Puntataqa tsënö kanqantam höraqa rikätsikayämurqö. Tsëqa Hebrëus 12:16 textuwan igualaqnömi karqan, porqui tsëchömi nin Esaüqa “sagrädu cösaskunata precisaqpaq mana” churanqanta y ‘punta kaq tsuri kë derëchunta’ juk mati mikïllapaq Jacobta rantikurinqanta. Tsënö ninqanmi entiendikarqan Esaüpa derëchunta rantirninqa, kastampita Mesïas shamunampaq kaqtapis Jacob logrëkanqanta (Mat. 1:2, 16; Lüc. 3:23, 34).

Peru Bibliapa wakin willakïninkunata alleq leyirninqa tsënö mana kanqantam rikäyarqö. Wakinllata rikärishun:

Leachö Jacobpa punta kaq tsurinqa Rubenmi karqan. Y mas kuyanqan warmin Raquelchö punta kaq tsurinqa Josëmi karqan. Ruben jutsata rurariptinmi punta kaq tsuri kanqan derëchunqa Josëmanna pasarirqan (Gen. 29:31-35; 30:22-25; 35:22-26; 49:22-26; 1 Crön. 5:1, 2). Tsënö kaptimpis Mesïasqa manam Rubenpa ni Josëpa kastampitatsu yurirqan, sinöqa Leachö yureq Judäpa kastampitam (Gen. 49:10).

Lücas 3:32 textum willakun pitsqa nunakunapaq y pëkunapis Mesïaspa unë awilunkuna kayanqanta. Itsa pëkunaqa llapampis  punta kaq tsuri kayarqan. Boazmi Obedpa teytan karqan y Obednam Jesëpa teytan karqan (Rut 4:17, 20-22; 1 Crön. 2:10-12).

Mesïaspa awilunkunachöqa Davidpis këkanmi. Peru pëqa manam Jesëpa punta kaq tsurintsu karqan, sinöqa ultimu kaqmi (1 Sam. 16:10, 11; 17:12; Mat. 1:5, 6). Jina Salomonpis manam Davidpa punta kaq tsurintsu karqan (2 Sam. 3:2-5).

Këwanqa manam punta kaq tsuri këqa mana precisaq kanqantatsu nikantsik. Porqui punta kaq tsuriqa familiachö respetashqam kaq, teytantam familiata dirigirnin yanapëta puëdeq y herenciatapis wakinkunapita mastam chaskeq (Gen. 43:33; Deut. 21:17; Jos. 17:1).

Peru mayor kaq tsuripa derëchunqa menor kaq wawqinkunamampis pasëta puëdeqmi. Abrahanpa tsurin Ismaelpa derëchunmi Isaacman pasarqan (Gen. 21:14-21; 22:2). Rubenpa derëchunnam Josëman pasarqan.

Kananqa yapë rikärishun Hebrëus 12:16 textu kënö ninqanta: “Alkäbu kayë pipis rakcha ruraq, ni Esaünö sagrädu cösaskunata precisaqpaq mana churaq qamkunachö mana kanampaq, pëqa punta kaq tsuri kë derëchuntam juk mati mikïrëkurlla qokïkurqan”. Tsënö nirqa, ¿imapaqtaq Pablu parlëkarqan?

Apostol Pabluqa manam Mesïas ima kastapita yurinampaq kaqtatsu parlëkarqan. Sinöqa shumaq portakuyänampaqmi consejëkarqan. Tsënöpa oqllanakur ruranakï jutsata rurayanqanrëkur Diospa favorninta mana oqrayänampaq (Heb. 12:12-16). Tsë jutsata rurarninqa Esaünömi kayanman karqan, pëqa “sagrädu cösaskunata” precisaqpaq churanampa rantinmi “mana alli kaqta” akrarqan (Kingdom Interlinear).

Israelïtakunapa awilunkunapa tiempunchömi Esaüqa kawarqan, itsachi höraqa teytampa rantin pëpis sacerdoti cuenta Jehoväpaq kayashqa ofrendakunata rurëta puëdeq (Gen. 8:20, 21; 12:7, 8; Job 1:4, 5). Peru Diospa kaqta despreciarninmi mayor kaq tsurinö katsinampaq kaq derëchunkunata juk mati mikïllapaq rantikurirqan. Itsa tsëtaqa rurarqan Abrahanpa mirënin sufrinampaq kaqta Biblia willakunqanta musyarnin (Gen. 15:13). Jinamampis sagrädu cösaskunata desprecianqantaqa rikätsikurqan Jehoväta mana sirweq warmikunawan casakurninmi, y tsëqa teytankunatam alläpa llakitsirqan (Gen. 26:34, 35). Peru Jacobqa jukläyam karqan, porqui Diosta adoraq warmiwan casakïtam procurarqan (Gen. 28:6, 7; 29:10-12, 18).

Tsëqa, juk nunapa kastampita Mesïas yurinampaqqa, ¿punta kaq tsuri këraqku precisarqan? Manam. Porqui Mesïaspa unë awilunkunapita wakinqa, manam punta kaq tsuriraqtsu kayarqan. Y tsëtaqa judïukunapis alleqmi musyayarqan, tsëmi Jesëpa menor kaq tsurin Davidpa kastampita Mesïas yurinanta shuyaräyaq (Mat. 22:42).