1. ¿Ima nitatan munëkantsik rasumpa kaq yachatsikuypaq parlarqa?

“¿IMANÖTAN rasumpa kaqta yachakurqëki?” “¿Musyëkarnaku yurikurqëki?” “¿Ëka tiempunatan tsëta yachakushqanki?”. Tsëtaqa itsa noqantsiktapis tapumashqantsik o wakinkunata noqantsik tsëta tapushqantsik. Tsëwanqa, ¿ima nitatan munëkantsik? Tsëpaq parlarqa, imata creinqantsikpaq, Teyta Diosta imanö sirwinqantsikpaq y imanö kawanqantsikpaqmi nikantsik. Pillapis rasumpa kaq yachatsikuyta katsiptinqa, Biblia ninqankunata musyanqanta y respetanqantam musyantsik. Tsënöpam, wakin religionkuna yachatsikuyanqanmanqa creintsiknatsu y jutsasapa karpis kushishqanam kawakuntsik (Juan 8:32).

2. Juan 13:34, 35 ninqannö, ¿imanö kashqatan nunakunaqa yachakuyta munayanqa?

² ¿Imanötan rasumpa kaqta yachakur qallarqantsik? Itsa Jehoväpa testïgunkuna imanö portakuyanqanta y kuyakoq kayanqanta rikarnin (1 Pëd. 2:12). Wakinkuna reunionman tsëllaraq ëwarpis tsëtam rikäyarqan y yachatsikuyanqanta wiyayanqampitapis masqa tsëtam yarpäyan. Tsëqa manam kananraqtsu pasan, Jesuspis willakushqanam karqan qateqninkunaqa kuyanakoq kayanqampita mëchöpis reqishqa kayänampaq kaqta (leyi Juan 13:34, 35). Peru alli markäkïyoq o yärakuyyoq kanapaqqa mastaran ruranantsik.

3. ¿Imaraq pasanman cristiänu mayintsikta kuyarlla Teyta Diosta sirwishqaqa?

³ Cristiänu mayintsikkuna kuyakoq kayaptinllatsu manam  Teyta Diosman markäkoq y yärakoqqa kanantsik. Këllaman pensari; ¿imaraq pasanman juk cristiänu, creikoqkunata rikaq wawqi y llapan tiempunwan yachatsikoq wawqi pani mana allita rurëkuyaptin? Y ¿imataraq rurashwan pillapis mana alli nimashqa o Teyta Diospa contran parlayaptin? ¿Imataraq rurashwan tsënö pasaptin? ¿Jehovätatsuraq dejarishwan? Alli markäkïyoq o yärakuyyoq kanapaqqa Jehovä Diostam kuyanantsik y manam jukkuna rurayanqantatsu qatinantsik. Wakinkuna imanö kayanqampita y imata rurayanqampita kushikurllatsu manam markäkïyoq o yärakuyyoqqa kashun, sinöqa Jehovä Diospita Bibliachö alli yachakunqantsikpitam (Rom. 12:2).

4. Mateu 13:3-6, 20, 21 ninqannö, ¿imatatan wakinqa rurayan problëmakuna kaptin?

⁴ Rasumpa kaq yachatsikuyta wakinkuna “kushishqa” chaskikurpis, mana allikunapa pasar dejariyänampaq kaqtam Jesusqa nirqan (leyi Mateu 13:3-6, 20, 21). Itsa Jesusta qatirqa bendicionkunata chaskir kushishqa kayänampaq kaqllaman pensayarqan y mana allikunapa pasarnin imata rurayänampaq kaqmanqa pensayarqantsu (Mat. 16:24). Peru kanan witsampis manam libritsu kantsik imëka problëmakunapitaqa, tsëmi mana pensanqantsik höra imallapis pasaramashwan (Sal. 6:6; Ecl. 9:11).

5. Rasumpa kaqta alli yachakushqa cristiänukunaqa, ¿imanötan kayan?

⁵ Jehovä Diosta llapan sirweqkunaqa allim musyantsik rasumpa kaqta yachakushqa kanqantsikta. Y ¿imanötan tsëta musyantsik? Pillapis mana allita nïkamashqa o mana allita ruramashqa mana qelanäkurirmi (Sal. 119:165). Imëka problëmapa pasar alli tsarakushqam markäkïnintsik o yärakuynintsik mas alliyanqa (Sant. 1:2-4). Tsënö markäkïyoq o yärakuyyoq kanapaqqa, ¿imatatan rurashwan?

6. ¿Imanirtan punta cristiänukunaqa alli markäkïyoq kayarqan?

⁶ Punta cristiänukunaqa “rasumpa kaqpita alli willakïkunata” yachakushqa karmi markäkïyoq o yärakuyyoq kayarqan (Gäl. 2:5). Tsë willakuykunaqa noqantsikrëkur Jesus wanunqanmi. ¿Imanirtan apostol Pabluqa tsëta alli musyarqan? Tsëtaqa musyarqan, “Cristu sufrinan y wanushqakunapita sharkamunan precisanqanta qellqarëkaqkunawan rikätsikur y shumaq käyitsikur[mi]” (Hëch. 17:2, 3). Y punta cristiänukunaqa tsëtam yachakuyta munayarqan (Hëch. 17:11, 12; Heb. 5:14). Imatapis tarita munar ni wakin cristiänukunawan kushishqa këta munarllatsu manam Teyta Diosmanqa markäkuyaq o yärakuyaq, sinöqa “Diospita rasumpa kaqta” yachakushqa karmi (Col. 1:9, 10).

7. ¿Imanötan yanapamantsik rasumpa kaqta yachatsikunqantsik?

⁷ Rasumpa kaq yachatsikuyqa manam cambiantsu (Sal. 119:160). Këllaman pensari; cristiänu mayintsik imata ruramashqa, jukkuna jutsata rurëkuyaptin o ima problëmapa pasashqapis rasumpa kaq yachatsikuyqa kaqllam këkan. Tsëmi Biblia yachatsikunqan rasumpa kanqanta alli musyanantsik. Imanömi wayi tsarakunampaqqa alli rurashqa cimientun  yanapan, tse cuentallam rasumpa kaqta yachakunqantsikpis imakunapa pasashqapis alli tsarakunapaq yanapamäshun. ¿Imanö mastan tsëta musyashwan?

8. 2 Timoteu 3:14, 15 ninqannö, ¿imanötan Timoteuqa rasumpa kaqta yachakurqan?

⁸ Timoteuqa rasumpa kaqta allim yachakushqa karqan. ¿Imanötan tsëta rurarqan? (Leyi 2 Timoteu 3:14, 15). Mamäninwan awilan Diospa Palabrampita yachatsiyaptimpis, kikinmi rasumpa kaqta mas yachakunampaq kallpachakurqan. Tsënömi pë, mamänin y awilampis Teyta Diospita mas yachakuyarqan. Awmi, Jesuspa qateqninkuna kuyanakoqta rikar y cristiänu mayinkuna imëpis juntu kayanqanta rikarmi, pëpis cristiänu mayinkuna yanapëta munarqan (Filip. 2:19, 20). Pëqa markäkoq o yärakoq karqan, manam wakinkunata kuyarllatsu sinöqa Teyta Diosta kuyarmi. Tsënöllam noqantsikpis Jehoväpaq Biblia ima ninqanta alli yachakunantsik.

9. ¿Mëqan yachatsikuytatan alli musyanantsik?

⁹ Tsëpaqqa yachakurishun, llapanta kamaqqa Jehovä kanqanta (Ex. 3:14, 15; Heb. 3:4; Rev. 4:11). Teyta Diospa yachatsikuynin Bibliachö nunakunapaq kanqanta (2 Tim. 3:16, 17). Y Jesucristu yanapaptin Jehoväpa testïgunkuna patsacho alli churanakushqa kayanqampita (Is. 43:10-12; Juan 14:6; Hëch. 15:14). Tsë rasumpa kaq yachatsikuyta musyanapaqqa manam alli yachaqraqtsu kanantsik. Sinöqa rasumpa kaqta yachakunqantsikmanmi creinantsik (Rom. 12:1).

10. Rasumpa kaqta yachakushqana karqa, ¿ima mastatan ruranantsik?

¹⁰ Jehoväpita y sirweqninkunapita alli yachakushqana karqa, wakinkunatapis Bibliapita allim yachatsishun. ¿Imanirtan tsëta ruranantsik? Rasumpa kaqllata  nunakuna yachakuyänampaqmi (1 Tim. 4:16). * Tsënö rasumpa kaqta yachatsikunapaq procurashqaqa markäkïnintsik o yärakuynintsikmi mas alliyanqa.

11. ¿Imatatan apostol Pablupita yachakushwan?

¹¹ Apostol Pablu wakinkunata yachatsirqa, “Moises qellqanqan Leywan y Diospa Willakoqninkuna Qellqayanqankunawanmi Jesusman creitsita tïrarqan” (Hëch. 28:23). ¿Imanötan pënölla Biblia ninqanta jukkunata yachatsir rurashwan? Manam yarpanqantsikllatatsu yachatsinantsik, sinöqa Jehovä munanqantam yachatsinantsik. Tsënömi Teyta Dios kuyakoq kanqanta kikinkuna alli yachakur, pëta mas kuyayanqa.

12, 13. ¿Imanötan papäkunaqa wamrankunata yanapayanman rasumpa kaq yachatsikuyta mana qonqëkuyänampaq?

¹² Papäkuna, qamkunaqa wamrëkikuna Teyta Diosta mana dejayänantam munayanki. Itsa munayanki wawqi panikunawan alli amïgu kayänanta. Tsënö kaptimpis, rasumpa kaq yachatsikuyta musyëqa manam alli amïguyoq kayanqampitatsu kanqa. Sinöqa, Teyta Dios kuyëtaqa kikinkunam yachakuyänan y rasumpa kaqta Biblia yachatsikunqantam alli musyayänan.

¹³ Teyta Diospita wamrëkikuna mas yachakuyänanta munarqa, kikikikunam Biblia ninqanta alli yachakuyänëki y tsëman yarpachakuyänëki. Tsënö ruraqta rikäyäshurnikiqa, wamrëkikunapis tsënöllam rurayanqa. Imanömi Bibliapita yachakuykaqkunata yanapanki, tsënölla wamrëkikunata rasumpa kaqta yachatsi. Tsëta ruranqëkim yanapanqa Jehoväta y markäkïpaq o yärakuypaq sirwipakoq yachëkätsimanqantsikta respetayänampaq (Mat. 24:45-47). Ama jana janallaqa Bibliapita yachatsiyëtsu. Sinöqa alli markäkïyoq o yärakuyyoq kayänampaq, “Diospa pakarëkaq yachëninta” shumaq yachatsiyë (1 Cor. 2:10).

14. ¿Imanirtan Biblia willakunqampita yachakushwan? (Rikäri “ ¿Yachantsikku kë willakuykuna yachatsikuyta?” neqtawan).

¹⁴ Teyta Diospa Palabranqa, Jehoväman mas markakunapaq o yärakunapaqmi yanapamantsik. ¿Ima willakuykunatan markäkunapaq o yärakunapaq yanapamashqantsik? Itsa yarpantsik “ushanan junaqkunachöqa” imanö tiempu kanampaq kaqta (2 Tim. 3:1-5;  Mat. 24:3, 7). Tsë willakuykunapita wakin cumplishqana kanqanmi markäkunapaq o yärakunapaq yanapamantsik. Këllaman yarpäri, ¿imanöraq musyashwan Danielpa 2 y 11 kaq capïtulunkuna cumplikashqanta y kanan witsan cumplikëkanqanta? * Biblia ninqanman markäkushqa o yärakushqaqa, imëkapa pasarpis allim tsarakushun. Tsënö kanqantaqa rikantsik, Ishkë kaq Jatun Guërra witsan Alemania nacionchö wawqi panikunata wanutsita munar qatikachäyanqanchömi. Tsë wawqi panikuna ushanan junaqkunapaq Biblia willakunqanta mana allilla musyëkarpis, Teyta Dios ninqanmanmi markäkuyarqan o yärakuyarqan.

15-17. Näzi gobiernuchö wawqi panikunaqa, ¿imanötan alli tsarakuyarqan?

¹⁵ Alemania nacionchö näzi gobiernuqa, mëtsika wawqi panikunatam mana aguantëpaq trabäjuchö trabajatsiyarqan. Hitlerwan Heinrich Himmlerqa, Jehoväpa testïgunkunata alläpam chikiyarqan. Juk panim willakurqan Himmler kënö ninqanta: “¡Jehovä Diosnikikunaqa ciëluchö mandakutsun, peru kë Patsachöqa noqakunam mandakuyä! ¡Pï mas tsarakunqantaqa rikäshunmi!”. Jehoväpa sirweqninkuna alli tsarakuyänampaqqa, ¿imatan yanaparqan?

¹⁶ Bibliapita Yachakoqkunaqa 1914 watam, ciëluchö Teyta Diospa Gobiernun qallashqana kanqanta musyar ushakätsita munayaptin mantsakäyarqantsu. Tsëmi Jehoväta sirweqkunaqa musyayarqan, Teyta Dios munanqan cumplikänantaqa ni mëqan gobiernupis mana michänampaq kaqta. Ni mandakoq Hitlerpis manam Teyta Diosta sirwiyänantaqa ushakätsinmantsu karqan, ni Diospa Gobiernumpa rantin pë gobernanmantsu karqan. Awmi, tsë witsan Diosta sirweqkunaqa Hitlerpa gobiernun  ushakänampaq kaqtaqa musyayarqanmi.

¹⁷ ¡Y tsënömi pasarqan! Ichik tiempullachömi näzi gobiernuwan Heinrich Himmler entëru Patsata gobernayänampaq nikarpis, guërrata perdïkur ëwakuyarqan. Tsënö ëwkuykarmi wawqi Lübkewan tinkurir carcelchö llawirätsishqa kanqanta yarpärirqan. Imanö këta mana puëdirmi Himmlerqa wawqi Lübketa kënö nirqan: “Kananqa Bibliapita yachakoqkunaqa, ¿imanöraq kayanki?”. Wawqi Lübkenam, näzi gobiernuqa imë karpis ushakänampaq kaqta y Testïgukunaqa salvakuyänampaq kaqta nirqan. Tsënö niptinnam Himmler nunaqa ni imata nirqantsu. Tsëpita unëllatanam kikin wanurirqan. ¿Imatatan tsëpita yachakuntsik? Bibliapita y willakunqampita yachakushqaqa, imëkapa pasarpis Teyta Diosman markäkunqantsik o yärakunqantsikmi yanapamäshun (2 Pëd. 1:19-21).

18. Juan 6:67, 68 ninqannö, ¿imanirtan alli musyëta y alli tantiaq këta wanantsik?

¹⁸ Llapantsik cristiänukuna kuyanakoq karpis, alli musyëta y alli tantiaq këtam wanantsik (Filip. 1:9). Mana tsënö kashqaqa “vientu wakman këman apanqan barcunömi kashun” y “yachëllapa engañakoq nunakunapa yachatsikïninkunata” cäsurmi qallëkushun (Efes. 4:14). Punta cristiänukunatam apostol Pëdruqa, “kawëta qokoq palabrakunataqa” Jesus katsinqanta nirqan (leyi Juan 6:67, 68). Jesus yachatsikunqantaqa manam llapantatsu Pëdruqa yarparqan, tsënö karpis Jesucristu ninqanmanqa markäkurqanmi o yärakurqanmi. Noqantsikpis tsënö Biblia yachatsikunqanman markäkushqa o yärakushqaqa, wawqi panintsikkuna alli tsarakuyänampaqmi yanapakushun (2 Juan 1, 2).