1, 2. (1) ¿Imanirtan mana allikunapa pasarninqa mantsakantsiktsu? (2) ¿Imapitataq yachakushun?

 JEHOVÄPA sirweqninkunaqa musyantsikmi imëka mana allikunapa pasanapaq kaqta. Teyta Diospa Palabranmi kënö nimantsik: “Diospa Gobiernunman yëkunapaqqa, mëtsika sufrimientupam pasashun” (Hëch. 14:22). Tsënöllam musyantsik wakin problëmantsikkunaqa Shumaq Patsachöraq altsakänampaq kaqta. Tsëchöqa, mananam nunakuna “wanuyanqanatsu o wañuyanqanatsu, llakikuyanqanatsu, waqayanqanatsu ni nanatsikuyanqanatsu” (Apoc. 21:4).

² Imëka mana allikunapa pasanantsikpaq kaqpitaqa manam Jehovä Diosnintsik libramantsiktsu, peru aguantanapaqqa yanapamantsikmi. Römachö cristiänukunata apostol Pablu ninqanman pensarishun. Pëpis y cristiänu mayinkunapis mana allikunapa pasëkäyanqampita parlapärirmi, kënö nirqan: “Kuyamaqnintsikrëkurmi tsë llapanta vencikantsik” (Rom. 8:35-37). Tsënö ninqanwanmi musyantsik mana allikunapa pasanqantsik hörakunapis llapan ruranqantsikkuna alli yarqunampaq Jehovä yanapamënintsikta puëdinqanta. Llapan ruranqankuna alli yarqunampaq Josëta Jehovä imanö yanapanqanta rikärishun. Tsëta yachakunqantsikmi, noqantsiktapis yanapamäshun.

3. ¿Imanötan Josëpa vïdanqa raslla o saslla cambiarirqan?

³ Tsurin Josëta Jacob kuyanqantaqa llapankunam musyayaq (Gen. 37:3, 4). Tsëmi mayor wawqinkunaqa Josëta chikipar qallëkuyarqan y madianïta negociantikunatam rantikuriyarqan. Tsë negociantikunanam Egiptuman apayarqan y  Potifartam rantikuyarqan. Potifarqa karqan Egiptuchö gobernaqpa guardiankunata mandaq y cortichö autoridämi. Josëpa vïdanqa illaqpitam cambiarirqan. Papänimpa kuyë tsurin këkarpis, ichik tiempullachömi Egiptuchöna esclävuna karqan (Gen. 39:1).

4. ¿Josënöpis ima problëmakunapataq pasashwan?

⁴ Diospa Palabranmi nimantsik llapan nunakunapis ‘mana pensayanqan höra imëka mana allikunapa pasayanqanta’ (Ecl. 9:11). Höraqa llapan nunakunapis pasayanqan problëmakunapam pasantsik (1 Cor. 10:13). Y höraqa Jesuspa qateqninkuna kanqantsikrëkurmi nunakunaqa noqantsikpita burlakuyan, michämantsik y chikimantsik (2 Tim. 3:12). Ima problëmapa pasashqapis ruranqantsikkuna alli yarqunampaqqa, Jehovämi yanapamënintsikta puëdin. Josëta imanö yanapanqanta yachakurishun.

5. ¿Imatataq Potifarqa cuentata qokurqan? (Genesis 39:2-6).

⁵ (Leyi Genesis 39:2-6). Potifarqa rikarqan jövinlla këkarpis Josëqa alli trabajador kanqantam. Y cuentatam qokurqan “Teyta Jehovä yanapaptin ima ruranqampis allilla yarqunqanta”. b Tiempuwannam, Potifarqa wayinchö imëka asuntuta rikänampaq churarqan. Y Potifarqa imëka bendicionkunatam chaskirqan.

6. ¿Imanöraq Josëqa sientikurqan?

⁶ Josë imanö sientikunqanman pensarishun. ¿Imataraq masqa munarqan? ¿Mas cargukunaman churananta munartsuraq alli trabajarqan? Manachi. Mas cargukunayoq karpis, santukunata adoraq nunapa esclävunllachi këkanman karqan. Pëqa mas munarqan papänimpa wayinta kutikunampaq libri dejarinantachi. Peru Jehoväqa manam permitirqantsu Potifar libri dejarinanta. Y problëmankunaqa masran karqan.

7. ¿Imanirtan nishwan Josëqa mas problëmaman chashqa kanqanta? (Genesis 39:14, 15).

⁷ Genesis librupa 39 kaq capïtulunmi willakun Potifarpa warminqa Josëta kuyakurkunqanta y pëwan oqllanakuyta munanqanta. Peru Josëqa manam munarqantsu.  Tsëmi warmiqa alläpa cölerar, ‘violamëtam munashqa’ nir acusarqan (leyi Genesis 39:14, 15). Tsënö acusaptinmi, Potifarqa Josëta atska watapa carcelaratsirqan (Gen. 39:19, 20). ¿Imanötan tsë carcel karqan? Bibliachö carcelpaq parlarqa, hebreu idiömachöqa uchku o pözu ninmi. Tsëwanqa entienditsikun alläpa ampeq o tsakaq y llakikuypaq carcel kanqantam (Gen. 40:15). Tsënöllam Bibliaqa willakun Josëta chakipita y kunkapita cadenayanqanta (Sal. 105:17, 18). Josëpa vïdanqa rasllam o sasllam cambiarirqan. Confiakuypaq esclävu këkanqampitam prësuna tikrarirqan.

8. Alläpa problëmakunapa pasarpis, ¿imamantan confiakushwan?

⁸ ¿Pasëkanqantsik problëmapa Jehovä Diosnintsikman mañakushqa karpis mas problëmapaku pasarquntsik? Tsëqa pasakunmanmi. Satanas gobernanqan tiempuchömi kawantsik y Jehoväqa manam pasëkanqantsik problëmakunapita libramäshuntsu (1 Juan 5:19). Peru confiakunantsikmi pasëkanqantsik problëmakunata Jehovä musyanqanta y noqantsikpaq yarpachakunqanta (Mat. 10:29-31; 1 Pëd. 5:6, 7). Kikin Jehovämi kënö änimantsik: “Manam imëpis dejashqëkitsu ni qonqashqëkitsu” (Heb. 13:5). Jehovä yanapamashqaqa, alläpa problëmakunapa pasarpis allim tsarakushun. Tsënömi Josëtapis Jehoväqa yanaparqan.

9. ¿Imanötan musyantsik Josëtaqa carcelchö këkaptin Jehovä yanapanqanta? (Genesis 39:21-23).

⁹ (Leyi Genesis 39:21-23). Carcelchö këkaptimpis, Josëtaqa Jehovämi yanaparqan. ¿Imanötan yanaparqan? Carcelta rikaq nunam Josëtaqa allipa rikarqan y respetarqan, tsëmi wakin prësukunata rikänampaq carguman churarqan. Teyta Diospa Palabranmi kënö nin: “Carcelta rikaq nunaqa mananam yarpachakoqnatsu Josëpa cargunman churanqan asuntukunapaq”. Tsënö carguman churashqa kaptinmi, Josëqa trabäjuyoqna karqan. Peru ¿imanirtan carcelta rikaq nunaqa violacionpa acusayanqan jövinta tsënö carguman churarqan? Tsëtaqa musyantsik Genesis 39:23 textuta leyirmi. Kënömi nin: “Josëtaqa Teyta Jehovämi imëkachöpis yanapaq, awmi, Teyta Jehovä yanapaptinmi ima ruranqampis allilla yarqoq”.

10. ¿Imanirtan Josëqa pensarqantsu llapan ruranqampis allilla yarqunqanta?

¹⁰ Josë imanö sientikunqanman yapë pensarishun. Këman pensarishun: ¿mana kaqpita acusashqa kayaptintsuraq llapan ruranqampis allilla yarqunqanta pensarqan? Imatataq Josë munarqan, ¿carcelta rikaq nuna alli tratanantatsuraq? Manam. Pëqa mas munarqan libri dejariyänantam. Prësu mayin nunatam carcelpita libri yarquptin mañakurqan pëpaq faraonta parlapëkunampaq y carcelpita jipirinampaq (Gen. 40:14). Peru tsë nuna faraonta mana parlapaptinmi, ishkë wata masraq carcelchö quedakurqan (Gen. 40:23; 41:1, 14). Peru Jehovä yanapaptinmi, Josë ruranqanqa llapampis allilla yarqurqan.

11. ¿Imanötan Josëta Jehovä yanaparqan, y imanötan tsëqa yanapakurqan Jehoväpa munënin cumplikänampaq?

¹¹ Carcel-llachöraq Josë këkaptinmi, Jehoväqa faraonta suëñutsirqan. Y faraonqa tsë suëñunqan imapaq kanqanta musyëta munarqan. Tsë suëñunqanta Josëlla willëta puëdinampaq kaqta musyarirmi, carcelchö këkaptin Josëta qayatsirqan. Jehovä yanapaptinmi, Josëqa tsë suëñunqan imapaq kanqanta y imata ruranampaq kaqta faraonta willarqan. Tsënö willaptinmi, faraonqa  espantakurqan. Y Jehovä yanapëkanqanta cuentata qokurmi, Egiptuchö llapan mikuykunata cargunchö katsinampaq churarqan (Gen. 41:38, 41-44). Tiempuwanqa, Egiptuchöpis y Josëpa familian kawayanqan Canaan markachöpis atska watapam mallaqäyarqan. Y mikuykunata cargunchö katsirmi, Josëqa llapan familiankunata salvarqan, y tsë familiankunapitam tiempuwanqa Diospa Akrashqan yurirqan.

12. ¿Imanötan Josëta Jehovä yanaparqan llapan ruranqan allilla yarqunampaq?

¹² Pensarishun, Josëpa vïdan imanö cambianqanman. ¿Pï munaptintaq esclävu këkaptimpis Potifarqa wayinchö llapan kaqkunata rikänampaq Josëta churarqan? ¿Pï munaptintaq carcelta rikaq nuna prësukunapa mandaqnin kanampaq Josëta churarqan? ¿Pitan faraonta suëñutsirqan y pitan Josëta yanaparqan tsë suëñunqan imapaq kanqanta willakunampaq? ¿Pï munaptintaq Egiptuchö mikuykunata cargunchö katsinampaq Josëta churayarqan? (Gen. 45:5). Jehovä munaptin y yanapaptinmi, Josë ruranqankunaqa llapampis allilla yarqurqan. Josëpa wawqinkuna mana allita rurayanqantaqa, Jehoväqa allimanmi tikratsirqan.

13. ¿Llapan problëmakunachöku Jehovä yanapamantsik?

¹³ Josë pasanqankunapitaqa imëkatam yachakuntsik. Peru ¿llapan problëmakunachöku Jehovä yanapamantsik? ¿Mana allikunapa pasanqantsikkuna alli tikranampaqku yanapamantsik? Tsëtaqa manam Biblia nintsu (Ecl. 8:9; 9:11). Peru segürum këkantsik mana allikunapa pasanqantsik höra Jehovä alkäbu këkanqanta y yanapamänapaq mañakushqa wiyamanqantsikta (Sal. 34:15; 55:22; Is. 59:1). Y manam tsëllatsu, alli tsarakunapaqmi yanapamantsik. ¿Imanötan ruran?

14. ¿Imanötan Jehoväqa mana allikunapa pasanqantsik höra yanapamantsik?

¹⁴ Jehoväqa mas necesitanqantsik hörakunam shoqamantsik y yanapamantsik (2 Cor. 1:3, 4). Tsënö kanqantam Turkmenistan nacionpita wawqi Eziz rikarqan. Pëtaqa Jehovä Diosnintsikta sirwinqanrëkurmi ishkë watapa carcelayarqan. Pëmi kënö willakun:  “Juzgayämanqan qoya o wärëmi, juk wawqi Isaïas 30:15 ninqanta leyipämarqan. Tsë textuqa kënömi nin: ‘Tranquïlu kar y noqaman confiakamurmi kallpayoq kayanki’. Tsë palabrakunam yanapamarqan tranquïlu kanäpaq y Jehoväman confiakunäpaq. Tsëman yarpararmi, carcelchö kanqä tiempu alli tsarakurqä”. ¿Noqantsikpis yarpantsikku mana allikunapa pasanqantsik höra Jehovä imanö shoqamanqantsikta y yanapamanqantsikta? 

15, 16. ¿Imatataq yachakuntsik pani Tori pasanqampita?

¹⁵ Höraqa manam cuentata qokuntsiktsu mana allikunapa pasanqantsik höra Jehovä imanö yanapëkamanqantsikta. Tsëtaqa problëmakuna pasariptinran cuentata qokuntsik. Tsënö kanqantam willakun Tori jutiyoq panintsik. Pëpaqqa, Mason jutiyoq wamranmi seis watapa cancer qeshyawan qeshyarqan y tsëpitam wanukurqan. Y Toriqa alläpam llakikurqan. Kënömi nin: “Juk mamapaqqa tsënöpa pasëqa alläpa llakikuypaqmi, manam imawampis igualantsu”. Y tsëpitanam kënö nin: “Llapan teytakunachi noqanö pensayan wamrantsikta tsënö sufreqta rikëpitaqa kikintsik sufrinqantsikchi mas alliqa kanman”.

¹⁶ Mana allikunapa pasashqa karpis, pani Toriqa tiempuwanqa cuentatam qokurqan Jehovä yanapashqa kanqanta. Kikinmi kënö nin: “Wamrä qeshyanqan tiempuman yarparqa, Jehovä alläpa kuyëwan yanapayämashqa kanqantam cuentata qokü. Yarpämi Mason hospitalchö alläpa grävi këkaptin, turikuna y nanakuna karu sitiukunapita watukaqnin viajayämunqanta. Hospitalchöqa imë hörapis turikuna y nanakunam këkäyaq yanapayämänampaq. Hasta necesitäyanqä  cösaskunawanmi yanapayämarqan. Tsë tiempukunachöqa manam imäkunapis faltarqantsu”. Teyta Jehoväqa Toritawan Masonta llapan necesitäyanqankunawanmi alli tsarakuyänampaq yanaparqan (rikäri “ Jehoväqa necesitäyanqä hörakunam yanapayämarqan” neq recuadruta).

17, 18. ¿Imaraq yanapamäshun mana allikunapa pasanqantsik höra Jehovä yanapëkämanqantsikta cläru rikänapaq y agradecikunapaq? (Salmus 40:5).

¹⁷ (Leyi Salmus 40:5). Jatusaq jirkakunaman ëwaqkunaqa mas altu kaq puntaman chëta munarpis, ëwayanqan nänichö shumaq sitiukunata rikapakurmi ëwayan. Tsënöllam noqantsikpis mana allikunapa pasëkarqa, seguïdu pensanantsik pruëbakunachö alli tsarakunapaq Jehovä imanö bendicikämanqantsikta. Cada junaq pasariptin, kënö tapukushun: “Kanan junaqqa, ¿imanötan Jehovä bendicimashqa? Mana allikunapa pasëkaptïpis, ¿imanötan Jehoväqa yanapëkäman alli tsarakunäpaq?”. Cada junaq Jehovä imanö bendicimanqantsikman pensashun.

¹⁸ Pasanqantsik pruëbakunata ushakätsinampaq Jehoväman mañakunqantsikqa allillam (Filip. 4:6). Tsënö karpis, manam qonqanantsiktsu Jehovä Diosnintsik kanan imanö bendicikämanqantsikta. Pëqa änimarquntsik kallpayoqta tikratsimänapaq y mana allikunapa pasarnin alli tsarakunapaq yanapamänantsikpaqmi. Tsëmi Jehovä Diosnintsiktaqa yanapamanqantsikpita agradecikunantsik. Tsëta rurarqa, clärum rikäshun Josëtanöpis mana allikunapa pasanqantsik hörakuna imanö yanapëkamanqantsikta (Gen. 41:51, 52).