1. ¿Imanirtan qateqninkunapaq üsha cuenta kayanqanta Jesus nirqan?

 JESUSQA juk mitsikoq üshankunawan imanö kanqantam, pëwan qateqninkuna imanö kayanqanta igualatsirqan (Juan 10:14). Tsënöqa igualatsikurqan, mitseqnimpa vozninta üshakuna wiyakuyaptinmi. Reqipakoq juk nunam tsënö kanqanta rikarqan, pëmi kënö willakurqan: “Fötuta tomëta munarmi, üshakuna witiyämunanta munayarqä. Peru voznïkunata mana reqirmi witiyämurqantsu. Tsënam mitseqnin jövin yurirkamurqan. Y qayar qallëkuptinllam üshakunaqa qepanta ëwar qallëkuyarqan”.

2, 3. (1) ¿Imanötan Jesuspa qateqninkunaqa pëta wiyakuyanqanta rikätsikuyan? (2) ¿Imatataq këchö y qateqnin kaqchö yachakushun?

² Tsë nuna rikanqanqa, üshankuna o juk parlakuychöqa qateqninkuna imata rurayänampaq kaqta Jesus ninqantam yarpätsimantsik. Kënömi nirqan: “Qayanqätam wiyayanqa” (Juan 10:16). Peru Jesusqa ciëluchönam këkan. Tsëqa, ¿imanöraq pëta wiyashwan? Juknöpaqa pë yachatsimanqantsikta rurarmi (Mat. 7:24, 25).

³ Këchö y qateqnin kaqchöqa, Jesus yachatsikunqankunapita wakintam rikäshun. Tsëkunachömi, imakunata manana ruranapaq y imakunata ruranapaq Jesus yachatsikunqanta rikäshun. Puntataqa, alli kaq Mitsikoqnintsik imakunata manana ruranapaq nimanqantsikpita yachakurishun.

4. Lücas 12:29 ninqannöpis, ¿imakunapaqtan alläpa ‘yarpachakurnin’ këkashwan?

⁴ (Leyi Lücas 12:29). Jesusqa wanayanqankunapaq alläpa mana ‘yarpachakuyänampaqmi’ qateqninkunata nirqan. Y tsë consëju alläpa alli kanqantaqa musyantsikmi. Tsënö kaptimpis, manam fäciltsu tsëta wiyakuyqa. ¿Imanir?

5. ¿Imanirtan wakin wawqi panikunaqa alläpa yarpachakurnin kawayan?

 ⁵ Itsa wakin wawqi panikunaqa, täräyanqan nacionchö trabäju mana kaptin mikuypaq, röpapaq y mëchö täräyänampaq alläpa yarpachakuyan. Itsa familiankunata manteniyänampaq qellëta tariqa fäciltsu kanman. O familianta manteneq kaq wanushqa y tsërëkur pishipakurnin këkäyan. Y COVID-19 qeshyarëkur, itsa wakinqa trabäjunnaq y qellëninnaq quedayashqa (Ecl. 9:11). Tsëkunapa o juk problëmakunapa pasashqa karqa, ¿imanötan wiyakushwan alläpa mana yarpachakunapaq Jesus consejakunqanta?

6. Apostol Pëdruta juk kutichö ima pasanqanta willakaramuy.

⁶ Juk kutim, apostol Pëdruwan wakin apostolkuna laqcheqsëkaq Galilea qochachö barcunkunawan këkäyarqan. Tsënö këkäyaptinmi, yaku janampa Jesus shamuykanqanta rikäriyarqan. Tsëmi Pëdruqa kënö nirqan: “Teytë, qam karninqa yaku janampa qam kaqman shamunäpaq mandamë”. Jesus “¡shamï!” niptinnam, “Pëdruqa barcupita yarpurirnin, yaku janampa purir Jesus kaqman ëwarqan. Peru llutëpa y feyupa vientïkaqta rikëkurmi alläpa mantsakarqan. Y hundikar qallëkurnam, ‘¡Teytë, salvëkallämë!’ nirnin qayarïkurqan. Tsënam Jesusqa jinan höra makinta makyëkurnin  tsarirkamurqan”. Jesusta rikaranqanyaqqa, Pëdruqa laqcheqsëkaq qocha janampam purirqan. Peru laqcheqsëkaq yakuta rikärirqa, mantsakar y yarpachakurmi hundikar qallëkurqan (Mat. 14:24-31).

7. ¿Imatataq yachakuntsik Pëdruta pasanqampita?

⁷ Barcupita Pëdru yarpurirqa, yaku janampam purir qallëkurqan. Y manam jukman yarpachakunampaq y hundikänampaq kaqmanqa pensarqantsu. Jesus kaqman chëtam munarqan, peru laqcheqsëkaq yakuta rikarmi, hundikar qallëkurqan. ¿Imatataq Pëdruta pasanqampita yachakuntsik? Yaku janampa purinampaq Diosman Pëdru markäkunqannöllam, kanan witsan problëmakunachö alli tsarakunapaq Diosman markäkunantsik. Yakuman hundikaq cuenta imëkapaq yarpachakurqa, Jehoväta y änimanqantsikta manam yarpäshunnatsu y ichikllapa ichikllapam pëman markäkushunnatsu o yärakushunnatsu. Ima problëma kaptimpis, Jehoväta y yanapamënintsikta puëdinqanta ama qonqashuntsu. ¿Imanötan tsëtaqa lograshun?

8. ¿Imatan yanapamäshun wananqantsikkunapaq alläpa mana yarpachakunapaq?

⁸ Yarpachakunantsikpa rantin Jehoväman confiakunqantsikmi yanapamäshun. Yarpäshun, Teytantsik Jehoväqa pëta mas puntaman churashqaqa, llapan wananqantsikkunata procuramunampaq kaqtam änimantsik (Mat. 6:32, 33). Pëqa tsëta änikunqanta imëpis cumplishqam (Deut. 8:4, 15, 16; Sal. 37:25). Pishqukunata y wëtakunata Jehovä cuidëkaptinqa, manam imata mikunapaq o vistikunapaq kaqman yarpachakushwantsu (Mat. 6:26-30; Filip. 4:6, 7). Imanömi wamrankunata kuyaq teytakunaqa, imampis mana faltanampaq yarpachakuyan, tsënöllam Teytantsik Jehoväqa wananqantsikkunapaq yarparëkan. Awmi, Jehovä cuidamänapaq kaqtaqa segürum këkantsik.

9. ¿Imatataq yachakunki juk wawqitawan warminta pasanqampita?

⁹ Wananqantsikkunapaq Jehovä yarpachakunqanta musyanapaq, juk wawqitawan warminta ima pasanqampita parlarishun. Pëkunaqa precursormi kayarqan. Ishkaq panikunata reunionman apayänampaq asheqmi, nacionninkunapita qeshpir ëwakoqkuna täräyanqan sitiuman makwana cärrunkunawan juk höratanö ëwayarqan. Wawqim kënö willakurqan: “Reunion ushariptinmi, ishkan panikunata wayiman mikoq ëwayänäpaq niyarqä. Peru tsëpitaqa, imäkunapis mana kanqantam yarpäriyarqä”. ¿Imatataq rurayarqan? Tsë wawqim kënö nin: “Wayiman chäriyänäpaqqa, punkuchömi rantipakuykunayoq ishkë jatun bolsakuna këkäyarqan. Tsëman pï dejashqa kanqantaqa manam musyayarqätsu. Jehovämi imanö këkäyanqäta musyëkarqan”. Tsëpita ichik tiempullatanam, cärrunkuna malograrirqan. Tsëwanmi Diospita yachatsikurnin puriyaq y altsatsiyänampaqqa manam qellëninkuna karqantsu. Tsëmi juk tallerman apayarqan ëkapaq altsapuyänampaq kaqta musyayänampaq. Tsënam pipa cärrun kanqanta tapukur, juk nuna yurirkurqan. Wawqinam, pëpa kanqanta y altsatsipaq këkanqanta nirqan. Nunanam, “manam imanantsu, warmïmi tsënöta y tsë color cärruta munan. ¿Ëkachötan rantikëkamankiman?” nirqan. Wawqiqa tsë nunatam cärrunta rantikuykurqan y paganqanqa jukta rantinampaqpis tinkurqanmi. Pëmi kënö nirqan: “Tsë junaq pasayämanqanqa mana creipaqnömi karqan. Tsënö pasayämanqan illaqpita mana kanqantam musyayarqä. Jehovämi yanapëkäyämarqan”.

10. ¿Imanötan Salmus 37:5 ninqan yanapamantsik wananqantsikkunapaq alläpa mana yarpachakunapaq?

 ¹⁰ Alli mitsimaqnintsik Jesusta wiyakushqa y wananqantsikkunapaq alläpa mana yarpachakushqaqa, segürum kashun wananqantsikkunata Jehovä procuramunampaq kaqta (leyi Salmus 37:5; 1 Pëd. 5:7).  Pitsqa kaq pärrafuchö parlanqantsik problëmakunaman pensarishun. Itsa kananyaqqa, familiantsikta dirigeqwan o patronnintsik pagamanqantsikwan Jehovä cuidëkämarquntsik. Peru familiantsikta dirigeq mantenimënintsikta manana puëdiptin o trabäjunnaq këkashqaqa, Jehoväqa juknöpapis wananqantsikkunata procuramunqam. Jina alli mitsimaqnintsik ima masta mana ruranapaq nimanqantsikta rikärishun.

11. Mateu 7:1 y 2 ninqannö, ¿ima rurëta dejanapaqtan Jesus nimarqantsik y imanirtan tsëta rurë difïcil kanman?

¹¹ (Leyi Mateu 7:1, 2). Jesusqa musyarqanmi nunakuna pantaq kanqantsikta y wakinkuna mana allita rurayanqanta masqa rikaranqantsikta. Tsëmi kënö nirqan: “Amana pitapis juzgayënatsu”. Y wawqi panintsikkunata mana juzganapaq kallpachakurpis, höra höraqa tsëtam rurantsik. Tsënö kaptinqa, ¿imatataq rurashwan? Jesus ninqantam wiyakunantsik y wawqi panintsikkunata juzguëtam dejanantsik.

12, 13. ¿Jehovä imata ruranqantan wakinkunata juzgar mana sïguinapaq yanapamantsik?

¹² Nunakunachö alli kaqta Jehovä rikanqanman pensashun. Alläpa jutsakunata rurashqa kaptimpis, Pëqa alli kaqtam rey Davidchö rikarqan. Davidqa, Bat-Sëbawanmi punukuykurqan y nunanta wanutsiyänampaqmi mandakurqan (2 Sam. 11:2-4, 14, 15, 24). Tsëta ruranqanqa manam kikinllapaqtsu mana alli karqan, sinöqa familiampaq y warminkunapaqpis (2 Sam. 12:10, 11). Juk kutichönam, Jehoväman mana confiakur Israel tröpakunata censatsirqan. Itsachi orgullösu tikrarirqan y mëtsika tröpanman confiakurqan. Dios mana mandëkaptin censatsinqampitam, 70.000 israelïtakuna qeshyawan wanuyarqan (2 Sam. 24:1-4, 10-15).

¹³ Israelchö tsë witsan kawarqa, ¿imataraq Davidpita pensashwan karqan? ¿Juzgarnintsuraq Dios llakipänampaqnö mana kanqanta nishwan karqan? Jehoväqa manam tsënötsu pensarqan. Tsëpa rantinqa, llapan kawëninchö mana dejëpa sirwishqa kanqanta y llapan shonqunwan arrepentikushqa kanqantam rikarqan. Tsëmi alläpa jutsata rurashqa kaptimpis, perdonarqan. Pëqa musyarqanmi, David alläpa kuyanqanta y alli kaqta rurëta munanqanta. ¿Manaku noqantsikchö alli kaqta Diosnintsik rikanqampita agradecikuntsik? (1 Rëy. 9:4; 1 Crön. 29:10, 17).

14. ¿Imatan wakin wawqi panikunata yanapashqa wakinkunata manana juzgayänampaq?

¹⁴ Pantareq nunakunata Jehovä llakipëkämashqaqa, noqantsikpis wakinkunatam llakipashwan y pëkunachö alli kaqta rikëtam procurashwan. Wakinkunachö mana alli kaqta rikanqantsikpitaqa fäcil-llam rimarishwan. Peru Jehovänö këta procuraq nunaqa, pantaq kayanqanta musyarpis, llapankunawanmi alli apanakun. Diamanti rumita manaraq chipapätsiyaptinqa, lluta rumikunanöllam. Peru tsë rumita reqeq nunaqa, chipapäratsiyaptin alläpa shumaq kanampaq kaqmanmi pensan. Jehoväwan Jesusqa manam nunakunapa rikëninllamantsu pensayan. Tsënöllam noqantsikpis, nunakuna imanö kayanqanta masqa rikänantsik.

15. ¿Imanötan wakinkuna pasëkäyanqanman pensanqantsik imarëkurllapis pëkunata mana juzganapaq yanapamäshun?

 ¹⁵ Wakinkunachö alli kaqta rikashqapis, ¿ima mastan yanapamäshun imallapitapis wakinkunata mana juzganapaq? Imakunapa pasashqa kanqanta o pasëkanqanman pensanqantsikmi. Këllata yarpärishun: juk kutim templuchö qellë churakuyänanman wallkalla väleq ishkë qellëninta juk waktsa viuda winëkaqta Jesus rikarqan. Pëqa manam imanir masta mana winashqa kanqantatsu nirqan. Tsëpa rantinqa, imanir winashqa kanqanta y imapa pasëkanqanta cuentaman churarmi, puëdinqanta winanqampita alabarqan (Lüc. 21:1-4).

16. ¿Imatataq yachakuntsik Verönicata pasanqampita?

¹⁶ Verönica imapa pasanqanmi, wakinkunapa kawënin imanö kanqanman pensanapaq yanapamantsik. Congregacionchömi, wamranta japallanlla wätaq juk pani karqan. Verönicam kënö nin: “Diosta sirwichö allilla mana yanapakoqtanö rikarmi, pëkunataqa allillaqa rikaqtsu kä. Tsëmi tsë nanawan juk kuti yachatsikoq yarqurqä. Tsëchömi wamran upa kaptin, imëka problëmakunapa pasanqanta willamarqan. Wamranta cuidanampaq y Diospita yachatsinampaq imëkata ruranqantam nimarqan. Wamran tsënö kaptinmi, juk congregacionta reunionkunaman ëwaq”. Jina Verönicaqa kënöpis nirqanmi: “Imëkapa pasëkanqantaqa manam ni ichikllapis  pensarqätsu. Kananqa, Jehoväta sirwinampaq kallpachakunqampitam alläpa respetä”.

17. ¿Imata ruranapaqtan Santiägu 2:8 nin, y imanötan tsëta wiyakushwan?

¹⁷ ¿Imatataq ruranantsik juk wawqita juzguëkanqantsikta cuentata qokurqa? Wawqi panintsikkunata kuyanantsikpaq kaqtam yarpänantsik (leyi Santiägu 2:8). Jina juzgarnin mana sïguinapaqmi, Jehoväta yanapëkamänapaq mañakushwan. Y mañakunqantsiknö ruranapaqmi, tsë wawqiwan parlëta procurashwan. Jina Diospita yachatsikoq y imallatapis mikurinapaqmi invitarishwan. Wawqintsikta mas reqinqantsikmannömi, Jehoväwan Jesus rurayanqannö pëchö imapis alli kaqta ashishun. Tsënömi alli mitsimaqnintsik, wakinkunata manana juzganapaq nimanqantsikta wiyakuntsik.

18. ¿Imanötan alli mitsimaqnintsik ninqanta wiyakunqantsikta rikätsikuntsik?

¹⁸ Mitseqnimpa vozninta üshakuna wiyaqnömi, Jesuspa qateqninkunaqa pë ninqanta wiyakuntsik. Wananqantsikkunapaq alläpa mana yarpachakushqa y wakinkunata manana juzganapaq kallpachakushqaqa, Jehoväwan Jesusqa bendicimäshunmi. Wallkaqlla üshakunapita kashqa o wakin kaq üshakunapita kashqapis, alli mitsimaqnintsik Jesusta wiyakunapaq y cäsukunapaq kallpachakushun (Lüc. 12:32; Juan 10:11, 14, 16). Qateqnin kaqchömi, ruranapaq Jesus nimanqantsikta ishkëta yachakushun.