Röma nacionta gobernaq Cësar Augustum judïukunata mandarqan markankunaman inscribikoq kutiyänampaq. Josëpa markanqa Belenmi karqan, tsëmi Marïawan ishkan tsëman viajayarqan. Y Marïaqa qeshpikunampaqnam këkarqan.

Belenman chärirqa posädata mana tarirmi animalkuna punuyänan wayillachö quedakuyarqan, y tsëchömi Jesus yurikurqan. Marïaqa juk tëlawan piturkurmi animalkunata qarayänanllaman punuratsirqan.

Belenpa amänunchömi juk ishkë mitsikoqkuna üshankunata täpëkäyarqan. Y mana kaqpitam juk angel yurirkurqan, y jiruroqninkunachömi rikäyarqan Jehoväpa puëdeq kënin chipapaqta. Tsë mitsikoqkunaqa alläpam mantsakäyarqan, peru tsë angelqa kënömi nirqan: “Ama mantsakäyëtsu, kushikïpaq noticiatam apëkämü. Mesïasmi Belenchö kanan yurikushqa”. Tsë höram atska angelkuna  ciëluchö yuririr kënö niyarqan: “Ciëluchö Dios alabashqa katsun, y patsachö yamë kawakï katsun”. Tsënö nirirmi illaririyarqan. ¿Y imatataq mitsikoqkunaqa rurayarqan?

Tsë mitsikoqkunaqa, “kanan höra Belenta aku” niyarqanmi. Y jinan höram ëwayarqan. Chärirmi Josëtawan Marïata taririyarqan llullunkunawan këkäyaqta.

Mitsikoqkunata angel willanqanta wiyarirmi pï më espantakuyarqan. Marïaqa tsë angel ninqantam imëpis yarpararqan. Y mitsikoqkunaqa rikäyanqampita y wiyayanqampita Jehoväta agradecikurirmi üshankuna täpaq kutikuyarqan.