanqantam niyan unë pasanqankunata estudiaqkuna y unë kaq cösaskunata asheqkunapis.

2 KAQ: Unë libruna këkaptinqa, ¿imanirtan Bibliachö ninqanta creishwan?

Ciencia asuntuchö manaraq musyayanqankunatapis Bibliaqa unënam willakushqa karqan, y Bibliata qellqayanqan witsanqa juktam juktam tsë asuntukunapaq niyaq. Kanan witsanran musyayashqa unëna Biblia willakunqanqa rasumpa kanqanta. Awmi, Bibliachö ninqanqa ‘kanan y imëpis confiakuypaqmi’ (Salmus 111:8).

3 KAQ: Imakuna pasanampaq kaqta Bibliachö willakunqantaqa, ¿imanirtan creintsik?

Bibliachöqa ‘manaraq pasakunqankunatam willakun’ (Isaïas 46:10). Unë pasanqankunatapis atska wataraq pishikaptinmi willakurqan. Kanan witsan pasëkanqankunatapis unënam willakushqa karqan. Imakunata Biblia willakunqanta y imanö cumplikanqantam këchö yachakunki.

MASLLA YACHAKUSHUN

Ciencia asuntuchöpis Bibliaqa rasumpa kaqllata ninqanta, y imakuna pasanampaq kaqta Biblia willakunqantam yachakushun.

4 KAQ: Bibliachö ninqanqa rasumpa kanqantam cientïficukunapis niyan

Patsaqa ima jananchöpis këkanqantam unë witsanqa niyaq. VIDEUTA rikäyë.

VIDEU: Patsaqa mana kaqllachömi këkan (1:13)

Bibliachö këkaq Job libruta qellqayanqampitaqa tres mil quinientus watanönam pasashqa. Imata qellqayanqanta yachakuy. Leyiyë Job 26:7 ima ninqanta y këpaq parlayë:

Patsa ‘mana kaqllachö’ këkanqanta Bibliachö ninqanqa, ¿imanirtan espantakuypaq?

Lamarpita vapor witsarnin pukutë tikrar tamyamunqanta musyayanqampitaqa tsëran doscientus watanö pasashqa. Peru rikäri tsëpaq Bibliachö unëna ima ninqanta. Leyiyë Job 36:27, 28 ima ninqanta y këkunapaq parlayë:

¿Ima ninkitan tamyapaq Bibliachö ima ninqampaq?
Kë leyinqantsikqa, ¿yanapashunkiku Bibliachö ninqanta creinëkipaq?

5 KAQ: Bibliachöqa willakurqannam imakuna pasanampaq kaqta

Leyiyë Isaïas 44:27-45:2 ima ninqanta y këkunapaq parlayë:

¿Babilonia markata imanö ushakätsiyänampaq kaqtataq doscientus wata pishikaptin Bibliachö nirqan?

VIDEUTA rikäyë.

VIDEU: Bibliachöqa nirqannam Babiloniata ushakätsiyänampaq kaqta (0:58)

Babilonia markataqa Persia nacionta gobernaq Cïrum soldädunkunawan 539 watachö ushakätsirqan (Jesus manaraq shamuptin), y tsënö kanqantam unë pasanqanta estudiaqkunapis niyan. Babilonia markapa pasaq mayutam juk lädupa jitayarqan. Tsëpitanam punkunkunata kicharëkaqta dejariyashqa kayaptin mana pelyëllapa yëkuyarqan. Tsënö pasanqampitaqa dos mil quinientus watanönam pasarishqa, y kananyaqpis tsë sitiuqa pasëpa ushakashqam këkan. Kananqa Babiloniapaq Bibliachö ima ninqanta yachakuy.

Leyiyë Isaïas 13:19, 20 ima ninqanta y këpaq parlayë:

¿Imanötan Biblia willakunqan cumplikashqa?

Unë Babilonia marka (Irak nacionchö)

6 KAQ: Kanan witsan pasëkanqankunatapis Bibliaqa willakurqannam

“Ushanan” tiempuchöna këkanqantsiktam Bibliachöqa nin (2 Timoteu 3:1). Kanan tiempupaq Bibliachö ima ninqanta yachakuy.

Leyiyë Mateu 24:6, 7 ima ninqanta y këpaq parlayë:

¿Ushanan tiempuchö ima pasanampaq kaqtataq Bibliachö willakurqan?

Leyiyë 2 Timoteu 3:1-5 ima ninqanta y këkunapaq parlayë:

¿Kanan tiempuchö nunakuna imanö kayänampaq kaqtataq Bibliachö willakurqan?
¿Nunakuna imanö kayanqantataq qam rikanki?

WAKIN IMA NIYANQAN: “Bibliachö willakunqanqa cuentullam”.

Këchö llapan yachakunqëkipitaqa, ¿imatan masqa yanapashunki Bibliachö ninqanta creinëkipaq?

KËTAM YACHAKURQUNKI

Cientïficukuna niyanqan, unë pasanqankunata estudiaqkuna tariyanqan y Bibliachö willakunqankuna cumplikanqanmi rikätsimantsik Bibliaqa rasumpa kaqllata willakunqanta.