Ichikllachönam ciëluchö këkaq Diospa Gobiernun entëru Patsata gobernamunqa y llapan nunakunam kushishqa, yamë, y shumaq trabajarnin kawakuyanqa. Jesucristutam gobernamänapaq Diosqa churashqa, y pëqa manam kë Patsachö mandakoq nunakunanötsu mana kuyakoq kanqa, sinöqa kuyamarnintsikmi alli kanantsikta munanqa. Jesusqa kuyakoq karmi nunakunata ankupëpa o llakipëpa gobernanqa (Isaïas 11:4).

Llapan nunakunam juk familianölla kawakuyanqa, manam mëpita kayanqampita o ima castapita kayanqampita chikinakuyanqanatsu (Revelacion [Apocalipsis] 7:9, 10). Kë Patsachö llapan täraq nunakunam Teyta Diosta y nuna mayinkunata kuyayanqa. Y llapantsikmi juntu y kushishqa trabajashun kë Patsa juk shumaq huertaman tikranampaq, tsënöpa Diosnintsik imëpis munanqannö kawanapaq (Salmus 115:16).

Diospa Gobiernun kë Patsata gobernamuptinqa manam alläpa achachë ni alläpa alalë kanqanatsu (Salmus 24:1, 2). Jesusqa kë Patsachö kawanqan witsanqa vientutapis päratsirqanmi. Tsëmi rikätsimantsik Teyta Dios yanapaptin imëkata rurëta puëdinqanta (Marcus 4:39, 41). Jesus gobernanqan witsanqa manam pipis alläpa tamyata ni kë patsa kuyoqta mantsanqanatsu. Y nunakunawan animalkunapis juntu y allim kawakuyanqa, y manam pipis kë Patsantsikta malogranqanatsu (Osëas 2:18).

Manam pipis qeshyanqanatsu, edäyanqanatsu ni wanunqanatsu (Isaïas 35:5, 6). Adanwan Ëva kawayanqannömi limpu y Shumaq Patsachöna kawakushun. Y mikuypis unë Eden huertachönömi llapantsikpaq atska kanqa (Genesis 2:9). Israel nacionchö täraqkunatam Teyta Dios kënö nirqan: “Pacha junta mikushqam [...] yamë kawakuyanki”. Tsënö ninqanmi Shumaq Patsachö cumplikanqa (Levïticu 26:4, 5).

Entëru Patsata Dios gobernamuptinqa yamë y allim kawakushun, nunakunapis shumaqmi tratanakuyanqa. Manam guërrakunapis kanqanatsu y pipis manam pitapis dominanqanatsu, y llapantsikpaqmi imëkantsik kanqa. Bibliachömi kënö nin: “Nunakuna mana mantsakushpana[m] kawakuyanqa. Üvas montipa y hïgus montipa chakinchö yamënam jamakuriyanqa” (Miquëas 4:3, 4).

Llapankunapaqmi wayinkunapis kanqa y manam pï qëchunqatsu. Y llapantsikmi gustamanqantsikkunata rurar kushishqa kashun. Bibliachömi kënö nin: “Mananam envänuqa afanakuyanqatsu” (Isaïas 65:21-23, TNM).

Bibliachömi nin llapan nunakuna Jehoväta alli reqiyänampaq kaqta (Isaïas 11:9). Imëkata yachaq Diosnintsikpita y llapan kamanqankunapitam nunakunaqa yachakushun. Manam yachakunqantsiktaqa armakunata rurar pitapis wanutsinapaqtsu utilizäshun, sinöqa Patsantsikta shumaq cuidar y llapankunawampis kushishqa kawakunapaqmi (Salmus 37:11; Isaïas 2:4).

Nunakuna mana wanushpa kawayänanta munarmi Teyta Diosqa kë Patsata imëkayoqta kamarqan, tsëchö alli y kushishqa kawakunapaq (Salmus 37:29; Isaïas 45:18). Tsëpaqqa Teyta Diosqa wanuyta chipyëpam ushakätsinqa (Isaïas 25:8). Bibliachömi kënö nin: “Wanïqa mananam masqa kanqanatsu, ni manam alläpa llakikï ni waqakï ni nanatsikï kanqanatsu” (Revelacion [Apocalipsis] 21:4). Teyta Diosnintsik mana allikunata ushakäratsiptinqa, cäsukoq nunakuna y mëtsikaq kawarimoqkunam kë Patsachö mana wanushpa kawayanqa (Juan 5:28, 29; Hëchus 24:15).

 Kanan witsanqa mëtsika millon nunakunam, Diospa Gobiernun kë Patsata gobernamuptin tsëchö kawëta munar mana alli rurëninkunata jaqikäyan. Jutsayoq karmi höraqa fäciltsu cambiayänan, tsënö karpis Teyta Diosnintsik munanqannö kawayänampaqmi kallpachakuykäyan. Y tsëta rurayänampaqqa Jehovä Diospita y Jesucristupita Bibliachö alli yachakuyanqanmi yanapëkan (Juan 17:3).

Ichikllanam pishin mana allikuna ushakänampaq. Tsë Shumaq Patsachö kawëta munarqa, Jehoväpa testïgunkunawan Bibliapita yachakuy. Pëkunaqa Kushishqa Kawakushun neq libruwanmi yachatsiyäshunki.