1. ¿Imanö kanatatan Jehovä munan?

JEHOVÄQA wawqi panintsikkunawan yanapanakunatam munan. Awmi, jukläya kashqapis Jehoväqa llapantsiktam kuyamantsik. Tsënö ruranapaqmi apostol Pablu ninqanqa yanapamäshun. Tsëta yachakurishun.

2. Efesius 4:16 ninqannö, ¿imanirtan wawqi panintsikkunawan yanapanakur kanantsik?

² Wawqi panintsikkunata “manam qamta wanaqtsu” mana ninapaqmi Pabluqa yachatsikurqan (1 Cor. 12:21). Wawqi panintsikkunawan yamë kanapaqqa llapantsikmi yanapanakur kanantsik (leyi Efesius 4:16). Tsënö rurashqam kuyashqa sientikuyanqa.

3. Kë yachatsikuychöqa, ¿imakunapitatan yachakushun?

³ Wawqi panintsikkuna respetanqantsiktaqa, ¿imanötan rikätsikushwan? Puntataqa, creikoqkunata rikaq wawqikuna kikinkunapura respetanakuyänampaqmi yachakushun. Tsëpitanam soltëru wawqi panintsikkunata respetanapaq y kuyanapaq yachakushun. Y usharinapaqnam quechuata yachakuykaq  wawqi panikunata respetanapaq yachakushun.

4. Romänus 12:10 Pablu ninqantaqa, ¿imanirtan creikoqkunata rikaq wawqikunaqa cäsukuyänan?

⁴ Jehoväpa yanapakuyninwanmi creikoqkunata rikaq wawqikunataqa churayan, tsënö kaptimpis pëkunaqa jukläya jukläyam kayan (1 Cor. 12:17, 18). Wakinqa mushoqllaraq karnin, qeshyapäkurnin y edäna karninmi igual-llaqa rurëta puëdiyantsu. Tsëmi ni mëqan creikoqkunata rikaq wawqikunaqa, “manam qamta wanaqtsu” nir pensayanmantsu. Tsëpa rantinqa Romänus 12:10 (leyi) Pablu ninqannömi rurayänan.

5. ¿Imanötan creikoqkunata rikaq wawqikunaqa respetanakuyan? Y ¿imanirtan tsënöqa rurayänan?

⁵ Creikoqkunata rikaq wawqikunaqa, shumaq wiyanakurmi respetanakuyanqanta rikätsikuyan. Tsënö kayanqanmi yanapakun ima asuntuta parlayaptimpis. Tsëmi 1988 wata 1 de octubri La Atalaya revistachö kënö nin: “Creikoqkunata rikaq wawqikunaqa allim musyayan Teyta Dios yanapaptin Jesucristu pëkunata yanapanqanta. Tsëmi pëkunaqa Diospa Palabran ninqannö ima asuntutapis rikäyan (Hëchus 15:6-15). Creikoqkunata rikaq wawqikunaqa, manam ni mëqampis mas alli kayanqantaqa pensayantsu”.

6. (1) Creikoqkunata rikaq wawqikunataqa, ¿imatan yanapanqa? (2) ¿Imanötan wawqi panikunataqa yanapanqa?

⁶ Creikoqkunata rikaq wawqikuna juntakäyanqanchö respetanakurqa, manam ni mëqampis yachaq tukur parlëkachanqatsu. Tsëpa rantinqa, humildi y tantiaq karmi wakinkuna parlakuyaptin shumaq wiyakunqa. Tsënömi rikätsikunqa Diospa Palabran y  “alli juiciuyoq y markäkïpaq sirwipakoq” ninqankunata wiyakoq kanqanta (Mat. 24:45-47). Creikoqkunata rikaq wawqikuna respëtuwan y shumaq parlar ima asuntutapis rikäyaptinqa, Teyta Dios yanapaptinmi wawqi panikunata shumaq yanapayanqa (Sant. 3:17, 18).

7. ¿Imanötan Jesusqa rikarqan soltëru këta?

⁷ Teyta Diospa sirweqninkunaqa manam casädu y wamrayoqllatsu kayan, sinöqa soltëru wawqi panikunapis kayanmi. ¿Imanötan rikashwan soltëru wawqi panintsikkunata? Soltëru këpaq Jesus pensanqampita yachakurishun. Jesus Patsaman shamurqa manam casakurqantsu, tsënö kanqanmi yanaparqan llapan tiempunwan Teytampita yachatsikunampaq. Tsënölla wakin cristiänukuna rurayänampaq kaqtapis nirqanmi. Peru manam yachatsikurqantsu casakuyta puëdiyanqanta o mana puëdiyanqantaqa (Mat. 19:11, 12). * Jesusqa respëtuwanmi soltërukunata rikarqan.

8. 1 Corintius 7:7-9 Pablu ninqannö, ¿imamantan cristiänukuna pensayänan karqan?

⁸ Apostol Pablupis soltëru karmi, Teyta Diospita llapan tiempunwan yachatsikuyta puëdirqan. Pëqa, casakuyta munarqa kikinkuna akrakuyänampaq kaqtaqa allim musyarqan. Tsënö kaptimpis, pënölla wakin cristiänukunapis Jehoväta sirwiyänampaqmi nirqan (leyi 1 Corintius 7:7-9). Awmi, Pabluqa soltërukunata respetarqanmi. Tsëchi Timoteutapis jövinllaraq këkaptin imëka cargukunachö yanapakunampaq churarqan (Filip. 2:19-22). * Tsëqa ama pensashuntsu casädu o soltëru karnin mas alli y yachaq kayanqantaqa (1 Cor. 7:32-35, 38).

9. ¿Imaraq nishwan casakuypaq y soltëru këpaq?

 ⁹ Jesuswan Pabluqa manam casakuy o soltëru kë mas alli kanqanta yachatsikuyarqantsu. Tsëqa, ¿imatatan nishwan casakuypaq y soltëru këpaq? 2012 wata 1 de octubri La Atalaya revistam, tsëpaq kënö nin: “Casädu y soltëru këpis Teyta Diospa qarëninmi. [...] Jehoväqa kuyanmi llapan soltëru kaqkunatapis”. Tsënö kaptinmi noqantsikpis soltëru wawqi panintsikkunata respetanantsik.

10. Soltëru wawqi panintsikkunataqa, ¿imanötan respetanqantsikta rikätsintsik?

¹⁰ Kikinkuna munar o imapis pasakuptinmi wakinqa soltërulla kakuyan. Wakinnam pëkunapaqnö kaqta mana tarirnin casakuyantsu. Wakimpanam majankuna wanushqa kaptin soltërulla kakuyan. Y wakinqa itsa majankuna ashirnin yanaparinapaq nimashwan. Imanö kaptimpis manam tapupashwantsu imanir mana casakuyanqanta y manam piwampis celashwantsu. Tsëmi, soltëru wawqi panintsikkunata imatapis manaraq nirnin alliraq pensanantsik mana llakitsinapaq (1 Tes. 4:11; 1 Tim. 5:13). Soltëru këpaq wakinkuna niyanqampita yachakurishun.

11, 12. ¿Imatatan ruranantsiktsu soltëru wawqi panintsikkunawan?

¹¹ Congregacionkunata watukaq juk wawqim soltëru karnin maslla yanapakuy puëdinqanta nin. Peru wakin wawqi panikuna imanir mana casakunqanta niyaptin llakikunqantapis ninmi. Y Betelchö yanapakoq juk soltëru wawqim kënö willakun: “Soltëru kë mana alli kaptinnömi, wakin wawqi panikunaqa soltëru kaqkunata llakipäyan”.

¹² Betelchö yanapakoq juk soltëra panim kënö willakun: “Wakin turi nanakunaqa, llapan soltëru kaqkuna casakuy munayanqanta y tsëta munar imëkata rurayanqantam pensayan. Juk trabäjuta ruraqmi juk nacionman mandayämarqan. Wayinchö quedakunäpaq kaq nanapaqa tsë tardim reunionnin kanaq. Tsë nanam winë mayi ishkaq turikuna kanqanta nimarqan. Diospa wayinman chäriyaptïnam tsë ishkan turikunata reqitsimänampaq jancharkur apamarqan. ¡Tsë turikunawan noqaqa imaläyam penqakuykuyarqä!”.

13. ¿Imatan yanaparqan juk soltëra panita?

¹³ Betelchö yanapakoq juk soltëra paninam kënö willakun: “Llapan tiempunkunawan yanapakoq soltëru turi nanakunatam reqi. Pëkunaqa Teyta Diospita yachatsikur y wawqi panikunata yanaparmi kushishqa kawakuyan. Y manam wakimpita mas alli kayanqantaqa pensayantsu”. Imanö shumaqmi wawqi panikuna respetanakur, mana chikinakur y wakimpita mas alli kayanqanta mana pensarnin kayaptinqa. Tsënö kaptinqa llapampis kuyashqam sientikuyanqa.

14. ¿Imanötan soltëru wawqi panintsikkunataqa respetantsik?

¹⁴ Soltëru wawqi panintsikkunaqa agradecikuyanmi pëkunata respetashqa y alli këninkunata rikashqa. Tsëmi Jehoväta mana dejëpa sirwiyanqampita respetanantsik. Tsënömi soltëru  wawqi panintsikkunata “manam qamta wanaqtsu” nishuntsu (1 Cor. 12:21). Tsënö rurashqam, soltëru wawqi panintsikkunaqa kuyanqantsikta y respetanqantsikta rikäyanqa.

15. ¿Imatatan atskaq wawqi panikuna rurayashqa?

¹⁵ Kë qepa watakunataqa atskaq Teyta Diospa sirweqninkunam quechuata yachakuyashqa maslla yachatsikuyänampaq. Tsënö Teyta Diospita yachatsikuyänampaqqa, quechuata parlayanqan markakunamanmi ëwakuyashqa. Tsënö rurayänampaqqa kikinkunam akrakuyashqa (Hëch. 16:9). Raslla quechuata mana yachakurpis imëkata yachayanqanwan y kuyakoq kayanqanwanmi wawqi panikunataqa yanapayan. Tsëmi pëkunataqa respetanantsik.

16. Creikoqkunata rikaqkuna pitapis carguman churëta munarqa, ¿imatatan cuentachö katsiyänan?

¹⁶ Juk wawqi creikoqkunata rikaq y yanapaqnin këta munaptinqa, ¿quechua parlëtaraqku alli yachanan? Manam. Tsëpa rantinqa, creikoqkunata rikaq wawqikunaqa Diospa Palabran ninqannömi tsë cargukunamanqa wawqikunata churayan (1 Tim. 3:1-10, 12, 13; Tïtu 1:5-9).

17. ¿Imatatan rurayänan juk markata ëwakoq familiakunaqa?

¹⁷ Wakin familiakunaqa trabäjuta ashirmi juk markakunata ëwakuyashqa. Itsa tsë markachöqa trabäjuta tariyänampaq y wamrankuna escuëlaman ëwayänampaqqa, castellänutaraq yachakuyänan. Y tsë markachöna, quechuachö Diospita yachakuyänampaq juntakäyanman. Tsëqa, ¿quechuaman o castellänumantsuraq ëwayanman?

18. Gälatas 6:5 ninqannö, ¿imanötan respetantsik teyta kaqkuna akrayanqanta?

¹⁸ Teyta kaqmi quechuaman o castellänuman ëwayänampaq kaqtapis rikänan. Tsëta ruranampaqqa familianta yanapanampaq kaqtam cuentaman churanan (leyi Gälatas 6:5). Familianman pensëkur imatapis teyta akranqantaqa respetanantsikmi. Tsëmi tsë familiakunataqa shumaq y kuyëllapa tratanantsik (Rom. 15:7).

19. ¿Imatatan teytakuna wamrankunapaq rurayanman?

¹⁹ Itsa wakin familiakunaqa Diospita quechuachö yachakuyänampaq juntakäyan. Peru wamrankuna quechua parlëta allilla mana yachayaptinqa,  ¿imatatan teytakuna rurayanman? Tsëqa Teyta Diospita wamrankuna yachakuyänampaqmi quechua parlëta yachatsiyänan o castellänuta parlayanqan reunionkunaman ëwayänan. Tsëta rurayänampaqqa teytakunam Jehovä yanapanampaq mañakuyänan. Tsënö rurayaptinqa wamrankunam Jehoväta mas kuyayanqa y pë munanqannö kawayanqa. Quechuaman o castellänuman familiakuna ëwayaptimpis, wawqi panikunaqa respetayanqanta y kuyayanqantam rikätsiyänan.

20. Quechua parlëta yachakuykaqkunataqa, ¿imanirtan respetashwan?

²⁰ Mëtsikaq wawqi panikunam quechuata yachakuyänampaq kallpachakuyan. Raslla yachakuyta mana puëdiyaptimpis, tiempu pasanqanmannömi Jehovä Diosta kuyarnin kallpachakuyanqanta rikäshun. Tsënö rurayaptinmi pëkunataqa maslla respetashun y kuyashun. Awmi, quechua parlëta yachakuykaq wawqi panintsikkunaqa yanapamënintsikta puëdiyanmi.

21, 22. ¿Imanirtan Jehoväta agradecikunantsik?

²¹ Ollqu, warmi, soltëru, casädu, jövin, edäna y quechua parlëta mana yachashqapis llapantsiktam wawqi panintsikkuna y Jehoväqa kuyamantsik. Awmi, llapantsik yanapakuyta puëdinqantsikpitam Jehovätaqa agradecikuntsik (Rom. 12:4, 5; Col. 3:10, 11).

²² Imanö rurashqa kanqantsikwanmi Pabluqa imëkata yachakunapaq yanapamarquntsik. Kë yachakunqantsiknö rurarqa wawqi panintsikkunata respetanapaqmi kallpachakushun.