1. ¿Imatatan Jehoväqa cada ünupaq ruramushqa?

JEHOVÄPA testïgun kanapaq ima yanapamanqantsikman yarpäshun. Itsa Diospa alli willakuyninkunapitaqa teytantsikkuna, escuëlachö, trabajaq mayintsikkuna o juk Testïgu wayin wayin ëwëkar parlapämarqantsik (Mar. 13:10). Bibliapita parlapämaqnintsikqa, tiempunta alli patsëkatsirmi llapan puëdinqanmannö yanapamarqantsik. Tsënömi, Jehoväta kuyanapaq y pë kuyamanqantsikta yachakurqantsik. Jehovä munaptinmi pëta sirwikantsik, y Jesuspa qateqnin karmi, mana wanushpa kawëta puëdintsik (Juan 6:44). Awmi, Jehovätaqa llapan shonquntsikwanmi agradecikuntsik, sirweqninkunawan pëta reqinapaq yachatsimanqantsikpita y pëta sirwinapaq yanapamanqantsikpita.

2. ¿Imakunapitatan yachakushun?

² Rasumpa kaqta musyarninmi, noqantsikpis wakinkunata yanapëta munantsik mana wanushpa kawayänampaq. Wakinkunaqa wayin wayinmi kushishqa yachatsikuyan, peru Bibliata estudiatsitaqa mantsakuyanmi. ¿Noqantsikpis mantsakuntsikku? Tsënö kaptinqa kë yachakunqantsikchömi imanö ruranapaq kaqta yachakushun. Këchöqa, nunakunata Diospita imanir yachatsinqantsiktam rikäshun. Jina nunakunata Bibliata estudiatsita mana mantsanapaq ima yanapamänapaq kaqtam yachakushun. ¿Imanirtan nunakunataqa Diospita parlapänantsikllatsu, sinöqa wiyakuyänampaq yachatsinantsik? Puntataqa, tsëpita yachakurishun.

3. ¿Imanirtan Diospa Gobiernumpita yachatsikuntsik?

³ Patsachö këkarqa, qateqninkunatam këkunata rurayänampaq Jesus mandarqan: juk, Diospa Gobiernumpita alli  willakuykunata nunakunata parlapäyänampaq. Pëqa, tsëta imanö rurayänampaqmi yachatsirqan (Mat. 10:7; Lüc. 8:1). Y yachatsikur puriyanqanchö, nunakuna wiyakuyaptin y mana wiyakuyaptin imata rurayänampaq kaqtam nirqan (Lüc. 9:2-5). Jina “llapan nacion nunakuna musyayänampaqmi” Jesusqa willakurqan (Mat. 24:14; Hëch. 1:8). Jesuspa qateqninkunaqa, wiyakuyaptin o mana wiyakuyaptimpis, Diospa Gobiernun imata ruramunampaq kaqtam nunakunata parlapäyänan karqan.

4. Mateu 28:18 a 20 ninqannö, ¿ima mastatan rurashwan Diospa Gobiernumpita nunakunata parlaparnin?

⁴ ¿Ima mastatan qateqninkunata Jesus mandarqan? Ishkë: llapan mandakunqankunata nunakuna wiyakuyänampaqmi yachatsiyänan karqan. Nunakunata Diospita parlapäyänampaq y yachatsiyänampaq Jesus mandakunqanqa, ¿tsë witsanllapaqku karqan? Manam. Jesusqa, “imëkapis imanö këkanqampa ushëninyaq” mandakunqanta rurayänampaq kaqtam nirqan, juk parlakuychöqa, kanan witsanyaq (leyi Mateu 28:18-20). Itsapis Jesusqa këta mandakurqan, quinientus qateqninkunata yuripunqanchö (1 Cor. 15:6). Y apostol Juanta Jesus revelanqanchöqa, nunakunata Diospita yachatsir llapan qateqninkuna yanapakuyänampaq kaqtam rikätsikurqan (Rev. 22:17).

5. 1 Corintius 3:6 a 9 ninqan igualatsikuywanqa, ¿imawantan Diospita nunakunata parlapëta y yachatsita apostol Pablu igualatsirqan?

⁵ Nunakunata Diospita yachatsitaqa, juk plantata winatsitawanmi apostol Pabluqa igualatsirqan. Tsënömi rikätsikurqan, juk planta winanampaqqa manam murunantsikllatsu. Tsëtam Corintu markachö këkaq cristiänukunata kënö yarpätsirqan: “Noqam plantarqä, Apölusmi parqurqan [...]. Qamkunaqa Diospa chakranmi kayanki, kikin trabajëkanqan chakra” (leyi 1 Corintius 3:6-9). ‘Diospa chakranchö’ trabajaqkunaqa, manam plantantsikllatsu, sinöqa parquntsik y imanö winëkanqantapis rikëkantsikmi (Juan 4:35). Tsënö kaptimpis, Diosmi murunqantsiktaqa winatsin.

6. ¿Imakunatatan Bibliata estudiatseqkunaqa ruranantsik?

⁶ ‘Imëyaqpis kawakïta chaskiyänampaq kallpachakïkaqkunatam’ ashintsik (Hëch. 13:48). Jesuspa qateqnin kayänampaqqa, 1) alli entiendiyänampaq, 2) yachakuykäyanqanta creiyänampaq y 3) Bibliapita yachakuyanqannö rurayänampaqmi yanapanantsik (Juan 17:3; Col. 2:6, 7; 1 Tes. 2:13). Bibliata estudiëkaqkuna reunionkunaman shayämuptinqa, congregacionchö llapan wawqi panikunam shumaq y kuyëpa chaskirnin yanapakuyänan (Juan 13:35). Itsa Bibliata estudiatseqqa, nunapa mana alli costumbrinkunata y creinqankunata cambiatsinampaqqa alliraq kallpachakunan (2 Cor. 10:4, 5). Tsëkunachö cambianampaq y bautizakunampaqqa, itsa atska killakunaraq pasanqa. Peru Bibliata estudiëkätseq tsëkunachö yanapanampaq kallpachakunqanqa allipaqmi kanqa.

7. ¿Imanirtan Diospita nunakunata parlapänantsik y Jesuspa qateqnin kayänampaq yanapakunantsik?

⁷ ¿Imanirtan Diospita yachatsikuntsik y Jesuspa qateqnin kayänampaq yanapakuntsik? Jukqa Jehoväta kuyarninmi. Llapan puëdinqantsikmannö Diospita yachatsikurnin y Jesuspa qateqnin kayänampaq yanapakurninqa, Diosta kuyanqantsiktam rikätsikuntsik (1 Juan 5:3). Diosta kuyarmi, wayin wayin yachatsikur qallarqantsik. Tsënö yachatsikuyqa, itsa fäciltsu kashqa. Tsëllaraq yachatsikur ëwarqa, punkuta takakuyta mantsakurqantsikmi. Tsënö kaptimpis, Jesus mandamanqantsikta cäsukurmi yachatsikurqantsik. Y kananqa,  itsachi Diospita yachatsikuytaqa mantsakuntsiknatsu, peru ¿nunakunataqa Bibliata estudiëkätsintsikku? Itsa tsëta rurëman pensarqa alläpa mantsakuntsik. Peru mana mantsakunapaq y nunakunata Bibliata estudiatsinapaq Jehoväta yanapamänapaq mañakushqaqa, Jesuspa qateqninkuna kayänampaq yachatsikunapaqmi yanapamäshun.

8. Marcus 6:34 ninqannö, ¿imanir mastan nunakunata Diospita rasumpa kaqta yachatsintsik?

⁸ Ishkë: nunakunataqa Bibliapita yachatsintsik pëkunata kuyarninmi. Juk kutim Jesuspa qateqninkuna yachatsikuyanqampita alläpa utishqa këkäyarqan, tsëmi juk sitiuta ashiyarqan jamariyänampaq. Peru mëtsikaq nunakunam shuyarëkäyarqan. Tsëmi Jesusqa alläpa llakiparnin ‘imëkata yachatsir qallëkurqan’ (leyi Marcus 6:34). ¿Imanirtan Jesusqa tsëta rurarqan? Nunakunata llakipar y yanapëta munarmi. Alläpa sufrikäyanqantam rikarqan y shamoq tiempuchö imapis alliyänampaq kaqta wiyëta munayanqantam musyarqan. Tsënöllam kanan tiempuchö, kushishqanö rikakoq nunakunapis shamoq tiempuchö imapis alliyänampaq kaqta wiyëta munayan. Pëkunaqa mitseqninnaq y ramakashqa üshakunanömi kayan. Apostol Pabluqa Diosninnaq y shamoq tiempupaq shuyäkuyninnaq kayanqantam nirqan (Efes. 2:12). Pëkunaqa ushakëman chätsikoq nänipam ëwëkäyan (Mat. 7:13). Markantsikchö Diosta mana reqeq nunakuna llakipëpaq këkäyanqanman yarpashqaqa, pëkunata kuyar y llakiparmi yanapëta munantsik. Y mas alliqa kanqa Bibliata estudiatsinapaq ninqantsikmi.

9. Filipensis 2:13 ninqannö, ¿imanötan Jehoväqa yanapamantsik?

⁹ Itsa pitapis Bibliata estudiatsinapaq änikuntsiktsu mëtsika tiempupaq kanqanta musyarnin. Tsënö kaptinqa, Jehoväta mañakurnin willashun imanö pensanqantsikta. Y nunakunata Bibliata estudiatsinapaq munënintsikta yuritsinampaq mañakushun (leyi Filipensis 2:13). Apostol Juan ninqannöpis, Diospa munëninmannö mañakushqaqa pëqa wiyamäshunmi (1 Juan 5:14, 15). Tsëmi, Jesuspa qateqninkuna kayänampaq munënintsikta Jehovä yuritsimunampaq kaqta següru këkantsik.

10, 11. ¿Imanirtan höraqa nunakunata Bibliata estudiatsita mantsakushwan?

¹⁰ Jesuspa qateqninkuna nunakuna kayänampaq yanapakunapaq kaqtaqa musyantsikmi. Tsënö kaptimpis, itsa Jehoväpaq masta ruranapaq kaqta imallapis michämantsik. Wakin wakinllata rikärishun y tsëkunata imanö vencinapaq kaqta yachakurishun.

¹¹ ¿Imanö këkanqantsikrëkurku masta rurëta mana puëdinapaq kaqta pensantsik? Wakin wawqi panikunaqa edäna karnin o qeshyapäkurninmi, masta rurëta mana puëdiyanqanta pensayan. Tsëkunapa pasëkarqa COVID-19 niyanqan qeshya kanqan witsan, imakunata yachakunqantsikta yarpärishun. Nunakunataqa Bibliata estudiatsita puëdintsik, telëfunupa o internetpam. Tsëqa itsa wayintsikllapita nunakunata estudiatsinapaq churapakashwan. Y manam tsëllatsu, nunakunaqa wawqi panikuna mana yachatsikuyanqan höram estudiëta munayan. ¿Manatsuraq pëkunapa tiempunkuna kanqan höra tempränu o paqaspa Bibliata estudiatsishwan? Nicodëmu paqaspa estudiëta munaptinmi, Jesuspis paqaspa yachatsirqan (Juan 3:1, 2).

12. Pitapis Bibliata estudiatsita mana puëdinapaq kaqta pensarqa, ¿imakunamantan yarpänantsik?

¹² ¿Nunakunata Bibliata estudiatsita mana puëdinapaq kaqtaku pensantsik?  Itsa Bibliapita mas yachakuyta wananqantsikta o nunakunata Bibliata estudiatsichö mas alliyänantsik pishinqanta pensantsik. Tsënö pensashqaqa, kë kimanman yarpanqantsikmi yanapamäshun. Juk: Jehoväqa allim musyan wakinkunata Bibliata estudiatsita puëdinapaq kaqta (2 Cor. 3:5). Ishkë: “ciëluchö y patsachö” mandakunampaq autoridäta chaskishqa Jesusmi, tsëta ruranapaq mandamantsik (Mat. 28:18). Y kima: manam japallantsiktsu këkantsik. Jehoväqa, imanö yachatsikunapaqpis Jesustanöllam yanapamäshun (Juan 8:28; 12:49). Pitapis Bibliata imanö estudiatsir qallanapaqqa, itsa creikoqkunata rikaqkunata, atska tiempupana yanapakoq precursorta, o juk publicadorta tapurishwan. Pëkunata Bibliata estudiatsiyanqanman yanaqashqaqa, masmi yachakushun.

13. ¿Imanirtan juknöpana yachatsikunapaq listu këkänantsik?

¹³ ¿Juknöpa yachatsikuyta mana puëdinapaq kaqtaku pensantsik? Nunakunata Bibliapita imanö estudiatsinapaq kaqkunaqa cambiashqam. Kananqa, Disfrute de la vida neq libruwannam yachatsikushun. Tsë libruwan juknöpana yachatsikunapaq kaptinmi, masraq preparakunantsik. Kananqa wallka pärrafukunallatanam leyintsik y masqa Bibliata estudiëkaqkunawanmi parlantsik. Videukunata y JW Librarytam mas utilizantsik. Këkunata utilicëta mana yacharqa, pillatapis nirishun yanaparamänapaq. Juknöpana imatapis rurëqa manam fäciltsu, tsëmi imëpis ruranqantsiknölla rurëta munantsik. Jehovä y wawqi panintsikkuna yanapamashqam, Bibliapita nunakunata juknöpana estudiatsita mantsakushuntsu. Juk precursor ninqannömi, “Bibliata yachatseqpaq y Bibliata estudiaqpaqpis, kë libruwan yachakuyqa mas shumaqmi kanqa”.

14. (1) ¿Imatatan yarpänantsik markantsikchö wiyakuyta mana munayaptinqa? (2) ¿Imanötan 1 Corintius 3:6 y 7 ninqan kallpachakur sïguinapaq yanapamantsik?

¹⁴ ¿Markantsikchö nunakunata Bibliata estudiatsi difïcil kanqantaku pensantsik? Itsa wakin nunakunaqa Bibliapita yachatsishqa munayantsu. O wakinqa Bibliapita yachatsikunqantsikrëkur contrantsik këkäyan. Tsëqa, ¿imatan yanapamäshun llakikur mana qelanäkurinantsikpaq? Yarpäshun, kanan witsan imëkapis cambiarëkaptinmi nunakunaqa imëkapa pasayan. Tsëmi Bibliapita yachatsikunqantsikta wiyëta mana munaqkunapis, itsa tiempuwanqa yachakuyta munayanqa (Mat. 5:3). Publicacionnintsikkunata mana chaskikuyta mana munaqkunapis, kanan witsankunaqa yachakuytam munayan. Musyantsikmi cosëchapa duëñunqa Jehovä kanqanta (Mat. 9:38). Pëqa, imëka muroqnö y parqoqnö nunakunata Bibliata estudiatsinatam munan. Peru sirweqnin pï kanampaq kaqtaqa pëmi akran (1 Cor. 3:6, 7). Y manam mëtsikaq nunakunata Bibliapita estudiatsinqantsikpitatsu kushikun, sinöqa llapan puëdinqantsikmannö Bibliapita yachatsikushqam. *

15. ¿Imanötan Jehoväqa rikan juk nuna Bibliapita yachakunqanmannö kawar qallëkuptin?

¹⁵ Jehoväqa alläpam kushikun juk nuna Bibliapita yachakunqanta wakinkunata parlapaptin (Prov. 23:15, 16). Kanan witsankuna tsënö yachatsikur këkanqantsikpitaqa, alläpachi kushikun. Këllaman yarpärishun: 2020 wata tsë muyakoq qeshya kanqan witsanqa, 7.705.765 nunakunatam Bibliapita  estudiatsiyashqa. Pëkunapitam, Jehovällatana sirwiyänampaq änikur 241.994 bautizakuyashqa. Tsë bautizakushqa wawqi panikunanam, nunakunata Bibliata estudiatsiyanqa y Jesuspa qateqninkuna kayänampaq yanapakuyanqa (Lüc. 6:40). Tsëta ruranapaq kallpachakushqaqa, Jehoväqa kushikunmi.

16. ¿Imata ruranapaqtan churapakashwan?

¹⁶ Nunakunata Jehoväpita yachatsinapaqqa, alliran kallpachakunantsik. Peru Jehovä yanapamashqam, nunakuna Jesuspa qateqnin kayänampaq yanapëta puëdishun. Tsëqa, ¿imanirtan juk nunallatapis Bibliata estudiatsinantsikpaq churapakantsiktsu? Puëdikaptinqa, llapan parlapanqantsik nunakunatam Bibliata estudiatsinantsikpaq nirishwan. Tsëta rurashqaqa, itsa Bibliata estudiatsinapaq änimäshun. Ama qonqashuntsu, nunakunata yachatsinapaq churapakashqaqa, Jehoväqa bendicimäshunmi.

17. ¿Imanötan kashun juk nunallatapis Bibliata estudiatsirqa?

¹⁷ Diospita rasumpa kaqta nunakunata parlapë y yachatsiqa alläpa kushikuypaqmi. Jesuspa qateqninkuna kayänampaq Tesalönica markachö mëtsikaq nunakunata yanapashqa karmi, apostol Pabluqa kënö nirqan: “¿Pikunataq Señornintsik Jesus këkämunqan witsan pëpa rikëninchö shuyäkïnïkuna o kushikïnïkuna o alläpa kushikï corönäkuna kayan? Rasumpa kaqchöqa, ¿manaku qamkuna kayanki? Rasumpaqa, qamkunam alabakïnïkuna y kushikïnïkunaqa kayanki” (1 Tes. 2:19, 20; Hëch. 17:1-4). Kanan witsampis, mëtsikaq wawqi panikunam tsënö kushishqa kayan. Mëtsika nunakuna bautizakuyänampaq nunanwan yanapakushqa panintsik Stephaniem kënö nin: “Nunakunata Jehoväta sirwiyänampaq yanapakuynöqa, manam imapis kushitsimantsiktsu”.