Bibliapa Mushoq Testamentunchöqa Bernabëpaqwan apostol Pablupaq atska kutim parlan. Pëkunaqa tsë tiempuchö congregacionkunata watukaqmi kayarqan. ¿Imanirtaq tsëta rurayaq? Diospa kaqchö cristiänu mayinkuna alli kayänanta munarmi. Cristiänu mayinkuna imanöpis këkäyanqanta rikëta munarmi Pabluqa watukaq yapë kutita munarqan. Tsë cristiänukunata yanapananrëkurqa manam mantsarqantsu karuta ëwëtapis (Hëchus 15:36). Tsënöllam kanan witsan congregacionta watukaq cristiänukunapis rurayan.

Yanapayämänampaqmi shayämun. Cada congregacionkunata watukaq cristiänuqa ishkë chunka congregaciontanömi watukan, y watachö ishkë kutim pëkunawan juk semänayan pasan. Casädu kayaptinqa pëkunapita y warminkunapita alli yachakïta puëdintsikmi. Pëkunaqa jövinkunata y mayorkunatapis igualpam reqita munayan, y Diospita yachatsikoq y Bibliapita yachëkätsiyanqäkunamampis kushishqam yanaqäyäman (wallkiyäman). Tsë watukakoq cristiänukunaqa anciänukunawanmi cristiänu mayïkunata yanapayänampaq watukayan, jina reunionkunachö y asamblëakunachömi shumaq discursukunata rurayämun llapäkunata yanapayämänampaq (Hëchus 15:35).

Llapäkunatam yanapayäman. Congregacionkunata watukaq cristiänukunaqa Diospa kaqchö llapan cristiänukuna alli kayänantam munayan. Anciänukunawan y siervu ministerialkunawanmi juntakäyan congregacionchö allikunata rurayanqampita parlayänampaq y alli trabajar sïguiyänampaqmi consejayan. Y precursorkunatanam yachatsikïninkunachö mas alliyäyänampaq yanapayan, y alläpam kushikuyan Diospita mas yachakur reunionman shamur qallëkaqkunata rikarpis. Kë cristiänukunaqa allipam trabajayan ‘biennintsicpaq’ (2 Corintios 8:23). Pëkuna Diosta kuyayanqannölla y sirwiyanqannölla noqantsikpis rurashun (Hebrëus 13:7).

• ¿Imarëkurtaq congregacionkunata watukaq cristiänukunaqa congregacionkunata watukayan?

• ¿Imanötaq alli provechankiman watukakoq cristiänupa yanapakïninta?