Ichikllanam pishirqan 32 wata Pascua fiestapaq, y Jesuspa qateqninkunaqa yachatsikoq ëwayanqampitam pë kaqman kutirishqa kayarqan. Tsëmi Jesusqa utishqata rikar nirqan jamariyänampaq Betsaida markaman barcuwan ëwayänampaq. Peru qocha kuchunman chëkarmi Jesusqa rikärirqan mëtsika nunakuna qatir ëwashqa kayanqanta. Y apostolninkunawan jamarita munëkarpis, pëqa shumaqmi tsë nunakunata chaskirqan. Qeshyëkaqkunatam kachakätsirqan y entëru junaqmi Diospa Gobiernumpita pëkunata yachatsirqan. Y tardiyäriptinmi apostolninkuna kënö niyarqan: “Nunakunaqa mallaqëkäyannachi. Mikïta asheq ëwayänampaq niri”.

Peru Jesusqa kënömi nirqan: “Manam precisantsu mëtapis ëwayänan. Qamkuna imallatapis qarariyë”. Tsënam apostolninkunaqa, “¿tanta ranteqku ëwariyä?” niyarqan. Y Felïpi jutiyoq kaqmi kënö nirqan: “Qellënintsik atska kapamashqapis manachi tinkunmantsu këtsika nunakunapaqqa”.

Tsënam Jesusqa, “¿imallataq kapamantsik?” nirqan. Y Andresmi kënö nirqan: “Pitsqa tanta y ishkë taksha pescädullam. Peru këtsika nunakunapaqqa alläpa wallkallam”. Jesusnam, “tsë tantakunata y tsë pescädukunata apayämï” nirqan. Nïkurmi nunakunata nirqan qorakuna jananllaman cincuentapayan y cienpayan täkuyänampaq. Y tantakunata y pescädukunata tsarirkurmi, ciëluman ñukirkur Diosman mañakurirqan. Nïkurmi apostolninkunata qorqan nunakunata qoyänampaq. Y llapankunam pacha junta mikuyarqan. Y ollqullam 5.000  kayarqan, peru warmikuna y wamrakunapis kayarqanmi. Y tsëpitaqa, mana perdinampaqmi llapan sobranqanta apostolkuna ëlluyarqan. ¡12 canastatam ëlluyarqan! ¿Tsëqa espantakïpaq milagrum karqan aw?

Alläpa kushikurmi nunakunaqa Jesus reyninkuna kananta munayarqan. Peru Jehoväqa manaran rey kananta munarqanraqtsu, tsëtam Jesusqa alleq musyaq. Tsëmi nunakunata despacharirnin apostolninkunata nirqan Galilëa qochata tsimparëkäyänampaq. Tsëmi pëkunaqa barcuman lloqarkur ëwakuyarqan, peru Jesusqa japallanmi juk jirkaman witsarqan. ¿Musyankiku imanir japallan witsanqanta? Teytanman mañakïta munarmi. Imëka rurëyoq këkarpis Jesusqa Diosman mañakunampaqmi tiemputa rakeq.