Jesusqa tsëllaran apostolninkunata ishkaqtayan kachashqa karqan y nunakunata imanö yachatsiyänampaq nishqa karqan. Y kuyëllapam willarqan yachatsikuyanqanrëkur wakinkuna contrankuna churakäyänampaq kaqta. Kënömi nirqan: “¡Rikäyë! Atoqkunapa chowpinchö üshakunatanömi qamkunata kachëkäyaq [...]. Nunakunapita cuidakuyanki, porqui patsan kaq cortikunamanmi apayäshunki, y Diosta adorayänan wayinkunachömi astayäshunki. ¡Jina gobernadorkunaman y reykunamanmi noqarëkur apayäshunki [...]!” (Mateu 10:16-18).

Tsënöpam Jesuspa qateqninkunaqa, chikir sufritsiyänampaq kaqta musyayarqanna. Peru kënö nirmi kallpata qorqan: “Makinkunaman churayäshuptiki, ama yarpachakuyankitsu imata o imanö parlayänëkipaq kaqman, porqui tsë höram musyariyanki imata parlayänëkipaq kaqta; porqui manam qamkunallatsu parlayanki, sinöqa Teytëkikunapa santu espïritunmi parlayänëkipaq yanapayäshunki”. Jina kënömi nirqan: “Wawqinllam wawqinta wanïman chätsinqa, y teytanam wamranta, y wamrakunanam teytankunapa y mamankunapa contran sharkuyanqa y wanïman chätsiyanqa. Y jutïrëkurmi qamkunataqa llapan nunakuna chikiyäshunki, peru ushananyaq alli tsarakushqa kaqmi salvakunqa” (Mateu 10:19-22).

Diospita willakï alläpa precisaptinmi, yachëllapa rurayänampaq qateqninkunata nirqan, tsënöpam willakur sïguiyänanta pipis michänantsu karqan. Pëkunatam kënö nirqan: “Juk markachö chikir sufritsiyäshuptikiqa, juk markata ëwakuyanki, porqui rasuntam niyaq, Israel nacionpa llapan markankunachö willakur manaraq ushayaptikim, nunapa Tsurinqa chäramunqa” (Mateu 10:23).

Jesusqa 12 apostolninkunatam imata rurayänampaq y cuidakuyänampaq nirqan, jina kallpatapis qorqanmi. Peru manam apostolninkunallapaqtsu tsënöqa nirqan, sinöqa Diospa Gobiernumpita llapan willakoqkunapaqmi. Kikin Jesusmi qateqninkunataqa “llapan nunakuna” chikiyänampaq kaqta nirqan, peru apostolninkunataqa tsëqa manam tsë kuti pasarqantsu. Jina Mateu Marcus, Lücas y Juan qellqayanqanchöqa manam willakuntsu Galilëachö tsë kuti Diospa Gobiernumpita willakuyanqampita gobernadorkunaman y reykunaman apostolkunata apashqa kayanqantaqa. Jina manam nintsu pëkunata wanutsiyänampaq kastankuna entreguëkushqa kayanqantaqa.

Tsëkunam rikätsikun, shamoq tiempupaq Jesus tsënö parlashqa kanqanta. Awmi, “llapan markankunachö willakur manaraq ushayaptikim, nunapa Tsurinqa chäramunqa” nirqa, Diospa Gobiernumpita  willakur manaraq ushayaptin, Rey y Jueznö kutimunampaq kaqtam nikarqan.

Nunakuna contrankuna churakäyänampaq kaqpitaqa manam apostolkuna espantakuyarqantsu, porqui kikin Jesusmi, “yachakïkaqqa manam yachatseqnimpa janampatsu këkan, ni manam sirwipakoqpis patronnimpa janampatsu këkan” nirqan. Diospa Gobiernumpita willakunqanrëkurmi, pëtaqa mana allipa tratëkäyarqan y chikir sufrikätsiyarqan, tsëmi qateqninkunatapis tsënölla rurayänan karqan. Tsëmi pëkunata kënö nirqan: “Cuerputa wanutsirpis kawëta ushakätsita mana puëdeq kaqkunataqa ama mantsayëtsu; tsëpa rantinqa, cuerputawan kawëta Gehënachö ushakätsita puëdeq kaqta mantsayë” (Mateu 10:24, 28).

Jesusmi tsëkunachö imanö tsarakunapaq yachatsimarqantsik. Alläpa valientim karqan y Jehoväta sirwita jaqirinampa rantinmi, wanurirqampis. Diosllam juk nunapa ‘kawëninta’ ushakätsita puëdin, juk parlakïchöqa, manam shamoq tiempuchöqa kawaritsimunqanatsu. Porqui pëllam pitapis kawaritsimïta y mana wanushpa kawëta qoyta puëdin. ¡Tsënö ninqanqa apostolkunata alläpachi kushitsirqan!

Jina pëkunata Dios alläpa kuyanqanta rikätsirmi kënö nirqan: “¿Manaku ishkë pichïsankataraq juk mana alläpa väleq qellëllapaq rantikuyan? Tsënö kaptimpis, Teytëkikuna mana musyëkaptinqa manam ni jukllëllapis patsaman ishkirintsu. [...] Tsënö këkaptinqa, ama mantsakuyëtsu, porqui qamkunaqa mëtsika pichïsankakunapitapis masmi väliyanki” (Mateu 10:29, 31).

Diospita willakuyanqan familiakunata rakikätsinampaq kaqtapis Jesusqa nirqanmi, porqui wakinkunam chaskikuyänan karqan y wakinqa manam, tsëmi, “ama pensayëtsu patsaman yamë këta apamoq shamunqäta” nirqan. Awmi, Bibliapita yachakunapaqqa alläpa valientim kanantsik. Jesusmi kënö atikakurqan: “Pipis teytanta o mamanta noqapitapis mas kuyaqqa, manam qatimaqnïpaqnötsu; y pipis ollqu wamranta o warmi wamranta noqapitapis mas kuyaqqa, manam qatimaqnïpaqnötsu” (Mateu 10:34, 37).

Peru wakinqa allim chaskiyänan karqan. Jesusmi kënö nirqan: “Pishi wamranö kaqkunapita mëqanllatapis qatimaqnï kanqanrëkur pipis juk väsu elaq yakuta qarëkoq kaqqa, rasuntam niyaq, manam ni imanöpapis premiunta oqranqatsu” (Mateu 10:42).

Apostolninkuna imata rurayänampaq y cuidakuyänampaq ninqan y kallpata qonqanqa, willakuyänampaq listu këkäyänampaqmi yanaparqan. Tsëmi “caserïun caserïun entërupa ëwayarqan, alli willakïkunata willakurnin y qeshyëkaqkunata më tsëchö kachakätsirnin” (Lücas 9:6).