1. ¿Diosnintsik ima änimanqantsiktataq kushishqa shuyarëkantsik?

 JEHOVÄ Diosnintsikqa mana wanuypa imëyaqpis kawakunapaqmi änimantsik. Wakin sirweqninkunaqa shuyaräyan ciëluchö imëyaqpis kawakuytam (1 Cor. 15:50, 53). Y wakin mëtsikaq sirweqninkunaqa kë Patsachö mana qeshyëpa imëyaqpis kawakuytam shuyaräyan (Apoc. 21:3, 4). Ciëluchö o Patsachö kawanantsik kaptimpis, Diosnintsik änimanqantsiktaqa kushishqam shuyarantsik.

2. Bibliachö shuyarëpaq parlarqa, ¿imapaqtan parlëkan?

² Imatapis shuyarëpaq Bibliachö parlarqa, imëka allikuna rasumpa cumplikänampaq kaqta creir shuyarëpaqmi parlëkan. Noqantsikqa Diosnintsik änimashqantsik kaptinmi, llapan shuyaranqantsik cumplikänampaq kaqta creintsik (Rom. 15:13). Musyantsikmi imakunata änimanqantsikta, y cumpleq kanqanta (Nüm. 23:19). Segürum këkantsik änikunqankunataqa Jehovä rurëta munanqanta y cumplinampaq kaqta. Tsëmi shuyaranqantsikqa lluta pensarkur munanqantsikllatsu, sinöqa rasumpam kanqa y Diosnintsik cumplinqam.

3. ¿Imatataq këchö yachakushun? (Salmus 71:5).

³ Teytantsik Jehoväqa kuyamantsikmi, y pëman confiakunatam munan (leyi Salmus 71:5). Jehoväman confiakurqa y änimanqantsikkunata alli firmi shuyararqa, mana allikunapa pasarpis allim aguantashun y shamoq tiemputapis kushishqam shuyaräshun. Këchömi yachakushun Diosnintsik änimanqantsikta shuyarëqa imanö yanapamanqantsikta. Puntataqa yachakushun shuyaranqantsik juk anclanö kanqanta y juk cascunö kanqantam. Tsëpitanam yachakushun imëpis shuyaranqantsik imanö yanapamanqantsikta.

4. ¿Imanirtan Diosnintsik änimanqantsikta shuyaranqantsikqa juk anclanö? (Hebrëus 6:19).

⁴ Diosnintsik änimanqantsikta shuyarëtam apostol Pabluqa, juk barcupa anclantawan igualatsirqan (leyi Hebrëus 6:19). Pëqa seguïdum barcuwan viajaq, tsëmi musyaq barcuta yaku mana apakunampaq  ancla tsaranqanta. Juk kutim, viajëkaptin alläpa vienturqan. Tsë kutim rikarqan vientu apaptin qaqawan o rumiwan barcu chocar mana ushakärinampaq, marinërukuna anclata jitayanqanta (Hëch. 27:29, 39-41). Tsë anclanöllam, Diosnintsik änimanqantsikta shuyaranqantsikpis mana allikunapa pasar Diosnintsikpita mana rakikäkurinapaq yanapamantsik. Ichik tiempullachöna, imëkapis allina kanampaq kaqta shuyaranqantsikmi yanapamantsik mana allikunapa pasarpis alli tsarakunapaq. Jesusqa, chikishqa kanantsikpaq kaqtam nirqan (Juan 15:20). Diosnintsik änimanqantsikkunata cumplimunampaq kaqman yarparanqantsikqa, imëka pasakuptimpis sirwita mana dejanapaqmi yanapamantsik.

5. ¿Imanirtan Jesusqa alli tsarakurqan wanunampaq kaqta musyëkarpis?

⁵ Yachakurishun wanutsiyänampaq kaqta musyëkarpis, Diosnintsik äninqanta shuyaranqan Jesusta imanö yanapanqanta. 33 wata Pentecostes fiesta junaqmi, apostol Pëdru parlarqan Jesuspaq parlaq juk salmuspita. Tsëchömi parlarqan Jesusqa alläpa tranquïlu kanqanta y Diosnintsikman alläpa confiakunqanta. Kënömi nirqan: “Noqaqa Teyta Diosman confiakurmi kawashaq. Qamqa manam Sepultürachö dejamankitsu. Y manam permitinkitsu llapan shonqunwan sirwishoqniki ismur ushakänanta. [...] Läduykichö këkarqa, alläpa kushishqam kashaq” (Hëch. 2:25-28; Sal. 16:8-11). Jesusqa wanunampaq kaqta musyëkarpis, Teytan kawaritsimunampaq kaqta y ciëluta kutirir Teytampa lädunchö kushishqa kanampaq kaqtam shuyararqan (Heb. 12:2, 3).

6. Diosnintsik änikunqampaqqa, ¿imatataq juk wawqi nirqan?

⁶ Diosnintsik änikunqankunata shuyaräyanqanmi, mëtsikaq wawqintsikkunata y panintsikkunata yanapashqa mana allikunapa pasëkarpis alli tsarakuyänampaq. Rikärishun Inglatërra nacionpita wawqintsik Leonard Chinn pasanqanta. Pëtaqa, Punta kaq Jatun Guërra witsanmi, guërrapaq yachakoq ejercituman ëwëta mana munaptin, carcelman apayarqan. Ishkë killapam, piwampis parlananta munayarqantsu. Tsëpitanam, rurëta mana puëdinqan trabäjukunachö trabajatsiyarqan. Tiempuwannam, kë wawqiqa kënö nirqan: “Tsëkunapa pasarmi cuentata qokurqä Diosnintsik änimanqantsikta shuyarëqa alli tsarakunapaq alläpa yanapakunqanta. Alli aguantanapaq y shamoq tiemputa kushishqa shuyaränapaqqa yanapamantsik Jesus, apostolkuna y Diosnintsikpa willakoqninkuna alli tsarakuyanqanman y Diosnintsik änimanqantsikkunaman yarparanqantsikmi”. Diosnintsik änikunqankunata shuyaranqanqa, Leonardpaqqa ancla cuentam karqan, y noqantsikpaqpis tsënömi kanan.

7. Diosnintsik änikunqankunata masraq shuyaränapaqqa, ¿imatan yanapamantsik? (Romänus 5:3-5; Santiägu 1:12).

⁷ Mana allikunapa pasar alli tsarakurmi y Teyta Dios yanapamanqantsikta rikarmi, Diosnintsik änimanqantsikkunataqa masraq shuyarantsik (leyi Romänus 5:3-5; Santiägu 1:12). Kananqa, Diosnintsikpita yachakur qallanqantsik witsampitapis masmi Diosnintsik änikunqankunata shuyarantsik. Satanasqa munan mana allikunapa pasar Jehovä Diosnintsik änimanqantsikkunata qonqëkunatam, peru Jehovä yanapamashqam imëkapa pasarpis alli tsarakushun.

8. ¿Imanirtan Diosnintsik änimanqantsikta shuyarëqa cascu cuenta? (1 Tesalonicensis 5:8).

⁸ Bibliachöqa nin, Diosnintsik änimanqantsikkunata shuyaranqantsikqa cascu cuenta kanqantam (leyi 1 Tesalonicensis 5:8). Juk soldäduqa cascuta cascukun, peqanta o umanta tsapanampaqmi, tsënöpa chikeqninkuna imawampis peqachö chätsiyaptin mana wanunampaq. Tsënöllam noqantsikpis Satanas mana ishkitsimänapaqqa, pensanqantsikta alli cuidanantsik. Satanasqa, mana allikunata pensanantsikta munarmi imëka tentacionkunata churamun y nunakuna niyanqankunata creinata munan. Imanömi juk soldädupa peqanta o umanta cascu tsapan,  tsënöllam Teyta Diosnintsik änimanqantsikkunata shuyaranqantsikpis, mana allikunata mana pensanapaq yanapamantsik. Y manam Jehovä Diosnintsikta imëpis dejashuntsu.

9. Diosnintsik änikunqanta mana shuyaraqkunaqa, ¿imanötan kawayan?

⁹ Mana wanuypa imëyaqpis kawakunapaq Diosnintsik änimanqantsikta shuyaranqantsikqa, imatapis allita decidinapaqmi yanapamantsik. Peru munanqantsikkunallaman yarpararqa, manam Diosnintsik änimanqantsiktaqa shuyaräshunnatsu. Unë Corintu markachö wakin cristiänukunata pasanqanta yarpärishun. Pëkunaqa, manam creiyarqannatsu wanushqakunata Diosnintsik kawaritsimunampaq kaqta änikunqanta (1 Cor. 15:12). Apostol Pabluqa nirqan, wanushqakuna kawariyämunampaq kaqman mana creeqkunaqa, munayanqankunallaman yarparäkur kawakuyanqantam (1 Cor. 15:32). Kanan witsampis, wakin nunakunaqa manam Diosnintsik änikunqankuna cumplinampaq kaqman creiyantsu. Tsëmi munayanqanta y gustayanqanta rurarlla kawakuyan. Peru noqantsikqa, Diosnintsik änimanqantsikkuna cumplikänampaq kaqmanmi confiakuntsik. Tsëta shuyaranqantsikqa, peqantsikta o umantsikta tsapaq cascunömi, munënintsikllata rurar Diosnintsikpita mana rakikäkurinapaq y allikunallata pensanapaq yanapamantsik (1 Cor. 15:33, 34).

10. ¿Imatan yanapamantsik wakinkunanö mana pensanapaq?

¹⁰ Wakinkunaqa pensayan allikunata ruranqantsiktaqa Diosnintsik cuentachö mana katsinqantam. Tsënö mana pensanapaqmi, Diosnintsik änikunqankunata shuyaranqantsikqa yanapamantsik. Capaz wakinkunaqa kënö pensayanman: “Noqataqa manachi Diosnintsik permitimanqatsu mana wanuypa kawakunäta”, “noqaqa manachi alli cristiänu këta puëdishaqtsu”, “noqaqa manachi Diosnintsik mandakunqankunata cumplita puëdishaqtsu”. Jobpa amïgun tukoq Elifazpis tsëtam nirqan. Kënömi nirqan: “¿Imanöraq wanoqlla nunaqa limpiu kanman[?]”. Tsëpitanam kënö nirqan: “Teyta Diosqa manam angelninkunamampis confiakuntsu. Pëpaqqa manam ciëlukunapis limpiutsu” (Job 15:14, 15). Elifazqa, ¡manam rasun kaqtatsu parlëkarqan! Tsënö pensanatam Satanasqa munan. Pëqa musyanmi tsëkunallaman pensarqa, Diosnintsik änikunqankunata manana shuyaränantsikpaq kaqta. Tsëmi, tsëkunamanqa pensanantsiktsu, tsëpa rantinqa Diosnintsik änimanqantsikkunatam yarparänantsik. Ama qonqashuntsu, Diosnintsikqa imëyaqpis mana wanuypa kawakunatam munan, y kikinmi yanapamäshun tsënö kawakuyta logranapaq (1 Tim. 2:3, 4).

11. ¿Imanirtan Diosnintsik änikunqanta pacienciawan shuyarashwan?

¹¹ Diosnintsik änikunqankunata atska tiempupa shuyarëqa manam fäciltsu. Höraqa saslla o raslla cumplimunanta munarmi, shuyarëta qelanärishwan. Peru Jehoväqa imëyaqpis kawakoqmi, pëpaqqa manam noqantsikpaqnötsu tiempu pasan (2 Pëd. 3:8, 9). Pëqa llapan änikunqankunatam cumplimunqa. Peru manachi noqantsik munanqantsik höratsu ruramunqa. ¿Imaraq yanapamäshun änikunqanta pacienciawan shuyaränapaq? (Sant. 5:7, 8).

12. ¿Imanötan Diosnintsik änikunqankunata shuyaranqantsikqa Hebrëus 11:1 y 6 textuchö markäkuypaq o yärakuypaq ninqanwan igualan?

¹² Kikin Diosnintsikmi nimantsik llapan änikunqankunata cumplimunampaq. Tsëqa, ¿imaraq yanapamäshun imëpis shuyarëkänapaq? Diosnintsikta llapan shonquntsikwan sirwinqantsikmi. Diosnintsik änikunqanta shuyarëtaqa, markäkïtawan o yärakuytawanmi Bibliaqa igualatsin. Diosnintsikman markäkoqqa, “pë rasumpa kawanqanta y shonqupita asheqninkunata bendicinqantam creinan” (leyi Hebrëus 11:1, 6). Diosnintsikpa mas amïgun karqa, llapan änikunqanta cumplimunampaq kaqmanmi mas confiakushun.  Peru ¿imatan yanapamäshun Diosnintsikpa mas amïgun kanapaq y änikunqanta imëpis shuyarëkänapaq?

13. ¿Imatataq rurashwan Diosnintsikpa amïgun kanapaq?

¹³ Diosnintsikman mañakushun y Bibliata leyishun. Diosnintsikta rikëta mana puëdirpis, amïgun këtaqa puëdintsikmi. Tsëmi wiyëkämanqantsikta musyar parlapantsik (Jer. 29:11, 12). Y Diosnintsik parlapämanqantsiktaqa, Palabranta leyir y leyinqantsikman pensarmi wiyantsik. Bibliata leyirmi musyantsik unë sirweqninkunata imanö cuidanqanta. Tsëmi yanapamantsik, änikunqankunata masraq shuyaränapaq. “Puntallapitana qellqashqa kaqkunaqa, noqantsik yachakunapaqmi qellqashqa kayarqan, tsënöpa alli tsarakur y Teyta Diospa Palabran shoqamashqa, shamoq tiempuchö Diospita chaskinapaq kaqta shuyarar këkänapaq” (Rom. 15:4).

14. Änikunqanta Jehovä cumplinqanman pensanqantsikqa, ¿imanötan yanapamantsik?

¹⁴ Änikunqankunata cumplinqanman pensashun. Yarpärishun Abrahantawan Särata äninqanta cumplinqanman. Pëkunaqa edäna karmi, wamrayoq këta puëdiyarqannatsu, peru Diosnintsikmi änirqan juk wamrankuna kanampaq (Gen. 18:10). Peru ¿Abrahanqa creirqanku? Awmi, “markäkurmi o yärakurmi mëtsika nunakunapa awilun këta shuyararqan” (Rom. 4:18). Tsënö edäyoq nunakunaqa, mananam shuyaräyannatsu wamrayoq këtaqa. Peru Abrahanqa confiakurqanmi äninqanta Diosnintsik cumplinampaq kaqman. Y Diosnintsikqa cumplirqanmi (Rom. 4:19-21). Bibliachö tsënö willakuykunata leyinqantsikmi yanapamantsik noqantsikpaq mana creipaqnö kaptimpis, änikunqankunata Diosnintsik cumplimunampaq kaqman confiakunapaq.

15. ¿Imanirtan pensanantsik noqantsikpaq Diosnintsik ruramunqankunaman?

¹⁵ Noqantsikpaq ruramunqankunaman pensashun. Y noqantsiktaqa, ¿Diosnintsik yanapamarquntsiknaku Palabranchö änikunqannö? Jesusmi änikurqan kawanantsikpaq  necesitanqantsikkunata Diosnintsik bendicimänapaq kaqta (Mat. 6:32, 33). Tsënöllam nirqan mañakushqaqa santu espïritunwan yanapamänapaq kaqtapis (Lüc. 11:13). Y Jehoväqa cumplishqam. Maskunata cumplimunqantapis yarpantsikchi: perdonamanqantsikta, llakikunqantsik höra shoqamanqantsikta y Palabranta yachatsimanqantsikta (Mat. 6:14; 24:45; 2 Cor. 1:3). Noqantsikpaq Diosnintsik ruramunqankunaman pensanqantsikmi yanapamäshun änikunqanta cumplimunampaq kaqman confiakunapaq y shuyaränapaq.

16. ¿Imanirtan Diosnintsik änikunqankunata shuyarëqa shumaq qarë?

¹⁶ Mana wanuypa imëyaqpis kawakunapaq Diosnintsik änimanqantsikqa, shumaq qarëmi. Tsënö kawakunantsik tiempu chäramunantaqa alläpam shuyarëkantsik, y Diosnintsikqa cumplimunqam. Änikunqankunata shuyaranqantsikqa, barcuta tsaraq anclanömi. Tsëmi yanapamantsik mana allikunapa pasanqantsik höra y nunakuna chikimashqa alli tsarakunapaq, y wanuytapis mana mantsanapaq. Tsënöllam shuyaranqantsikqa peqantsikta o umantsikta tsapaq cascu cuenta. Tsëmi yanapamantsik Jehoväta cäsukur alli kaqllata ruranapaq, mana allikunaman mana pensanapaq y mana ruranapaq. Änikunqankunata Bibliachö leyirmi musyantsik Diosnintsik kuyamanqantsikta, y tsëmi yanapamantsik pëta kuyanapaq. Awmi, Diosnintsik änikunqankunata shuyarëkanqantsikqa alläpam yanapamantsik.

17. ¿Imanirtan Diosnintsik änikunqankunata shuyarëqa kushikuypaq?

¹⁷ Römachö cristiänukunatam apostol Pablu nirqan: “Shuyarëkäyanqëkiman yarpar kushikuyë” (Rom. 12:12). Pabluqa, Diosnintsikta mana dejëpa sirwirqa ciëluchö imëyaqpis kawakunampaq kaqta yarparmi imëpis kushishqa karqan. Noqantsikpis segürum këkantsik änikunqankunata Diosnintsik cumplimunampaq kaqta, tsëmi kushishqa këta puëdintsik. Salmus qellqaq ninqannöpis, “Jehovä yanapananta shuyaraq nunaqa kushishqam kanqa”. “Pëqa parlanqanta cumpleq Diosmi” (Sal. 146:5, 6).