Isaacqa 40 watayoq këkarmi Rebëcawan casakurqan. Y alläpam kuyaq. Tiempu pasariptinqa ishkë ollqu wamrankunam kapurqan, y millishmi kayarqan.

Mayor kaqpa jutinqa Esaümi karqan, y menor kaqpanam, Jacob. Esaütaqa chakrakunachö pärëmi gustaq, y animalkunata wanutsitam cösa yachaq. Peru Jacobtaqa wayichö pärëmi gustaq.

Tsë witsanqa, mayor kaqmi papäninkuna wanukuptin mas atska chakrata y mas atska qellëta chaskeq. Tsëtam herencia niyaq. Peru Isaacpa familianchöqa, juk mas herenciatam chaskiyänan karqan, y tsë herenciaqa karqan Abrahanta Jehovä äninqankunam. Esaüqa manam precisaqtanötsu tsë änikïkunata rikaq. Peru Jacobpaqqa alläpam precisaq.

Juk tardim animalkunata wanutseq ëwanqampita wayinman alläpa utishqa Esaü chärirqan. Tsënam Jacob rurëkanqan mikïta munapärir kënö nirqan: “¡Mallaqëpitam wanurïna! ¡Tsë rurëkanqëki puka pichuta ichikllata qararamë!”. Tsënam Jacobqa kënö nirqan: “Yä, peru puntataqa herenciëkita qomänëkipaqraq änimë”. Esaünam kënö nirqan: “¡Tsë herenciaqa manam imapaqpis sirwimantsu! Munarqa katsikïpis. Kanan höraqa mikïtam noqaqa munä”. Pensari, ¿allitaku Esaü rurarqan? Manam. Porqui juk plätu mikïllawanmi alläpa väleq herencianta trokarirqan.

 Awkinyärirqa mayor kaq tsurinta jukllana bendicikïtam Isaacqa munarqan. Peru warmin Rebëcaqa yachëllapam menor kaq wamran Jacobta bendicitsirqan. Tsëta musyëkurmi Esaüqa cölerar wanuritapis munarqan, y wawqinta wanuratsitam munarqan. Tsënam Isaacwan Rebëcaqa imapis pasëkunanta mantsar Jacobta kënö niyarqan: “Tiyïki Laban kaqta ëwakï, porqui pëqa mamänikipa turinmi, y Esaüpa cöleran pasanqanyaq tsëchö quedakamï”. Tsënam Jacobqa papäninta y mamäninta cäsukurqan, y wawqin mana wanïkatsinampaqmi escapakurqan.