Simon jutiyoq fariseupa wayinchö perdonakoq këpaq yachatsikurirmi, Jesusqa Galilëapa yapë yachatsikur qallëkurqan. Juk wata masnam sagrädu rurëninta qallanqampita pasarishqa, y tsë kutiqa 12 apostolninkunawan y “mana alli espïritukunapita y qeshyankunapita kachakätsinqan” wakin warmikunawanmi ëwarqan (Lücas 8:2). Wakinqa kayarqan Marïa Magdalëna, Susäna y rey Herödis Antïpaspa wayinta rikaq nunapa warmin Juänam.

Jesus ruranqankunata pï më musyayanqanmannömi, rurëninkuna alli o mana alli kanqampaq masraq parlayarqan. Tsënö parlayanqanqa rikakärirqan, juk supë wiskuyätsishqa y müduyätsishqa nunata jampiriptinmi. Tsë nunapita supë yarquriptin rikëta y parlëta puëdinqantana rikëkurmi, alläpa espantakur kënö niyarqan: “¿Manatsuraq pëqa Davidpa Tsurin?” (Mateu 12:23).

Jesus këkanqan wayichö mëtsika nunakuna kayaptinmi, pëwan qateqninkunaqa mikurillatapis puëdiyarqantsu. Peru Dios änikunqannö “Davidpa Tsurin” Jesus kanqantaqa manam llapantsu creiyarqan. Wakin fariseukuna y Ley qellqaqkunaqa Jerusalenpita patsëmi ëwashqa kayarqan, peru manam pëpita yachakïta munartsu ni pëman qaqëta munartsu. Tsëpa rantinqa, tsëchö këkaqkunatam, ‘Satanas ullupushqa’ kanqanta y ‘supëkunata gobernaqman’ Jesus qaqanqanta niyarqan (Marcus 3:22). Nunakuna tsënö büllakurkuyanqanta musyarirmi, kastankunaqa Jesusta apakuyänampaq jinan höra ëwayarqan. ¿Imanir?

Tsëyaqqa, Jesuspa wawqinkunaqa manam creiyarqantsu Diospa Tsurin kanqantaqa (Juan 7:5). Jina Nazaretchö pëkunawan winanqampitaqa alläpa jukläyam karqan, tsëmi ‘juiciunta oqrashqa’ kanqanta pensayarqan (Marcus 3:21).

 Peru ¿imatataq rurëninkunaqa rikätsikurqan? Jesusqa tsëllaraqmi juk nunapita supëta qarqushqa karqan, tsëmi tsë nunaqa parlëta y rikëta puëdirqanna. Tsëta pipis neguëta mana puëdiptinmi, Ley qellqaqkuna y fariseukunaqa tumpayarqan. Pëpaqmi kënö niyarqan: “Kë nunaqa supëkunapa gobernaqnin Satanaspa yanapakïninwanmi supëkunata qarqun” (Mateu 12:24).

Ley qellqaqkuna y fariseukuna imata pensëkäyanqanta musyarmi, Jesusqa kënö entienditsikurqan: “Mëqan gobiernuchöpis kikinkunapura rakishqa karqa, ushakëmanmi chäyan, y mëqan markachöpis o wayichöpis kikinkunapura rakikashqa karqa, manam tsarakuyanqatsu. Jina tsënöllam Satanaspis Satanasta qarqurqa, kikimpa contran churakärishqa, y tsënö karqa, ¿imanöraq gobiernun tsarakunqa?” (Mateu 12:25, 26).

¡Tsëqa clärum këkarqan! Fariseukunaqa musyayaqmi wakin judïukunapis supëkunata qarquyanqantaqa (Hëchus 19:13). Tsëmi pëkunata kënö tapurqan: “Satanaspa yanapakïninwan supëkunata qarquptïqa, ¿pipa yanapakïninwantaq qamkunapa qateqnikikunaqa supëkunata qarquyan?”. Pëkunatapis tsënöqa tumpëta puëdiyanmanmi karqan. Tsëmi Jesusqa fariseukunata kënö entienditsirqan: “Peru Diospa santu espïritumpa yanapakïninwan supëkunata qarquptïqa, rasumpa kaqchöqa, Diospa Gobiernunmi janëkikunachöna këkan” (Mateu 12:27, 28).

Tsëpitanam Jesusqa juk igualatsikïwan rikätsikurqan Satanaspitapis mas puëdeq karnin supëkunata qarqïta puëdinqanta. Kënömi nirqan: “¿O imanöraq pipis kallpayoq nunapa wayinman mälas yëkïkur, imëkantapis apakunman tsë kallpayoq nunata manaraq pankarqa? Tsëta rurar-ran imëkantapis wayimpita apakïta puëdinqa. Pipis noqaman mana qaqämoq kaqqa, noqapa conträmi këkan, y pipis noqawan mana ëlloq kaqqa, ramëkanmi” (Mateu 12:29, 30). Ley qellqaqkuna y fariseukunaqa Jesuspa contranmi këkäyarqan, tsënöpam Satanasman qaqëkäyanqanta rikätsikuyarqan. Tsëmi Diospa poderninwan milagrukunata rurëkaptimpis, pëpaq mana allita parlarnin nunakunata mantsatsiyarqan mana witiyänampaq.

Tsëmi Jesusqa contranchö këkaqkunata kënö nirqan: “Nunakunapa tsurinkunaqa llapan rurayanqampitam perdonashqa kayanqa, ima jutsata rurayanqampitapis y imatapis ofendikïpa parlayanqampitapis. Peru pipis santu espïritupa contran ofendipa parlaqqa, manam ni imëpis perdonashqatsu kanqa, sinöqa imëyaqpis condenashqa këman chätsikoq jutsapitam culpayoq kanqa” (Marcus 3:28, 29). Satanaspa poderninwan milagrukunata Jesus ruranqanta neqkunaqa mana perdonëpaq jutsatam rurëkäyarqan.