1. 2 Corintius 3:1-3 ninqannö, ¿imanirtan alläpa kushikuypaq pitapis bautizakunqanyaq yanapëqa? (Qaranchö fötutawan rikäri).

BIBLIA yachakoqkuna bautizakuyaptinqa, ¿imanötan sientikuntsik? Llapantsikmi kushikuntsik (Mat. 28:19). Y Biblia yachatsinqantsik bautizakuptinnäqa masraqmi kushikuntsik (1 Tes. 2:19, 20). Tsëllaraq bautizakushqakunaqa allita parlaq carta kayanqantam rikätsikuyan. Tsënöpam yachatseqnimpaq y wawqi panikunapaqpis allita parlayanqa (leyi 2 Corintius 3:1-3).

2. (1) ¿Imanirtan bautizakuyänampaq yanapakushwan? (2) ¿Imanötan Bibliapita yachatsikuntsik? (Willakuytawan rikäri).

² Pasaq chusku watakunachöqa 10 millonpitapis mas nunakunam Bibliapita yachakuykäyashqa. * Tsë witsankunallam 280.000 nunakunapitapis mas cada wata bautizakuyashqa. Awmi mëtsika Biblia yachakoqkunaran bautizakuyänan pishin. Pëkunataqa, ¿imanöraq yanapashwan? Jehoväqa pacienciakoq karmi shuyarëkan  pëkunapis Jesuspa qateqnin tikrayänanta. Ushakë tiempu këllachöna kaptinmi, Biblia yachakoqkuna bautizakuyänampaqqa imëkanöpa yanapakunantsik (1 Cor. 7:29a; 1 Pëd. 4:7).

3. ¿Imatatan kananqa yachakushun?

³ Kanan witsan Biblia yachakuykaqkuna bautizakuyänampaqmi, Jehoväpa Testïgunkunata Pushaqkunaqa më tsë sucursalkunapa yanapakuyninta ashiyashqa. Kanan y qateqnin kaq yachatsikuychöqa congregacionkunata watukaqkunapita y llapan tiempunkunawan atska watapa yanapakoq wawqi panikunapitam yachakushun (Prov. 11:14; 15:22). * Pëkuna niyanqanmi mas alli yachatsikunapaq yanapamäshun y Biblia yachakoqkunatanam mas alli yachakuyänampaq yanapanqa. Kananmi, Biblia yachakoqkuna bautizakuyta munarqa pitsqa rurëkunata rurayänampaq y yachatseqnimpis imanö yanapanampaq yachakurishun.

4. Punkunkunallachö Bibliapita yachatsikushqaqa, ¿yanapakunqatsuraq?

⁴ Biblia yachakuyta munaqkunapa punkunllachömi, mëtsikaq wawqi panikunaqa yachatsikuyan. Tsënö ruranqantsik alli kaptimpis, mana seguïdu y wallkallata yachatsishqaqa manam shonqunkunaman chanqatsu. Maslla yachatsiyänampaqmi wakin wawqi panikunaqa celularnimpa nümerunta mañayan tsënöpa qayarnin o qellqaparnin maslla Bibliapita yachatsiyänampaq. * Tsënöqa killa killa yachatsikushqapis manam bautizakuyänampaq kallpachakuyanqatsu. Awmi Diospa Palabrampita ichikllata yachakurqa manam Jehovällapaqna kawanampaq änikuyta y bautizakuytaqa puëdinqatsu.

5. Lücas 14:27-33 ninqannö, ¿imatan Biblia yachakoqkunata yanapanqa?

⁵ Jesusqa igualätsikuykunawanmi yachatsikurqan qateqnin këta munarqa imata rurayänampaq kaqta. Pëqa parlarqan törri sharkatsita munaq nunapaq y guërraman ëwaq reypaqmi. Jesusqa törri shäritsita munaq nunapaq  parlarqa, ushatsinampaq ëkata gastanampaq kaqta y tinkunqanta o mana tinkunqanta pensanampaqmi nikarqan. Reypaq parlarnam guërraman manaraq ëwar gananampaq o mana gananampaq kaqta rikänan karqan (leyi Lücas 14:27-33). Tsënöllam nunakunapis Jesuspa qateqnin kayänampaqqa alliraq pensayänan. Jesus ninqanta nunakuna rurayänampaqqa cada semänam Bibliapita yachatsinantsik.

6. Biblia yachakoqkuna bautizakuyänampaqqa, ¿imatatan rurashwan?

⁶ Puntataqa punkunkunallachö maslla yachatsinapaq kallpachakushun. Cada watukaq ëwarmi juk versïculullatapis Bibliapita leyipänantsik. Cada watukaq ëwarmi Bibliapitaqa ichik maslla leyipänantsik. Maslla yachatsinqantsikwan yachakäriyaptinqa kënö tapushun: “¿Mëllamampis jamakushwanku maslla parlakunapaq?”. Imata nimanqantsikwanmi rikätsikuyanqa Bibliapita yachakuyta munayanqanta o mana munayanqantapis. Tsëpitanam semänachö mas junaqkuna yachatsinapaq nirishwan. Tsëqa raslla bautizakuyänampaqmi yanapanqa. Biblia yachakoqkunaqa mastaran rurayänan.

7. Cada yachatsikoq ëwanapaqqa, ¿imanötan alistakunantsik?

⁷ Bibliapita yachatsikunapaqqa, puntataqa kikintsikran alli yachakunantsik. Tsëpaqqa yachatsinapaq kaqta y Bibliatam leyipänantsik. Tsëpitana imapita yachatsinapaqqa tïtulunkunata, tapukuyninkunata, Bibliata, dibüjukunata y videukunata utilizar shumaq yachakunantsik. Tsëpitanam yachatsinqantsik nunakunata shumaq yachatsinapaq pensanantsik. Tsënöpa yachakuyanqanmannö pëkunapis kawayänampaq (Neh. 8:8; Prov. 15:28a).

8. Colosensis 1:9, 10 Pablu ninqannö, ¿ima mastatan ruranantsik?

⁸ Bibliapita yachatsikoq ëwanapaq alistakunqantsik höram, Jehovä pëkunata yanapëkunampaq mañakunantsik. Tsënöpa Bibliapita yachatsinqantsikkuna shonqunyaq chärinampaq (leyi Colosensis 1:9, 10). Nunakuna bautizakuyänampaq yanapëta munarpis  yarpäshun, manam llapan nunakunatsu igual-lla yachakuyan. Tsëmi imanö yanapanapaq kaqman pensanantsik.

9. Biblia yachakoqkuna alistakuyänampaqqa, ¿imanötan yanapashwan?

⁹ Bibliapita seguïdu yachakurqa Jehoväwan Jesus rurayanqampitam agradecikunqa y mas yachakuytam munanqa (Mat. 5:3, 6). Bibliapita yachakoqqa, yachakunqankuna yanapanampaqmi shumaq wiyakunan. Tsëpaqqa puntallapitanam leyinan y leyinqanmanmi pensanan. Tsëpaqqa puntallapitanam leyinampaq y yachakunqanmannö imatapis ruranampaq ninantsik. Puntallapitana alistakuyänampaqqa noqantsikran yachatsinantsik tsëta imanö rurayänampaq. * Leyinqanta yarpar parlakamunampaqqa, juk ishkë palabrakuna marquëta yachatsishun. Tsëpitana yachakunqankunata parlakamunampaq nirishun. Kananqa ima masta ruranampaq rikärishun.

10. Biblia yachakoqqa, ¿imanirtan cada junaq Bibliata leyinan? Y leyinqan yanapanampaqqa, ¿imatatan ruranan?

¹⁰ Cada semäna Bibliata yachatsishqapis, kikinkunam masta rurayänampaq kallpachakuyänan. Y tsëpaqqa Jehovämanmi mañakuyänan. Y Jehovä parlapanqanta wiyayänampaqqa, Bibliatam cada junaq leyiyänan (Jos. 1:8; Sal. 1:1-3). Tsëta rurayänampaqqa yanapanqa jw.org päginachö yarqamoq yanapakuymi. * Biblia leyinqan yanapanampaqqa, allim pensanan Jehoväpita yachakunqanman y tsë yachakunqanmannö kawanampaqmi yanapanantsik (Hëch. 17:11; Sant. 1:25).

11. Biblia yachakoqqa, ¿imanötan mañakuyta yachakunqa? Y ¿imanöraq yanapanqa?

¹¹ Biblia yachakoqta Jehoväman cada junaq mañakunampaq yachatsishun. Yachatsinqantsik nunakunawan Jehoväman mañakurqa, pëkunapaqpis mañakushun. Tsënömi shonqupita patsë Jehoväman mañakuyanqa Jesucristupa jutinchö (Mat. 6:9; Juan 15:16). Cada junaq Bibliata leyiptin y  Jehoväman mañakuptinqa, Biblia yachakoqqa Teyta Diosnintam mas reqinqa (Sant. 4:8). Kë llapanta yachakurqa, Jehovällapaqna kawanampaq y bautizakunampaqmi yanapanqa.

12. Biblia yachakoqtaqa, ¿imanötan Jehoväta kuyanampaq yanapashwan?

¹² Bibliata yachakuykaq nunapa shonqunyaq chänampaqmi Bibliapitaqa yachatsinantsik. ¿Imanirtan tsënöqa yachatsinantsik? Shonqunyaq chaptinmi yachakunqanmannö imatapis rurëta munanqa. Jesusqa shumaqmi yachatsikoq, tsëmi nunakunapa shonqunman chaptin pëkunaqa qatiräyaq (Lüc. 24:15, 27, 32). Bibliapita yachakoq nunaqa Teytantanö, Diosnintanö y Amïguntanömi Jehoväta rikänan (Sal. 25:4, 5). Bibliapita yachatsikunqantsik höram Teyta Diosnintsik imanö kanqampita yachatsinantsik (Ex. 34:5, 6; 1 Pëd. 5:6, 7). Imapita yachatsirnimpis Jehoväta reqiyänampaqmi yanapanantsik. Tsëtaqa rurashun kuyakoq, alli y ankupäkoq kanqanta yachatsirninmi. Jesusqa yachatsikurqan Jehovä Diosta kuyanapaqmi y tsë mandamientuqa ima mandamientupitapis mas alli kaqmi (Mat. 22:37, 38). Bibliapita yachakoq nunakuna Teyta Diosta kuyayänampaq yanapashun.

13. Jehovä Dios imanö kanqanta musyayänampaqqa, ¿imanötan Biblia yachakoqkunata yanapashwan?

¹³ Bibliapita yachakoq nunawan parlarqa, imanir Jehovä Dios kuyanqantsikta willashun. Itsa tsëqa yanaparinqa Jehovä Diosta reqinampaq y mas kuyanampaq (Sal. 73:28). Jehovä Dios kuyakoq kanqanta, yachaq kanqanta, alli kanqanta o kallpayoq kanqanta leyikanqantsikman pensarishun. Tsëta ruranqantsik Jehovä Diosta kuyanapaq yanapamanqantsiktam Bibliapita yachakoq nunakunata nirishwan. Kananqa, Bibliapita yachakoq bautizakuyta munarqa ima masta ruranampaq kaqta rikärishun.

14. Hebrëus 10:24, 25 ninqannö, ¿imatan Biblia yachakoqkuna bautizakuyänampaq yanapanqa?

¹⁴ Llapantsikmi munantsik Bibliapita yachakuykaqkuna bautizakuyänantaqa.  Tsëpaqqa reunionkunaman seguïdu ëwayänampaqmi ninantsik. Unëpana yachatsikoq wawqi panikunaqa, reunionkunaman ëwaq nunakuna mas raslla bautizakuyanqantam niyan (Sal. 111:1). Wakinkunaqa Biblia yachakoqkunata niyan wakinllata yachakuyanqantam y mas yachakuyta munarqa reunionkunaman ëwayänampaqmi niyan. Tsëpaqqa, Hebrëus 10:24, 25 leyirishun y reunionkunaman ëwë imanö yanapakunqanta nirishun (leyi). Y ¿Imanötaq reunionnïkuna? * neq videutapis rikäratsishwanmi. Bibliapita yachakoq nunakunata yanapashun reunionnintsikkunaman ëwayänampaq.

15. Bibliapita yachatsinqantsikkuna reunionman ëwayänampaqqa, ¿imanötan yanapashwan?

¹⁵ Bibliapita yachatsinqantsik nunakuna reunionkunaman manaraq ëwayaptin o puëdirninlla ëwayaptinqa, reunionchö yachakunqantsikta willapärishun. Tsëkunata ninqantsikmi reunionkunaman ëwanampaq yanapanqa. Tsë killapaq Täpakoq revistata y Reunionchö Yachakunapaq höjata apapushun. Y tsë semänachö yachakunapaq kaqta rikätsishun. Y tsëpitana mëqanllatapis yachakuy munanqanta tapurishun. Tsënö yanapashqam, juk religionkunachö yachatsiyanqampitaqa reunionnintsik mas alli kanqanta rikanqa (1 Cor. 14:24, 25). Y reunionnintsikkunachö wawqi panikunata reqinqanmi bautizakunampaq yanapanqa.

16. (1) Biblia yachakoqkuna bautizakuyänampaqqa, ¿imanötan yanapashwan? (2) ¿Imapitatan yapëchöqa yachakushun?

¹⁶ Bibliapita yachakoqkunataqa cada semäna yachakunampaq, alli alistakunampaq, Jehoväman mañakunampaq, pëta kuyanampaq y llapan reunionkunaman ëwanampaqmi yanapanantsik. (“ Bibliapita yachakoq ruranampaq” neqtawan rikäri). Yapëchönam imanö yachatsikunapaq kaqta pitsqata yachakurishun.