Kikikim imatapis decidinëki
Imanö kawanapaq decidinqantsikpitam kushishqa o llakishqapis kashun. Tsëta musyarmi Jehoväqa munan mandakunqankunata cäsukur kawakunantsikta.
Jehoväqa yamë y kushishqa kawakunatam munan.
Bibliachömi kënö nin: “Noqaqa Jehovä Diosnikikunam kä. Noqaqa biennikikunapaqmi imatapis qamkunata yachatsï, y puriyänëkipaq kaq nänipa ëwayänëkipaqmi qamkunata pushä. Mandakunqäkunata shumaq cäsukuyaptikiqa yamë kayanqëkipis mayuchö yakunömi mëtsika kanqa, y alli kaqta rurayanqëkipis lamarchö laqcheqyëkaq yakunömi kanqa” (Isaïas 48:17, 18).
Kamakoq Diosnintsik karmi Jehoväqa musyan alli kawakunapaq ima yanapamanqantsikta. Tsëmi biennintsikpaq kaptin consëjunkunata cäsukunata munan. Teyta Dios mandamanqantsikta cäsukurqa allim kawakushun. Imatapis alli decidirmi, yamë y kushishqa kawakushun.
Jehoväqa manam mañamantsiktsu rurëta mana puëdinapaq kaqkunata.
Bibliachömi kënö nin: “Kanan qamkunata willayanqaq mandakuykunaqa manam sasa o aja cumplinantsu, y manam qamkunapita karuchötsu këkan” (Deuteronomiu 30:11).
Teyta Dios mandakunqannö kawakunapaqqa, capaz pensanqantsikta y ruranqantsikta cambianantsik. Peru rurëta mana puëdinqantsiktaqa manam Jehovä mañamantsiktsu. Kamamaqnintsik karmi pëqa musyan llapanta rurëta mana puëdinapaq kaqta. Teyta Diosnintsikta alli reqirqa, cuentatam qokuntsik ‘mandakunqankunata cäsukuyqa mana alläpa difïcil’ kanqanta (1 Juan 5:3).
Mandakunqankunata cäsukoqkunataqa Jehovä yanapanqam.
Bibliachömi kënö nin: “Noqa Jehovä Diosnikikunaqa, derëcha makikikunapitam qamkunata tsarëkä. Noqam qamkunata kënö nï: ‘Ama mantsakäyëtsu. Noqam yanapayashqëki’” (Isaïas 41:13).
Teyta Dios yanapamashqallam pë munanqannö kawëtaqa puëdintsik. Pëqa Palabran Bibliawanmi yanapamantsik, animamantsik y shamoq tiempuchö mas allina kawakunapaq kaqta nimantsik.
Entëru Patsachömi mëtsikaq millon nunakuna cuentata qokuyashqa Bibliachö consëjukunata cäsukurqa mas alli kawakuyanqanta. ¿Bibliapita maslla yachakuyta munankimanku? ¿Tsëchö consëjukunapita maslla yachakuyta munankimanku? Tsëta maslla musyanëkipaqqa, Kushishqa kawakushun neq follëtuta yachakuri. Tsëtaqa jw.org päginachömi grätislla tarinki. Tsë follëtuchöqa këkunatam yachakunki:
-
“¿Imanirtan Bibliapita yachakuyqa alli?”.
-
“Bibliachöqa alli noticiakunam kan”.
-
“¿Bibliachö ninqanta creishwantsuraq?”.
Teyta Diospa Palabranta yachakurqa, ‘kanampis y imëpis confiakuypaq’ consëjukunatam tarinki (Salmus 111:8). Imanö kawakunapaq Bibliachö consëjukunata cäsukurqa mas allim kawakunki. Tsënö kaptimpis, Teyta Diosqa manam tsënö kawakunapaq obligamantsiktsu (Deuteronomiu 30:19, 20; Josuë 24:15). Tsëtaqa kikintsikmi decidinantsik.
