23 KAQ
Jutiki respëtuwan rikashqa katsun
“TEYTA DIOS, mana ushakaqmi kanki” (SAL. 135:13).
10 KAQ CANCION Jehovä Diosnintsikta alabashun
KËTAM YACHAKUSHUN *
1, 2. Jehoväpa testïgunkunaqa, ¿imapitatan yachatsikuntsik?
LLAPANTSIKMI Jehoväpa jutinta y autoridänintaqa respetatsinantsik. Tsëkunapitam Jehoväpa testïgunkunaqa yachatsikuntsik. Kë yachatsikuykunaqa igualnöllam kayan.
2 Llapantsikmi Jehoväpa jutintaqa respetatsinantsik y pëlla mas alli autoridäyoq kanqantam rikätsikunantsik. Tsëta ruranapaqmi kallpachakunantsik.
3. ¿Ima ninantan Jehoväpa jutinqa?
3 Diospa jutin Jehovä kanqanqa, pëlla mas alli Gobernaq kanqantam rikätsimantsik. Tsëmi Teyta Diospa jutin alli rikashqa kanampaq ninqantsikwanqa, Jehovänö gobernaqqa ni pï mana kanqanta nintsik. Awmi, Jehovällam ciëluchö y Patsachö autoridäyoqqa (Rikäri “ ¿Imanirtan tsënöqa ruranantsik?” neqtawan).
4. (1) ¿Imatan Salmus 135:13 nin Diospa jutimpaq? (2) ¿Ima tapukuykunapitatan yachakushun?
4 Jehovä jutiwanqa manam ima jutipis igualantsu (leyi Salmus 135:13 *). ¿Imanirtan tsë jutiqa mas alli kaq? ¿Ima mana allitatan puntata niyarqan tsë jutipaq? ¿Imanötan Diosqa jutinta respetatsin? Y noqantsikqa, ¿imanötan Jehoväpa jutinta respetatsishwan? Kë tapukuykunapita yachakurishun.
ALLI REQISHQA KË
5. Diospa jutin respetashqa kanampaqqa, ¿imatatan tapukushwan?
5 Jesusqa, ‘jutiki respëtuwan rikashqa katsun’ nir mañakunapaqmi nimarqantsik (Mat. 6:9). ¿Imapaqtan tsënöqa mañakushwan? Tsëqa Diosnintsikpa jutin limpiu y respëtuwan rikashqa kanampaqmi. Tsënö kaptimpis wakinqa kënömi tapukuyan: “¿Manaku Jehoväpa jutinqa limpiu y respetashqa? Tsëqa, ¿imanirtan respetatsinantsik?”. Tsëta musyanapaqqa, Jehoväpa jutin ima ninan kanqanta yachakurishun.
6. ¿Imanirtan pï mëchö alli reqishqa kanantsik?
6 Jutitaqa manam parlanantsikllatsu ni qellqanantsikllatsu. Tsëpaqmi Bibliaqa nin: “Qellëyuq y qoriyuq këpitapis mas alliqa pïmëpitapis alli rikashqa këmi” (Prov. 22:1; Ecl. 7:1). Awmi, jutintsiktaqa manam musyayänanllatsu sinöqa imanö kanqantsiktam musyayänan. Imanö jutintsik qellqaranqampitapis mas alliqa imanö reqishqa kanqantsikmi.
7. ¿Ima mana allitatan Diospa jutimpaq parlayashqa?
7 Jehoväpaq mana rasumpa kaqta parlarmi, pëtaqa mana allichö quedatsita munayashqa. Puntataqa Eden huertachömi Diospa jutimpaq mana allita parlayarqan. Tsëta yachakurishun.
JEHOVÄPA JUTIMPAQ MANA ALLITA PARLAR QALLAYAN
8. (1) Adanwan Ëvaqa, ¿imatatan musyayarqan? (2) ¿Imatatan tapukuntsik?
8 Adanwan Ëvaqa Jehoväpa jutinta, imanö kanqanta, kamakoq kanqanta y shumaq huertachö kawayänampaq kaqtaqa musyayarqanmi (Gen. 1:26-28; 2:18). Tsë llapanta Jehovä pëkunapaq ruranqanmanqa, ¿yarparëkäyarqanku? Jehovä ruranqampitaqa, ¿agradecikuyarqanku?
9. Genesis 2:16, 17 y 3:1-5 Bibliachö ninqannö, ¿imatatan nirqan Jehovä Adantawan Ëvata? Y ¿imatatan Diabluqa nirqan?
9 (Leyi Genesis 2:16, 17; 3:1-5 *). Culebrata parlatsirmi Diabluqa Ëvata kënö nirqan: “¿Rasunpaku Dios niyäshurqunki montikunapa wayïninta mana mikuyänëkipaq?”. Diabluqa mana kaqtam Diospaq nikarqan. Adantawan Ëvata huertaman Dios churarqa, imëkatam mikuyänampaq winatsirqan. Tsënömi Jehoväqa alli këninta rikätsikurqan (Gen. 2:9). Tsënö Ëvata tapunqanchömi Diabluqa, Diospa jutinta y alli këninta mana allichö quedatsita munarqan.
10. Diospaqqa, ¿ima nirqantan Diablu? Y tsëpitaqa, ¿imatan pasakurqan?
10 Ëvaqa Jehoväman creirqanraqmi. Tsëmi Ëvaqa, huerta chöpinchö këkaq montipa wayïninta mana mikuyänampaq ni mana yatayänampaq nirqan. Pëqa musyarqanmi tsë montipa wayïninta mikurqa wanuyänampaq kaqta. Tsënam Diabluqa kënö nirqan: “Manam wanuyankitsu” (Gen. 3:2-4). Tsënömi Diosta mana allichö quedatsirnin, Diabluqa mana kaqta nirnin Ëvata creiratsirqan (1 Tim. 2:14). Jehoväman markäkunampa o yärakunampa rantinmi Diabluta cäsukur tsë montipa wayïninta mikurqan y tsënöllam Adanpis rurarqan (Gen. 3:6).
11. ¿Adanwan Ëvaqa imatatan rurayanman karqan?
11 Diabluta Ëva imanö ninampaq kaqman pensarishun. Kënö ninqanman: “Teytä Jehovätaqa reqïmi, peru qamtaqa manam. Pëmanqa markäkümi o yärakümi. Adantawan noqataqa llapan wanayanqätam qarayämashqa. ¿Imanirtan tsënöqa parlapämanki? ¡Këpita ëwakï!”. Tsënö wamran niptinqa imanöraq Jehovä kushikunman karqan (Prov. 27:11). Peru Ëvawan Adanqa, Jehoväta mana kuyayanqantam rikätsikuyarqan.
12. ¿Imatatan Diabluqa Ëvata creitsirqan? ¿Imatatan Adanwan Ëva rurayarqantsu?
12 Diabluqa Ëvata creitsirqan Jehovä mana alli teyta kanqantam. Tsënömi Adanwan Ëvaqa Diospa jutinta rakchatäyarqan. Tsënöpam Jehoväpitapis mas Diabluta cäsukuyarqan. Kanan witsampis Diabluqa tsënöllam imëka mana allikunata rurëkan. Jehoväpa jutintam imëkanöpa mana allichö quedatsita munan.
JEHOVÄQA JUTINTAM RESPETATSIKUN
13. Ezequiel 36:23 Bibliachö ninqannö, ¿imatatan Jehovä ruranqa respetatsikunampaq?
13 Diablu mana kaqta parlaptin, ¿imatatan Jehovä rurarqan? Eden huertachö Diablu ninqankuna mana rasumpa kanqantaqa, Bibliamanmi kikin Jehovä churatsirqan jutin respetashqa kanampaq (Gen. 3:15). Bibliaqa rikätsikun, kikin Jehovä jutinta respetatsikunqanta y Jesus mandakuptinraq Patsachö shumaq y yamë kawakuy kanampaq kaqtam. Awmi, Bibliallachömi tarintsik imanö Jehovä jutinta respetatsikunqanta (leyi Ezequiel 36:23 *).
14. Jutin respetashqa kanampaqqa, ¿imatatan Jehovä rurëkan?
14 Jehoväpa jutin mana respetashqa kanampaqqa, Diabluqa imëkata rurarpis manam puëdishqatsu. Bibliallachömi tarintsik Jehovä imanö kanqanta y pënö ni pï mana kanqanta. Tsënö kaptimpis, Diabluwan qateqninkuna imëka mana allikunata rurayanqanmi Jehoväta llakitsishqa (Sal. 78:40). Tsë llapantam Jehoväqa yachëwan, pacienciawan y puëdeq këninwan altsamunqa. Y tsë llapan ruranqanchöqa kuyakoq kanqanmi masqa rikakun (1 Juan 4:8). Jehoväqa imëkatam rurëkan jutin respetashqa kanampaq.
Ëvatam Diabluqa Jehoväpaq mana kaqta nirqan. Nuna jutsata ruranqampitam Diabluqa Teyta Diosta mana allichö quedatsita munashqa. (Rikäri 9, 10 y 15 kaq pärrafukunata). *
15. Kanan witsankunaqa, ¿imanötan Diabluqa Diospa jutinta mana allichö quedatsin?
15 Kanan witsampis imëkanöpam Diabluqa Jehoväta mana allichö quedatsita munan. Tsëtaqa ruran Jehovä puëdeq, yachaq y kuyakoq mana kanqanta nunakunata creitsirmi. Diabluqa Jehovä mana kanqantam creitsikuyta munan. Y pillapis creiptinqa mana alli Dios kanqantam imëkanöpa creitsin. Y mana alli ruraqkunata infiernuman apanampaq kaqtapis creitsikunmi. Tsëkunaman creeqkunaqa manam Jehoväta respëtuwan rikäyanqatsu. Diablu kawëkarqa, imëkanöpam mana allikunata nirnin ishkitsimënintsikta munanqa. ¿Puëdinqatsuraq?
¿IMANÖTAN YANAPAKUSHWAN?
16. ¿Imanirtan Adanwan Ëvanöqa kanantsiktsu?
16 Jehoväpa jutin respetashqa kanampaqqa, jutsa ruraq karpis yanapakuytaqa puëdintsikmi. Kanan witsan nunakunaqa Adanwan Ëvanömi Jehoväta respetayantsu. Tsënö kaptinmi noqantsikqa, Jehoväpa jutinta, alli këninta y kuyakoq kanqanta musyatsikunantsik (Is. 29:23). Jehovä patsätsinqan Gobiernullachömi yamë y kushishqa kawakushun y tsë Gobiernupitam llapan nunakunata yachatsinantsik (Sal. 37:9, 37; 146:5, 6, 10).
17. ¿Imanötan Jesusqa Teytampa jutinta musyatsikurqan?
17 Jesucristu ruranqannölla rurarqa noqantsikpis Jehoväpa jutin respetashqa kanampaqmi yanapakuntsik (Juan 17:26). Jesusqa manam Teytampa jutinta musyaqllatsu, sinöqa Jehovä imanö kanqantam yachatsikoq. Tsëtaqa rikätsikurqan, Jehovä mana ankupäkoq, mana kuyakoq y mana yachanëpaq kanqanta fariseukuna niyaptinmi. Tsënam Jesusqa Teytan yachanëpaq, kuyakoq y ankupäkoq kanqanta yachatsikurqan. Y Teytan Jehovänö kanqantaqa rikätsikurqan imanö kawakunqanchömi (Juan 14:9).
18. Jehoväpa chikeqninkuna mana allita niyaptin, ¿imatatan ruranantsik?
18 Jesus ruranqannömi noqantsikpis Jehovä ankupäkoq y kuyakoq kanqanta yachatsikunantsik. Tsënömi jutsa ruraq karpis Jehoväpa jutin respetashqa kanampaq yanapakuntsik (Efes. 5:1, 2). Jehovä imanö kanqantaqa rikätsikuntsik parlanqantsikchö y imanö kawanqantsikchömi. Dios respetashqa kanampaqqa, pëpaq mana allita pensaq nunakunatam yachatsinantsik. * Y jutsa ruraq karpis Jehoväpa jutin respetashqa kanampaqqa yanapakuyta puëdintsikmi (Job 27:5).
Bibliapita yachatsinqantsik nunakunatam, Jehovä alli Teyta y kuyakoq kanqanta rikätsinantsik. (Rikäri 18 y 19 kaq pärrafukunata). *
19. Isaïas 63:7 Bibliachö ninqannö, ¿imanirtan Bibliapita yachatsikuntsik?
19 Jehoväpa jutin respetashqa kanampaqqa mastaran ruranantsik. Tsëtaqa rurantsik Bibliapita nunakunata yachatsirmi. Noqantsikqa Teyta Diosta kuyayänampaq y pëllata sirwiyänampaqmi nunakunata yachatsintsik. Tsëmi Jehoväpa jutin rikätsikunqanta y imanö këninta musyatsikunantsik (leyi Isaïas 63:7 *). Tsënö yachatsikushqam Jehoväta kuyayanqa y pë ninqankunata wiyakuyanqa.
20. ¿Ima tapukuypitatan yapëchöqa yachakushun?
20 Kawënintsik y Bibliapita yachatsikunqantsikqa, ¿imanötan Jehoväpa jutinta respetayänampaq yanapakunqa? Yapëchönam kë tapukuypita yachakushun.
2 KAQ CANCION Jutikiqa Jehovämi
^ par. 5 Nunakunawan angelkunaqa, ¿imanötan Jehoväpa jutinta respetatsiyänan? ¿Imanötan tsënö kanampaqqa yanapakushwan? Këkunapita yachakunqantsikmi Jehoväman mas markäkunapaq o yärakunapaq yanapamäshun.
^ par. 4 Salmus 135:13: “TEYTA DIOS, mana ushakaqmi kanki. Qamqa imëyaqpis yarpashqam kanki”.
^ par. 9 Genesis 2:16, 17; 3:1-5: “Tsëpitanam nunata nirqan: ‘Kë huertachö montikunapa wayïninqa llapanpis mikunëkipaqmi. Tsënö kaptinpis ama mikunkitsu alli kaqta y mana alli kaqta musyatsikuq montipa wayïnintaqa. Tsëta mikurqa wanunkim’. Teyta Dios llapan kamanqan animalkunapitapis culebraqa mas sabïdum karqan. Tsëmi warmi këkanqanman ëwëkur nirqan: ‘¿Rasunpaku Dios niyäshurqunki montikunapa wayïninta mana mikuyänëkipaq?’ Tsënö tapuptinnam warmi nirqan: ‘Llapan montipa wayïninta mikuyänäpaqmi niyämashqa. Tsënö kaptinpis huerta chöpinchö këkaq montipa wayïnintaqa mana mikuyänäpaq ni mana yatayänäpaqmi niyämashqa. Tsë montipa wayïninta mikurqa wanuyäshaqshi’. Tsënam culebra nirqan: ‘Manam wanuyankitsu. Tsë montipa wayïninta mikuyanqëki junaqqa Diosnömi musyariyanki ima alli kanqanta y ima mana alli kanqantapis. Tsëmi Diosqa munantsu mikuyänëkita’”.
^ par. 13 Ezequiel 36:23: “‘Shutïta manakaqpaq churayänanpaq qamkunam jutsayuq kayarqunki. Tsënö kaptinpis qamkunata jorqamurmi tsë nación nunakunata musyatsishaq shutï santu kashqanta. Puëdiq TEYTA DIOS kashqäta musyayänanpaqmi llapan nunakuna rikänanpaq jorqayämushqëki’. TEYTA DIOSMI tsënö nin”.
^ par. 18 Jehoväpa jutinta mana respetatsinapaq kanqantam unëqa yachakurqantsik. 2017 wata Broadcasting progrämachömi tsënö mana kanqanta yachakurqantsik. “Manam alläpa difïciltsu, jutinta Jehovä respetatsinampaq mañakunqantsikqa allillam, porqui Jehovä imanö Dios kanqanqa clärum musyakänan” (Rikäri 2018 wata enëru killachö yarqamoq progrämata, tsëtaqa tarinki jw.org® päginachö y ëwë RURAYÄMUNQÄKUNA > JW BROADCASTING®).
^ par. 19 Isaïas 63:7: “TEYTA DIOS kuyakuq kashqantam imëpis willakushaq. Noqantsik rëkur imëkatapis rurashqanpitam TEYTA DIOSTA payllä nikü. Ankupäkuq karmi Israel nunakuna kashqantsik rëkur imëpis yanapamantsik”.
