1. ¿Imanötan panintsikkunaqa yanapakuyan? Y ¿imakunamantan yarpachakuyan? (Qaranchö fötukunatawan rikäri).

PANIKUNA Jehoväpa markanchö yanapakuyanqampitaqa alläpam agradecikuntsik. Pëkunaqa reunionkunamanmi ëwayan, yachatsikoqmi yarquyan y wawqi panikunatam yanapayan. Wakinqa Diospita yachakunapaq wayi altsëchömi yanapakuyan. Peru hörataqa yarpachakuyan edäyashqana teytankunata cuidarnin, familiankuna michäkuyaptin y wakinnam japallankunalla wamrankunata watarnin alliraq trabajayan.

2. Panintsikkunata yanapanapaqqa, ¿imanirtan kallpachakunantsik?

² Ollqukunaqa më tsë nacionchömi, warmikunata respetayantsu y mana allipam tratayan. Tsëmi Bibliachöqa warmikunata yanapanapaq nimantsik. Tsëtaqa rikantsik Röma nacionchö cristiänukuna pani Fëbita shumaq chaskir y imëkanöpa yanapayänampaq apostol Pablu ninqanchömi (Rom. 16:1, 2). Fariseu kanqan witsanmi Pablu y yanaqinkunaqa warmikunata mana allipa tratayaq. Peru Jesuspa qateqnin tikrarirqa, Jesusnömi warmikunata kuyëpa y respëtuwan tratarqan (1 Cor. 11:1).

3. ¿Imanötan Jesusqa warmikunata tratarqan?

³ Jesusqa respëtuwanmi llapan warmikunata tratarqan (Juan 4:27). Pëqa manam tsë tiempu judïukunanötsu karqan. Tsëtam Bibliapaq willakoq juk libru kënö nin: “Jesusqa manam ni ima ninqanwan warmikunata penqakatsirqantsu”. Tsëpa rantinqa pëqa respetaqmi teytampa munënin ruraq warmikunataqa. Y ciëluchö pëwan mandakoqkunaqa ollqupis warmipis kayänampaqmi parlëkarqan (Mat. 12:50).

4. ¿Imakunapitatan yachakushun?

 ⁴ Jesusqa Jehoväta sirweq warmikunatam yanaparqan, rurayanqampitam kushikurqan y mana alli tratayaptimpis yanaparqanmi. Jesusnö warmikunata tratanapaq yachakurishun.

5. Wakin panikunaqa, ¿imanirtan alli amïgukunayoq këta puëdiyantsu?

⁵ Ollqu o warmi karnimpis llapantsikmi alli amïgukunayoq këtaqa wanantsik. Peru manam llapan panikunatsu amïguyoq këta puëdiyan. Tsëta rikärishun panikuna niyanqanchö. Pani Juänam * kënö nin: “Soltëra karnin y turi nanakunawan parlakuyta mana puëdirmi imapaqpis mana sirweqnö sientikü”. Pani Kristïnaqa maslla yachatsikuyta munarmi juk markaman ëwanqanta willakun: “Tsëllaraq turi nanakunata reqirmi hörataqa japallälla sientikoq kä”. Peru wakin panikunapaqqa manam fäciltsu Jehoväta mana sirweq familiankunawan y wawqi panikunawan parlakuyqa. Wakinnam qeshyapäkur o familianchö pillapis qeshyaptin mëtapis yarquyta puëdiyantsu. Pani Anïtam kënö willakun: “Mamäta cuidarmi mëtapis yarquyta puëdeqtsu kä”.

6. Lücas 10:38-42 ninqannö, ¿imanötan Jesusqa Martatawan Marïata yanaparqan?

⁶ Jehoväta sirweq warmikuna amïgan kayaptinmi Jesusqa pëkunata watukaq. Tsëpaqqa Jesuspa amïgankuna Marïawan Martaman pensarishun (leyi Lücas 10:38-42). Pëkuna mana penqakuyänampaqmi Jesusqa shumaq parlapaq y trataq. Tsënö kaptinchi Marïaqa Jesus yachatsikunqanta wiyanampaq lädunllachö jamakurqan. * Y Martaqa nanan Marïa mana yanapaptin piñashqa kanqantam Jesusta willarqan. Tsë ninqanta wiyarmi Jesusqa shumaq yachatsirqan. Y pëkunapaq y turin Läzarupaq yarpachakunqantaqa rikätsikurqan pëkunata watukarninmi (Juan 12:1-3). Tsëchi Marïawan Martaqa turinkuna Läzaru qeshyakurkuptin Jesus yanapanampaq raslla musyatsiyarqan (Juan 11:3, 5).

7. ¿Imanötan panintsikkunata yanapashwan?

⁷ Wakin panikunaqa reunionkunallachömi wawqi panikunawan juntakäyan. Tsë panintsikkunata shumaq chaskishun, parlapäshun y pëkunapaq yarpachakunqantsikta musyatsishun. Näqa parlanqantsik pani Juänam kënö nin: “Reunionkunachö parlakunqä shumaq kanqanta niyämaptin, yachatsikoq yarquyänäpaq niyämaptin y juknöpa yanapayämänampaq niyämaptinmi kushikü”. Panintsikkunapaq yarpachakunqantsikta musyatsishun. Pani Carmenmi kënö willakun: “Reunionman mana ëwaptïqa, turi nanakunam celularnïman qellqapäyäman imanö këkanqäta tapuyämänampaq. Tsëchömi rikä turi nanakuna noqapaq yarpachakuyanqanta”.

8. Jesusnö ruranqantsiktaqa, ¿imanötan rikätsikuntsik?

⁸ Jesus ruranqannö tiempuntsikta patsätsishun panintsikkunawan juntakunapaq. Itsa wayintsikman mikoq invitarir Jehoväpa sirweqnin kanqantsikpita  parlakunapaq juntakärishwan (Rom. 1:11, 12). Jesusnö rurayänampaqqa creikoqkunata rikaq wawqikunam masqa kallpachakuyänan. Jesusqa musyarqanmi wakin soltërukunapaq mana fäcil kanampaq kaqtaqa. Peru kushishqa kawakunapaqqa manam casädu o wamrayoqraqtsu kanantsik, sinöqa Jehovä Diosta kushishqa sirwinqantsikpitam (Mat. 19:12; Lüc. 11:27, 28).

9. Creikoqkunata rikaq wawqikunaqa, ¿imanötan panikunata yanapayan?

⁹ Creikoqkunata rikaq wawqikunaqa warmikunata rikäyänan mamankunatanö y paninkunatanömi (1 Tim. 5:1, 2). Tsënö kayanqantaqa rikätsikuyan reunion manaraq qallaptin o ushariptin pëkunawan parlakurmi. Pani Kristïnam willakun: “Creikoqkunata rikaq turiqa alläpa trabajanqätam cuentata qokurirqan, tsëmi shumaq tiempüta patsätsinäpaq parlapämarqan. Tsënö niramanqampitaqa alläpam kushikü”. Creikoqkunata rikaq wawqikuna panikunawan parlayaptinqa, pëkunapaq yarpachakuyanqantam sientiyanqa. * Tsënö yanapayanqantam pani Anïtaqa kënö willakun: “Creikoqkunata rikaq turikunawan parlakurqa masmi reqinakuyä. Tsëmi imapis pasamaptinqa raslla willarinäpaq yanapaman”.

10. Panintsikkuna alli kayänampaqqa, ¿imanötan yanapakushwan?

¹⁰ Llapantsiktam gustamantsik pillapis alli rurëkanqantsikpita parlapäramashqaqa. Tsënö mana rurayaptinqa llakikuntsikmi. Cuentapaq mana churayanqanta pensarmi pani Abigailqa kënö willakun: “Noqataqa pëpa wamran o pëpa panin nirllam reqiyäman. Tsëmi mana kaqtanö tratayämanqanta pensä”. Y pani Pamëlaqa juk nacionchömi Diospita yachatsikur yanapakurqan, tsëpitanam nacionninman kutirqan teytankunata cuidanampaq. Kananqa 70 watayoqna karpis llapan tiempunwanmi yachatsikun, pëmi kënö nin: “Turi nanakuna kuyayämanqanta niyämanqanmi noqataqa yanapaman”.

11. Yachatsikur purinqanchö yanaqaq warmikunataqa, ¿imanötan Jesus rikarqan?

¹¹ Jesusqa kushikurqanmi warmikuna “imëkankunawan” yanapayaptin (Lüc. 8:1-3). Y manam yanapayarqanllatsu, sinöqa yachatsikunqantapis wiyakuyarqanmi. Jesusqa pëkunatapis musyatsirqanmi wanutsiyänampaq y kawarimunampaq kaqta (Lüc. 24:5-8). Mana alli tiempukunachö apostolninkunata tsarakuyänampaq yachatsinqannöllam tsë warmikunatapis yachatsirqan (Mar. 9:30-32; 10:32-34). Tsë warmikunaqa Jesusta wanutsiyanqan junaqpis tsëchömi këkäyarqan llapan apostolninkuna ëwakushqa kayaptimpis (Mat. 26:56; Mar. 15:40, 41).

12. ¿Imata rurayänampaqtan Jesusqa warmikunata nirqan?

¹² Jesusqa wakin warmikunamanmi markäkurqan o yärakurqan. Tsëqa rikakurqan kawariramur warmikunata yuripunqanchö y kawarishqa kanqanta apostolninkuna willaq ëwayänampaq ninqanchömi (Mat. 28:5, 9, 10). Y 33 wata Pentecostes fiestachö juntarëkaq nunakunawanqa itsa warmikunapis kayarqan Jehoväpa kallpanta chaskiyänampaq. Tsënö kaptinchi tsë akrashqa warmikunapis “Diospa espantëpaq rurëninkunapita” nunakuna parlayanqanmannö yachatsikur qallëkuyarqan (Hëch. 1:14; 2:2-4, 11).

13. (1) Kanan witsan panintsikkunaqa, ¿imanötan Jehoväta sirwiyan? (2) Tsënö yanapakur këkäyanqampitaqa, ¿imanötan panintsikkunata agradecikushwan?

¹³ Jehoväta sirwiyanqanchö imëkata rurayanqampitaqa panintsikkunata agradecikushun. Pëkunaqa juntakänapaq sitiukuna rurëchö y altsëchömi yanapakuyan, wakinnam quechua parlaqkunata yachatsikur yanapakuyan y wakinqa Betelchömi yanapakuyan. Desgraciakuna pasakuptimpis yanapakuyanmi, librukunatawan revistakunata quechuaman tumatsirmi yanapakuyan, llapan tiempunkunawanmi yachatsikuyan y juk nacionkunachöpis yachatsikuyanmi. Y wawqikunanöllam pëkunapis llapan tiempunkunawan yachatsikoqkunapaq escuëlaman, ishkë killa duraq escuëlaman y Galaadmampis ëwëta puëdiyan. Casäda panintsikkunapis Jehoväpa markanta y qowankunatam cargunkunachö alli rurayänampaq yanapayan. Kë panikuna qowankunata mana yanapayaptinqa manachi wawqi panikunapaqqa qarë cuentanatsu kayanman (Efes. 4:8). Jehoväta sirwirnin panintsikkuna tsënö rurëkäyaptinqa, ¿manatsuraq puëdinqantsikmannö yanaparishwan?

14. Salmus 68:11 ninqannö, ¿imatatan creikoqkunata rikaq wawqikunaqa rurayan?

¹⁴ Creikoqkunata rikaq wawqikunaqa, “atskaq warmikuna” Jehoväpita  yachatsikuyanqantaqa allim musyayan (leyi Salmus 68:11 *). Tsëmi creikoqkunata rikaq wawqikunaqa, panikuna yachayanqanta alli utilizäyan. Näqa parlanqantsik pani Abigailtaqa yanapan, imanö yachatsikur qallanqanta wawqikuna tapupäyanqanmi. Kënömi willakun: “Këmi rikätsiman yanapakur ruranqäkunawan Jehovä Dios kushikunqanta”. Creikoqkunata rikaq wawqikunaqa unëna Jehoväta sirweq panikunapa yachënintam alli utilizäyan mas shipash panikunata yanapayänampaq (Tïtu 2:3-5). Tsëmi panintsikkunataqa kuyëllapa agradecikunqantsikta rikätsinantsik.

15. ¿Imakuna pasakuptintan panikunaqa yanaparinata wanayan?

¹⁵ Panintsikkunata yanapanapaqqa itsa hörataqa pëkunapaq parlakurinata wanayanqa (Is. 1:17). Japallankunalla kawakoq panikunaqa itsa qowankuna unë rurayanqanta pillapis yanaparinanta wanayanqa. Juk edäna paniqa doctorkunawan parlar yanapayänanta itsa wananqa. Y llapan tiempunwan Diospita yachatsikoq paniqa itsa Jehoväpa kaqchö juknöpa yanapakur seguïdu yachatsikoq yarquyta puëdintsu, tsëna pëpaq mana allita parlayaptin yanaparinata wananqa. ¿Imanöraq panintsikkunata yanaparishwan? Jesuspita maslla yachakurishun.

16. Marcus 14:3-9 ninqannö, ¿imanötan Jesus Marïata yanaparqan?

¹⁶ Jesusqa warmikunapaq mana allita parlayaptinmi, pëkunapaq allita parlar yanaparqan. Tsëtam Jesusqa rikätsikurqan Marïata nanan Marta piñapaptin yanapanqanchö (Lüc. 10:38-42). Y juk kutinam mana alli rurëkanqanta niyaptin yapë Marïata yanaparqan (leyi Marcus 14:3-9). Jesusqa imanir ruranqanta musyarmi yanaparqan. Kënö nirmi kushitsirqan: “Pëqa alläpa allitam noqapaq rurashqa. [...] Pëqa llapan puëdinqantam rurashqa”. Tsëpita tiempuwan pasanampaq kaqtapis willakurqanmi: “Më tsëchöpis nunakuna kayanqanchö alli willakïkunata willakuyanqanchöqa, kë warmi yarpashqa kanampaqmi ruranqanta willakuyanqa”. Y noqantsikpis tsë willakuypitam yachakur këkantsik. Marïaqa kushikurqanchi Jesus tsënö pëpaq parlaptin. Awmi, më tsë nacionchö yachatsikunapaq kaqtam rikätsikun Marïapaq willakunqanqa.

17. ¿Imanöraq panintsikkunata yanaparishwan? Willakaramuy.

¹⁷ Panintsikkuna mana allipa pasayaptin yanapashun. Pensarishun mana Testïgu qowayoq juk panintsik reunionkunaman imëpis tardi chaptin, wamrankunata mana apaptin y reunionkunapita raslla ëwakuptin mana allipa rikäyanqanman. Tsëna qowanta mana mantsanampaq niyanman. Peru rasumpa kaqchöqa panintsikqa manam reunionkunachö imë hörayaq kanampaq y wamrankuna pushëtaqa puëdintsu. Awmi, qowan mana Testïgu kaptinmi alliraq kallpachakunan. Tsënö panintsikkunata pasaptinqa, ¿imanöraq yanapashun? Tsënöpa pasaq panikunataqa shumaqllam parlapärinantsik y wakinkunatam alli rurëkäyanqampita parlapärinantsik.

18. ¿Imanö mastan panintsikkunataqa yanapashwan?

¹⁸ Juknöpaqa panintsikkunata yanapantsik ima rurëninkunachöpis yanaparninmi  (1 Juan 3:18). Pani Anïtaqa qeshyapäkoq mamanta cuidanqampitam kënö willakun: “Hörataqa amïgükunam shayämoq yanapayämänampaq o imatapis mikunapaqmi apayämoq. Tsënö turi nanakuna kayanqanchömi Jehovä kuyamanqanta rikä”. Y pani Juänatanam cärrunta imanö altsatsinampaq juk wawqi yanaparqan. Tsëtam kënö willakun: “Kushikümi turi nanakuna alli kanata munayanqampitaqa”.

19. Creikoqkunata rikaq wawqikunaqa, ¿imanö mastan panikunata yanapayanman?

¹⁹ Creikoqkunata rikaq wawqikunaqa panintsikkunata yanapayänampaqmi listu këkäyänan. Tsënöqa rurayan Jehoväta kushitsiyänampaqmi (Sant. 1:27). Tsëmi Jesusnö kayänampaq kallpachakuyan y manam imatapis pëkuna munayanqannö rurakänantaqa shuyaräyantsu (Mat. 15:22-28). Panikunaqa kushikuyanmi imallachöpis yanapariyaptinqa. Pani Carmen juk wayita täraq ëwakunqanta musyarirshi creikoqkunata rikaq wawqikunapita juk kaqqa wawqi panikuna raslla yanapayänampaq patsätsinaq. Tsëtam kënö willakun: “Creikoqkunata rikaq turikuna shumaq parlapärayämaptinqa shonqüpis ankashyärirqanmi. Tsënö yanapayämanqanchömi Jehovä kuyamanqanta y japallä mana këkanqäta rikarqä”.

20, 21. Panintsikkunata kuyanqantsiktaqa, ¿imanötan rikätsikushwan?

²⁰ Jehoväpa sirweqninkunachöqa mëtsika panikuna yanapakoqtam rikantsik, tsëmi pëkunataqa yanapanantsik. Jesuspitaqa yachakurquntsik panintsikkunata maslla reqirnin yanapanapaqmi. Y Teyta Diosta llapan puëdiyanqanmannö sirwir yanapakuyanqampitam agradecikunantsik. Panintsikkunapaq mana allita parlayaptinqa pëkunapaq allita parlarmi yanaparinantsik.

²¹ Römachö wawqi paninkunaman cartakunqanchömi apostol Pabluqa 9 panikunapa jutinkunata qellqarqan (Rom. 16:1, 3, 6, 12, 13, 15). Tsëchö panikunaqa alläpachi kushikuyarqan pëkunapaq Pablu yarpachakunqanta musyarir. Noqantsikpis panintsikkunata yanapanapaq kallpachakunqantsikta rikarqa, pëkunaqa familiantanö y kuyanqantsiktam rikäyanqa.