Jesusqa 29 watachö bautizakurirmi mandakoq kaq Sacerdöti tikrarqan. ¿Imanötan tsëta musyantsik? Tsëtaqa bautizakunqan junaqmi, Teytan Jehoväpa “munëninta rurarnin” kawanampaq rikätsikurqan (Gäl. 1:4; Heb. 10:5-10). Jesus bautizakunqampitam Jehoväpa munëninta rurëqa qallarqan y tsë höram templuchö imëkanöpa Jehovä Diosta sirwipis qallarqan. Templu nirqa parlan, Jesus wanunqanrëkur Jehoväpa munëninta tukuynöpa rurar sirwinapaq yanapamanqantsiktam (Mat. 3:16, 17; Heb. 5:4-6).

Jehovä munanqannö imapis rurakänampaqqa mandakoq kaq Sacerdötitaran wanarqantsik. Tsëpaqmi Jehoväqa Jesusta “santu espïrituwan y poderwan” akrarqan (Hëch. 10:37, 38; Mar. 1:9-11). Tsëqa, ¿imanötan musyantsik Jesus manaraq wanur y kawarimur mandakoq kaq Sacerdöti kanqanta? Tsënö kanqantaqa nintsik, Aaronwan tsurinkuna mandakoq kaq sacerdötikuna kayänampaq Moisespa Leynin ninqannö rurayanqanchömi.

Leyqa mandakoq Sagrädu sitiuman mandakoq kaq sacerdötilla yëkunampaqmi. Nunakuna jutsa rurayanqampita perdonashqa kayänampaqmi, mandakoq kaq sacerdötiqa Sagrädu sitiuman chänampaqqa cortïna chöpimparaq pasaq (Heb. 9:1-3, 6, 7). Aaronwan tsurinkunaqa, mandakoq kaq sacerdöti këman chärir-ran “cortïna chowpimpa” Sagrädu sitiuman yëkuyaq. Tsënöllam Jesusqa manaraq wanur mandakoq kaq Sacerdöti këman charqan, tsëpitaran “cortïna chowpimpa” o juk parlakuychöqa kikimpa kawëninwan charqan (Heb. 10:20). Tsëchi apostol Pabluqa nirqan, Jesusqa “mandakoq kaq sacerdötinö Cristu” shamunqanta. Tsëpitanam nirqan “makiwan mana rurashqa kaq, mas jatun y chipyëpa alli kaq carpa wayimanmi yëkurqan” nir, o juk parlakuychöqa “kikin ciëlumanmi yëkurqan” (Heb. 9:11, 24).

Mushoq conträtuqa juk junaqllachömi patsakarqan. Tsënö kanqantaqa nintsik, Jesus nunakunarëkur wanurnin ciëluta ëwashqa kaptinmi. Tsënömi mushoq conträtuqa patsakarqan. ¿Imanötan tsë conträtuqa patsakarqan?

Puntataqa, Jehovä kaqmanmi Jesusqa ëwarqan. Tsëpitanam nunakunarëkur wanunqanta, qarë cuentatanö Teytanman chätsirqan. Y Jehoväqa Jesus ruranqanta chaskirqanmi. Kë llapan pasariptinran mushoq conträtuqa qallarirqan.

Bibliachöqa manam tarintsiktsu imë Jehovä tsëkuna ruranqanta. Tsëmi musyantsiktsu imë mushoq conträtu qallanqantaqa. Peru Pentecostes fiestapaq chunka junaq pishikaptinmi Jesusqa ciëluta kutikurqan (Hëch. 1:3). Tsë junaqkuna Jehoväwan këkaptinchi mushoq conträtuqa qallarirqan (Heb. 9:12). Tsënö kanqanqa musyakärirqan Pentecostes fiestachö pasakunqanwanmi (Hëch. 2:1-4, 32, 33). Tsë junaqpita mushoq conträtu qallanqanqa, clärum rikakarqan.

Tsëqa nunakunarëkur Jesus wanunqanta Jehovä chaskiriptinmi, mushoq conträtuqa qallarirqan. Tsënöqa pasakurqan mandakoq kaq Sacerdöti Jesus tikrariptinran (Heb. 7:25; 8:1-3, 6; 9:13-15).