1, 2. (1) Wanunampaq ichikllana pishikaptin, ¿imapitataq apostolninkunata Jesus parlaparqan? (Rikäri kë yachatsikïpa qallananchö këkaq dibüjuta). (2) ¿Imanirtaq alläpa precisan Diospita imanir yachatsikunqantsikta musyanantsik? (3) ¿Imapitataq kë yachatsikïchö yachakushun?

WANUTSIYÄNAMPAQ ichikllana pishikaptinmi, Jesusqa apostolninkunata nirqan alläpa kuyanqanta. Y punta kaq yachatsikïchö rikanqantsiknöpis, Jesusqa üvas planta kikin kanqantam nirqan. Tsënömi qateqninkunata yanaparqan ‘mëtsikata imëpis wayur’ sïguiyänampaq o Diospa Gobiernumpita yachatsikur sïguiyänampaq (Juan 15:8).

² Jesusqa manam yachatsikuyänanllapaqtsu apostolninkunata mandarqan, sinöqa imanir yachatsikur sïguiyänampaq kaqtam entienditsirqan. ¿Imanirtaq noqantsikpis tsëta entiendinantsik? Porqui tsëmi yanapamäshun ‘alli willakïkunata entëru Patsachö’ yachatsikur sïguinapaq (Mat. 24:13, 14). Tsëmi, Diospita imanir yachatsikunapaq Biblia ninqampita chuskuta rikärishun. Jina yachakushunmi, Jehovä qomanqantsik chusku cösaskuna yachatsikur sïguinapaq imanö yanapamanqantsikta.

3. (1) ¿Imanir yachatsikunapaq kaqtataq Juan 15:8 textu nimantsik? (2) Jesus parlanqan igualatsikïchöqa, ¿imatataq üvas planta rikätsikun, y imanirtaq üvas plantawan igualatsikïqa alläpa alli?

³ Diospitaqa yachatsikuntsik, Jehoväta alläpa precisaqpaq churanqantsikta y jutinta alläpa respetanqantsikta rikätsikurninmi (leyi Juan 15:1, 8). Jesusqa nirqan üvas plantata cuidaqqa Teytan kanqanta, üvas plantana kikin kanqanta y qateqninkunana rämankuna kayanqantam (Juan 15:5). Awmi, üvas plantaqa Diospa Gobiernumpita yachatsikunqantsiktam rikätsikun. Jesusmi apostolninkunata kënö nirqan: “Teytätaqa alläpa precisaqpaq churayan: mëtsikata imëpis wayuyaptiki[m]”. Imanömi juk murukoqta üvas plantan alli wayuptinqa respetayan, tsënöllam Jehovä Diosnintsikta alläpa precisaqpaq churëkantsik, llapan puëdinqantsikmannö Gobiernumpita yachatsikurnimpis (Mat. 25:20-23).

4. (1) ¿Imakunata rurartaq Diospa jutin alläpa respetashqa kanqanta rikätsikuntsik? (2) ¿Imanötaq sientikunki Diospa jutin alläpa respetashqa kanampaq yanapakurnin?

⁴ Rikanqantsiknömi, Diospita yachatsikurninqa jutintapis alläpa respetanqantsikta rikätsikuntsik. Tsënö nirqan, manam Diospa jutinta mas sagräduyätsipaqtsu parlëkantsik, porqui jutinqa chipyëpa sagrädunam. Peru Isaïas ninqannöpis, Diospa jutinta respetatsitaqa puëdintsikmi (Is. 8:13). ¿Imanötaq alläpa respetanqantsikta rikätsikuntsik? Alläpa precisaqpaq churarnin, tsë jutiqa Diosnintsikllapa kanqanta rikätsikurnin y respetayänampaq nunakunata entienditsirninmi (Mat. 6:9). Këllaman pensarishun, Jehoväpita y änikunqankuna cumplikänampaq kaqpita nunakunata parlaparninmi, Diablupa ulikïninkunapita Diospa jutinta defendikantsik (Gen. 3:1-5). Jina alläpa precisaq kanqantaqa rikätsikuntsik, Jehovälla ‘alläpa precisaqpaq kanqanta, respetashqa kanqanta y poderyoq’ kanqanta nunakunata yachatsirninmi (Rev. 4:11). 16 watapana precursornö yanapakïkaq Rune jutiyoq wawqim kënö nin: “Ciëlutawan Patsata Kamaq Dios, pëpita yachatsikunapaq permitimanqampitaqa alläpam agradecikü. Y tsëta musyanqämi, yachatsikur sïguinäpaq yanapaman”.

5. (1) ¿Imanir yachatsikunapaq kaqtataq Juan 15:9, 10 textu nimantsik? (2) ¿Imanötaq Jesusqa rikätsikurqa alli tsarakoq këqa alläpa precisanqanta?

⁵ (Leyi Juan 15:9, 10). Jina shonqupita patsë Jehoväta y Jesusta kuyarninmi yachatsikurqa sïguintsik (Mar. 12:30; Juan 14:15). Jesusqa manam kuyayänanllapaqtsu qateqninkunata nirqan, sinöqa imëpis kuyar sïguiyänampaqmi nirqan. Porqui Dios munanqannö wata wata kawar sïguinapaqqa, alläpam precisan alli tsarakunantsik. Tsëmi Jesusqa alleq tsarakunantsik alläpa precisanqanta rikätsikurnin, Juan 15:4-10 textuchö “kuyakïnïchö imëpis kayë” nir cläru entienditsikurqan.

6. ¿Imanötaq rikätsikuntsik Jesusta imëpis kuyanqantsikta?

⁶ ¿Imanötaq rikätsikuntsik Jesusta imëpis kuyëkanqantsikta y kushitsita munanqantsikta? Mandamanqantsikkunata cäsukurninmi. Rasumpa kaqchöqa, pënölla cäsukoq kanapaqmi nimantsik. Kikinmi kënö nirqan: ‘Noqapis Teyta mandakushqankunata wiyakushqa karmi, kuyakïninchö imëpis këkä’. Clärum këkan, Jesusmi cäsukoq këta yachatsimarquntsik (Juan 13:15).

7. ¿Imatataq Jesus nirqan cäsukïpaq y kuyakïpaq?

 ⁷ Cäsukïpaq y kuyakïpaq parlarninmi, Jesusqa apostolninkunata kënö nirqan: “Mandakunqäkunata chaskikoq kaq y wiyakoq kaqmi, kuyamaq kaqqa” (Juan 14:21). Jinamampis, yachatsikunapaq Jesus mandamanqantsikta cumplirninqa Diosta kuyanqantsiktam rikätsikïkantsik. Porqui Jesusqa mandamantsik Teytampa voluntäninta ruranapaqmi (Mat. 17:5; Juan 8:28). Jehovätawan Jesusta kuyanqantsikta imëpis rikätsikushqaqa, pëkunapis kuyamäshunmi.

8, 9. (1) ¿Imanir mastaq Diospita yachatsikunantsik? (2) ¿Imanirtaq Ezequiel 3:18, 19 y 18:23 textukuna ninqan yanapamantsik yachatsikur sïguinapaq?

⁸ Jina Diospita yachatsikurqa sïguintsik, pasanampaq kaqpita nunakunata musyatsita munarmi. Bibliaqa Noëpaq nin, “alli kaq rurëkunapita willakoq” kanqantam (leyi 2 Pëdru 2:5). Awmi, tsë willakïchöqa, mana cäsukoq nunakuna ushakäyänampaq kaqtapis willakurqanmi. Jesusmi kënö nirqan: “Porqui imanömi tsë witsankunapis Apäkï Tamya manaraq shamuptinqa nunakuna mikur y upur këkäyarqan, y ollqukunapis y warmikunapis casakur këkäyarqan, hasta arcaman Noë yëkunqan junaqyaq, y manam wiyakuyarqantsu hasta Apäkï Tamya shamur llapankunata ushakäratsinqanyaq, tsënöllam nunapa Tsurin këkämunqan witsampis pasakunqa” (Mat. 24:38, 39). Nunakuna mana wiyakïta munëkäyaptimpis, Noëqa ima pasakunampaq kaqtaqa willakïkarqanllam.

⁹ Kanan witsampis, Diosnintsik ruramunampaq kaqta nunakuna musyayänanta munarmi yachatsikur sïguintsik. Y Jehovänömi, salvakuyänantaqa alläpa munëkuntsik (Ezeq. 18:23). Jina tukïnöpa yachatsikurninmi willakïkantsik, mana cäsukoq nunakunata Diospa Gobiernun ushakätsimunampaq kaqta (Ezeq. 3:18, 19; Dan. 2:44; Rev. 14:6, 7).

10. (1) ¿Imanir yachatsikunapaq kaqtataq Mateu 22:39 textu nimantsik? (2) Filïpus markachö Pabluwan Sïlas carcelta täpaq nunata imanö yanapayanqanta willakaramï.

¹⁰ Jina nuna mayintsikta kuyarninmi, Diospitaqa yachatsikurnin sïguintsik (Mat. 22:39). Musyantsikmi mana allikunapa pasarninqa, höraqa juknöpana nunakuna pensayanqanta. Pëkunata kuyanqantsikmi yanapamantsik yachatsikur sïguinapaq. Filïpus markachömi Pablutawan Sïlasta chikeqninkuna carcelman llawiratsiyarqan. Peru pullan paqasnönam, patsa alläpa kuyïkurqan y carcelpa llapan punkunkuna kichakärirqan. Carcelta täpaqqa, prësurëkaqkuna escapakushqa kayanqanta pensarmi wanutsikurita munarqan. Peru tsë höram, Pabluqa mana wanutsikunampaq michärirqan. Alläpa mantsakashqam carcelta täpaqqa, kënö tapukurqan: “¿Imatataq ruranä salvakunäpaq?”. Pëkunanam, “Señor Jesusman creikï, y salvashqam kanki” niyarqan (Hëch. 16:25-34).

11, 12. (1) ¿Imatataq yachatsimantsik carcelta täpaq nunata pasanqan? (2) ¿Imanirtaq yachatsikur sïguintsik?

 ¹¹ ¿Imatataq kë willakï yachatsimantsik? Rikanqantsiknöpis, carcelta täpaqqa patsa feyupa kuyuriptinraqmi yachatsiyänampaq mañakurqan. Tsënöllam kanan witsampis pasakun, wakinkunaqa trabäjunkunata oqrarirnin, majankunawan rakikäkurirnin, alläpa grävi qeshyawan kayanqanta willariyaptin, kastankuna wanuriyaptin o imëka mana allikunapa pasar-raqmi cambiariyan o yachakïta munayan. Tsëraqmi wakinqa imapaq kawayanqanta tapukuyan. Höraqa hasta carcelta täpaq nunanömi, “¿imatataq ruranä salvakunäpaq?” nir tapukuyan. Tsënö mana allikunapa pasëkaq nunakunaqa, itsa yachatsikunqantsikta wiyakïtana munayanqa.

¹² Diospita yachatsikïta mana jaqirqa, alli shonquyoq nunakunatam yanapëta puëdishun (Is. 61:1). 38 watapana llapan tiempunwan yanapakïkaq Charlotte panim, kënö nin: “Kanan witsan nunakunaqa imëka oqrakashqa cuentam këkäyan. Y alläpam wanayan Diospa Palabrampita wiyakïta”. Y 34 watapana precursöranö yanapakïkaq Ejvor jutiyoq panim, kënö nin: “Kanan witsanqa mëtsika nunakunam alläpa llakishqa sientikuyan, tsëmi pëkunata alläpa yanapëta munä”. Awmi, nuna mayintsikta kuyanqantsikmi Diospita yachatsikur sïguinapaq yanapamantsik.

13, 14. (1) ¿Ima qarëpitataq Juan 15:11 textuchö parlan? (2) ¿Imanötaq Jesusnölla kushishqa këta puëdintsik? (3) Kushishqa sienkunqantsikqa, ¿imanötaq yachatsikunqantsikchö yanapamantsik?

¹³ Wanutsiyänampaq ichikllana pishikaptin parlayanqanchömi, Jesusqa apostolninkunata nirqan Jehoväpa qarëninkunatapis chaskiyänampaq kaqta. Y tsë qarëqa yachatsikur sïguiyänampaqmi yanapanan karqan. ¿Imakunataq tsë qarëkunaqa kayan? Y ¿imanötaq yanapamantsik?

¹⁴ Kushishqa kë. Jesus mandamanqantsikta cäsukïqa manam alläpa sasatsu. Jesusqa üvas plantapita parlarirmi, yachatsikurqan pënö kushishqa kanapaq kaqta (leyi Juan 15:11). Jesusqa üvas planta kanqanta y qateqninkuna rämakuna kayanqantam nirqan. Imanömi juk planta yakuyoq y alli wanuyoq kaptinqa rämankunapis shumaq verdiräyan, tsënöllam Jesuswan juknölla karnin y ruranqankunata alli qatirninqa, pënölla kushishqa kashun (Juan 4:34; 17:13; 1 Pëd. 2:21). 40 watapitapis masna precursöranö yanapakïkaq Hanne jutiyoq panim kënö nin: “Diospita yachatsikurnin kushishqa sientikunqämi, Jehoväta sirwir sïguinäpaq yanapaman”. Awmi, shonqupita patsë kushishqa sientikunqantsikmi, mana wiyakïta munayanqan markakunachöpis yachatsikur sïguinapaq yanapamantsik (Mat. 5:10-12).

15. (1) ¿Ima qarëpitataq Juan 14:27 textuchö parlan? (2) ¿Imanötaq yamë sientikunqantsikqa yachatsikur sïguinapaq yanapamantsik?

¹⁵ Yamë kë (leyi Juan 14:27). Apostolninkunawan parlanqan kutillachömi, Jesusqa kënö nirqan: “Yamë kënïtam qamkunata qoyaq”. ¿Imanötaq yamë këninqa yanapamantsik? Mana jaqipa yachatsikurnin Jehoväta y Jesusta kushitsinqantsikpita alli sientikunapaqmi (Sal. 149:4; Rom. 5:3, 4; Col. 3:15). 45 watapana llapan tiempunwan yanapakïkaq Ulf jutiyoq wawqim kënö nin: “Yachatsikoq yarqurninqa utishqam wayïman kutï, peru ruranqäqa alli sientikunäpaq y kawënïta allipa utilicëkanqäta musyanäpaqmi yanapaman”. Awmi, imëpis yamë sientikunqantsikpitaqa alläpam agradecikuntsik.

16. (1) ¿Ima qarëpitataq Juan 15:15 textuchö parlan? (2) ¿Imatataq apostolkunaqa rurayänan karqan Jesuswan amïgu sïguiyänampaq?

 ¹⁶ Jesuswan amïgu kë. Imëpis kushishqa kayänampaq apostolninkunata nirirninmi, Jesusqa shonqupita patsë kuyanakuyänan alläpa precisanqanta nirqan (Juan 15:11-13). Tsëpitanam kënö nirqan: “Qamkunataqa amïgükuna nirmi qayayarqoq”. Jesuswan amïgu këqa, ¡alläpa shumaq qarëmi! Peru ¿imatataq apostolkunaqa rurayänan karqan Jesuswan amïgu sïguiyänampaq? Wayurmi o yachatsikurmi sïguiyänan karqan (leyi Juan 15:14-16). Ishkë watanönam pasarishqa karqan, “ciëluchö Gobiernuqa” këllachöna këkanqanta willakuyänampaq apostolninkunata mandanqampita (Mat. 10:7). Tsëmi wanutsiyänampaq ichikllana pishikaptin parlayanqanchöqa, yachatsikurnin sïguiyänampaq nirqan (Mat. 24:13; Mar. 3:14). Tsëta ruranan fäcil mana këkaptimpis, rurëtaqa puëdiyanmanmi karqan. Tsënöpam Jesuswan amïgu sïguiyänan karqan.

17, 18. (1) ¿Ima qarëpitataq Juan 15:16 textuchö parlan? (2) ¿Imanötaq tsë qarëqa Jesuspa qateqninkunata yanapanan karqan? (3) ¿Jehoväpa ima qarënintaq kanan witsan alläpa yanapamantsik?

¹⁷ Mañakïnintsikkunata Diosnintsik wiyanqan. Jesusqa apostolninkunata nirqan, jutinchö imatapis mañakuyaptinqa Jehovä qonampaq kaqtam (Juan 15:16). Jesus tsënö ninqanqa alläpachi yanaparqan. * Jesus ichikllachöna wanunampaq kaqtaqa apostolninkuna manam alleqllaqa entiendiyarqantsu. Peru yanapakïtaqa chaskir sïguiyänanmi karqan. Yachatsikur sïguiyänampaq mañakuyaptinqa, Jehoväqa yanapananmi karqan. Y tsënömi karqan, ichik tiempullatam rikäyarqan mañakïninkunata Jehovä imanö contestanqanta (Hëch. 4:29, 31).

¹⁸ Tsënöllam kanan witsampis pasakun. Diospita yachatsikur sïguishqaqa, Jesuswanmi amïgu këta puëdishun. Jinamampis, segürum kashun yachatsikur sïguinapaq mañakushqaqa Jehovä wiyamänapaq kaqta (Filip. 4:13). Alläpam agradecikuntsik mañakushqa Jehovä wiyamanqantsikpita y Jesuswan amïgu këta puëdinqantsikpita. Këkunam yanapamantsik yachatsikur sïguinapaq (Sant. 1:17).

19. (1) ¿Imanirtaq yachatsikurnin sïguintsik? (2) ¿Imataq yanapamäshun Diosnintsik mandamanqantsikta rurarnin sïguinapaq?

¹⁹ Kë yachatsikïchö yachakunqantsiknöpis, yachatsikurqa sïguintsik, Jehoväta y jutinta alläpa precisaqpaq churarnin, shonqupita patsë Jehoväta y Jesusta kuyarnin, pasanampaq kaqpita nunakunata musyatsita munarnin y nuna mayintsikta kuyarninmi. Jinamampis kushishqa kë, yamë kë, Jesuswan amïgu kë y Diosnintsik mañakïnintsikkunata wiyanqanmi yanapamantsik mandamanqantsikta rurarnin sïguinapaq. Awmi, Jehoväqa alläpam kushikun shonqupita patsë ‘mëtsikata imëpis wayunapaq’ kallpachakushqa.