Tsënö kaptimpis Jehoväqa munan, änikunqankunata dispuninqan tiempuchö ruramunanta pacienciawan shuyaränatam. ¿Imanirtan ruramunampaq kaqkunata pacienciawan shuyaränata munan? Y ¿imatan yanapamäshun änikunqankunata kushishqa shuyaränapaq?

¿IMANIRTAN JEHOVÄQA SHUYARÄNATA MUNAN?

Bibliachömi kënö nin: “Teyta Jehoväqa qamkunawan alli kanampaq y qamkunata llakipäyäshunëkipaqmi pacienciawan shuyarëkan. Jehovä Diosqa imëpis alli kaqtam ruran. Llapan shonqunkunawan pëta shuyaqkunaqa kushishqam kayanqa” (Is. 30:18). Mana cäsukoq judïukunatam Isaïas tsënö nirqan (Is. 30:1). Peru tsë tiempuchöqa kayarqanmi Jehoväta mana dejëpa sirweq judïukunapis. Pëkunataqa Isaïas ninqan alläpachi yanaparqan Jehovä ruranampaq kaqkunata pacienciawan shuyaräyänampaq. Tsënöllam noqantsiktapis yanapamantsik.

Tsëqa, ¿imanirtan pacienciawan shuyarashwan? Kikin Jehoväpis ruramunampaq kaqkunata pacienciawan shuyaraptinmi. Jehoväqa citashqanam fëchata llapan mana allikunata ushakätsinampaq y tsë junaq chämunantam pacienciawan shuyarëkan (Mat. 24:36). Tsë junaqmi cläru musyakärinqa, Jehoväpaq y sirweqninkunapaq Satanas ninqankunaqa mana rasumpa kanqanta. Diosnintsikqa manam permitinqanatsu Satanas kananta, y yanapaqninkunatapis ushakätsinqam. Peru sirweqninkunataqa, llakipar salvanampaqmi änishqa.

Änikunqankunata shuyaranqantsik tiempuchöqa, manachi Jehoväqa llapan problëmantsikkunata ushakätsimunqatsu. Peru kushishqa kanapaq yanapamänapaqmi änimantsik. Tsëmi Isaïas ninqannö, Diosnintsik änikunqankunata shuyararnin kushishqa këta puëdintsik (Is. 30:18). a Peru ¿imataq yanapamäshun? Chuskullata yachakurishun.

¿IMATATAQ RURASHWAN ÄNIKUNQANKUNATA SHUYARARPIS KUSHISHQA KANAPAQ?

Alli kaqkunallaman pensashun. Gobernanti Davidqa rikarqan, imëka mana allikunata nunakuna rurayaqtam (Sal. 37:35). Tsëkunata rikëkarpis kënömi nirqan: “Teyta Jehoväpa puntanchö upällalla kë, y ruramunampaq kaqta pacienciawan shuyarë. Juk nuna imatapis mana allita ruranampaq pensaptinqa  ama cölerakuytsu” (Sal. 37:7). ¿Imatataq David rurarqan kë consëjunta cäsukur? Salvanampaq Jehovä äninqanman y imëka allikunata pëpaq ruranqanmanmi yarpararqan (Sal. 40:5). Tsënöllam noqantsiktapis, mana allikuna pasamanqantsikman yarparänapa rantin, Jehovä imanö yanapamanqantsikman pensanantsik. Tsëmi yanapamäshun Jehovä änikunqanta pacienciawan shuyaränapaq.

Imë hörapis Jehoväta alabashun. Salmus 71 cancionta qellqaqqa capazchi David karqan y kënömi nirqan: “Noqaqa qamllatam shuyarashqëki, waran waranmi masraq alabashqëki” (Sal. 71:14). ¿Imanötan alabarqan? Cantarnin y nunakunata Jehoväpita parlaparninmi (Sal. 71:16, 23). Noqantsikpis Davidnömi Jehoväta alabashwan nunakunata yachatsirnin, amïguntsikkunata y familiantsikkunata Jehoväpita parlarnin y reunionkunachö cantarnin. Tsëmi cantarninqa, tsë cancion imata ninqanman alli pensanëki. Tsëmi yanapamäshun Jehovä änikunqankunata kushishqa shuyaränapaq.

Wawqi panikunawan imëpis juntu këkäshun. Problëmakunapa pasarmi Davidqa Jehoväta kënö nirqan: “Sirwishoqnikikunapa puntanchömi jutikiman confiakamushaq” (Sal. 52:9). Davidqa mana allikunapa pasanqan hörakunaqa, Jehoväpa sirweqninkunawanmi mas juntu kaq, tsëmi yanapaq kallpayoq tikranampaq. Tsënöllam noqantsikpis Diospita yachatsikur, reunionkunachö y imëkata rurarpis wawqi panikunawan mas juntu kanantsik (Rom. 1:11, 12).

Shuyaranqantsik cumplikänampaq kaqta següru kashun. Salmus 62:5 textum kënö nin: “Teyta Diostam yanapëkamänampaq tranquïlu shuyarëkä, pëmi salvamanqa”. Mana allikunapa ushakënin manaraq chämuptimpis, änikunqankunata Jehovä cumplimunampaq kaqtam següru kanantsik. Mëtsika tiempupa shuyararpis, cumplimunampaq kaqmanqa llapan shonquntsikwanmi confiakunantsik. Tsënö confiakunapaqqa, Diospa Palabrantam estudianantsik. Y estudiarqa allim yachakunantsik Dios willakunqankuna imanö cumplikashqa kanqanta, Bibliachö ninqankuna mana contranakunqanta y Jehovä imanö kanqanta (Sal. 1:2, 3). Tsënöllam Jehoväman seguïdu mañakunantsik, y imëpis amïgun kanapaqmi santu espïritunta mañakunantsik. Tsëkunata rurarmi, imëyaqpis kawakuyta shuyaranqantsik tiemputa alli provechashun (Jüd. 20, 21).

Noqantsikpis Davidnömi següru këkänantsik, änikunqanta shuyaraqkunata y alläpa kuyanqan kaqkunata Jehovä rikëkämunqanta (Sal. 33:18, 22). Tsëmi änikunqankunata Jehovä ruramunanta shuyararnin kushishqa kanapaqqa, alli kaqkunallaman pensanantsik, imë hörapis Jehoväta alabanantsik, wawqi panikunawan imëpis juntu kanantsik y shuyaranqantsik cumplikänampaq kaqta següru kanantsik.