Pentecostes fiestachömi Jesuspa wakin qateqninkunaqa santu espïrituta chaskiyarqan, tsëqa ciëluta ëwakunqampita chunka junaqkuna pasariptinmi karqan. Tsëmi rikätsikurqan ciëluchöna Jesus këkanqanta. Peru manam tsëllatsu ciëluchö këkanqantaqa rikätsikurqan. Jina qateqnin Estëbanta rumiwan qompayaptinmi, pëqa manaraq wanurnin kënö nirqan: “¡Rikäyë! Ciëlutam kicharëkaqta, y nunapa Tsurintam Diospa derëcha kaq lädunchö shëkaqta rikëkä” (Hëchus 7:56).

Jesusqa Teytanwan ciëluchö këkarnam, Diospa Palabranchö qellqarëkanqan cumplikanqanyaq shuyaränan karqan. Tsëpaq parlarmi rey Davidqa Dios yanapaptin kënö qellqarqan: “Jehovä Diosmi Señornïta nirqan: “Derëcha kaq lädüman täkaramï, chikishoqnikikunata chakiki jalunanman churamunqäyaq”. Tsë witsan chäramuptinmi, Jehoväqa Jesusta kënö ninan karqan: “Gobernë chikishoqnikikunapa rurinchö” (Salmus 110:1, 2). Peru ¿imataraq ruranan karqan tsë witsanyaqqa?

33 wata Pentecostes fiesta witsanmi, Jesusqa congregacionninta patsäratsirqan. Y santu espïrituwan akranqan cristiänukunatam ciëlupita patsë gobernarnin qallarqan (Colosensis 1:13). Jinamampis, yachatsikuyänampaqmi yanaparqan y shamoq tiempuchö cargukunata chaskiyänampaqmi yachatsirqan. ¿Ima cargukunatataq chaskiyänan karqan? Wanuyanqanyaq tsarakoq kaqkunam, kawariramurnin ciëluchö Jesuswan gobernayänan karqan.

Jesuswan ciëluchö gobernayänan kaqkunapitaqa, jukqa Saulum karqan, pëtaqa Pablu nirmi Römachöqa mas reqiyaq. Pëqa judïum karqan y Diospa Leyninta cumplinampaqmi alläpa kallpachakoq. Peru judïu religionpa pushaqninkunaqa alläpa mana allipam yachatsiyarqan, tsëmi Estëbanta tsampiyänantapis allipa rikarqan. Jina Jesuspa wakin qateqninkunatam amenazarqan y wanutsita munarqan. Hasta sacerdötikunapa mandaqnin Caifaspis Damascuchö këkaq Jesuspa qateqninkunata prësu tsarinampaq y Jerusalenman apanampaqmi permïsun qorqan (Hëchus 7:58; 9:1). Peru nänipa ëwëkaptinmi, pasëpa chipapaq aktsita rikëkurnin ishkirirqan.

 Y kënö neqtam wiyarqan: “Saulu, Saulu, ¿imanirtaq chikir qatikachëkämanki?”. Saulunam tapurqan: “¿Pitaq kanki Teytë?”. Pënam, “noqaqa chikir qatikachëkanqëki Jesusmi kä” nirqan (Hëchus 9:4, 5).

Jesusqa Sauluta nirqan, Damascu markaman yëkunampaq y tsëchö imata ruranampaq mandanqanyaq shuyaränampaqmi. Peru pillapis yanaqänanmi karqan, porqui tsë aktsita rikärirmi wisku quedarirqan. Damascuchö täraq Ananïas qateqnintapis Jesusqa yuripurqanmi, y Sauluta ashinampaqmi mandarqan. Ananïasqa alläpam mantsakarqan, peru Jesusmi kënö nirqan: “¡Ëwë! Porqui kë nunaqa juk nacionkunaman, reykunaman y Israelpa tsurinkunaman jutïta apanampaq akrashqa väsum”. Tsëmi Sauluqa yapë rikar qallëkurqan y Damascuchömi “Diosta adorayänan wayikunachö Jesuspita willakur qallëkurqan, pë Diospa Tsurin kanqanta” (Hëchus 9:15, 20).

Jesus yanapaptinmi, Pabluwan wakinkunaqa yachatsikurnin sïguiyarqan. Y Dios bendiciptinmi mëtsikaqta yanapayarqan. Tsëmi Damascuman ëwaq nänichö Jesus yuripunqampita 25 watakuna pasarishqanchö, Pablu kënö qellqarqan: “Tsë willakïkunaqa entëru patsa nunakunachömi musyatsikushqa kashqa” (Colosensis 1:23).

Atska watakuna pasariptinmi, Jesusqa apostol Juanta suëñïninchönö tukïta rikätsirqan, y tsëtaqa Revelacion libruchömi leyita puëdintsik. Tsëmi Juanqa, atska watakunapa kawashqa karnin, Jesus Reynö shamïkaqta suëñïninchö rikëta puëdirqan (Juan 21:22). Y santu espïritupa yanapakïninwanmi “Señorpa junaqninchö” këta puëdirqan (Revelacion 1:10). ¿Imëraq tsë junaq kanan karqan?

Diospa Palabranchö atska musyatsikïkunam rikätsikun ‘Señorpa junaqninqa’ 1914 watachö qallanqanta. Tsë watachömi Punta Kaq Jatun Guërra qallarqan. Tsëpita patsëmi mas guërrakuna, qeshyakuna, mallaqë, patsa kuyïkuna y imëkakuna pasakushqa. Tsë llapan pasakunqanwanmi ‘këkämunqantana’ y ushakë junaqna kanqanta apostolninkunata Jesus willanqan ‘señal’ chipyëpa cumplikanqa (Mateu 24:3, 7, 8, 14). Y kanan witsanqa manam Röma kinrëllachötsu Diospa Gobiernumpita willakïkäyan, sinöqa entëru Patsachömi.

Tsëkuna ima ninan kanqanta entienditsikurmi, apostol Juanqa Dios yanapaptin kënö qellqarqan: “¡Kananmi rikakushqa Diosnintsikpa salvakoq kënin, podernin, Gobiernun y Cristumpa autoridänin!” (Revelacion 12:10). Awmi, Diospa Gobiernumpaq Jesus parlanqanqa gobernëkannam.

Këqa Jesusman llapan markäkoq qateqninkunapaq juk alläpa shumaq willakïmi. Tsëmi pëkunaqa apostol Juan ninqannölla nita puëdiyan: “Tsërëkur, ¡kushikuyë ciëlukuna, y tsëchö täraqkuna! ¡Allaw patsa y lamar!, porqui alläpa piñashqam qamkunaman Diablu urämushqa, wallka tiempullana karinanta musyar” (Revelacion 12:12).

Awmi, Jesusqa mananam Teytampa derëcha kaq lädunchö gobernanampaq shuyarëkannatsu. Porqui kananqa ciëluchömi Rey y ichikllachönam llapan chikeqninkunata ushakäratsimunqa (Hebrëus 10:12, 13). Peru ¿imakunaraq shamoq tiempuchö pasakunqa?