1, 2. Manaraq bautizakur, ¿imatataq puntata rurankiman?

 PASAQ pitsqa watakunachömi, juk millonpitapis mas nunakuna Jehoväpa testïgun kayänampaq bautizakuyashqa. Wakinkunaqa Timoteunömi wamra kayanqampita Bibliapita yachakuyarqan (2 Tim. 3:14, 15). Wakinkunanam mayorna këkar, o awkinna o chakwanna këkar Jehoväpita yachakuyarqan. Pasaq watakunallachöran, 97 watayoq këkar juk warmi bautizakurqan.

² ¿Y qamqa Bibliapita yachakuykankiku? ¿Testïgu teytëkikunaku yachëkätsiyäshunki? Imanö kaptimpis, capazchi bautizakuyta pensëkanki. Y tsëqa, ¡alläpa kushikuypaqmi! Peru manaraq bautizakurmi puntataqa Jehovällatana sirwinëkipaq änikunëki. Tsëmi këchö yachakushun Jehovällatana sirwinapaq änikuy ima kanqanta, y änikuyta y bautizakuyta imanir mana mantsanëkipaq kaqta.

¿IMATAN JEHOVÄTA SIRWINAPAQ ÄNIKUYQA?

3. ¿Pikunatan unë witsanchö Diosllatana sirwiyänampaq rakishqa o akrashqa kayarqan? Willakaramuy.

³ Diosllata sirwinapaq änikuyqa, Pëta sirwinapaq rakishqa o akrashqa këmi, tsëtam Bibliachö entienditsikun. Tsënö akrashqam karqan Israel nacionpis. Peru Jehoväqa wakin israelïtakunatam akrarqan sagrädu rurëkunata rurayänampaq. Këllaman pensarishun: Aarontam akrarqan sacerdötikunapa mandaqnin kanampaq. Y ‘akrashqa kanqanta’ musyayänampaqmi alli kaq örupita sagrädu vinchata Aaronpa urkunman churatsirqan (Lev. 8:9). Y nazareukunapis Jehovällatana  sirwiyänampaqmi änikuyaq. Nazareu palabraqa hebreu idiömachö nazir neq palabrapitam shamun, tsëqa “akrashqa” o “rakishqa” ninanmi. Moises Qellqanqan Leychömi willakoq nazareukuna imakunata rurayänampaq y mana rurayänampaq kaqta (Nüm. 6:2-8, nöta).

4. (1) Jehovällatana sirwinapaq änikurqa, ¿imatataq änikuykantsik? (2) ¿Ima ninantan “amana kikimpaqqa kawatsunnatsu” ninanqa? (Rikäri dibüjuta).

⁴ Jehovällatana sirwinapaq änikurqa, Jesuspa qateqnin kanapaq y Dios munanqanllatana imëpis ruranapaqmi änikuykantsik. Y Jesus kënö ninqantam cumplinantsik: “Pï nunapis qatimaqnï këta munarqa, amana kikimpaqqa kawatsunnatsu” (Mat. 16:24). Griëgu idiömachö “amana kikimpaqqa kawatsunnatsu” neq palabrakunataqa, “amana kikimpa munënintaqa ruratsunnatsu” nirpis traduciyanmanmi. Jehovällatana sirwinëkipaq änikushqa karqa, mananam chikinqan cösaskunata ruranëkinatsu (2 Cor. 5:14, 15). Mananam jutsa ruraq cuerpu munanqankunata ruranëkinatsu, o mana casädu këkarqa piwampis oqllanakunëkitsu (Gäl. 5:19-21; 1 Cor. 6:18). Jehovä Diosnintsikta rasumpa kuyaptiki y mandakunqankuna biennikipaq kanqanta següru kaptikiqa, mandakunqanta cumplinanqa fäcil-llam kanqa (Sal. 119:97; Is. 48:17, 18). Nicholas jutiyoq wawqim kënö nin: “Diospa leyninkunata imanöpis rikanqëkiqa qampitam kanqa. Bienmi kanman libri kakunëkita tsapäshoqniki carcelpa rëjannö o leonkunapita tsapäshoqniki cercunö”.

5. (1) ¿Imanötan Jehovällatana sirwinapaqqa änikuntsik? (2) ¿Imachötan jukläya Jehovällatana sirwinapaq änikunqantsikwan bautizakunqantsik? (Rikäri fötukunata).

⁵ ¿Imanötan Jehovällatana sirwinapaqqa änikuntsik? Diosnintsikman mañakunqantsikchömi pëllata adoranapaq y pë munanqanllata imëpis ruranapaq änikuntsik. Juk  parlakuychöqa, llapan shonquykiwan, llapan kawënikiwan, llapan pensënikiwan y llapan kallpëkiwan sirwinëkipaqmi änikuykanki (Mar. 12:30). Tsënö änikunëkipaqqa, japallëkillam Jehoväman mañakunëki; tsëtaqa qamwan Jehovällam musyayanki. Peru bautizakunqëkitam sïqa wakinkunapis rikäyanqa, tsëwanmi musyatsikunki Jehovällatana sirwinëkipaq änikushqa kanqëkita. Jehovällatana sirwinëkipaq änikunëkipaqqa alliran pensanëki. Änikunqëkitam cumplinëki, tsëtam Jehovä Diosnintsikqa imëpis shuyaranqa (Ecl. 5:4, 5).

¿IMANIRTAN JEHOVÄLLATANA SIRWINËKIPAQ ÄNIKUNKIMAN?

6. ¿Imanirtan Jehovällatana sirwinëkipaq änikunkiman?

⁶ Jehovällatana sirwinëkipaqqa änikunëki pëta kuyarninmi. Y kuyanëkipaqqa yanapashurqunki pëpita rasumpa kaqta yachakunqëkita alli entiendinqëkim (Col. 1:9). Bibliata estudiarmi yachakurqunki 1) Jehovä rasumpa kanqanta, 2) santu espïritunwan Bibliata qellqatsimunqanta y 3) sirweqninkuna kayanqanta y voluntäninta ruranampaq pëkunata utilizanqanta.

7. Jehovällatana sirwita munarqa, ¿imatataq pï nunapis ruranan?

⁷ Jehovällatana sirwinampaq pipis änikuyta munarqa, Bibliapa principal yachatsikuyninkunatam musyanan, Dios mandakunqankunatam cäsukunan y puëdinqanmannömi creinqankunapita wakinkunata parlapänan (Mat. 28:19, 20). Tsënöllam Jehovä Diosnintsikta llapan shonqunwan kuyanan y pëllatanam adoranan. ¿Tsënöku Jehoväta kuyanki? Llapan shonquykiwan kuyarqa, manam yachatsishoqnikita kushitsita munarllaqa,  Jehoväta sirwinëkipaq äninkitsu ni bautizakunkitsu. Y jövin karqa, manam teytëkikunata kushitsita munarllaqa o amïguykikuna bautizakuyaptinllaqa bautizakunëkitsu.

8. ¿Imanötan agradecikoq kanqantsik yanapamantsik Jehovällatana sirwita änikunapaq? (Salmus 116:12-14).

⁸ Qampaq imëkakunata Jehovä ruramunqanman pensarqa, agradecikurmi pëllatana sirwinëkipaq änikuyta munanki (leyi Salmus 116:12-14). Bibliachöqa nin “llapan alli qarëkuna y imëka allikunaqa” Jehoväpita shamunqantam (Sant. 1:17). Y Jehoväpita chaskinqëki mas alli kaq qarëqa Jesus wanunqanmi. Jesus wanunqanrëkurmi Jehoväwan amïgu këta puëdinki y imëyaqpis kawakuyta puëdinki (1 Juan 4:9, 10, 19). Jehovä kuyashunqëkipita y imëkata qampaq ruramunqankunapita agradecikurqa, pëllatana sirwinëkipaqmi änikunëki (Deut. 16:17; 2 Cor. 5:15). Tsëtam yachakuntsik ¡Manana wanurmi kushishqa kawakushun! neq librupa 46 kaq yachatsikuyninchö 4 kaq puntuchö, y tsëchömi tarita puëdintsik ¿Imataraq Jehoväta qarashwan? neq videutapis.

¿PUËDINKINAKU JEHOVÄLLATANA SIRWINËKIPAQ ÄNIKUYTA Y BAUTIZAKUYTA?

9. ¿Imanirtan jukkunata rikarllaqa Jehoväta sirwinëkipaq änikunkimantsu?

⁹ Capazchi pensëkanki Jehovällatana sirwita änikunëkipaq y bautizakunëkipaqqa manaraq listu kanqëkita. Y Jehovä mandakunqankunata cäsukunëkipaq y pëman maslla markäkunëkipaq mas tiemputaraq wananqëkita (Col. 2:6, 7). Peru yarpänëkim, manam Bibliata llapan estudiaqkunatsu igual-lla Jehoväpita yachakuriyan. Y jövinkunapis manam igualtsu poqu cristiänu këman chäyan. Tsëmi masqa, kikiki imanö këkanqëkita rikänëki, y manam wakinkunawanqa igualatsikunëkitsu (Gäl. 6:4, 5).

10. ¿Imatataq rurankiman Jehovällata sirwita änikunëkipaq y bautizakunëkipaq manaraq listu këkarqa? (Leyiri “ Teytëkikuna Testïgu kayaptin” neq recuadruta).

¹⁰ Jehovällata sirwita änikunëkipaq manaraq listu këkarqa, kallpachakurnin sïgui. Cambiukunata rurëchö yanapashunëkipaq Jehoväta mañakuy (Filip. 2:13; 3:16). Jehoväqa mañakunqëkita wiyashunkim y yanapashunkim (1 Juan 5:14).

¿IMANIRTAN DIOSTA SIRWIYÄNAMPAQ ÄNIKUYTA MANTSAYAN?

11. ¿Imanötan Jehovä yanapamantsik alli kaqllata ruranapaq?

¹¹ Wakinkunaqa Jehovällatana sirwita änikuyänampaq y bautizakuyänampaq listuna këkarpis, manam decidikuyantsu. Capazchi, jutsata rurayaptin congregacionpita qarquyänampaq kaqta pensar mantsapakuyan. Peru Bibliachöqa Teyta Jehoväpaqmi nin, alli portakuyänampaq y allikunata rurayänampaq sirweqninkunata yanapanqanta (Col. 1:10). Tsëmi mantsapakurqa, confiakunëki allikunata ruranëkipaq Jehovä yanapashunëkipaq kaqta. Y Jehoväqa sirweqninkunata imëpis tsënömi yanapan (1 Cor. 10:13). Tsëmi congregacionpitaqa juk ishkëllata qarquyan. Pë yanapashuptikim alli kaqta imëpis rurëta puëdinki.

12. ¿Imaraq yanapamäshun jutsata mana ruranapaq?

¹² Jutsa ruraq karmi, llapantsikpis mana allikunata rurëta munantsik (Sant. 1:14). Peru tentacionkunapa pasarqa, kikintsikmi decidita puëdintsik tsë jutsata ruranapaq o mana ruranapaqpis. Wakinkunaqa niyan cuerpunkuna munanqanta dominëta mana puëdiyanqantam. Peru tsëqa manam rasumpatsu. Sientinqantsikta y cuerpuntsik munanqankunataqa dominëta puëdintsikmi. Y tsëpaqqa yanapamantsik llapan junaqkuna Jehoväman mañakunqantsik,  Diospa Palabranta seguïdu estudianqantsik, reunionkunaman y yachatsikoqpis seguïdu ëwanqantsikmi. Tsëkunata rurarninqa, Diosnintsikta äninqantsiktaqa cumplita puëdishunmi. Y yarpänantsikmi japallantsiklla mana këkanqantsikta; Jehovämi yanapamantsik (Gäl. 5:16).

13. ¿Imatataq yachakuntsik Josë ruranqampita?

¹³ ¿Imaraq yanapamäshun Jehovä mandakunqankunata mas fäcil-lla cumplinapaq? Tentacionkunapa manaraq pasarmi puntallapitana pensanantsik, tentacion höra imata ruranapaq kaqta. Tsënö pensaqkunapaqmi Bibliaqa willakun. Tsë nunakunaqa noqantsiknö jutsasapam kayarqan, peru manam tentacionkunaman ishkiyarqantsu. Josëman pensarishun. Bibliachömi willakun Potifarpa warmin patsäkuyänampaq kutin kutin ninqanta, peru Josëqa manam munarqantsu. Kënömi nirqan: “¿Imanöraq Teyta Diosta llakitsir tsëläya jutsata rurëküman?” (Gen. 39:8-10). Tsënö ninqanwanmi entiendintsik Josëqa tentacionkunapa manaraq pasarnin puntallapitana imata ruranampaq kaqta pensashqa kanqanta. Tsëmi Potifarpa warmin patsäkuyänampaq niptinqa, fäcil-llana “manam” nirqan.

14. ¿Imanötan puntallapitana alistakushwan Jehovä chikinqankunata mana ruranapaq?

¹⁴ Noqantsikpis Josënömi, tentacionpa manaraq pasarnin alli pensanantsik, imata ruranapaq kaqta. Manam tsë jutsakunaman pensëkänantsiktsu, tsëpa rantinqa Jehovä chikinqan rurëkunata mana ruranapaqmi següru kanantsik (Sal. 97:10; 119:165). Puntallapitana imata ruranapaq kaqta pensanqantsikmi yanapamäshun jutsata mana ruranapaq. Y tentacionkunapa pasanqantsik höraqa, musyashunnam imata ruranapaq kaqta.

15. ¿Imanötan rikätsikunki llapan shonquykiwan Jehoväta ashinqëkita? (Hebrëus 11:6).

¹⁵ Següruchi këkanki rasumpa kaqta yachakushqa kanqëkita y Jehovätapis llapan shonquykiwanchi sirwita munanki. Peru ¿imanirtan Jehovällatana sirwinëkipaq änikunkiraqtsu y bautizakunkiraqtsu? Gobernanti David ruranqanman pensë. Pëmi kënö nirqan: “Teyta Dios, imanö kanqäta alli rikëkallämë y shonqüchö imanö kanqäta musyëkullë. Imakunapaq yarpachakunqäta musyanëkipaq alli rikëkallämë. Alli rikëkallämë, capaz shonqü munanqanta cäsur mana allikunatapis  rurëkä, y imëyaqpis kawakuyman chätsikoq nänipa pushëkallämë” (Sal. 139:23, 24). Jehovällatana sirwita änikunëkipaq y bautizakunëkipaq kallpachakurqa, llapan shonquykiwan Jehoväta ashikanqëkitam rikätsikunki. Y Bibliachöqa nin tsënö nunakunata Jehovä bendicinqantam (leyi Hebrëus 11:6).

TEYTA DIOSMAN MASLLA WITI

16, 17. ¿Imanötan Jehoväqa Testïgukunapa wamranta congregacionman pushamun? (Juan 6:44).

¹⁶ Jesusmi nirqan sirweqninkuna kayänampaq kikin Jehovä nunakunata pushamunqanta (leyi Juan 6:44). ¡Tsëqa alläpa shumaqmi! Jehoväqa cada nunatam imanö kanqanta rikan. Y pëpaqnö kanqanta rikarqa, sirweqnin kanampaqmi akran, y sirweqninkunataqa alläpam kuyan (Deut. 7:6). Y qamtapis kuyashunkim.

¹⁷ Jövin, capazchi teytëkikuna Testïgu kayaptinqa pensëkanki, pëkuna pushayäshuptikilla congregacionchö këkanqëkita y Jehovä mana akrashunqëkita. Peru Bibliachömi kënö nin: “Teyta Diosman witiyë, y pëqa qamkunamanmi witimunqa” (Sant. 4:8; 1 Crön. 28:9). Tsënö nirqa nikan, Jehoväman witinëkipaq kikiki kallpachakuptikiqa, pëpis qamman witimunampaq kaqtam. Jehoväqa manam grüpuchö këkaqtanöllatatsu rikäshunki. Pëqa cada ünutam congregacionchö kaqkunata pushamushqa. Testïgupa wamran kayaptimpis, pëqa cada ünutam pushamushqa. Pipis Jehoväman witinampaq kallpachakuptinqa, Santiägu 4:8 ninqannömi, Jehoväpis pëman mas witin (igualaratsi 2 Tesalonicensis 2:13 textutawan).

18. ¿Imatataq qateqninchö yachakushun? (Salmus 40:8).

¹⁸ Jesusqa Teytampa voluntäninta ruranampaqmi kushishqa bautizakurqan (leyi Salmus 40:8; Heb. 10:7). Y qampis Jehovällatana sirwinëkipaq änikur y bautizakurqa, Jesusnömi rurëkanki. Peru ¿imatan yanapashunki bautizakurirnin Jehovä sirwita mana dejanëkipaq? Tsëtam qateqninchö yachakushun.