1. ¿Imanötan Jehoväqa punta cristiänukuna ordenädu yachatsikuyänampaq patsätsirqan?

 IMATAPIS rurayänampaq sirweqninkunata Jehovä mandarqa, imëpis ordenädu rurayänantam shuyaran (1 Cor. 14:33). Këllaman pensarishun, Jehoväqa munan entëru Patsachö alli noticiakunata yachatsikuyänantam (Mat. 24:14). Y tsëta diriginampaqmi Jesusta churashqa. Y Jesusnam imanö yachatsikuyänampaq alli patsätsishqa. Punta cristiänukuna kawayanqan witsanqa, congregacionkunata dirigiyänampaqmi apostolkuna y anciänukuna kayarqan (Hëch. 15:2; 16:4). Y llapan congregacionchömi anciänukunata churayaq y pëkunatam niyaq decidiyanqankunata congregacionchö kaqkunata willayänampaq (Hëch. 14:23). Congregacionchö kaqkunaqa tsë niyanqankunata cäsukurmi mas ‘markäkuyarqan o yärakuyarqan’ y ‘mas atskam’ tikrayarqan (Hëch. 16:5).

2. ¿Imanötan Jehoväqa 1919 watapita sirweqninkunata dirigïkashqa y yachëkätsishqa?

² Kanan tiempupis, Jehoväqa sirweqninkunatam yanapëkan ordenädu yachatsikuyänampaq. Tsëmi 1919 watachö, Jesusqa ciëlupaq akrashqa wallkalla grüputa utilizarqan imanö yachatsikuyänampaq kaqta patsätsiyänampaq y wakin sirweqninkunata Diospita yachatsiyänampaq (Lüc. 12:42). a Pëkuna rurayanqanta Jehovä bendicikanqanqa clärum rikakun (Is. 60:22; 65:13, 14).

3, 4. (1) Entienditsikaramuy yachatsikunapaq Jehovä alli patsätsimunqan imanö yanapamanqantsikta. (2) ¿Imatataq këchö yachakushun?

 ³ Yachatsikunapaq alli patsätsishqa mana kaptinqa, manam Jesus mandamanqantsikta cumplita puëdishwantsu (Mat. 28:19, 20). Këllaman pensarishun: mëkunachö yachatsikunapaq patsätsishqa mana kaptinqa, munanqantsikchöchi lluta yachatsikushwan. Y wakin sitiukunallachömi kutin kutin yachatsikushwan, y wakinmanqa manachi chashwantsu. ¿Imanö mastan yanapamantsik alli patsätsishqa këkanqantsik?

⁴ Kanan witsampis Jesusqa, unë witsanchö qateqninkuna yachatsikuyänampaq patsätsinqannöllam ordenädu yachatsikuyänampaq Diospa sirweqninkunata patsätsin. Këchömi yachakushun Jesus ruranqanta y kanan witsampis Jesus ruranqannölla sirweqninkuna rurëkäyanqanta. Tsënöllam yachakushun dirigimänapaq Jehovä churanqan nunakunaman maslla confiakunapaq.

DIRIGIMAQNINTSIKKUNAQA JESUS RURANQANNÖLLAM RURËKÄYAN

5. ¿Imanötan Jehoväpa sirweqninkunata dirigeqkunaqa Jesusnölla rurayan? (Juan 8:28).

⁵ Jesusqa Teytampitam yachakurqan imata ruranampaq kaqta y imanö parlanampaq kaqta. Tsënöllam kanan witsampis Jehoväpa sirweqninkunata dirigeqkunaqa Biblia ninqannö consejamantsik y yachatsimantsik (leyi Juan 8:28; 2 Tim. 3:16, 17). Y seguïdum yarpätsimantsik Bibliata leyinapaq y yachakunqantsiknö kawanapaq. ¿Imanötan tsë consëjuta cäsukunqantsik yanapamantsik?

6. ¿Imanötan publicacionkunawan Bibliata estudianqantsik yanapamantsik?

⁶ Biblia ninqankunata entiendinapaq publicacionkunata estudianqantsikqa alläpam yanapamantsik. Këllaman pensarishun: Jehoväpa sirweqninkunata dirigeqkuna imatapis ruranantsikpaq nimanqantsikkunata Bibliawan igualatsirqa, Biblia ninqannölla mandëkämanqantsiktam cuentata qokuntsik. Tsëmi dirigimaqnintsikkunamanqa maslla confiakuntsik (Rom. 12:2).

7. ¿Imapitataq Jesus yachatsikurqan, y imanötan Jehoväpa sirweqninkunaqa Jesus ruranqanta rurayan?

⁷ Jesusqa, ‘Diospa Gobiernumpita alli noticiakunatam’ yachatsikurqan (Lüc. 4:43, 44). Qateqninkunatapis tsë Gobiernumpita yachatsikuyänampaqmi mandarqan (Lüc. 9:1, 2; 10:8, 9). Kanan witsampis Diospa sirweqninkunaqa mëchö kawarpis o ima trabäjuyoq karpis, llapankunam Diospa Gobiernumpita yachatsikuyan.

8. ¿Ima shumaq trabäjuyoqtan kantsik?

⁸ Diospa Gobiernumpita nunakunata yachatsiqa, alläpa shumaq trabäjum. Tsëtaqa manam llapan nunakunatsu rurëta puëdiyan. Këllaman pensarishun: Jesusqa kë Patsachö këkar manam demoniukunata permitirqantsu pëpita willakuyänanta (Lüc. 4:41). Kanan witsampis, Jehoväpa testïgunkunawan yachatsikuyta munaqkunaqa puntataqa Biblia ninqannöran kawayänan. ¿Y Diospa Gobiernumpita yachatsikuytaqa valorantsikku? Awmi. Tsëtaqa rikätsikuntsik mëchö këkarpis yachatsikurninmi. Jesusnömi, plantata plantarir regaq cuenta, nunakunata parlapantsik y yachatsintsik (Mat. 13:3, 23; 1 Cor. 3:6).

9. Jehoväpa sirweqninkunata dirigeqkunaqa, ¿imatataq rurayashqa Diospa jutinta musyatsikuyänampaq?

⁹ Jesusqa Diospa jutintam musyatsikurqan. Juk kutim Teytanman mañakunqanchö kënö nirqan: “Jutikita[m] pëkunata musyatsirqö” (Juan 17:26). Tsënöllam kanan witsampis, Diospa sirweqninkunata dirigeqkunaqa Diospa jutinta yachatsikuyan. Tsëpaqqa Mushoq Patsachö Kawaqkunapaq Bibliatam utilizäyan. Tsë Bibliaqa pullanlla kar  o llapan karpis 270 idiömakunachömi kan. Tsë Bibliachömi puntata qellqayanqanchönölla Diospa jutinqa mëtsika kuti yurin. Masllata musyanapaq A4 kaq y A5 kaqmi maslla entienditsimantsik, mëqan versïculukunaman Diospa jutinta kutitsishqa kayanqanta. Tsënöllam Biblia de estudio ninqan Bibliachöpis, apéndice C nishqan entienditsimantsik Griëgu Idiömachö Diospa Palabranta Qellqayanqanchö 237 kuti Diospa jutin yurinqanta.

10. ¿Imatataq yachakuntsik Myanmar nacionchö warmita pasanqampita?

¹⁰ Jesusnömi, Diospa jutinta mëtsikaq nunakuna musyayänanta munantsik. Këllaman pensarishun: Myanmar nacionchömi 67 watayoq warmita juk Testïgu yachatsirqan Diospa jutinqa Jehovä kanqanta. Tsë warmiqa alläpa kushikurmi waqarirqan, y kënömi nirqan: “Kananran Diospa jutintaqa musyarï. [...] Imëpis mana musyanqätam yacharatsimarqunki”. Tsënö pasakunqanwanmi musyantsik Diospa jutinta nunakuna musyariyaptinqa, vïdankuna cambiarinqanta.

DIRIGIMAQNINTSIKKUNAMAN IMËPIS CONFIAKUSHUN

11. ¿Imanötan anciänukunaqa rikätsikuyanman dirigimaqnintsikkunaman confiakuyanqanta? (Rikäri fötukunata).

¹¹ ¿Imanötan anciänukuna rikätsikuyanman dirigimaqnintsikkunaman confiakuyanqanta? Juknöpaqa imatapis rurayänampaq mandakayämunqankunata alli leyirnin y cäsukurninmi. Këllaman pensarishun: dirigimaqnintsikkunam anciänukunata niyämun reunionkunata imanö rurayänampaq, pikuna y imanö mañakuyänampaq y wawqi panikunata cuidayänampaq. Tsë llapan niyämunqanta anciänukuna puëdiyanqanmannö cumpliyaptinqa, wawqi panikunaqa Jehovä kuyanqanta y cuidanqantam sientiyan.

12. (1) ¿Imanirtan anciänukuna nimanqantsikta cäsukushwan? (Hebrëus 13:7, 17). (2) ¿Imanirtan anciänukuna allikunata rurayanqanta masqa cuentachö katsishwan?

¹² Imata ruranapaqpis anciänukuna nimashqaqa, kushishqam cäsukunantsik. Tsëmi cargunkunata fäcil-lla cumpliyanqa. Bibliachöqa nimantsik dirigimaqnintsikkunata cäsukunapaqmi (leyi Hebrëus 13:7, 17). Peru anciänukunaqa jutsasapam kayan, tsëmi höraqa cäsukunantsik fäciltsu kanman. Peru ¿imanirtan mana cäsukunqantsikqa allitsu kanman? Allikunata rurayanqanta cuentachö katsinantsikpa rantin pantayanqankunallata yarparäkurqa, manam anciänukunaman confiakushunnatsu. Y pëkunaman mana confiakurqa, dirigimaqnintsikkunamampis mananam confiakushunnatsu, tsëtam chikimaqnintsikkunaqa munayan. Peru ¿imakunatataq rurashwan chikimaqnintsikkuna ulikuyanqanta o llullakuyanqanta mana creikurkunapaq?

DIRIGIMAQNINTSIKKUNAPAQ MANA KAQTA PARLAYANQANTA CREISHUNTSU

13. ¿Ima niyantan dirigimaqnintsikkunapaq chikimaqnintsikkuna?

¹³ Chikimaqnintsikkunaqa dirigimaqnintsikkunapaqmi niyan yachatsimanqantsikqa mana alli kanqanta. Këllaman pensarishun, Bibliachömi mandakun limpiu limpiu kawanapaq, jukwan jukwan mana kakunapaq y Diosta munanqannö sirwinapaq. Y mana arrepentikuyaptinqa, jutsa ruraqkunata congregacionpita qarquyänampaq (1 Cor. 5:11-13; 6:9, 10). Tsëkunata cäsukushqam, chikimaqnintsikkunaqa nimantsik mana alli kanqantsikta y wakinkunapita mas alli tukoq kanqantsikta.

14. ¿Pitan yanapëkan Diospa sirweqninkunapa contran parlaqkunata?

¹⁴ ¿Pitan yanapëkan Diospa sirweqninkunapa contran parlaq nunakunata? Bibliachöqa clärum nin ‘ulikoqkunapa o llullakoqkunapa teytanqa’ Satanas kanqanta. Pëmi  ulikoq o llullakoq nunakunata utilizan Diospa sirweqninkunapa contran parlayänampaq (Juan 8:44; Gen. 3:1-5). Tsëtam punta cristiänukunapa tiempunchöpis rurarqan.

15. ¿Imatataq mandakoq religiösukuna Jesustawan qateqninkunata rurayarqan?

¹⁵ Y Diospa Tsurin Jesuspaqpis jutsannaq këkaptin y imëka milagrukunata rurëkaptinmi, Satanasqa nunakunata utilizarqan pëpaq ulikuyänampaq o llullakuyänampaq. Këllaman pensarishun: mandakoq religiösukunam nunakunata creitsiyarqan Jesusqa, ‘demoniukunapa gobernantin yanapaptin demoniukunata’ qarqunqanta (Mar. 3:22). Y juiciuyanqan junaqnam “Diostam ofendishqa” nir acusayarqan y “wanutsiyänampaq niyänampaqmi tsëchö nunakunata yachatsiyarqan” (Mat. 27:20). Y tiempuwannam Jesuspa qateqninkuna yachatsikur qallëkuyaptin, nunakuna chikiyänanta munar “juk nacion nunakunata” imëkata willapäyarqan (Hëch. 14:2, 19). Hëchus 14:2 textuta entienditsikurmi 1998 wata 1 de diciembrichö yarqamoq La Atalaya revista nirqan chikikoq judïukunaqa Jesuspa qateqninkuna yachatsikuyanqanta mana cäsukuyanqanta y nunakuna chikiyänanta munar “pëkunapaq imëka mana allikunata parlayanqanta”.

16. ¿Imatataq yarpänantsik Jehoväpa sirweqninkunapaq mana allikunata parlaqta wiyarqa?

¹⁶ Satanasqa imëpis ulikushqam o llullakushqam, y kanampis ‘entëru patsachö’ nunakunatam engañëkan (Apoc. 12:9). Tsëmi Jehoväpa sirweqninkunapa o Jehoväpa sirweqninkunata dirigeqkunapaq ulikuyanqanta o llullakuyanqanta wiyarqa, yarpänantsik Jesuspaqpis y qateqninkunapaqpis ulikushqa kayanqanta. Biblia ninqannöllam, Jehoväpa testïgunkunapaqpis imëka mana allikunata parlayan y chikiyan (Mat. 5:11, 12).  Tsëqa, ¿imatataq yarpänantsik engañakuyanqanta mana creinapaq? Satanas yanapaptin engañakuyanqantam. Peru ¿imanötan cuidakushwan?

17. ¿Imatataq rurashwan mana rasumpa kaq cuentukunata chaskir o willamashqa? (2 Timoteu 1:13; leyiri “ ¿Mana rasumpa kaq cuentukunata chaskirqunkiku o willayäshurqunkiku? ¿Imatataq rurankiman?” neq recuadruta).

¹⁷ Ama mana rasumpa kaq cuentukunata wiyashuntsu. 1 Timoteu 1:3 y 4 textuchömi apostol Pablu cläru entienditsimantsik tsënö “cuentukunata” mana wiyanantsikpaq. Timoteutam kënö consejarqan: “Teyta Diosta deshonraq mana rasumpa cuentukunataqa ama wiyayëtsu” (1 Tim. 4:7). Këllaman pensarishun: juk wamra imatapis patsachö jitarëkaqta tarirqa, ¿imatataq ruran? Rasllam o sasllam aptarkur amukurkun. Peru juk poqushqa nunaqa manam tsëta rurantsu; musyanmi rakcha o qanra kanqanta y amukurkurqa qeshyarinampaq kaqta. Tsënömi noqantsikpis mana rasumpa kaq cuentukunataqa ni wiyëllapis wiyanantsiktsu, tsëpa rantinqa yachakunapaq y yanapamänapaq kaq alli palabrakunallatam wiyantsik (leyi 2 Timoteu 1:13).

18. ¿Imatataq rurashwan Jehoväpa sirweqninkunata dirigeqkunaman confiakunqantsikta rikätsikunapaq?

¹⁸ Këchömi kimata yachakurquntsik Jehoväpa sirweqninkunata dirigeqkunaqa, Jesus ruranqannölla rurayanqanta. Peru manam tsëllatsu, Bibliapita maslla yachakurqa, maskunatam tarinki. Wawqi panikunata yanapë Jehoväpa sirweqninkunata dirigeqkunaman mas confiakuyänampaq. Y Jehoväta mana dejëpa sirwi, y ama permititsu pëkunapita imapis rakishunëkita (Sal. 37:28). ¿Manaku alläpa kushikuntsik Jehoväpa sirweqninkunata dirigeqkunawan juntu Jehoväta sirwir? ¡Pëkunaqa alläpa kuyakoq y mana dejakoqmi kayan! Tsëta imëpis valorashun.