Marywan qowan o runan Johnqa, a mëtsikaq filipïnukuna trabajaq ëwayanqan nacionchömi täkuyan, y tsëchömi Diospita yachatsikuyan. COVID-19 qeshya kanqan witsanmi, Maryqa täkunqan nacionchö nunakunata y juk nacionpita nunakunata Bibliapita yachatsir qallarqan. ¿Imanötan tarirqan?

Maryqa estudiantinkunatam kënö tapoq: “¿Pillatapis reqinkiku Bibliapita yachakuyta munaqta?”. Awmi niyaptinqa, kënömi neq: “¿Reqitsimankimanku?”. Tsënö tapukurllam Bibliapita yachakuyta munaqkunata atskaqta tarishqa. Bibliapita yachakuyta gustaqkunaqa, familiankunata y amïgunkunatam yachakuyanqankunata willayan. Bibliapita yachakuyta munaqkunata Mary imanö tarinqanta rikärishun.

Marytaqa Jasmin jutiyoq estudiantinmi, Bibliapita yachakuyta munaqkunata chuskoqta reqitsirqan. Juk kaqpa jutinqa Kristïnam karqan, pëtaqa alläpam Bibliapita yachakuy gustaq, tsëmi semänachö ishkë kuti estudianampaq nirqan. Pëtam Maryqa kënö tapurqan: “¿Pillatapis reqinkiku Bibliapita yachakuyta munaqta?”. Kristïnanam kënö nirqan: “Awmi, amïgäkunam yachakuyta munayan, reqitsishqëki”. Tsëmi juk ishkë semänallachö, chuskoq amïgankunata reqitsirqan. Y tiempuwannam mas amïgankunata Maryta reqitsirqan, y tsë amïgankunapis wakinkunaqa mas amïgankunatam reqitsiyarqan.

Kristïnaqa, Filipïnaschö këkaq familiankunapis Bibliapita yachakuyänantam munarqan. Tsëmi wamran Andrëata yachakunampaq nirqan, peru Andrëaqa kënömi pensaq: “Testïgukunaqa mana reqishqa religionmi kayan, manam Jesusman creiyantsu y Antiguo Testamentullatam leyiyan”. Peru yachakuyta qallarirllam cuentata qokurqan tsënö mana kanqanta. Tsëmi cada estudianqan höra, kënö neq: “Bibliachö tsëta niptinqa, ¡rasumpachi!”.

Tiempuwannam Andrëapis ishkaq amïgankunata y juk trabajaq mayinta Bibliapita yachakuyänampaq Maryta reqitsirqan. Andrëapaqa tiyan Angelapis yachakuytam munarqan. Marywan Andrëa Bibliapita cada yachakuyaptinmi Angelaqa wiyakoq, tsëtaqa manam Mary musyaqtsu. Juk kutim Angelaqa, Bibliapita yachakuyta munar sobrinan Andrëata nirqan Maryta reqitsinampaq. Angelataqa alläpam Bibliapita yachakuy gustaq, tsëmi juk killapis manaraq pasaptin mëtsika textukunata dememoria yachakurqan y semänachö chusku kuti yachakuyta munanqantam Maryta nirqan. Angelaqa  sobrinan Andrëa yanapaptinmi videollamädapa reunionkunata seguïdu wiyakoq.

Kristïna Bibliapita yachakuptinmi, qowan o runan Joshuaqa wiyakuyta munar amänunllachö quedakoq, tsëta cuentata qokurirmi Mary kënö tapurqan: “¿Qampis Bibliapita yachakuyta munankimanku?”. Pënam kënö nirqan: “Wiyakamushaqlla, peru ama imatapis tapumankitsu, tapumaptikiqa jinan höram ëwakushaq”. Peru cincu minütuspis manaraq pasaptinmi, Kristïnapitapis mastana tapukurqan y Bibliata estudiëta munanqanta nirqan.

Maryqa, tapukurmi atska estudiantikunata tarirqan. Llapankunata yachatsita mana puëdirmi wakin estudiantikunata wawqi panikunata pasarqan. Y pëpaqa chusku nacionkunapitam veinti öchu estudiantinkuna karqan.

Jasminqa 2021 wata abril killachömi bautizakurqan, Kristïnanam 2022 wata mäyu killachö bautizakurqan, pëqa yapëmi Filipïnas nacionchö familiankunawan këkan. Maryta Kristïna reqitsinqan ishkë amïgankunapis bautizakuyashqanam. Y Angelapis, Kristïna bautizakunqampita juk ishkë killakuna pasariptinllam bautizakurqan, kananqa precursöra regularmi. Kristïnapa qowan o runan Joshua, wamran Andrëa y wakin estudiantikunapis yachakurmi sïguikäyan.

Punta cristiänukuna kawayanqan tiempuchöpis, mëtsikaq nunakunam Diospita yachakuyarqan familiankuna y amïgunkuna willayaptin (Juan 1:41, 42a; Hëch. 10:24, 27, 48; 16:25-33). Y qamqa estudiantikikunata y Bibliapita yachakuyta munaqkunata, imanirtan kënö tapunkitsu: “¿Pillatapis reqinkiku Bibliapita yachakuyta munaqta?”. Tsënö tapurmi, Diospita yachakuyta munaqkunata tarinki.