1, 2. ¿Imatatan Satanaspita y demoniukunapita musyanantsik?

 TEYTANTSIK Jehoväqa shumaq Patsachö kushishqa kawakunantam imëpis munashqa. Tsënö kaptimpis, kanan witsan nunakunaqa Diablupa y demoniukunapa munënintam mas rurayan (2 Corintius 4:4). Pëkunata mana rikashqapis, kayanmi y noqantsikpita mas puëdeqmi kayan.

² Jehovä Diosnintsik yanapamänapaq kaqta musyarpis, ima rurëkunawan Satanaswan demoniunkuna jutsaman ishkitsimanqantsiktam musyanantsik. ¿Imatatan rurashwan Jehoväta mas kuyanapaq, y Satanaspita cuidakunapaq? Yachakushun.

3. ¿Imatatan Diablu munantsu?

³ Mana allikunapa pasarqa, nunakuna Jehovä Diosta manana sirwiyänampaq kaqtam Satanasqa nin (leyi Job 2:4, 5). Tsëmi juk nuna Jehoväta reqir qallëkuptinqa, Satanaswan demoniunkuna imëkanöpa michäkuyan. Y Teytantsik Jehoväta sirwiyänampaq änikuyaptin y bautizakuyaptinqa cölerapitapis wanuytam  munayan. Bibliaqa nin, Diabluqa “qapareq qayareq leonnömi purikan, pitapis tragakurkïta” munar (1 Pëdru 5:8). Diabluqa manam munantsu Teytantsik Jehoväta kuyarnin sirwinata (Salmus 7:1, 2; 2 Timoteu 3:12).

4, 5. (1) ¿Imatatan Satanas rurëta puëdintsu? (2) ¿Imanötan Diablupa contran churakashwan?

⁴ Teytantsik Jehovä mas puëdeq kaptinmi, Satanastawan demoniunkunataqa mantsanantsiktsu. “Jatun  sufrimientupita” “mëtsikaq” sirweqninkuna salvakuyänampaqmi Diosnintsikqa änikushqa (Revelacion [Apocalipsis] 7:9, 14). Teyta Dios yanapamashqam, Diabluqa salvakunata michämäshuntsu.

⁵ Jehovä Diosnintsikta kuyarnin sirwishqaqa, Satanasqa manam ima ruramënintsikta puëdinqatsu. Bibliachöqa nimantsik: “Teyta Dioswan këkäyaptikiqa pëpis qamkunawanmi këkanqa” (2 Crönicas 15:2; leyi 1 Corintius 10:13). Abel, Enoc, Noë, Sära, Moises y mas nunakunaqa, Jehoväta kuyarmi Diablupa contran churakäyarqan (Hebrëus 11:4-40). Noqantsikpis tsënölla ruranapaqmi, Diospa Palabran kënö nimantsik: “Diablupa contran churakäyë, y pëqa escaparmi qamkunapita ëwakunqa” (Santiägu 4:7).

6. ¿Satanas imatatan munan y imanötan tsëta ruran?

⁶ Jehovä Dios mas puëdeq kanqanta musyëkarpis, Satanasqa imëkanöpam Diosnintsikta sirwinata michäkun. Diabluqa imëkanöpam ishkitsimënintsikta munan, y tsëkunataqa manam kananllaraqtsu rurëkan. ¿Imanötan ishkitsimantsik?

7. Jehovä Diospa sirweqninkuna, ¿imata rurayänantatan Satanas munan?

⁷ Apostol Juanmi nirqan: “Mana cäsukoq nunakunaqa Satanaspa makinchömi këkäyan” (1 Juan 5:19). Diospa sirweqninkunapis munëninta rurayänantam Satanasqa munan (Miquëas 4:1; Juan 15:19; Revelacion 12:12, 17). Ichik tiempullana kananta musyarmi, Diospa sirweqninkuna mana allita rurayänampaq imëkanöpa ishkitsita munan.

8. ¿Imatatan Diospa sirweqninkunaqa cuentachö katsinantsik?

 ⁸ Bibliachöqa nin, ‘ciëluchö puëdeq alläpa mana alli espïritukunawan’ tsaränakur këkanqantsiktam (Efesius 6:12). Teytantsik Jehoväta sirwir qallanqantsikpitam Diabluwan y demoniukunawan pelyaq cuenta këkantsik. Tsëmi apostol Pabluqa, Diospa sirweqninkuna alli tsarakuyänampaq kima kuti qellqarqan (Efesius 6:11, 13, 14).

9. ¿Imatatan Satanaswan demoniunkuna munayan?

⁹ Satanaswan demoniunkunaqa, imëkanöpam jutsaman ishkitsimënintsikta munayan. Tsëmi Diablu ishkitsimënintsikta munaptin alli tsarakushqa karpis, yapëchö manana ishkitsimänapaq kaqtaqa nishwantsu. Diabluqa imakunachö pantanqantsiktam rikan, y tsëkunatam utilizan ishkitsimänapaq. Bibliaqa tsëkunapita cuidakunapaqmi yanapamantsik (2 Corintius 2:11; rikäri 254 päginachö 31 kaq yachatsikuyta “Satanas ruranqankuna”). Jukqa nunakunata demoniukuna ruratsiyanqanmi.

10. (1) ¿Imatatan demoniukuna nunakunata ruratsiyan? (2) Jehovä Diosqa, ¿ima nintan tsë rurëkunapaq?

¹⁰ Demoniukunaqa brujerïawan, suerti qatitsikuywan, kuka chaqchëwan y wanushqakunapa almanta tapuywanmi nunakunata engañayan. Jehovä Diosqa Palabranchömi nimantsik, tsë rurëkunata melananqanta y pëta sirwikarqa demoniukuna rurayanqanta mana ruranapaq (Deuteronomiu 18:10-12; Revelacion 21:8). Diospa sirweqninkunaqa, manam demoniukuna rurayanqanta ruranantsiktsu (Romänus 12:9).

11. ¿Imamantan chärishwan demoniukuna rurayanqan gustamashqa?

 ¹¹ Demoniukuna rurayanqan gustamashqaqa, Satanasqa rasmi jutsaman ishkiratsimäshun. Demoniukuna rurayanqanta rurashqaqa, manam Teytantsik Jehovä kuyamäshunnatsu.

12. ¿Imanötan nunakunata Satanas engañan?

¹² Satanasqa ichikllapa ichikllapam nunakunata engañan. Tsëmi nunakunaqa, “mana alli kaqta” allitanö rikäyan y “alli kaqtana” mana allitanö rikäyan (Isaïas 5:20). Bibliachö yachakunqantsikkuna mana yanapakunqanta y Diosnintsikta mana cäsukur mas kushishqa kanapaq kaqtam Diabluqa nin.

13. ¿Imanötan Satanasqa nunakunata pantatsin?

¹³ Diosnintsik nunakunata kamanqampitam, Satanasqa ima alli kanqanta y ima mana alli kanqanta nunakunata pantatsishqa. Eden huertachömi Ëvata kënö tapurqan: “¿Rasunpaku Dios niyäshurqunki montikunapa wayïninta mana mikuyänëkipaq?” (Genesis 3:1). Tsëpitanam angelkunapa puntanchö Jobpaq Jehoväta kënö tapurqan: “¿Debaldillaku Jobqa Diosta respetashqa?” (Job 1:9 TNM). Jesus bautizakuriptimpis Satanasqa kënömi nirqan: “Diospa tsurinkunapita karqa, kë rumikunata niri tantaman tikrariyänampaq” (Mateu 4:3).

14. ¿Imanötan Diabluqa demoniunkuna rurayanqanta rikätsikun?

¹⁴ Unënöllam Diabluqa kanampis nunakunata pantëkätsin. Demoniukuna rurayanqantam allitanö rikätsikun. Tsëmi Diospa wakin sirweqninkunapis, demoniukuna rurayanqanta allitanö rikäyashqa (2 Corintius  11:3). Tsëqa, ¿imatan yanapamäshun jutsaman mana ishkinapaq? ¿Imatatan rurashwan Satanas mana engañamänapaq? Kushikunapaq rikanqantsikchö, pukllanqantsikchö y wiyanqantsikchö, y qeshyarnin jampikunqantsikchö imanö engañamanqantsikta yachakushun.

15. ¿Imakunachötan demoniukuna rurayanqanta rikëkashwan o rurëkashwan?

¹⁵ Atska videukuna, pelïculakuna, televisionchö rikanqantsikkuna y Internetchö rikänapaq o pukllanapaq kaqkunaqa, demoniukuna rurayanqanta, brujerïata y mas mana allikunatam rikätsikayämun. Wanushqakunapaq rurayanqanchö, juk animalpa ñatinninta rikäyanqanchö y sueñïninkunaman creiyanqanchöpis demoniukuna rurayanqantam rikantsik. Tsë rurëkuna allilla kanqanta nirmi, mëtsikaq nunakunaqa demoniukuna rurayanqanta rurëkäyan. Diabluqa tsë rurëkuna mana musyëpaqnö, shumaq y kushikuypaq kanqantanömi rikätsikun. Tsëmi wakinkunaqa “noqaqa demoniukuna rurayanqanta manam rurätsu” nirnin, demoniukuna rurayanqanta pelïculachö, televisionchö y imëkachö rikaräkuyan. ¿Noqantsiktapis tsëqa pasamashwanku? (1 Corintius 10:12).

16. ¿Imanirtan demoniukuna rurayanqanwan kushikushwantsu?

¹⁶ Satanaswan demoniunkunaqa manam musyëta puëdiyantsu imaman yarpanqantsikta. Tsënö kaptimpis, noqantsikpaq y familiantsikpaq imata akranqantsikchömi, imaman yarpanqantsikta y ima gustamanqantsikta  musyayan. Rikanqantsik pelïcula, wiyanqantsik müsica y leyinqantsik librukuna brüjukunapita y demoniukuna rurayanqampita parlaptinqa, Satanaswan demoniunkunaqa tsëkuna gustamanqantsiktam rikäyanqa. Y tsëkunata rikaräkushqaqa, jutsamampis ishkiratsimashwanmi (leyi Gälatas 6:7).

17. ¿Imanötan Satanasqa alli saloryoq këta munanqantsikwan ishkiratsimashwan?

¹⁷ LLapantsikmi alli saloryoq këta munantsik. Tsëta munanqantsikwanmi Satanasqa mana alli rurëman ishkiratsimantsik. Kanan witsan qeshyëkaqkunaqa, kachakëta munarmi më tsëman ëwayan (Marcus 5: 25, 26). Y mana kachakarmi, brüjukunaman y shoqmakoqkunaman ëwayan. Diospa sirweqninkunaqa musyantsikmi, tsë rurëkuna mana alli kanqanta y demoniukunapita shamunqanta. Tsëmi tsëkunawan jampikuntsiktsu (Levïticu 19:31).

18. ¿Mëmantan Diospa sirweqninkunaqa jampikoq ëwanantsiktsu?

¹⁸ Wakin israelïtakuna brüjukunaman ëwashqa kayaptinmi, Jehovä Diosqa pëkunapaq kënö nirqan: “Makikikunata pallarirkur mañakayämuptikipis tumakurishaqmi. Kutïkuryan mañakayämaptikipis manam wiyayashqëkinatsu” (Isaïas 1:15). Brüjukunaman ëwayaptinmi Jehovä Diosqa mañakuyninkunata wiyaqtsu. Teytantsik Jehovä qeshyëkashqa yanapamänata y mañakunqantsikta wiyananta munarqa, manam brüjukunaman jampikoq ëwanantsiktsu (Salmus 41:3). Imanö jampikunapaq kaqmanmi alliraq yarpänantsik (Mateu 6:13). Y manam demoniukuna rurayanqanwanqa jampikunantsiktsu. (Rikäri 255 päginachö 32 kaq yachatsikuyta “Imanö jampikunapaq”).

19. ¿Imanirtan mëtsikaq nunakuna Diabluta mantsayan?

¹⁹ Satanaswan demoniunkuna mana kayanqanta niyaptimpis, wakinkunataqa mantsakätsiyashqam. Nunakunaqa tuku waqariptin pillapis wanunampaq kaqta, allqu awllarqa almata rikashqa kanqanta y maskunatam niyan. Demoniukunata mantsayänampaqmi, wakinkunaqa demoniukuna rurayanqanta cuentakuyan. Y wakinkunataqa, tsë cuentukunata wiyë y yapë willakuy gustanmi. Tsë cuentukunarëkurmi nunakunaqa Diabluta mantsayan.

20. ¿Imata rurartan Satanasta yanapëkashwan?

 ²⁰ Satanasqa nunakuna mantsayänantam munan (2 Tesalonicensis 2:9, 10). Tsëmi ulikïta o llullakuyta alläpa yachar, Satanasqa demoniunkuna rurayanqan mana rasumpa kaptimpis nunakunata creitsin. Y tsë nunakunaqa demoniukuna rurayanqanta rikashqa o wiyashqa kayanqanta nirmi, tsë cuentukunata yapa yaparkur willakuyan. Diospa sirweqninkunaqa, manam tsë cuentukunata willakur Satanasta yanapëta munantsiktsu (Juan 8:44; 2 Timoteu 2:16).

21. Demoniukunapaq parlanantsikpa rantinqa, ¿imapitatan parlanantsik?

²¹ Diospa sirweqninkunaqa manam Satanastawan demoniunkunata mantsanantsiktsu. Juk wawqita o juk panita demoniukuna mana allita rurayashqa kayaptinqa, manam tsëkunapita willakur purinantsiktsu. Noqantsikqa Jesusmanmi yarpänantsik, pëpita y Teytan Jehovä yanapanqampitam masqa parlanantsik (Hebrëus 12:2). Demoniukuna rurayanqampita qateqninkunata manam parlapaqtsu. Tsëpa rantinqa Jesusqa “Diospa espantëpaq rurëninkunapita” y Gobiernumpitam parlaq (Hëchus 2:11; Lücas 8:1; Romänus 1:11, 12).

22. ¿Imata ruranëkipaqtan kallpachakunëki?

²² Satanasqa imëkanöpam munan Teytantsik Jehoväpita rakimënintsikta. Imakunawan ishkitsimanqantsikta musyarmi, demoniukuna rurayanqantaqa ni imanöpapis rurëta munantsiktsu. Manam munantsiktsu Diablu jutsaman ishkitsimänata (leyi Efesius 4:27). Satanaspa contran churakarqa manam munëninta rurashuntsu, y Teytantsik Jehovä noqantsikwan kaptinmi imatapis mantsashuntsu (Efesius 6:11).