1. Diospa qarëninkunapaqqa, ¿ima nirqantan Jesus?

WAKIN Diospa qarëninkunataqa manam rikëta puëdintsiktsu. Jirkachö Jesus yachatsikuykarmi, Diospa qarëninkuna mas alli kanqanta nirqan. Kënömi nirqan: “Mëchömi fortünëki këkan, tsëchömi shonqïkipis këkanqa” (Mat. 6:19-21). Shonquntsik imatapis munaptinqa, hörataqa tsëta ashirmi qallëkuntsik. ‘Ciëluchö fortünakunataqa’ juntantsik, Jehovä Dios munanqannö kawakur y munanqanta rurarninmi. Jesus willakunqannöpis, Diospa qarëninkunataqa manam ni pï qochimënintsikta puëdinqatsu.

2. (1) 2 Corintius 4:17, 18 ninqannö, ¿imata ruranapaqtan Pablu nimantsik? (2) ¿Kë yachatsikuychöqa imatatan yachakushun?

² Apostol Pabluqa, ‘mana rikakoq kaq cösaskunaman’ rikaränapaqmi nimantsik (leyi 2 Corintius 4:17, 18). Mushoq Patsata Jehovä Diosnintsik änimanqantsikchömi, mana rikakoq kaq bendicionkunataqa chaskishun. Kananqa yachakushun mana rikanqantsik Diospa qarëninkunapitam: Dioswan amïgu këpita, mañakuypita, Diosnintsik yanapamanqantsikpita. Y yachatsikunapaq Jehovä, Jesus y angelkuna yanapamanqantsikpita. Tsë llapan qarëkunapita, imanö agradecikunapaq kaqtapis rikäshunmi.

3. ¿Mëqan mana rikanqantsik qarëtan mas väleqqa?

³ Jehoväwan amïgu kanqantsikmi, mana rikanqantsik qarëpita mas väleqqa (Sal. 25:14). Jutsata ruraq  nunakunapa amïgun këkarninqa, ¿imanötan Jehoväqa limpiu y puëdeq kanman? Jehoväwan amïgu këtaqa puëdintsik noqantsikrëkur Jesus wanushqa kaptinmi (Juan 1:29). Jehoväqa musyarqannam nunakunata salvananrëkur, wamran Jesus wanunqanyaq tsarakunampaq kaqta. Tsënöpam Jehoväqa unëpitana wakin nunakunawan amïgu karqan (Rom. 3:25).

4. Jesus manaraq shamuptinqa, ¿pikunatan Diospa amïgunkuna kayarqan?

⁴ Patsaman Jesus manaraq shamuptinmi, Jehoväpa amïgunkunaqa karqanna. Abrahanqa Jehovämanmi markäkurqan o yärakurqan, tsëchi waranqa watakunana wanushqana këkaptimpis Jehoväqa amïgü nirqan (Is. 41:8). Awmi, amïgunkuna wanuyaptimpis Jehoväqa manam qonqantsu. Tsëchi Abrahantaqa kananyaqpis yarparëkan (Lüc. 20:37, 38). Jobpis Jehoväpa amïgunmi karqan. Ciëluchö llapan angelninkunawan këkarninmi Jehoväqa Jobman markäkunqanta o yärakunqanta rikätsikurqan. Jobpaq parlarninmi kënö nirqan: “Pënöqa manam pipis kantsu alli ruraq, munashqänö kawakuq, alli sirwimaq y jutsa mana ruraq” (Job 1:6-8). 80 watapana santukunata adorayänan markachö täraq Danielpaqqa, ¿ima nirqantan Jehovä? Daniel edäna këkaptinmi, kima kutipa Diosqa angelninkunawan kuyanqanta musyatsirqan (Dan. 9:23; 10:11, 19). Awmi, Jehoväqa kushishqam shuyarëkan amïgunkunata kawaritsimunampaq (Job 14:15).

5. Jehoväwan amïgu kanapaqqa, ¿imatatan ruranantsik?

⁵ Mëtsikaq nunakunam jutsata ruraq karpis, Jehoväpa amïgunkuna kayan. Entëru Patsachö nunakunam Jehoväpa amïgun këta munarnin, pë munanqanmannö kawakuyan. Bibliachömi nin, ‘allita ruraq nunakunata Jehovä kuyanqanta’ (Prov. 3:32). Tsënö nunakunaqa Jesus wanunqanman markäkur o yärakurmi Jehoväpa amïgun këta puëdiyan. Noqantsikpis Jesus wanunqanrëkurmi, Jehovä munanqannö kawakunapaq bautizakuyta puëdintsik. Tsënö rurarllam noqantsikpis, wakin wawqi panintsikkunawan Jehoväta juntu sirwishun y pëpa amïgun këtapis puëdishun.

6. Jehoväwan amïgu kanqantsikpitaqa, ¿imanötan agradecikushwan?

⁶ Jehoväwan amïgu kanqantsiktaqa, ¿imanötan rikätsikushwan? Abrahannö y Jobnö rurarninllam. Pëkunaqa pachak watakunapam Jehovällata sirwiyarqan, tsënöllam noqantsikpis Jehovä Diosta sirwinantsik. Danielqa Jehoväwan amïgu kanqanta valurarqanmi, tsënöllam noqantsikpis Jehoväwan amïgu kënintsikta valuranantsik (Dan. 6:7, 10, 16, 22). Imëka mana allikunapa pasarnimpis, Jehovä Diosnintsik yanapamashqam alli tsarakuyta y amïgun këta puëdishun (Filip. 4:13).

7. (1) Proverbius 15:8 ninqannö, ¿imanötan Jehoväqa mañakuynintsikta wiyan? (2) ¿Imanötan Jehoväqa yanapamantsik?

⁷ Mañakuyqa mana rikanqantsik qarëmi. Alli amïgukunaqa, pensayanqanta y imanö sientikuyanqantam willanakuyan. Jehoväqa parlapämantsik Palabran Bibliawanmi, tsëchömi nimantsik pensanqanta y imanö sientikunqanta. Noqantsiknam mañakurnin pëta parlapantsik.  Tsë höram pensanqantsikta y imanö sientikunqantsikta willantsik. Jehoväqa kushishqam mañakuynintsikta wiyan (leyi Proverbius 15:8 *). Pëqa kuyakoq amïguntsik karmi llapan mañakunqantsikta wiyan. Hörataqa rasllam yanapamantsik, peru hörataqa mañakurninmi sïguinantsik. Imanö kaptimpis, Jehovä yanapamänapaq kaqmanmi markäkunantsik o yärakunantsik. Jehovä Diosqa yachaq këninwan y kallpanwanmi, mana allikunapa pasashqa yanapamäshun (1 Cor. 10:13).

8. Mañakuy puëdinqantsikpitaqa, ¿imanötan agradecikuntsik?

⁸ Mañakuy puëdinqantsikpitaqa agradecikuntsik, ‘Diosman imëpis mañakurninmi’ (1 Tes. 5:17). Jehoväqa manam pëman mañakunapaq obligamantsiktsu. Tsëpa rantinqa, ‘mana jaqipa’ pëwan parlanatam munan (Rom. 12:12). Tsëmi agradecikunqantsikta y alabanqantsiktaqa rikätsikuntsik, Teyta Diosman kutin kutin mañakurnin (Sal. 145:2, 3).

9. (1) ¿Wawqi Cristianqa ima nintan mañakuypita? (2) Y qamqa, ¿ima ninkitan mañakuypita?

⁹ Atska watapana Jehovä Diosta sirwirnin y wiyamanqantsikta musyarninmi, Jehovämanqa masraq markäkuntsik o yärakuntsik. Rikärishun llapan tiempunwan 47 watapa yanapakoq wawqintsik Cristian willakunqampita: “Llapan junaqkunam Inti o Rupay manaraq yarqamuptin Jehoväman mañakü. Jehovä llapanchö yanapamanqampitam pëman agradecikur mañakü. Y patsäkurqa Jehoväman mañakurirmi kushishqa punukü”.

10. Jehovä Dios yanapamanqantsiktaqa, ¿imanirtan agradecikunantsik?

¹⁰ Jehovä Diosnintsik yanapamanqantsikpis mana rikanqantsik qarëmi.  Jesusqa nimarqantsik, Jehovä Dios yanapamänapaqqa kutin kutin mañakunapaqmi (Lüc. 11:9, 13). Jehoväqa, ‘nunakunapa kallpampita mas puëdeq kallpanwanmi’ yanapamäshun (2 Cor. 4:7; Hëch. 1:8). Pë yanapamashqam imëkapa pasarpis alli tsarakushun.

11. ¿Imata ruranapaqtan Jehovä Diosqa yanapamantsik?

¹¹ Jehovä Diosqa pë munanqanta ruranapaqmi yanapamantsik. Y mana puëdinqantsikta ruranapaqpis yanapamantsikmi. Awmi, Diosnintsik yanapamashqam Gobiernumpita yachatsikurqa purintsik y manam kikintsikpa kallpantsikwantsu.

12. Salmus 139:23, 24 Bibliachö ninqannö, ¿imatatan mañakunantsik?

¹² Mana alli pensëkanqantsikta y mana allita shonquntsik munëkanqanta musyanapaqmi, Jehoväman mañakunantsik. Tsënömi Jehovä Dios yanapamanqantsiktaqa agradecikuntsik (leyi Salmus 139:23, 24 *). Jehovä Dios yanapamashqam, imachö pantanqantsiktaqa rikäshun. Mana allikunata pensarnin o mana allikunata munarninqa, Jehovä yanapamänapaqmi mañakunantsik. Tsënömi Jehovä chikinqankunata mana ruranapaq kallpachakushqaqa, kikin yanapamäshun (Efes. 4:30).

13. Jehovä yanapamanqantsikpitaqa, ¿imanötan agradecikushwan?

¹³ Jehovä Dios yanapamanqantsikta musyanqantsikmi, mas agradecïdu kanapaq yanapamäshun. Ciëluta manaraq ëwakurmi Jesusqa qateqninkunata kënö nirqan: “Qamkunaman santu espïritu shamuptinmi poderta chaskiyanki, y noqapita musyatsikoq testïgum kayanki [...], patsapa mas karu kuchunyaq” (Hëch. 1:8). Jesus ninqankunaqa  kanan witsankunam cumplikëkan. Jehovä Diospa yanapakuyninwanmi, 8 millonpitapis mas nunakuna Jehoväpa testïgun tikrayashqa. Jehovä yanapamashqam kuyakurnin, kushishqa karnin, yamë karnin, pacienciayoq karnin, alli shonquyoq karnin, alli karnin, markäkïyoq karnin, yachanëpaq karnin, tsarakuyta yacharninmi shumaq kawakuntsik (Gäl. 5:22, 23). Awmi, Jehovä Diospa yanapakuyninqa juk shumaq qarëmi.

14. Yachatsikoq yarqushqaqa, ¿ima yanapakuytan kapamantsik?

¹⁴ Jehoväwan ciëluchö Gobiernun yanapamanqantsikpis, mana rikanqantsik qarëmi (2 Cor. 6:1). Jesuspa qateqnin kayänampaq yachatsikushqam yanapamantsik. Tsëmi kikimpaq y yachatsikoq mayinkunapaq parlarnin, Pabluqa kënö nirqan: “Noqakunaqa Diospa minkankunam kayä” (1 Cor. 3:9). Yachatsikoq yarqurninqa Jesuspa minkanmi kantsik. Pëmi “qatimaqnïkuna tikrayänampaq llapan nacionkunapita nunakunata yachatsiyë” nir qateqninkunata mandarir kënö nirqan: ‘Qamkunawanmi këkäshaq’ (Mat. 28:19, 20). ‘Mana ushakaq alli willakïkunata [...] patsachö täraqkunata willanampaq’ angelkuna yanapamanqantsikpitam agradecikuntsik (Rev. 14:6).

15. ¿Jehovä yanapamanqantsiktaqa Bibliachö mëqan willakuytan rikätsikun?

¹⁵ Diospa Gobiernumpita yachatsikunqantsik nunakunapa shonqunkunayaq chäriptinqa, masmi yachakuyta munayanqa (Mat. 13:18, 23). ¿Pitan mas yachakuyänampaqqa yanapakun? Jesusqa, “Teyta [...] noqaman mana apamuptinqa” manam qatimaqnïkuna këta puëdiyantsu nirqanmi (Juan 6:44). Tsënö kanqantaqa musyëta puëdintsik, apostol Pablu warmikunata yachatsinqanchömi. Juk kaqqa Lidiam karqan, pëpaqmi Bibliachö kënö willakun: “Jehovämi shonqunta chipyëpa kicharapurqan Pablu ninqankunata alleq wiyakunampaq” (Hëch. 16:13-15). Lidiata yanapanqannöllam, Jehoväqa mëtsikaq nunakuna reqiyänampaq permitikan.

16. Imatapis ruranqantsikchöqa, ¿pitan alabashqa kanan?

¹⁶ Tsëtaqa musyashun Corintu markachö wawqi panikunaman Pablu qellqanqanchömi: “Noqam plantarqä, Apölusmi parqurqan, peru Diosmi winatsir sïguirqan. Tsëmi ni plantaqpis ni parqoqpis precisaqtsu kayan, sinöqa winatseq kaq Diosmi” (1 Cor. 3:6, 7). Awmi, imëkata rurashqapis Jehovä alabashqa kanampaqmi Pablunö ruranantsik.

17. Jehovä, Jesus y angelkuna yanapamanqantsikpitaqa, ¿imanötan agradecikushwan?

¹⁷ Llapan puëdinqantsikmannö Jehovä Diospita yachatsikunapaq kallpachakurninmi. Tsëtaqa rurashun “nunakuna juntaräyanqanchö y wayin wayin” yachatsikurmi (Hëch. 20:20). Atska wawqi panikunatam cällikunachö yachatsikuy gustayan. Tsëtaqa rurayan yachëllapa mana reqiyanqan nunakunata parlaparmi, tsënöpa Diospita maslla yachakuyta munayänampaq.

18, 19. (1) ¿Imanötan Diospa minkankuna kantsik? (2) Bibliapita yachakoq Rafaeltaqa, ¿imanötan Jehovä yanaparqan?

¹⁸ ‘Diospa minkankuna’ karmi, noqantsikqa nunakunata yanapar sïguinantsik. Yachakuy munaqta tarirqa,  imëkanöpa yachatsinapaqmi kallpachakunantsik. Mana puëdirqa, juktam yachatsinampaq ninantsik. Llapantsikmi kushikuntsik Jesuspa qateqnin këta munar yachakuyaptinqa, tsënö rurayaptinqa Jehoväpa yachatsikuyninqa pensëninyaq y shonqunyaqmi chärinqa.

¹⁹ Sudafrica nacionpita Rafaelqa brüjum karqan. Pëtaqa gustaqmi Bibliachö yachakunqankuna. Tsëmi wanushqakunawan parlë mana alli kanqanta Bibliachö yachakurqa yarpachakurqan (Deut. 18:10-12). Jehoväqa tiempuwanran imanö pensanqanchö yanaparqan, tsëmi brüju kë trabäjun kaptimpis dejarirqan. Kananqa 60 watayoqnam Rafaelqa, pëmi willakun: “Kushikümi Jehoväpa testïgunkuna trabäjuta tarinäpaq yanapayämanqampita. Peru tsë llapampita masqa, munanqannö kawanäpaq bautizakunqäpitam Jehoväta agradecikü”.

20. ¿Imatatan ruranantsik?

²⁰ Chusku qarëkunapitam yachakurquntsik. Llapampitapis mas väleq qarëqa Jehoväwan amïgu kanqantsikmi. Tsërëkurllam wakin mana rikakoq qarëkunapis kayan: Diosman mañakuyta puëdinqantsik, Diosnintsik yanapamanqantsik y Diospa minkankuna kanqantsik. Tsë mana rikakoq qarëkunata mas valuranapaqmi yachakurquntsik. Y Jehovä amïguntsik kanqampitaqa imëpis agradecikur këkäshun.