MANARAQ ciëluta kutirninmi, Jesusqa qateqninkunata mandarqan alli yachatsikïta ‘jinantin munduyaq chätsiyanampaq’ (Hëchus 1:8). ¿Imanöraq jinantin markakunaman chätsiyanman karqan?

Universidächö trabajaq juk profesormi nirqan, Röma mandakunqan witsanchö täraq cristiänukunaqa wakin religionkunapita, hasta judïukunapitapis jukläya kayanqanta. ¿Imanirtaq jukläya kayarqan? Porqui Jesus ruranqannömi më tsë markakunapa ëwar nunakunata yachatsiyaq. Jesuspa qateqninkunaqa më tsë markakunachömi Diospa Gobiernumpita yachakïta munaqkunataqa “alli willaquita” yachatsiyarqan (Lücas 4:43). Tsëmi Bibliaqa willakun tsë witsanchöqa ‘apostolcuna’ o yachatsikoq ëwayänampaq akrashqa nunakuna kayanqanta (Marcus 3:14). Jesusmi qateqninkunata kënö nir mandarqan: “Qamcunata[m] cachayaq jinantin nasioncunapa ewar, noqaman creyicuyänanpaq nunacunata willapäyänequipaq” (Mateu 28:18-20).

Rasunmi, Jesuspa 12 apostolninkunaqa manam kë Patsachönatsu këkäyan. Peru Jehoväpa mëtsikaq sirweqninkunam, pëkuna rurayanqannö rurëkäyan Diospita yachatsikïta wanayanqan sitiukunaman yanapakoq ëwarnin. Pëkunam kënö niyan: “¡Këchömi noqa këkä! Noqata kachamë” (Isaïas 6:8). Wakinmi nacionninkunachö mas yanapakïta wanayanqan markakunaman ëwayashqa. Y wakinnam, juk idiömata yachakuyashqa juk idiömata parlaq congregacionchö o grüpuchö yanapakuyänampaq. Y Galaad escuëlaman ëwaqkunaqa karu nacionkunatam yanapakoq ëwayashqa. Wakinkunapaqqa manam fäciltsu kashqa tsëta rurayänan.  Peru tsë wawqikuna y panikunaqa, Jehoväta y nuna mayinkunata kuyarninmi imëkankunata jaqirïkur yanapakoq ëwayashqa. Tiempupitam alistakuyashqa, y qellëninkunata y kallpankunatam utilizäyashqa yachatsikurnin yanapakuyänampaq (Lücas 14:28-30). Kë llapan wawqikuna y panikunam alläpa yanapakïkäyan.

Peru manam llapantsiktsu juk idiömata yachakïta o mas wanayanqan sitiukunaman ëwëta puëdintsik. Tsënö kaptimpis, llapantsikmi congregacionnintsikchö misionërunö yanapakïta puëdintsik. ¿Imanötaq rurashwan?

Apostolkuna kawayanqan witsanchö cristiänukunaqa, manam llapantsu misionërunö juk markakunachö yanapakuyarqan, sinöqa markankunachömi alleq yachatsikuyaq. Timoteuta Pablu kënö consejanqantam wiyakuyarqan: “Salbasionpaq alli willaquicunata willaquï. Cumplï llapan ruranequipaq caqcunata” (2 Timoteu 4:5). Noqantsikpis tsë consëjutam wiyakunantsik. Y Diospa Gobiernumpita nunakunata yachatsinapaq mandakïtam cäsukunantsik. Congregacionnintsikchö misionërunö yanapakunapaqqa imëkatam rurëta puëdintsik.

Juk nacionta yanapakoq ëwaqkunaqa, tsëchö imanö kawë kanqantam yachakïta procurayan. Itsa noqantsikqa, juk markakunata ëwëta puëdishuntsu. Peru markantsikchö mas alli y tukïnöpa yachatsikïtam procuranantsik. Tantiyarinapaq, 1940 watachömi, semänachö juk junaq cällikunachö yachatsikuyänampaq niyämurqan y tsënömi rurayarqan. ¿Y noqantsikqa cällichö tinkunqantsik nunakunata yachatsintsikku? ¿Mostradorkunawan o juknöpapis yachatsikurquntsiknaku?

Tukïnöpa yachatsikunqantsik alli yarqunampaq kaqman pensarqa, kushi kushillam yachatsikoq yarqushun. Juk idiömata yachakoqkuna y juk markakunata ëwaqkunaqa, alläpam yanapakuyan kayanqan congregacionchö. Tantiyarinapaq, yachatsikïchömi punta puntachö këkäyan. Mëtsikaq misionërukunam congregacionta dirigiyan patsan wawqikuna dirigita yachakuyanqanyaq. ¿Y qamqa bautizädunaku kanki? ¿Listuku këkanki anciänunö o siervu ministerialnö yanapakunëkipaq? (1 Timoteu 3:1.)

Peru congregacionchöqa juknöpapis yanapakïta puëdintsikmi. Ollqu, warmi, jövin o mayor karpis llapantsikmi cristiänu mayintsikkunata markäkïninkunachö alli firmi kayänampaq yanapëta puëdintsik (Colosensis 4:11).

Cristiänu mayintsikkunata yanapanapaqqa, alleqran reqinantsik. Y reunionkunaman ëwarninmi cristiänu mayintsikkuna imata wanayanqanman pensanantsik (Hebrëus 10:24). Tsëqa manam kawëninkunaman mëtikïtsu. Sinöqa imanö sientikuyanqanta y imata wanayanqanta entiendita procurëmi. Itsa wanëkäyan imallachöpis yanaparinata o Biblia ninqanwan shumaq parlapärinata. Awmi, wakin asuntukunachöqa anciänukunallam o siervu ministerialkunallam yanapëta puëdiyan (Gälatas 6:1). Peru edäyashqakunata y problëmakunapa pasëkaqkunataqa llapantsikmi yanapëta puëdintsik.

Salvatore jutiyoq wawqi pasanqanman pensarishun. Pëqa alläpa jaqam karqan y tsëta pagakunampaqmi negociunta, wayinta y wakin cösasninkunata rantikurqan. Tsëmi familianta imanö manteninampaq kaqman alläpa yarpachakurqan. Peru congregacionnimpita juk familiam musyarirqan Salvatore y familian imapa pasëkäyanqanta. Tsëmi qellëwan yanapayarqan y kikimpaq y warmimpaqpis trabäjuta ashipuyarqan. Y atska tardikunapam watukayarqan y imanö sientikuyanqanta willayaptin shumaq wiyayarqan. Ishkan familiam alli amïgu tikrariyarqan. Y kananqa, alläpa sasakunapa pasayanqan hörachö yanapanakuyanqantam kushishqa yarpäyan.

Jehoväpa sirweqninkunaqa imëpis listum këkantsik wakin nunakunata Diospita yachatsinapaq. Jesus ruranqannömi, Diosnintsik ruramunampaq kaqkunapita llapan nunakunata willanantsik. Juk markakunata yachatsikoq ëwëta puëdir o mana puëdirpis, llapantsikmi congregacionnintsikchöqa cristiänu mayintsikkunata yanapëta procuranantsik (Gälatas 6:10). Tsënö rurarqa kushishqam kashun y ima ruranqantsikpis Diostam kushitsinqa (Colosensis 1:10; Hëchus 20:35).