Jesuswan apostolninkunaqa Cedron Urampa pasarirmi Olïvus jirkachö këkaq Getsemanï huertaman chäriyarqan. Pullan paqasnam karqan, y pampa killam karqan. Tsënam Jesusqa, “këchö quedakuyë, y ama punukäyankitsu” nirir mas washaman ëwarqan. Tsëchömi alläpa llakikurnin Jehoväman, “qampa munëniki rurakätsun” nishpa qonqurikïkur mañakurqan. Tsënam Jehoväqa juk angelninta kacharqan kallpata qonampaq. Nïkurmi Jesusqa kima apostolninkuna këkäyanqanman kutirqan, y punïkäyaqtam taririrqan. Tsëmi kënö nirqan: “¡Riyakuyë! Manam kë höraqa punur këkäyänëkipaqtsu. Porqui chikimaqnïkunaman entregayämänan höram chäramushqa”.

Tsë höram espädankuna y garrutinkuna tsarashqa nunakunata pusharkur Jüdas chärirqan. Jesuswan y wakin apostolkunawan tsë huertaman atska kuti ëwashqa karmi pëqa musyarqan tsëchö këkäyanqanta. Y soldädukunatam nishqa karqan Jesus pï kanqanta musyatsinampaq. Tsëmi Jesusman defrenti ëwëkur, “noqallämi. . . Maestru” nirqan, nïkurmi qaqllanchö mutsarirqan. Tsënam Jesusqa, “Jüdas, ¿mutsëkamarnïku traicionaramanki?” nirqan.

Jesusqa ichik mas puntaman ëwarirmi, “¿pitataq ashikäyanki?” nirqan. Tsënam, “Nazaretpita Jesustam” niyarqan. Y pëqa, “noqam kä” nirqanmi. Tsënam llapankuna qepaman kutir patsaman ishkiriyarqan. Jesusqa yapëmi, “¿pitataq ashikäyanki?” nirqan. Tsënam, yapë “Nazaretpita Jesustam” niyarqan. Jesusnam kënö nirqan: “Noqam kä niyarqoqnataq. Noqata ashimarnïqa, jaqiriyë pëkuna ëwakuyänanta”.

Tsënam Pëdruqa llapan pasakïkanqanta rikëkur espädanta sutarir mandakoq kaq sacerdötipa esclävun Malcupa rinrinta roqurapurqan. Peru Jesusqa herïdanta yatëkurmi kachakäratsipurqan. Nïkurmi Pëdruta kënö nirqan: “Espädëkita sitiunman kutitsi. Porqui espädawan pelyaptikiqa,  espädawanmi wanutsiyäshunki”. Tsënam soldädukunaqa Jesusta tsaririr makimpita pankayarqan, y apostolninkunaqa escaparmi ëwakuyarqan. Nïkurmi tsë nunakunaqa precisaq sacerdöti Anasman Jesusta apayarqan. Pënam, tapupärirnin mandakoq kaq sacerdöti Caifasman pasaratsirqan. ¿Y imatataq apostolkunaqa rurayarqan?